ما لم يكُن بالقلب عليم

البارت 35

البا

يمكن صارت الساعة 12؟ ما ادري حتى موبايلي طفى وماكو ساعة ولا اكو ضوا حتى اعرف شكد بالضبط
من تعبي وعيوني الي هلكت هاي يومين غفييت وياريتني ما غفيت فزيت على صوت قوي حييل بالغرقة خلاني ارجف،وايديه ترتعش
باوعت وانصدمت !!
جان سيف كمت من الفراش رأسًا
نور: ليش جاي ؟
سيف: احجي عدل !! هذا بيتي وهذي غرفتي وانتِ مرتي !!
هذا الاكل
نور: بس اني ما راح اكل !!
سيف: بكيفج ..
كالها ببرود ووصل يم الباب صيحت من مكاني
نور: يعني انت ناوي تخليني بهذا القرررف !!!
سيف: وهواي عليج !
باوعتله والدموع بعيني بس سيطرت عليها
ما لازم اضعف كدامه ابد
سيف: الطابق معزول ومحد يكدر يوصلج،والباب ينفتح من يمج بس او بمفتاح من برا والمفتاح عندي اني ..
نور: اني مو حيوان !! شتتوقع ؟ حنهزم مثلا ؟
سيف: تسويها ..
تركني وطلع،حرك اعصابي من جديد،خليت الاكل على صفحة وحاولت ارجع انام بس كوابيس الاختفاء رجعتلي !!!! مدا اكدر انام والعرك صار ينزل من كل جسدي مع انه الجو بارد بس من الخوف والتوتر
بقيت احاول انام وكلما اغفى فجاة اصررخ احس اكو شي حيربطني،اكو شي دا يعذبنييي مدا اكدر انام يا نااسس !!!
ذاك اليوم مستحييل انساه ابشع يوم بحياتي،جان يوم مرعب بحذافيره،بذاك اليوم تذكرت كل ذكرياتي وتذكرت اهلي وتذكرت طفولتي
وتذكرت كل شي اتمنى الوكت واكف عنده،اجا الصبح واني ممأكلة ولا نايمة وحالتي حااالة فزيت على فتحة الباب قوي ومنو يكون يعني غيره؟
زمخ بيا بعدجج نايمة ! حيجون يركبون الغُرفة كومي روحي بالغرفة الثانية وماري راح تجي تنظف الغرفة
ظليت ممركزة وياه كلامه وتعبانة فززني على صياحه عليه بحدة كالي
سيف: ما سمعتي؟
نور: كايمة
سيف: استعجلي !
شلت جنطتي ورحت لغير غرفة واخذت الفراش المخربط الي جنت نايمة عليه وبالفعل سمعت صوت هوسة بالغرفة
ورا ثلاثة ساعات رجعت للغرفة هو كالي،جانت مرتبة والسرير نفرين استغربت ! بس الغرفة نظيفة جانت ماري يم الباب
ماري: محتاجة شي ؟
نور: لا ممنونة مقصرتي
دا اباوع لتفاصيل الغرفة جانت كاملة من كل شي وبسيطة حيل حلوة فزيت على صوته سد الباب انقبض قلبي باوعتله بتوتر وكتله
نور: ليش السرير نفرين ؟
سيف: ليش احنا مو زوجين ؟
نور: زواج؟ انت تعرف هذا زواج جذب ومبني على جذبة ! انت حتى مكتلي انت متزوج !!
صار قريب مني ارتبكت جان دا يباوع ببرود كعادته
سيف: متزوج وهذا الموجود وخلي يكون بعلمج،هي الي احبها هي اول حب واول زوجة وانتِ مجرد هنا حالج حال ماري !!
نور: لعد مالك شي يمي ! باوعت بعيونه وكتله
سيف: اني الي نفسي كازة منج ..
كال كلامه ودفعني على الخفيف وطلع وركع الباب قوي !
رجعت خطواتين للسرير وكعدت،لشكم مرة يتحمل كَلبي؟ اني انخدعت بيه وانخدعت بجذبه وانخدعت حتى بالزواج منه،هو منتهي تماماً بكلبي والكره الي بداخلي تجاه جبير بس تحز بالخاطر ! منو تتحمل
هيج كلمة تسمعها !! يا مرّة تتحمل كازة منج نفسي !!
يا عمق الوصف وعمق الوجع !
بقيت محبوسة بالغرفة واني لحد هسة حتى مرته ما شفتها،من الشباك سمعت صوت السيارة رحت بسرعة
جان هو دا يركب ويطلع فرحت يعني اكدر اطلع هسة
بس راح كمزت على الباب فتحته وترددت افتح الفاصل بيني وبين الطابق الارضي بس فتحته كل درجة اخطيها التوتر يسطر علية اكثر
نزلت الدرج اني ونازلة طخت ايدي بمزهرية جانت على صفحة خليت ايدي على حلكي من الصدمة فجأة سمعت صوت بنية شابة التفتت خلفي جانت البنية عمرها تقريباً 25 طويلة،ملامحها عادية بس حلوة
جان مبين عليها العصبية اجتي وكفت كبالي وكالت بصوت عالي
شهد:انتِ مرته ؟؟
نور: اي
شهد: يا هلا ! فايته بيتي وتبوكيني !!
باوعتلها بتفاجُأ
نور: عفواً ؟ اتأدبي بالكلام !! اني مجاية ابوكج !
