ما لم يكُن بالقلب عليم

البارت 44

البارت 44

حزت بخاطري تجاهلهُ الجبير الي ..صدفة ذاك اليوم سمعت صوته ويه خالته يضحك ووياهم شهد
كعدت ابجي مثل الاطفال على وضعي ..شكد جنت اتمنى لو جاي وماسح دموعي مثل ما جان يسوي !
ظايت أكل بنفسي بين اني غلطانة وبين اني مغلطانة
مر اسبوعين على هاي الحالة الى ان أجا اليوم التعيس،يلي جان بداية لخراب حياتي بالكامل ..
كعدت الصبح ابد ما جان عندي نفس بالاكل
وفوكتها عطلة يعني ما اكدر اروح للجامعة شوية اشوف ناس اغير جو
كالتلي قبس تعاي اطلعي ويانا بس رفضت مالي خلك ابد ولا قدرة ..مرت الصبحية كلها واجا الظهر
طبخت كلت بلكت يجي !
سويت الاكلة يحبها مقلوبة عرفت يحبها من بيبي ذاك اليوم جانت تحجي وتكول يحبها حيل ما ادري
شخطرلي وسويتها جنت احاول اجذب على نفسي انه ممكن يرجع يكعد ويستقر عندي مو عند شهد !
اي مع نفسي جنت اغار منها او ما ادري شسمي هذا الشعور اغار او بالاحرى اضوج من اسمع صوت ضحكهم بليل واني كاعدة النهار كله لوحدي محد يكَلبني !
عموماً سويت وكملت صارت ساعة 2 وما اجا واني ممتريكة حتى ما اشتهيت وانتظرته للغدااء وهم ما اجا،اخذت غفوة بدون ما اوعى وفزيت على صوت الباب كمت بكل قوة من مكاني لان هو اجا..واخيراً !
طب للحمام بدون ما يحجي حرف اني كبل رحت جهزت وكملت وخليت كل شي على الميز انتظرته وما اكلت سمعت صوت جكجكة مال غراض بالغرفة عرفت طلع من الحمام فرحت كلت هسة يجي
ورا كم دقيقة طلع ومر من يمي ونزل جوا وتركني !
تركني بلا ما يباوع حتى على كل تعبي !
اعصابي انتهت بذيج اللحظة تمنيت لو بس بيدي اطلع واروح لمكان محد يعرفه ابد
ظل الوضع نفس ما هو وتوجهت لمخدتي ردت دموعي تنزل ما كدرت ما ادري ليش !
ظلت حسرة الموضوع تدك بداخلي بدون ما ابجي وازيح هذا الهم ..
اي لهنا وانتهى عندي كل شي وفقدت ..كل الي سويته نمت وياريتني ما نمت ..

