ما لم يكُن بالقلب عليم

البارت 29

وصلتني رسالة من قبس فتحتها جانت صورة نور قريبة بشكل منها،بالصورة جانت مبتسمة والفرحة تشع من عيونها،خزنت الصورة بالميموري وطلعت خارج الحفلة مركز بالصورة وبتقاسيم وجهها وبكُل أنش بيها،فجأة سمعت صوت يكول
سيف،تعال نور تسممت ..
التفتت بخوف جان صوت رحمة طالعة خارج قاعة النسوان وصاحتني،اجتي تركض بإتجاهي ودموعها بعيونها
رحمة: سيف تعال الله يخليك نورر..
سيف: شبيييها ؟؟
رحمة: مسحت دموعها وكالت نور وكعت بيناتنا تعااال
ما انتظرتها تكمل حجيها رحت مستعجل لقاعة النسوان فتحت الباب جانوا ملتميين حولها النسوان وراسها بحضن بيبي وعمة لازمة موبايلها وتخابر على هءا هذا بس شافتني اجتي باتجاهي وكالت
سيف الله جابك،تعاال ساعدها،مشيت برُعب والنسوان بعدن من شافني حطيت راسها بحضنُي وحاولت اصحيها بس ماكو،هزيتها وصيحتها وهم ماكو ماكووو واحد بيهن يكلي شصار بيها بالضبببط ؟؟ اثناء مدا احجي لمحت قطرات دم على ملابسها من منطقة الخصر والايديين بقيت مصدووم شجاي يصيرر !!!! شلتها وبيبي ركضت وياي وصلت للمستشفى بألف يا الله اول مطبيت مجان اكو دكتور لزمت الممرض من ياخته وحاجيته بعصبيية
والتموا يخالصونا بالكوة تفاككنا واجا الدكتور بدون نقاش دخلوها للغُرفة واني لايب برا وبيبي تبجي غيث اجا هم بعد ما عمة خابرته
عمه الي بقت يم قبس ..قبس الي خرب زواجها واحلى يوم بحياتها ! شفتها جانت تبجي من فتت للقاعة بس ما همني ما كدرت احاجيها واني روحي طالعة من الي ما مكتوب لا اني ولا هي نعيش براحة
ضربت ايدي على المسطبة بانفعال ليشش !!!!!
ليش بس هي براسها توكع كل فترة تتأذى وكل أذى اكبر من الثانيي !!!!! اجا غيث كعد بصفي
غيث: سيف بس اهدأ خل نلكي حل
سيف: لك اني طكييت،متخيل شدايصير بيا يوم بعد يوم من ما الكى الي سوا بيها هيج
غيث: بس ماراح تكسب شي صدكني اذا فقدت اعصابك
سيف: غيييث،لك كل يوم دا تموت كدامي واحنا واكفين بمكاننا ولا دا نكشف الي سوا هيج
جرني من كتفي وكال واحنا شدرانا منوو هو !!!!!
فقدت اعصابي تماماً وصيحت عليه وكتله لككك هي اختتتك !!!
تغيرت ملامحه ولزم ياخة قميصي بقوة وكال
احترم نفسك !! لحد الان اني ما تخاربت وياك ولا اعترضتلك بس تجيب سيرة اختييي بهيج شغلة قذرة لا لهنا وكاافي،لكن انت شدا تحجي بكييفك !!! لك هاي شغلة حياة وموت مستحييل اختي تسويها مستحييل
دفعته عني وكتله ان صدكت او لا برااحتك،وشتكدر سوي
اجتي بيبي تفاككنا واحنا هم كل واحد راح بجهة،عزت عليّة نفسي شلون يتجرأ يصيح بهالطريقة بوجهي ؟ احنا وصغار وكبرنا وتربينا سوا ولا يوم فرقته عن اخوي،يجي هسة ويتصرف هيج !!
بس حقه من بتوقع توصل اخته لهل دنائة !! ..
