ما لم يكُن بالقلب عليم

البارت 28

البارت 28

مشيت خطواتي بإتجاه الباب وكتله
نور: شُكرًا ..
التفتلي بحركة سريعة
سيف: على شنو ؟
نور: على كُل شي ...حجيتها واني واكفة يم الباب ومبتسمة،التفتت اله شفت شبح أبتسامة على ملامحة تركته وطلعت بسرعة ..
دا انزل من الدرج وجمدت بمكاااني،حسيت الدنيا وكفت بيا،وكل شي دا تجاوزه رجعلي،حسيت بشعور مُرعب،تصلبت بمكاني ! ...
صارت بوجهي ميساء وجهي جانت ملامحها باردة ومشت بهدوء ووكفت مقابيلي،ما ادري ليش حسيت كَلبي واجعني واني مجنت اخاف منها،شنو الي تغير ؟
عندي ردة فعل اخاف اباوع بوجهها وهي اتقربت عليّة وهمست شلونج عيني ؟ باوعت عليها بتردد واكتفيت كلتلها زينة ..
ابتسمت بس ابتسامة زرعت الخوف بكَلبي أكثر،حسيت ابتسامة شر وحقد وأنانية،بسرعة مشيت اريد انزل واعوفها
مرن يومين وباجر زواجها لقبس وكلنا متحضرين،اجن مسرة ومدائن هم وجهالهن والبيت صار هوسة بحيث ماكو نوم أصلاً
سيف شفته يدردم ويه قبس ويكوللها يعني لا من انتِ عزبة نرتاح ولا من حتتزوجين نرتاح ؟ وهي تضحك وتداهره،علاقتهم حيييل مميزة وجنهم روسية دوم واحد يداهر الثاني،نزلت ويا مدائن اشتريلي شي للحفلة مردت اروح بس بيبي جبرتني واني هم كلت شوية اغير من الشي الي جنت بيه،دورت وملكيت شي حلو ابد،مدائن هلكت من التعب
مدائن:ادري انتِ شون عايشة؟؟ شو كل شي تشوفيه ميعجبج
نور: هن مو حلوين والله
مدائن: شحنسوي ؟ السوك خلص وفريناه مرتين
نور: اييي شوفي خل نرجع
مدائن: شنو !!! كل عقلج ارجع ؟ لج باجر الزواج وانت ما لكيتي شي شنو قابل حتعتزلين ومتروحين ؟ غير قبس تكفشج
نور: بس انطيني مجال اكمل،تذكرت عندي فستان من زمان عمة اشترته الي بس مَ لبسته ولا مرة
مدائن: كومي كومي امري لله،شغلتج تعبانة انت وما راح يعجبج شي
ابتسمت الها ورجعنا للبيت،ريام رجعت علاقتي بيها قوية وفرحت من عرفت قبلت ترجع لغيث وزواجهم هم عن قريب،غيث ميقبل يأجل بعد أكثر،ليلة العرس اليوم وقبس مكدرت اروح عليها تعانة حيل ومريضة شوية فخابرتني بليل جانت متوترة وخايفة
كلتلي،صار شكد اعرفه لاحمد بس من صارت حقيقة كمت اخاف ومتوترة
قبس شبيج ؟ لا توسوسين مجرد شعور عادي وكل بنت تمر بيه بليلة زواجها اكيد تخاف من المستقبل ومن الحياة الجاية
لج شلون مدااكدر انام،واحمد احس هسة خجلانة منه وهجم الموبايل هو بالرسايل ومدا ادرله
قبس تخجل !!!غريب!!
صوجي خابرتج،يلا روحي خل يوكعون بغرامج الناس احسن
قبس شتقصدين ؟؟
اكولج باجر من الصبح يمي انتِ غير ؟؟ رحمة صغير تدرين بيها اريد انت وياي هم
اي اي اطمىني باجر من الثمانية على راسج بس ادعي الكى واحد يوصلني
اني اكول لسيف لان غيث بيت اهله هسة
غمضي عيونج وادعي بكلبج ترتاحين وحياة مستقرة الج ولزوجج،وروحي نامي اريد باجر تطلعين أميرة ..