شهد: فايتة ببيتي وبالسر شيعنيي !!!
نور:انت فاهمة خطأ،اني اجيت هنا بس حتى ..
شهد: وتعيطين بوجهي هم !! الظاهر تحتاجين تربية
مدت ايدي تلزم شالي بس دفعت ايدها بقوة صدفة طخت بالحايط،التفتت جان جاي سيف بس احنا ممنتبهين هي راسًا كامت تبجي وراسها على صدره باوعلي بحقد ونظرة حادة
نور: بس اني !
سيف: فوك ..
نور: خليني اشرحلك اني جنت ..
سيف: كلتتت فوووك !!!
رج البيت بصرخه تراجعت بهدوء بس الخوف مسيطر علّية طبيت لغرفتي ورا ربع ساعة سمعت حركته
سيف: اني شوكت أخلص منج !!! لج انت انتقااام ؟؟ انتِ عذاب ؟ شوكت اخلص منج ومن مشاكلج !!
نور: بس انت فاهمني خطأ !!
سيف: اشش ما اريد اسمع صوتج،ليش تفاضلتي ونزلتي جوووا !! اني ما حذرتج تنزلين جوا ليش كسرتي كلامي!!
سيف: حذرتج لو لا !!!
عاط بوجهي ورج ايدي حيل،باوعتله بخوف
وكتله ..اي كتلي
سيف: لعد ليش نزلتي !
نور: بس اني مجنت دا اسرقها،اني بس نزلت لان اختنكت منا هاي يومين
سيف: لا وجذابة هم ! شنو الي يثبت ؟ الي تخطط كل هالخطط مو صعبة عليها تنزل لمستوى وتبوك !!
تجمعت الدموع بعيوني ومن صدك متحملت الاهانة،هواي زودها بحقي وهواي سكتت اني
باوعتله وكتله اني كل شي اتحمل الا تتهمني بشرفي وباخلاقي،اني متربية على العز والدلال متربية على حضن دافي وحب نقي،متربية على عز وشرف
متربية على عين مليانة ما اسمحلك تتجاوز اكثر من هيج ! لا تظن سكوتي ضعف بس صدكني راح يجي يوم على كل حرف تتندم..بس وكتها الوكت فات ..
جان دا يباوعلي بهدوء وتركيز عاااالي فجأة
ضحك باستهزاء بصوت عالي متعمد باوعلي وكال
سيف: صدك !! الي اريده احجيه واسويه لا انتِ ولا غيرج مايمنعوني !!
نور: مستعدة اتخلص من حياتي وما اشوفك بيها
سيف: وشتسويين بالله ؟
نور: اكتلك..او اكتل روحي واخلص من شرك
تقرب خطوة ودفعني على السرير بس متاذيت كال
بأحلامج،تجين تعتذرين هسة من شهد!
دفعت ايده بانتفاض وغضبب
نور: كل عقلك تحجي !! اني بريئة ومسويت شي ليش اعتذر !!
سيف: تجين والا غير تصرف راح تشوفين ..اوعدج
جرني من ايدي قووي ونزلنا جوا بس صاح شهد
راساً اجتي جانت متمكيجة على اخر حبة ولبسها ضيق نوعاً ما انقرفت من وضعها ومن دنائته هو ..
سيف: اعتذري !
سكتت حجيت شي،عزت علية نفسي اوصل لهاي المرحلة،دغني من ايدي،باوعتله بنظرة جانت كفيلة تدمره راسًا غير نظره عني وباوع لغير اتجاه وكال اعتذري !
باوعتله وكلتلها،اعتذر ..مجان قصدي
سحبت ايدي منه وصعدت وصلت الباب لحكني تقربت اني منه والدموع بعيوني كلتله بنبرة قوة
"ولا تُلبسوا الحق بالباطل وتكتموا الحق وأنتم تعلمون"
بقى ساكت وبباوعلي بنظرة باردة ومُتفاجأ،مشيت وعفته
بس رجعت لغرفتي بجيت ..بجيت هواي وطلعت كل القهر الي حابسته،الموضوع مو موضوع اعتذار ولا الكلمة حتأثر عليه ..بس الموضوع موضوع كرامة
بالوكت الي جان المفروض يوكف وياي وكف ضدي وهو يدري كلش زين اني ما ادور مشاكل ولا حتى افكر بيها !
بعد شوية هدأت تذكرت جبت شاحنتني خليت الموبايل عليها بدا يشحن،جان الكنتور فارغ كلت اكوم ارتب الهدوم بيه بين ما موبايلي يشحن،خليت كل الهدوم ورتبتها وطلعت عطر واحد بس جبته وياي رشيت الغرفة صارت مريحة اكثر،رجعت لموبايلي شفت مكالمات هووواي من قبس ومن ريام
عززا !! اكيد عرفوا بموضوعي ! ترددت ادك على ريام بس دكيت احسن بس فتحته انهدت بيه تحجي
ريام:لج لهدرجة وصلللت بييج ؟؟ترحين تعقدين وحتى مكلتي ولا حجيتي !!
نور: ريام الله يخليج انطيني صبر،احجي !
ريام: اشش ما خليتي بيخا حجي،لج فجأة نسمع رايحة عاقدة وطالعة من البيت !! مكلفتي نفسج تكولين الي اذا مو لغيث ؟
نور: بسسس اني تعباااانة كافي كلكم علية كاافي !!
سديت المكالمة منها ولطيت الموبايل بالارض فقدت اعصااابي،كل شي اجتمع علية وحاوطني،تدمرت نفسياً