انتفضت من افكاري على طلعة الدكتور والممرضات
رحنا علينا كُلنا وسألناه،لا تخافون الوضع طبيعي صار هي أكلت شي بيه مادة متحملتها الأمعاء وهي اصلاً مريضة من البداية ووضعها مو كلش تمام مستقر فلذلك بين عليها بشكل قوي،بس التزموا بالاكل الي تقدموه الها وحاولوا اشياء خفيفة دائما منا لشهر والعلاج ما تقطعه ابداً والا راح تسؤء حالتها،تكدرون تشوفوها هسة،رجعت لوعيها
تشكرته للدكتور وطبينا علينا،غيث تحمدلها وبيبي كعدت يمها ولازمة ايدها وتحاجيها
هي جانت تعبانة بس احسن من مرضها الاول جانت دا تباوع بعيون نعسانة،لحد الان اني محجيت اي شي
هي الي باوعتلي بهدوء وبملامح كأنهُ دا تكلي مابيا شي اني !،اراهنج لو تدرين الي بيا مجان اكتفيتي بسكوتج هذا تجاهي،حجيتها وظلت بنفسي،جنت فاقد القدرة اكولها كدام الكل ..والأهم كدامها هي ..
انتفضت من محور افكاري على صوت عمي الي جاي من باب الغرفة
محمد: بنتيي،شلونج!!
نور: اني زينة خالو لا تخافون
محمد: شلون صار وضعج،هسة حاسة بشيي ؟؟
لزمت ايده لعمي وكالتله لا تخاف بنتك قوية وابتسمتله
محمد: غيث،بسرعة شوف المستشفى شتريد حتى نكدر نطلع منا واني اجيبلها ممرضات للبيت
نور: خالو،اني زينة !! احتاجكم بس يمي
محمد: ما يصير انت حيل مريضة وكل يوم يصيرلج شي لازم اكو ممرضة يمج تنتبه الج وتراعي صحتج
سيف: باوعت بعيونها تجاهي وكالت،ممقصرين خالو ما ادري شلون أجازيكُم،عرفت دا توجه الكلام الي ابتسمتلها على الخفيف
بعد نص ساعة غيث اجا وكال يلا نكدر هسة نطلع
بيبي هلكت وهي اصلاً متكدر توكف هواية مفاصلها توجعها فكعدت برا وغيث بعده ما يباوع ولا يحجي وياي وحقه ينصدم ..
خالو اجته مكالمة وطلع يخابر بقيت بس اني بالغُرفة وهي جانت واكفة على حيلها بس بعدها تعبانة دا اطلع وسمعت صوت التفتت جانت موكعة الجنطة مال هدوم الي جابتها بيبي بالارض وحجابها مخربط ومدا تكدر تضبطه وملامحها معكرة ومنزعجة من الوضع وممنتبها لوجودي،مشيت بإتجاهها التفتتلي
نور: أنت !
هزيت براسي بمعنى اي،دنكرت عدلت الجنطة ووكفت على حيلي وتقربت منها أكثر،رفعت ايديا وضبطت الدنبوس بشالها،نفسه الي جان مضوجها لان دا يفلت منها ومالها قوة تتعب بيه أكثر،كملته ونزلت ايديه،باوعتلي ببراءة،جانت قريبة مني بشكل
بس ما حجيت شي واحرجتها اكتفيت وكلتلها يلا
عموماً رجعنا على البيت ورحمة جانت هناك ساعدتها كعدت على الطخم هلكان من التعب والف فكرة براسي
زواج احمد وقبس تخربط،بس لو اعررف منو اله ايد !!!! معقولة تكون فعلا ميساء ؟
شفت رحمة مارّة صيحتها
سيف: رحمة ..