ختمتها وياها وراحت،اليوم نايمة براحة شوية بعد كل ذيج الفترة المظلمة بحياتي،فزيت الصبح على قبس هاجمة الموبايل خمسة وعشرين مكالمة واني المفجوعة نمت بلا ما احس على نفسي جانت ساعة 9 الصبح فزيت وبدلت شكو كدامي واخذت فستاني واموري الي احتاجها من حروح على الحفلة بسرعة كملت ونزلت اركض انطخيت ببيبي
شبييج نور اهدي
اسفة اسفة بيبي،تأخرت على قبس هسة تزفني
هااا واني اكول شعنده سيف كاعد من وكتت !!
بيبي وييينه ؟؟
باعي على نفسج دا تنهجين،اهديي وسيف بالاستقبال ينتظرج
يلا بايي وبلغي البنات يجني هناك لان ما راح ارجع على البيت من ببت قبس انطلق للقاعة
طبيت مثل الهجووم على باب الاستقبال وجمدت بمكاني جان سيف وويه وااااحد !!!
ما ادري شلون شالتني رجلية وسديت الباب بكل قوتي عززززا،شسوييييت اني !!!!!
حطيت ايدي على وجهي،شنو هالموقف التعيسس!!!
كعدت بالهول وايدي على راسي ووجهي مكلوب هسة يجي سيف ويزفني هذا الثاني شكوله !!!بس حقه اني طبيت هجوم على الاستقبال ورا ربع ساعة طلع و وجهه مكلوب وملامح الجديات عليه اجا يمي وخزرني وكال شنو هذا الي سويتيه !!!
نزلت عيني مكدرت اباوعله،وترددت احجي
احجيي شسويتي ؟؟ شلون تطبين هيج ؟
تدرين شنو الموقف الي خليتيني بييه !! بااوعلي واحجيي !! حجاها وهو كاز على اسنانه ومبين حينفجر بس لازم اعصابه كوة
باوعتله بهدوء وكتله والله ما ادري، وبيبي هي كلتلي روحي عليه بالاستقبال ينتظرج،وجنت مستعجلة حيل،ما عبالي اكو احد وياك
غمض عيونه وتنفس بعمق وبعدين رجع باوعلي
يلا امششي ..
مشى كدامي واني هم وراه بهدوء متنفست
هالمرة حقه،انا الي متسرعة زايد بس منين اعرف اكو احد وياه !! قابل أقر كف ايدي،شحجيي عليجج بيببي !!
اجيت اركب وراه بس باوعلي بنظرة خفت بس ما بينتله،راسًا حولت وكعدت كدام لنص الطريق وهو ما حجا ولا حرف بس اني زاد الفضول عندي وقطعت الصمت وكتله
سؤال ..شكلت للرجال من طبيت ؟
سكت شوية ورجعلي باوعلي بهدوء وكال،كتله طفلة بت كرايبنا ..
باوعتله وانعجقت ملامحي،شون هيج يكله ؟ درت وجهي اباوع على الشباك بس حسيته دا يباوعلي وملامح إبتسامة خفيفة مرسومة على وجههُ،بقيت الطريق كله افكر شبييه،بس اني اعرفه هو مو هيج يتصرف،زين معقولة مكدر يتدارك الموقف الا بهيج جملة ؟ كوومة افكار براسي بس محجيت ابد ولا هو اكتفى بذيج جملته،وفضولي زاد اكثر وصلنا بيت باب قبس بقيت شوية منزلت باوعلي كال
متنزلين ؟؟
التفتتله وكتله،جاوبني بصراحة شكتله ؟
باوعلي وصار قريب مني وهمس، كتله مرتي ..