سيف: بعد الي كالتله وحجته تركتها وتجاهلتها وقطعت اي شي ممكن يربطني بيها حتى الشغلات البسيطة سحبتها منها يا اما اني اسويها او شهد تسويها
جنت اتعمد ما اشوفها ..من اشوفها اضعف
واذا ضعفت كل شي دا اسويه راح يخرب
هي غلطت هواي ومجان بيدي اسامحها او اتغاضى
وين اكو رجال مرته تكله لو متزوجة غيرك اشرفلي؟
هي متعرف جملتها شنو معناها ولا تعرف شكد هاي الكلمة مهمة للرجل..
صح جنت تاركها بالنهار بس باليل اتسلل لغرفتها حتى اشوفها حتى لو من بعيد ما يهمني..المهم اطمئن هي زينة ما اتذكر مرّ يوم ما شفتها وطمئنت روحي بيها
اليوم من رجعت شميت ريحة كلش زين اعرفها
هشي ريحة الاكلة الي احبها للحظة اجيت اضعف واروحلها وانسى كل شي بس توقفت
ورجعت لاسلوبي وتجاهلي الكاااامل الها
صارت الساعة 9 بليل تقريبا او 8:50 صعدت عليها كلت اتحجج بحجة اخذ ملابسي او نسيت شغلة
جنت اتحجج باي شي حتى اتأكد كل يوم منها
اليوم صعدت الباب ما مسدود بس دفعته اجا بيدي وضوا الغرفة طافي وظلام داااااامس وماكو ولا صوت
علكت الضو شفتها نايمة تفاجئت هي ما تنام ابد بهذا الوكت وجبانة ما تنام بهيج ظلام قوي
سحبت ايدها ما شفت منها ردة فعل..لزمتني خوفة قوية سحبتها باتجاهي شفتها فاقدة !
ما ادري شلون اوصف شعوري ما ادري شحسيت بوقتها بس جان شي كلش مرعب حسيت نفسي قاتل واني قتلتها ! ما ادري شجنت اخربط وافكر جبت مي وطشيت عليها ما ردتلي ولا تحركت ابد
تذكرت مرة من جانت بييت عمي صار بيها هيج هم
واتذكر رشوا هواي مي مو قطرات
اني هم رشيت عليها وراسها بحُضني شفت منها شوية ردة فعل بس عيونها مداتفتحهن
صرت ادفع بخصل شعرها عن ملامحها اريد اشوفها واضح بس ..بس بدت توعى سحبتها قوي لاحضاني
حالي حال اي رجال شرقي او عراقي بالاحرى ما يعرف يعبر عن مشاعره ولا موهوب بالاعترافات بس يمكن جان تصرفي اكبر دليل ..مستحيل اوصف شنو حسيت من شفت احساس الفُقدان
وجهها اصفر ومخطوف دا تباوعلي بتفاجأ وبتعب
سيف:شصارلج؟
نور: ما ادري يمكن هبوط قوي
سيف: تغديتي؟
نور: لا
سيف:تريكتي؟
نزلت راسها ما حجت عرفت ما متريكة والبارحة هم شفتها ما تغدت ولا تعشت شداتسوي هاي!!!
انهديت بيها رزايل على تصرفاتها وتفكيرها حرت وحيرتني وياها
سيف:شنو هالتصرفات السخيفة هذذي !!!!
اني شكم مرة كايلج انت عندج فقر دم وعندج هبوط يصير مايصير تتركين اي وجبة ليش تعاندين !!!
يعني اذا تركتي الاكل راح ارجع؟ خلي يكون بعلمج مستحيل ارجعلج اني مرتاح ويه شهد ومو بحاجتج
نور: طلكني !
سيف:تحلمين..تظلين هيج معلكة وطلاك ما اطلك وبطلي تصرفات رعنة الكل يدري بيج تفتهمين وواعية براسي تنكلبين مراهقة وتتركين الاكل ..
جانت منزلة راسها واحس كلامي يدك براسنا دكة دكة تقربت من يمها وهزيت اكتافها بعصبية واردفت بكلامي وكلتلها،انتبهي على روحج وكومي يلا كدامي اكلي اني ما مجبور اتحمل مسؤؤلية موتج
رفعت عيونها بصدمة من اخر كلمة،يمكن جنت قاسي وياها شوية شفت هواي حجي مجمع بعيونها..هواي
نور:ليش مهتم؟
سيف:باجر عكبه يصيرلج شي توكع براسي مسؤؤلية ما انقذتج وتركتج تموتين واني ممستعد اتحمل هذي المسؤؤلية من وراج
سكتت ما ردتلي بحرف بس جبتلها مي شربته ورحت للمطبخ شكو شي كدامي خليته بالصحن حتى لو صارلة قرن بالثلاجة ..
دفعت ايدها بقوة وكعدت بصفها جنت عاكد حواجبي وملامح الغضب والعصبية مبينة علية لدرجة هي الحجايّة خافت تحجي وياي
كمت اسويلها لُكَم وتاكلهم لان ادري اذا تركتها مستحيل تروح تاكل بارداتها لازم غصب
طول فترة الاكل عيونها نازلين وشاردة ابد ما تحط عيونها بعيوني يمكن تتذكر شحجيت قبل شوية اجيت اكوللها اني اسف !
بس سكتت حتى تبطل هذا العناد تعرف عدها هبوط ليش سوت هيج ؟!
خلصت تركتها وطلعت راساً قبل ما احط رجلي برا الباب كالت جُملة شلعت كَلبي بيها ..
نور: اذا لهدرجة موتي يريحك ويزيح هم عن كَلبك
فإن شاء الله اخر الآيام تكون هَذي ..
ما التفتت عليها بس سمعتها تغطي روحها واندارت للجهة الثانية تنام
نزلت جوا وكلامها يدك براسي،اذا صارلها شي وين اروح اني ؟