رحمة: كول سيف
سيف: رحمة شلون صار هيج بيهاا ؟؟ هي صارلها اسبوعين تقريبا ووضعها عادي مابيه شي ولا العلاج بيه اثار حانبية ظهرت عليها لعد شلون صار هيج اليوم،احجيلي بالتفصيل
رحمة: باوع سيف هي جانت كاعدة يمنا الى نص الحقلة بس جانت تروح لقبس شوية وترجع ومجان بيها ايي شي بس بعد فترة الاكل بيبي صاحتني تحسب نور يمنا،دورت عليها ملكيتها عبالي يم قبس وهم ماكو،سناء كالت اني ادور عليها وانتِ روحي اغسلي طرف ملابسج توسخ
رحت للمغاسل وانصدمت جانت نور هناك بس وضعها مو طبيعيي ابدد،درتها وجان منظرها فظيييع،جانت دا تتقيئ العفو دم،وجسمها نار من الحرارة صار،حاجيتها مكدرت تردلي جانت بالكوة دا تشوفني غسلتلها وسندتها بس وصلت لبداية القاعة فقدت الوعي من تمام هالمرة وبعدها اجن النسوان شافنها وصار الي صار وطلعت صيحتك
سيف:دا اسمعها واحلل حرف حرف،والشك اكل بكَلبي اكل،تشكرتها
سيف: زين قبس شصار بيها ؟؟
رحمة: هو الزواج اصلا جان حينتهي مابقاله شي ومن انت شلتها لنور وطلعتوا وبيبي وياكم كامت تبجي وما تقبل تكمل العرس،تريد تروح على نور بالمستشفى،بس بالكووة قنعوها امي وام العريس وانتظرنا احمد خلص الحفلة مالته واجا اخذها،وهم بجت وبالكوة سكتناها ووصتني اكلك تراسلها او تراسل احمد وتكللهم على وضع نور
سيف: لا حول ولا قوة الا بالله،اعتذر قاطعتج عن اشغالج
رحمة: ادلل،بس حروح انطي العلاج لنور
سمعت بيها علاج فز كَلبي لات اعرف نور نحسة بسالفة العلاج واحتمال تذبه هم وما تاخذه قبل ماتروح رحمة كلتلها جييبه اني انطيها هو
وبالفعل صعدت على غُرفتها جانت كاعدة مو نايمة شافتني طبيت مكالت شي انطيتها المي والعلاج بالايد الثانية بدون ما احجي حرف،بس هي ملامحها انكلبت وجنها تريد تبجي !!
سيف: اخذييه !!
نور: ما اخذ
سيف: لاصدك تحجيين !! لعد شلون يتحسن وضعج؟
نور: ما ارريد لا تحاول ما اخذذه.
سيف: لا راح تاخذيه وانت الممنونة هم يلاا لا تعبيني
نور: ليش محد منكم يفهم،اني اتقررف من سالفة العلاج اموت وما اخذذه !!! ما اتحمله !!!
سيف: دا احسج كدامي طفلة واقنعهاا !! شبيج بابا ؟ باعي شطولج وشعرضج تخافين من حبة ؟؟
نور: بكيفك احجيي ما راح اشربه ودارت وجهها تنفست بعمق وزفرت يمكن خافت ! ههه لان رجعت باوعتلي بس بغير ملامح
نور: عفية اتركني،ما اخذه
نور: من كل عقلي راافضة تماماً اخذ العلاج،من جنت صغيرة اموت منه وما اقبل اخذه،بس سيف قبل فترة ضغط عليه ويحبرني اخذه بس هالمرة لو اموت من صدك ما اخذه ولا اخليه يجبرني،بس شو هذا كعد على صفحة على سريري بمسافة قليلة وكال
ليش متحبيه ؟
باوعتله بتردد وكتله هيج ما احبه ودرت وجهي
سمعته كال امم ! باطراف اصابيعه لزم ايدي بخفة،غمضت عيوني وسمعته كال،عندي حل ..
كتله شنو ؟
ميل نفسه تجاهي وفتح ايدي وخلا العلاج والايد الثانية المي،بعده قريب مني
بصوت اقرب للهمس كال،باعيلي،واشربي العلاج ..
بدون وعي مني باوعتله بكل تركيز،وعيونه الي فصلت كل أنش بملامحي،شربت العلاج وصدك انا الممنونة،عيونه تيهتني،نظرته صعقت روحي،وجوده يخربط أفكاري. ويشلش كَلبي
لمس وجهي بايده بهدوء وكال نامي وغطاني
دا يطلع ولزمت ايده التفتلي متفاجأ كتله قبس !
كال اطمئني،زفوها،وهي زينة دزيت لاحمد رسالة طمنته ..تركت ايده راسًا حسيت على نفسي
وصل يم الباب وكال تخافين ؟
باوعتله شلون قرأ افكاري؟ اني من يوم الي رجعت من خطفي وتقريبا كل الايام كوابيس وخوف،نادر ما نمت مطمئنة حالي حال البشر
كتله لا ما اخاف
جان واكف يم الباب سمعته كال،اذا منمتي فتحي موبايلج ..