فتحت عيوني على وسعها،حجاها وهو مبتسم بخفة وهدوء ،وبعدت نفسي بس قبل ما احجي فتح الباب يعني انزلي بسرعة نزلت وطبيت جوا بس ظلت جملة ترن بمسامعي،شافتني قبس لو ابتليت ؟ استلمتني حاصل فاصل
بسس اسكتي قبس الوقت راح يضيع،بسرعة تعالي نجهز بعد شوية حنروح للصالون،اجني خواتها ساعدني هم وكملنا كل شي،اجا اخوها لقبس عبدالرحمن صغير مو صغير مو جبير حيل بالخامس اعدادي،وصلنا للصالون وراح
انتظرنا يجي سراها واجا،ظلن حوالي ال3 ساعات واكثر يجهزوها من كل شي اظافرها ووشعرها ومكياجها وقبس عايشة الدور ومسلطنة تحسب نفسها اميرة هههه
بعد شوية خلصت هي بس مقبلت تلبس الفستان تكول الا انت تلبسين الي محضرته للحفلة وتكعدين يكملوج البنات من المكياج والشعر اني ما احب الامور المبالغ بيها ابد وادري بالصالون يخلون مكياج ثكيل حيل ومبالغ،كعدتني غصببب عني وبظوا يحطولي وكل شوية اكوللهم امسحوا وخففوا بعد ويضطرون يقبلون ان الى وصلت نتيجة مقتنعة بيها جان المكياج خفيف بس بارز الملامح بشكل حلو ومركز على العيون،هواي عجبني ..عموما كملت اني والفستان وطبت قبس تلبس فستانها وطلعت كملت كل الي بالصالون انبهروا بيها وهي فعلا حلوة قبس بشكل
نور: بعد عمري الكبران،الرحمن يسعدج ويهينج
قبس:حياتي نوري،يوم الي اشوفج متهناية ومحققة احلامج واوكفلج بعرسج نفس وكفتج وياي،طالعة أجمل مني اليوم حتى !!
حضنتني قوي وابتعدت والدموع متجمعة بعيونها،اني هم دزيت رسالة لسيف يجي باخذنا
سيف قبل يشتعل اليوم سائق لخاطر قبس وترك كل شغلة،اني هم تلفلفت حيييل وماكو شي طالع مني حتى وجهي ما اريد يشوفه ابد،اجا سيف وساعدنها البنات وويانه رحمة هم،العريس حيجي ياخذها من بيتهم للقاعة وجتن بالعكس بس من احنا بالصالون تغيرت الخُطة وصار لازم نرجع للبيت
عموماً ركبنا كلنا واني ركبت خلف مو كدام لكيتها حجة وىحنة خليتها تركب كدام وسيف شغل أغنية وكامت تغني وياها قبس
سيف: بالله الي يشوفج يكول اليووم عرسجج ؟؟
قبس: وليش يابة؟ عرسي وودا اغني
سيف: باع السان ! الله يساعدك حبيبي احمد،بيوم عرسها وهيج رعنة
قبس: علي الصوت عليّ وظل دردم مع نفسك انتَ
اجتني الضحكة من كلتله هيج بس سكتت نفسي كوة وبقيت بس ابتسم على الموقف،قبس باسؤء المواقف تبدل الموقف لضحك،فد قابلية !!
وصلنا البيت بألف يا الله واستقبلوها عماتها وخالاتها وامها والهلاهل والهوسة بالكوة كدىت اختلي بنفسي اريد اعيد ترتيب شكلي،اكيد تخربط هسة،صعدت فوك لوحدي واجتي مسرة هم صدفة
مسرة: لك هلا بالجمال
نور: هلاو مسرة،حضنتها صار زمان مشايفتها،بس قبس نبهتني ما اكول لبشر على سالفة الحادث،بدلت وكملت ورتبت شعرها وباوعتلي بنظرة تعجب
اكول نور شبيها ايدج ؟
ترددت احجي،شون اجذب عليها؟؟ كله بسبب سيف ما ادري شنو قصده من نا يخلينا نحجي الحقيقة ونضطر نجذب على العالم والى متى ؟ ايديه اثنينهن مبين الاثر بيهم والجروح الخفيفة الي بوجهي هم مبينة يعني مابها مجال حتى نضم زايد ! ردت احجي الحقيقة بس خفت منه ومن ردة فعله فأكتفيت وكلتلها تعرضت لحادث بسيط وهي هم ما عدها وكت تفوت بالعمق وياي جانت مخبوصة ويه جهالها
طلعوا كلهم وبقيت اني،دا اكمل وطفى الضوا الغرفة اخر غرفة يعني ظلمة مبيها شمس فلازم ضوا ووكعت بحيرة وبنفس الوكت ما بقى وكت لازم انزل حتى الحك اروح وياهم للقاعة
مرت عشرة دقائق وسمعت صوت الباب ورايا،خفت
تذكرت نفس الموقف صار من جنت مخطوفة،صارت عندي خوفة قويية من الظلام والاصوات المفاجئة،بقيت بمكاني واني اكول منو ؟ اثناء كلامي رجعت الكهرباء وبقيت هم بمكاني متحركت متفاجئة جان سيف !!
