ما لم يكُن بالقلب عليم

البارت 13

البارت 13

سيف:انت طول عمرج تفهميني خطأ،اني بحياتي مشكيت بيج ولا حشك،انت تربيتي كدامنا،تربيتي وياي،عشتي نص طفولتج ببيتنا وانت تلعبين لعبة الاختفاء ويه اسمهان،عشتي نص طفولتج واني ادور وراكم وانت تبجين إذا لكيتج ! عشتي نص طفولتج واني وياج نتناكَر،وازعل اذا امي فضتلج عليّة ! عشتي نص حياتج تبجين من صوت الرعد وصوت المطر بغزارة..تبجين وامسح دموعج !
انت عشتي ويانه وومنا وبينا،شلون متخيلة اشك بيج ولو لوهلة ! مجان شك ابداً جان خوف ..خفت عليج !
محجت شي ابد..جانت بس ساكتة وتباوع وحسيت راح تبجي بس مبجت،قاطع الموقف بيبي صيحت عليها،اني هم انسحبت من يمها ورحت لغرفتي ..
ثاني يوم من الصبح تواصلت ويه وسام وحنروح على مكان شغله لعامر "المشتكي على حسن"
وسام: لازم نلكى وثيقة او ورقة هو كاتبها بخط ايده حتى نطابق خطه مع خط التهديد ويجهز اول دليل بالفعل رحنا علل مكان شغله ومحد يقبل يحجي شي كلهم كالوا صار اله شهر تقريبا ممداوم وهو اساسا عامل بسيط،رجعنا وانا روحي طفرانة ما ندري شنسوي وكت ما بقى ..
وسام: دقيقة دقيقة لكيتها !!! اول مرحنا جان اكو مقابل بيتهم محل ! المحل لمحت عليه كاميرات المراقبة زين اذا حسن صحيح التهمة عليه معناها المفروض يبين بالكاميرا !
درنا السيارة ورحنا للمنطقة والمحل جان مغلق على حظنا، كعدنا ننتظره يفتح بعد شوية اجا فتحه سلمنا عليه،
وسام: حجي اذا ممكن بس نشوف الكاميرات
الحجي: ليش ؟ منو انتوا ؟
سيف:احنا جايين بشغلة،ومحتاجين مساعدتك
طلعنا الشاشة الي تعرض صور الكاميرا رجعنا الاحداث الى ورا ثلاثة ايام مجان اكو شي ! ولا حسن اجاهم البيت ولا اي شخص ثاني اجا !!
ويام: سيف رجع الاحداث ويومين زيادة
رجعنا الاحداث قربنا الشاشة ..تفاجأنا !
سيف: وسام هذا مو حسن ؟
اي هو بس شدايصير ؟؟ مدا افهم شي،حسن ما كال هو راح على عامر !
سيف: ممنونين حجي ..طلعنا برا ركبنا بالسيارة جانت الدنيا لهييب من الحرارة
سيف: وسام القضية دا تتعقد اكثر ..شراح يصير
وسام: شوف اول جلسة احنا خاسريها خاسريها لان مدانلكى اي دليل ولو واحد بس ! وهو الحكم مارح يتنفذ نهائيا من اول جلسة
سيف: وسام بس حسن راح تزيد عليه،والجلسة الثانية ممعلوم شوكت يحددوها
وسام: يعني شنسوي !ما بيدنا شي ،لازم اول جلسة تروح حتى مجال يصيرلنا اكثر،وحسن لازم يحجي بالتفصيل اني متأكد اكو شي بالسالفة مضموم،حسن شجابه على عامر،وهو كال عامر هو الي اجا عليه !
سيف: اني رايح للشركة صار ثلاثة ايام تاركها،رايح ساعتين ثلاثة بس لازم اببن نفسي للموظفين،وانت روح للسجن قابل حسن بلكي تعرف تفاصيل ونتخابر عود من تطلع
سيف: مقل ما اتفقنا راح كل واحد لشغله رحت للشركة الحمدلله الامور تمام ماشية تفقدت الموظفين وشغلهم ،بقيت هناك ساعتين وبعدين طلعت ..

ريام: زهراء كملناها واليوم ليلة الخطوبة مالتها لبست فستان احمر غامق الى تحت الركبة ورداناته طويلات وفصاله بسيط حيل حبيته واني هم كملت وبدت الحفلة عمتي رحاب وباقي عماتي ونسوات اعمامي هم موجودين واجوي اهل الولد كملنا الامور المتعارف عليها بالخطوبات وطلع الولد على حفلته برا مسويها ويه اولاد اعمامي واولاد اخوالي واخواني لان هو الولد اساسا مو غريب هو كرايبنا فعادي وجودهُم،عمومًا البنات بدوا بالحفلة والرقص وهالامور اني حييل انشغلت بالاغراض ويم اختي كاعدة تحتاج مساعدة بالفستان او المكياج،صار وكت الاكل جبناه للاكل ووزعنا كعدت على حافة الدرج هلكانة من التعب حتى رقص مرقصت مجان الي واهس،سمعت صوت صادق اخوية يصيحني
صادق:ريام جيبي سويجي ووجبة اكل جاهزة لاثنين بسرعة ولبسي عباية لا تطلعين هيج
رحت سويت الي كال عليه ولفيت شال زين على شعري وعباية الي يشوفني ميكول بحفلة هي بس المكياج شوية يدل مع انه جان بسيط،عموما طلعت ناوشته لاخوية جان واكف بصفه ولد،صدفة رفعت راسي جان غيث !! غيث شيسوي هنا ؟ شجابه ؟ وشلون اسأله لصادق !