كال هيج وطلع من الغُرفة،ما ادري ليش كال هيج ! ما فهمت بالبداية،رجعت راسي ليورا والافكار اكلتني اكللل،شكد جنت اني معمية ومدا اشوف سيف الحقيقي؟ من اول ما اجيت وهو جان مزعوج مني ودائماً ينفجر بيا،بس من رجعت كل شي تغير،كمت احس بالحنان الموجود داخله..هو حنون بشكل،بس شخصيته صعبة حييل ما يظهر اي شي يحس بيه،يمكن اني وياه عدنا هالطبع !! بالاخير احنا تربينا سوا وعلى نفس الايد ..
سمعت دكة موبايلي فتحته جانت رسالة منه مكتوب نايمة ؟؟
لا منايمة
شبيج،ليش ضايجة؟
بس اني محجيت ترا !
بلا متحجين اعرف ..
لو بيا جان حجيت
انتِ ليش عنيدة؟ ليش متحجين الي تحسين بيه ؟ شو من اجيتي وانتِ من وكعة لوكعة وكلما اسألج تكولين مبيا شي !!
وانت ليش شايل هم؟ لو بيا جان حجيت،رايحة انام ..
روحي نايم واني لايب هنا ..
شقصدك؟
تبقين طول عمرج متفهميني ولا راح تتغيرين
شلون افهمك وانت تحجي بالالغاز؟
نور اني تعبان بسببج،انتِ الي قالقة كل شي بيا ..
جنت دا أقرأ حرف حرف من رسائله وبعد مد وجزر كتبلي هالرسالة شهكت من قريتها،شقصده !! بس ! تذكرت رسالة الحفلة وكل تصرُفاته وو ..وهواية أمور ما ادري اني دا اخربط لو هي صدك !!! دزيتله ؟؟
طول بالكتابة وبعدين كال اقصد من يوم اختفائج وكلنا خايفين عليج ومدانعرف منو الي وراها واليوم هذا وضعج وهم متعمد،شلون تردينا ما نقلق !!!!
تعوذت من الشيطان وبعدت الافكار عن راسي
سيف ابد ما ممكن يسوي هيج او يفكر او يمكن اصلاً دا ايسوي هيج بدافع اخوي ! ما ادري راسي راح يطك من التفكير ختمتها وياه وكتله تصبح على خير ..
الصبح كعدت على صوت موبايلي ريام داكة علية او ما فتحته استلمتني
ريام: لج انت شوكت تحسسسين ؟؟؟ اني صايرة اشكال والوان هنا وانت ولا حاسة !!! كلبي واجعني عليج من كالي غيث وما بيدي شي احجيليي
نور: اهدأي ريلم،اني زينة والوضع هم زين،ومكدرت اخابرج لان تعبانة بشكل متتصوريه،ومحسيت على نفسي من غطيت بالنوم
ريام: كااافي يا روحي كافي تحجين لا تتعبين اكثر
ادري الي صار مو قليل وعاذرتج بس من خوفي انفجرت بيج
نور: عادي،واني مقدرة مشاعرج
ريام: لج ردت اجي بس ابوي ما قبل وما اكدر اكله ليش اجيج حتى!!! صايرة نار بغرفتي وابن خالج الافندي ولا يرد على مكالماتي من الصبح !
نور: على كيفج ريام،وغيث ترا هم عنده شغل مو بس يكعد يخابر !
ريام: اي واني اعرف ومقدرة بس هو البارحة جان فتير واعصابه نار،وكتله على موعد العرس انفجر بوجهي بس ما طول راسًا سده بوجهي للمكالمة
وشلت همج وهمه هو همات،كَلبي واجعني نور هم حيصير شي ويخرب العرس
نور: اشش كافي تشائُم،تمني الخير وتوقعي حصوله اكيد راح يحصل فعلاً،وغيث تردين بيه شوية انفعالي واكيد صاير شي حتى طلع قهره بيج،بس ميخالف شي اعتيادي ويصير بين كل اثنين
ريام: متدرين شكد ريحتي كَلبي ! بالمناسبة غيث دا يدك هسة بايي
يالخايينة بعتيني علمود غيث افندي !!