نزلت عيوني منه بتوتر وخجلان ممتعودة ابد يشوفني بهالشكل،صحيح البسك تراكات بالبيت بس موديلها زين ومحترم،والفستان الي لابسته جان طويل الى الرُكبة بس ايديناته قصار وشعري مفتوح ودائما البس شال كدامه،جان دا يتقدم بإتجاهي واني واكفة متصلبة ما تجرأءت حتى اشوف ملامحه،بقت خطوات قليلة تفصلنا توترت أكثر،من لما جنت طفلة والكى حلول لمشاكلي وتعودت دائما اطلع من الموضوع بأقل الخسائر بس بوجوده هو دائماً أطلع بخسائر وغالبًا تكون هالخسائر هي أني،شكد احاول ابتعد وأبعده من حياتي بس يصير العكس تماماً ويزيد القُرب وتزيد المواقف بيني وبينه،شكد اكول حقاومه وما اخلي اي شي يتطور بس من يتقرب لهدرجة أعلن خسارتي وأخضع لتوتري وخوفي،صار بيناتنا بعد شعره ! لف إيده القوية حولي وأنسحبت بهدوء تجاههُ همسلي بصوت خافت،باوعيلي ..
ما تجرأت ارفع عيوني بعيونه بعد ما صارت الانشات البسيطة الي تفصلنا،عكسه هو الي كان يباوع بعيوني بدون أي توتر أو خوف،انتفضت على قبضته إلي اشدتت وهو يكرر كلمته "باوعيلي"
بتأني رفعت عيوني بعيوني وحسيت ملامحه تغيرت ويمكن عيونه ما رمشت ! حسيت بنبضاتي ازدتت وكأنها منتفضة على وضعية غريبة، رفع أنامله وحاوط وجهيوهمس بصوت سمعته،خل اسوي العرس عرسين ..
باوعتله بتفاجُأ،وخوف بس محجيت ولا حرف،تعابيري جانت كفيلة بهالشي،فزيت على صوت مدائن وهي تصيحني حاولت افلت ايدي بس هو جان أقوى وجان مُصرّ يبقى بهالوضعية،قطعت سكوتي وكتله
عفية،حيروحون،خليني اروح
سكت ومحجى ولا حرف واني مستمرة بالمُحاولة اريد افلت ايدي وهو قافل،شيريد بالضبط ؟
سيف !!
عيونه ..
جاوبني بجواب مختصر كامل ومفيد،جاوبني بجواب سطرني وسطر كَلبي وعقلي،بقيت صافنة بيه وبالكلمة الي كالها ونسيت شردت اني ! ملامحه جانت جدية بس الشي الي طلع من كلماته المعدودة ااي كالهن مُستحيل يطلعن خدعة !
فزيت من صفنتي وفز من نظراته الصاعقة إلي على دكة الباب همزين جان مقفل والا معرفت شجان صار بحالي لو أحد شاف ..
هو راح على صفحة عرفت شقصده فتحت الباب جانت مدائن
مدائن:وينج اميي ؟؟ العريس واهله كلهم جوا وقبس قافلة متقبل تمشي الا تجين وياها
نور: جاية جاية،بس صارتلي شغلة،وتأخرت
مدائن: شبيج متوترة ؟
نور: هاا !! لا مبيا شي،يلا امشي
طلعت اني وياها لمدائن وسيف بقى بالغرفة بكل الاحوال اهل العروس ميصير يحضرون زواج بنتهم شنو المعنى وليش هالشي ما ادري !
