ما لم يكُن بالقلب عليم

البارت 33

البارت 33
امتحنت وطلعت ونفس الشي بقية الامتحانات الحمدلله مشت عدل اليوم رجعت من اخر امتحان وخالو كال الا نطلع اليوم مجان بيا حيل بس جبروني وطلعنا واكيد سيف جان مرافقنا من كعدنا تعمد بكعد كبالي ومتجاهلته اني ما احاول ابين كدامه اي شي واصلا بعدني مستحية من سالفة الفستان

دا احجي ويه بيبي وعمة ودا اكوللها على صديقتي ابوها توفى واخوها يكتل بيها ويأذيها وحتى زوجوها غصب لواحد وطلع سكير وكل يوم تاكل ضرب منه ختمت كلامي ويه بيبي وهي تدعي على كل واحد يتزوج بنية غصباً عنها ..
لمحت بطرفي عيوني جان دا يباوعلي تجاهلته اكثر تعشينا ورجعنا،بالرجعة شغت غيث حيسوق كتله غيث مرّ من يوم الجادرية
توكفين على الجسر ؟
لا مجرد امرّ من يمها كُلش مشتاقلة اله بهيج جو وبليل
اي بس بكيف سيف وسيف يكره ذاك المكان حيل ودائما يعوج طريقه وميروح منه
التفتت جان خلفي وما عرفت بوجوده كتله ماكو مشكلة ركبنا واساساً نسيت السالفة فزينا على صوت غيث وهو يكول سيف ليش جاي منا ؟
مو الجادرية منا ؟
عجبب !!! لك مو انت تكره هذا المُكان !!
كال عادي ورفع عيونه ينظرلي بمرآة السيارة خجلت منه سوا هالشي علمودي !
اني مدا افهم هذا الانسان احيانا اظن اعرفه واحيانا احسه غررريب عني،هو كتوم وما يحجي بس تصرفاته غريبة وما اعرف بالضبط شيدور بباله !
اني عايشة بدوامة من المشاعر المتناقضة ساعة اكول مجرد صديق طفولة وساعة لا مدا اعرف افسر شعور ولا تفكيري الدائم ولا حتى افسره هو بحد ذاته !!

وصلنا البيت وتعبانين رحنا ارتحنا بس اني كَلبي واجعني بس طبيت حتى انام ما ادري شراح يصير
بس ! اكو شي غرريب اني احساسي ما يخطأ يا رب رحمتك ..
ساعة 11 بليل بيبي صاحتني كالت نامي من وكت باجر عدنا عزيمة لازم نعزم قبس وزوجها ما يصير عيب
نمت من وكت وكعدت على صوت التحضيرات وداخلين نفير عام وعمة مسوية كل الاكلات الي تحبها قبس
بيبي راح يجي عمو قاسم ؟
لا ما يجي شكد ضغطت عليه يجي بس يكول البنات بعدهن بالمدارس وممخلصين امتحاناتهم وهو عنده شغل فقبس وزوجها راح يجون
اها ! زين سيف وعمر حيكونون موجودين ؟
اي اكيد هم بمثابة اخوانها اكيد يبيضون وجهها ويكونون موجودين كبال زوجها
شلت هم يعني هم راح ارجع اقااابله !!!!!
لبست كلابيتي وحضرت نفسي ونزلت بس نزلت وكفت بمكاني غمضت عيوني واستنشقت ريحة اعرفها ..اعرفها كلش زين
فتحت عيوني بهدوء واني التفت جان خلفي
هاي ريحته هو ...اي هو !

ملامحه جانت شبه مبتسمة وهادئة،نزلت عيوني عنه بس بطرف عيني لمحته لابس الزي العربي فاجئني هاي ثاني مرة بس بكل حياتي اشوفه لابسه
لانه ما يحبه ابداً ! وللأمانة جان لايكله ..هواي
شوية وابتعدت عنه على المطبخ بس مخلتني عمة اشتغل شي تكول تتوسخ كلابينج وقبس على جية
وصدك شوية واجتي قبس هي وزوجها سلمنا عليهم واخذتني بالاحضان
بسس قبسس اضلاعي تكسرت
مو مال حب
لج يا حب هذا،ايدج قوية اضلاعي تكسرت
لعد شلون متحملة اخوي وجرته القوية !!
باوعتلها متفاجئة هاي شون تحجي هيج؟ والا شكوللها ؟ اتنرفز من هالحركة وهو يتعمد يسويها بيا !
فزيت على دغتها من كتفي
هااا وين سرحتي !!!
وياااج،بس ثقي لو يصيرلج درزن اطفال فلا تكبرين
ابتعدي اروح اشوف اخوي شسوا تطورات دفعتني على الخفيف ومن صدك راحت وكفت يم زوجها وكبال سيف واحمد زوجها هم اريحي راساً
اخذ وعطا بالحجي وكام يسولف ويتشاقة مع خالو ومع بيبي ومع عمر جنه واحد من العائلة
سمعت نكاتهم وسيف يكله الله يساعدك على الاختلال العقلي الي دفعت مهر علموده
وهي تتغالض وياه وتكله يحببببني