بيبي صاحتني من جوا على الريوك،نزلت على كيفي وعمة مموجودة لا هي ولا سيف بس اني وخالو وبيبي
بيبي سوت كل الاكل الي احبه على الريوك،كعدت بينها وبين خالو محسسيني جني بنتهم وخالو كل شوية يوكلني ويضحك،بنص اكلي شفت ميساء اجتي للبيت وكلمت بيبي تهلّي بيها،وهي بوستها وسلمت على عمها هم،كعدت مقابيلي،باوعتلي وكالت
الحمدلله على السلامة نور
الله يسلمج ..كلتها ورجعت اكل،بنص الاكل سمعتها كالت اكولج بيا مرحلة صرتي؟
السنة حتخلص،بقت بس الامتحانات وانجح للثانية
شوكت امتحاناتج
بعد اسبوع
لعد شدي حيلج،وبلكت ايدج تفيدج منا لاسبوع ..كالتها بنبرة بسمار واعرف شقصدها،ما ردت الوث نفسي بيها واجاوب نماذج مثلها،تجاهلتها بس سمعت صوت اعرفه هوايي من يم باب الهول
كال حتلو ما فادتها اني موجود ..
التفنا كلنا جان سيف،شو راجع من وكت !! مصارله ساعتين من راح ! اجا بإتجاهنا وجان دا يباوع لميساء بنظرة فسرتها نظرة انتصار ! اجا وكعد مقابيلي ومقابيل بيبي هم،سكتت اني وهي هم سكتت محجت شي
محمد: ها سيف شو راجع ؟
سيف: لا عمو ماكو شي بس رجعت لان نسيت شكم حساب لازم يكتمل ..
جنت داباوعله من دا يحجي،وموجه نظره لميساء شو هي فجاة فزت من مكانها جنها اترعبت ! طبطبت بيبي على ظهرها،مد كلاص المي الها سيف بنظرة حادة ! اني مداافهم شدايصير بهذا البيت !!
كمنا خلصنا ريوك ولميت الي اكدر عليه بس بيبي خطية هي اكثر لانه اني تعبانة بعدني ممستقر وضعي حيل،كعدت على الطخم حرتاح وسيف راح لغرفته يكمل اموره يعني كل واحد تفرق بيناا،لزمت موبايلي اتصفح فجأة فزيت على صوت عمة اجتييي جانت جايبة السوك وجاية كابلها خالو بالباب
محمد: هاا اشتريتي السووك ؟؟
عمة: ليش ضامم القلوس لمرتك الثانية؟؟
محمد:استغفررر الله،فوتي فوتي ما منج جارة
سمعتهم دا يحجون وضحكت،عمة من يحاسبها خالي على سالفة السوك راسًا تكلب الموضوع لصالحها وتجيب سيرة المرة الثانية حتى بسرعة يسكت لان اذا جادلها راح تجادله هم ويدوخ راسه هو،فمن يسمع راح تفتخ الموضوع راساً يقبل بأي شي احسن من دوخة الراس(خطة تكتيكية)
فرشت الاغراض وطلعو بيبي وميساء تكابلوا وياها ويكلبون بالغراض اني كاعدة على الطخم مالي خلك انبش،نزل سيف مستعجل كالعادة دا يخابر وكال عمة سويلي الكهوة الي سويتيها ذاك اليوم اذا تكدرين،عجبتني ..