طلعت وقبس حضنتني ولبست حجاب وعباية بالقاعة انزعهن،عموماً ركبت العروس ووردلت ويه بيبي ووصلنا القاعة والكادر التصويري دا يصورون الدخولية والهوسة حييل اني وكفت على صفحة بعد شوية كملوا وكعدوا بالكوشة وبدت الحفلة والبنات نزلن يطلعن مواهبهن لحت علية بيبي بس ابد ما قبلت حتى بحفلة ريام ما رقصت،بدن النسوان يتبشبشن على هاي وذيج واني كاعدة وية البنات ولمحت عيني على ميساء وسناء،تفاجئت ذني شجابهن ؟؟ على حد علمي كلتلها لقبس اعزميهن بس قبس مقبلت ورفضت،لعد شجابهن ؟ بقيت من بعيد ما رحت عليهن،ومستمرة احجي وية اابنات واسولف الى ان حسيتهن واكفات على راسنا والبنات كامن سلمت واني اخر وحدة سلمت عليهن عادي برسمية بس ميساء حضنتنيي وهمست قرب مسامعي وكالت الحمدللله على السلامة حبي !
عقدت حواجبي واني صافنة على شنو ؟ معقولة عرفت بسالفتي ؟ باوعتلها بثقة وكلتلها الله يسلمج ومشيت وعفتها دا امشي ولزمتني وحدة من النسوان ما عرفتها بس بقت تعرفني على نفسها بنت عم خال ابن عم امي وكل شي مفهمت ههه بس جاريتها مترهم احرجها،وسألتني على بيبي وعلى دراستي جان المرّية مو جبيرة حيل ولا صغيرة وسط بنص حجيهم وياي وصلني مسج جان من سيف بس مكدرت ارد عليه ولا كدرت اتركهن وهن دا يحجن وياي،بقن يسولفن ويسألنّي وأني اجاملهن وابتسم وياهم بس انقذتني رحمة وهي تكول تعالي العروس تريدج
رحت على قبس
قبس: نور ءني انت عازمتهن؟
م
نور: صراحة اني هم تفاجئت انتِ ما عزمتيهن،شلون اجوي ؟
قبس: لج من يوم يومها صلفة ميساء وميهمها وتجي وتروح بكيفها
نور: على كيفج قبوس،مالج علاقة بيهن وتجاهليهن اليوم ليلة عرسج اتونسي،ولا تنطيهن اهمية وتشغلين بالج تعالي كومي اركصي،شو اني كلتلها هيج رأسًا كامت فعلاً والاغنية حيل مناسبة للركص وكامت تركص همستلها كااافي استجني فضحتينا،بدل ما تسمع كلامي لزمت ايديه وكامت تحركني وياها واضطريت اسوي نفسي مبتسمة هههه
نور: قبسس الله عليج كافي،اني حنزل وانت ابقي
قبس: نور بلا خجل،عفية يلا ركصيلي
نور: انتِ واعية؟ انداريت اروح لزمتني مرة الخ بمعنى الا تركصين
اضطريت اجاريها وفعلاً ركصت يمها شوية واستغليت الفرصة جامت لازمة موبايلها وتاخذ صور ونزلت،بعد شوية اجا العريس وكملن باقي الأمور والذهب والكيك وسوالف العرس كُلها، شون نسيييت ؟ رسالته بجهازي فتحت رسالتي وايدي على كَلبي،فتحتها وقريت حرف حرف وكلمة كلمة وكل جملة انغرست بداخلي بشكل عجييب !
"كُلّ هالجمال،هواي على كَلبي"
جان كاتب هالسطر وبس ..
أول مرة أعيش هالدور،وأعيش شي ما ردته بس يوم بعد يوم دا تعايش وياه وبرغبتي !! الشي الي دا احسه غريب ومعرفت افسره غير على شكل إبتسامة نرسمت على ملامحي،سديت الموبايل من عمة صاحتني اكعد يمها،وشوية وشفت البنات كعدت يمهن وصار وكت الأكل،ميساء اختفت وسناء كاعدة ويه بنات ما عرفتهن منو،استغربت وين راحت ميساء؟ بعد شوية اجتي من بعيد لمحتها وبيدها الاكل اجتي وكفت كدامي ووجهها مبتسم وكالتلي تفضلي نور
بقيت مستغربة حييل،شجاها ؟ شنو هالمشاعر الي نكلبت فجأة تجاهي !! بقت مادتلي العصير لان ما اشرب ببسي اني والاكل وياها،ترددت اخذها بس مترهم ارد إيدها اخذتهن منها بابتسامة مصطنعة بس كَلبي واحساسه ما يغلطن أبداً !! ...