عمة: سيف الي سوتها جانت نور مو اني
باوع لعمة وسكت رجع وجه عيونه تجاهي،اني مباوعتله،لان اعرف دا يباوعلي
فزيت على صوت بيبي كالت كومي نور سويله اذا بيج حيل
اي بيبي هسة
كمت على حيلي ومريت من يمه كال اوكفي،ميحتاج
عرفته دا ايحجي هيج لا يكون تعبانة اني او مريضة التفتت عليه كتله عادي،هسة اكمله هز راسه بمعنى اي
ميساء لمحتها صافنة علينا اثناء مدايحجي وياي
باوعت عليها راسًا دارت نظرها للأغراض،راح هو للاستقبال واني سويتها وكملتها بس بقى اصبها سمعت خالي صيحني رحت عليه بسرعة جان رايد ادكله رقم ابو اسماعيل صديقهُ،وبيبي بس خليتلاها شكم غرض فوك الكنتور تموت على هاي المُكان ههه
الهول جان فارغ صفوه عمة وميساء همزيين
رحت صبيت الكهوة وهالمرة دكيت الباب اهم شي حتى ما اجفت مثل ذاك اليوم
مديت ايدي وانطيتياه باوعلي كال أهم شي الواحد يثق بالباب
ضحكت بيني وبين نفسي اعرف دا يبسمرني على الفوته مالتي من جان صديقه موجود
استجمعت قوتي وكتله ..والأهم يثق بالناس الموجودين خلفه،شفت شبح ابتسامة على ملامحه تركته ومشيت،كعدت بالاستقبال لوحدي ودا افكر بالامتحانات وشراح يخلصهة والمحاضرات المتراكمة ..
صعدت فوك اتصلت بصديقاتي ودزولي الملخصات والمحاضرات المهمة بس شكرتهم دا انزل من الدرج وسمعت صوت من غرفة سيف،تقربت ما ادري ليش الفضول زاد !
سمعت كال ميساء للمرة الاخيرة انتبهي على نفسج !! والا متدرين شحسوي !!!
ميساء: بس اني ..
سيف: ما اريد اسمع حرف !! الي عندي كلته ! عندي شغل هسة ..(بمعنى اطلعي) الظاهر اني جيت على نهاية الحديث ولهذا سمعت بس هالسطرين
راسًا اني ابتعدت من يم الباب ورجعت لغرفتي بسرعة فائقة لمحت ميساء طلعت وطلع هو وراها هم ركب سياراه وراح !!
ليش كاللها هيج ؟ ليش هي شسوت !! هو ما يحجي بهالطريقة الا من اكو سبب حتمي !! زين ليش ما كال لعمي عطالله عليها او لغيث،ليش هو بهدلها !!! التفكير أكل رأسي أكل شلت غريضاتي ونزلت جوا جانوا دا يسوون اكل ساعدتهم بيبي كالت روحي جيبي الفنجان مالته من الاستقبال خاف يجي احد هسة !
استغربت منو حيجي؟ شو بيبي صايرة غريبة هالايام ؟
رحت للاستقبال جانت ريحته بعدها عاطة بالغُرفة شلته للفنجان ورحت اغسله بس قبل ما اغسله ما ادري شلون اجاني فضولي اعرف طعمها للقهوة شربتها وياريتني مشربتها ملحكت على نفسي العفو ألكى مغاسل استفرغ بيها جانت عبارة عن ملللح
معقولة اني أخطأ !!!!! مستحيل اكون حاطة بدال السُكر ملح !! رحت شربت شوية من الباقي بالفنجان ونفس طعم الي بالدلة عززززا !!!!!!!
لعد شلون قدمتها اله انييي !!! بس اني متأكدة حطيت سكر مو مللح !!! شكد عيب غميت نفسي بالسنة حسنة يطلب شي ويوم الي طلبت رحت سويتها تشبه كل شي الا الكهوة !!! بس هو ما كال ولا حجا مجرد تركها وطلع،يوم بعد يوم اكتشف خُصلة جديدة منه،يمكن لو اي شخص ثاني جان سواها مشكلة جبيرة بس هو لا !
خلص ذاك النهار،وغيث ماكو لا عدنا ولا ببيت اهله ميساء كالت،وقبس خابرتها وصرخت عليّة وشلون ما خابىتها بليلة زواجها من صحيت قبس وسوالفها بعد
ريام بس غيث خابرها وطمئنها الزواج ما حيتأخر اكثر من شهر ونص بالزايد واني كاعدة بنص ذني المخطوبات والمتزوجات وافك مشاكلهم هههه
سيف: رجعت هلكان من التعب،بس قبل ما انام لازم اريحح دماغي راح اطك من هذا الموضوع،اني ساكت ومتحمل بالكوة ما اريد اضغط زايد،بس الى متى؟ اني انام واصبح بنفس التفكير واريد بس شي يبرد كَلبي وروحي ويريح ضميري،خفت اكول لبيبي رحت على عمة جانت كاعدة بعدها صحتها واجتي للحديقة وياي
عمة: ها سيف؟
سيف: عمة تعالي اكعدي عندي موضوع وياج
عمة: يلا احجي؟ شبيك ؟ شو ضايج وتعبان باع على ملامحك شكد مهلك نفسك انت !!
سيف: عمة الموضوع بس بيني وبينج وياريت متكولين لاحد..حتى لبيبي
عمة: خوفتني ترا،احجي؟
سيف: الموضوع انهُ .....
بنهاية كلامي شفت ملامح الصدمة عليها بس كعدت بصفها وكلتلها عمة اني تعبااان،تعبان من هالموضوع ومن غيره ساعديني وريحلي ضميري وكَلبي
عمة: بس سيف..ما ادري تعال ابني فتحت ايديها وخليت راسي بحضنها،لهذا البيت كلهم احسهم قطعة مني وربوني وكبروني،عمة وبيبي امي الي ...امي الي مشت وتركتني
سديت نذا الباب ما اريد ينفتح كل شي قديم بس ارتاحيت من مسدت شعري،وحسيت بس هي راح تكدر تفيدني بهذا الموضوع ختمت كعدتي وياها
عمة اني راح انام،تصبحين على خير
وانت من اهله سيوف،لا تخاف كل شي على وضعه صدكني،وراح اساعدك واريحك هم بس كون متأكد الي كتلك هو قبل شوية هو الصح
الله كريم عمة ..
صعدت لغرفتي وبقيت اتكلب مدا أكدر انام ابد سمعت دكة الباب جانت ساعة 1 تقريباً بليل منو يعني؟ قبس المختلة عقليًا وراحت ! ههه
فتحت الباب وتفاجئت جانت نور واكفة يم كبال الباب وبيدها الفنجان
سيف: فوتي ..
شو تغيرت ملامحها راسًا جنها خافت ؟ كالت لا لا ما اريد بس اجيت اكول ..
تفوتين لو لا ؟
غمضت عيونها بعدم رضا وفاتت ورجعت كعدت اني على سريري كلتلها ايي ؟؟ وهي واكفة كبالي
ما حجت شي بس مدتلي ايدها بيها فنجان الكهوة
سيف: شربت الصبح،متشوفيني مو نايم ؟
نور: احد كالك متعرف تجذب ؟ شفته للفنجان كل شي جان يشبه الا الكهوة
نور: كلتله هيج وابتسم كالي عادي مو بهالسؤء
نور: حار ترا ! ايدي احتركت ! ما حتاخذه ؟
اخذه من ايدي وكال شُكرًا بعيون فرحانة
نور: العفو،بس سؤال
سمعت كال بهمس بدت تحقق ..ورجع يكمل الفنجان
ليش مكتلي عليه ؟
جنتي تعبانة،وادري بيج متكدرين توكفين كبال النار بهالوضع فغلست، بالمُناسبة مُرّة ترا !
جاوبته بانفعال مستحييل ! هالمرة وكفت على راسها وبحذر خليت كل مادة انطينياها انطاني الفنجان شربت منه شوي غريب شدايحجي ؟
ترا حلوة ! ذوقها زين
رجع شرب منها وباوعلي بملامح باردة كال ايي هسة صارت حلوة ..
اشتد تركيزي على جُمتله وعرفت شدايقصد وليش اصلا كال هيج،انرسمت ابتسامة على ملامحي بينما هو دا يباوعلي بس مسيطر على ملامحه عدا ابتسامته الطفيفة درت راسي ووصلت يم الباب وكتله تصبح على خير
وأنتِ من أهلي ..
سمعته كال هيج لو متوهمة !! طلعت وسديت الباب بس طلعت لزمت نفسي دا تنفس بشكل متسارع،دا أحس بشعور غريب ..كَلبي دا ينبض بشكل رهيب !!

بارت طويل حيل الكم .شنو أرائكُم بالبارت وبالشخصيات ؟ وشتتوقعون الجاي؟
واعذروني على التأخير البارت جان امس المفروض ينزل بس صديقتي توفت والدتها ورحت الها ادعولها بالرحمة واحبكم على صبركُم الي ومحتاجة تصويت وتعليق 🖤

______
اختكُم ريام الزُبيدي