سيف: بعد موقف الصبح،رحت للشركة وكملت البيانات الي جان لازم امليهن من قبل اسبوع بس بسبب شغلة نور أجلتهن،اليوم زواجها لقبس وبيبي وعمة خابروني اوصلهن لبيت قبس لان عمر ماكو كالعادة هالشكم شهر اشوفه يا مرة يا مرتين بس ! صرت سائق لست نور وهالمرة بيبي عليّة ! معندي غير حل والا قبس تطنكر علية،وديتهن بس عمة ام قبس طلبت اسويلها الواير جان مجلوخ مال كهرب وحيطفي عليهم بأي وقت،نزلت وطولت شوية علما سويته الطابق الارضي اشتغل بقى الطابق الثاني فاصل،صعدت عليه وجانت صوج الجوزة فاصلة ومحد شافها عموماً سمعت صوت اعرفه كلش زين ! صوت محفور بذاكرتي وعقلي و ...وكَلبي
جان صوتها هي،ما ادري شنو الايحاء الي وصلني والي كلي شوفها ! من طبيت جان الباب مو مغلق،مفتوح على النص،طبيت وياريتني مطبيت !
بعمري كُله مشايفها بلا حجاب،شفتها بس من جانت فاقدة الوعي،وبعدها جانت دائماً تحاول تتحشم كبالي وتلبس شالها،الفستان الي لابسته جان عادي ؟ الي لابسته جان يجذب أي شخص على رُغم هو جان مسترّ ! أو يمكن بالأحرى اني الي دا اشوفها بهالجمال !! عيونها الأحبهن وأحب أنعكاسي بوسعهن،جانت منزلة نظرها،وخجلانة ومستحية من الموقف،بكل موقف تجاهها جان اكو شي بداخلي يدفعني للتقدم،يدفعني حتى أخليها ضمن حدودي،صارت قريبة بشكل وهي توترت أكثر وتستحي تباوعلي،صارت بين إيديه وجبرتها تباوع،رفعت عيونها ..فوك جمالها جمال !
كل شي بيها مرسوم،كل شي بيها يجبرني أباوع لملامحها
كل شي بيها يجبرني أتخذ خطوات بعمري ما فكرت بيها،خطوات تقربها أكثر وأكثر ولو كان على حساب أي شي
بين ايديه ويلي يفصلنا أنشات صغيرة ! توترها وكَلبها يلي ينبض بقوة،أفكارها يلي تحوم حولها ..كل شي دا أسمعه منها،لوهلة بس ..لوهلة فكرت أشرد بيها،أو تكون أمام الناس والشرع مني وبحياتي وكَلبي يصير ضمن أملاكها !! ما فكرت بيوم بالزواج ولا بعرس ولا أي شي بس بذاك اليوم..الشي الوحيد يلي اجاني،تكونلي نصفي الثاني،وشريكة حياتي !
بعدها بين ايدي وصافن عليها وبعيونها وبعدها تحاول تهرب،أنقذتها مدائن والإ يمكن ..ما ادري شجان سويت !
بدت الحفلة واني كاعد ويه حفلة الزلم الي سواها احمد،وصلتني رسالة من قبس فتحتها جانت صورة نور قريبة بشكل منها،بالصورة جانت مبتسمة والفرحة تشع من عيونها،خزنت الصورة بالميموري وطلعت خارج الحفلة مركز بالصورة وبتقاسيم وجهها وبكُل أنش بيها،فجأة سمعت صوت يكول
سيف،تعال نور تسممت ....

يتبع
شنو أرائكم بالبارت،وتوقعاتكُم ؟

____
ريام الزُبيدي