ما لم يكُن بالقلب عليم

البارت 15

البارت 15

واني واكفة على صفحة حسيت على كف بكف ايدي !
باوعت جان سيف لزم ايدي وسحبني بهدوء وياه من الهول من بين الكل للطابق الثاني،صرت بموقف لا يُحسد عليه ايده بيدي كدام الكُلّ وبنفس الوقت خجلانة منه بهالقُرب وتساؤلات ببالي ليش سووا هيج ؟
وصلت لغرفتي كال جُملة وحدة بس "طُبي لغُرفتج"
سويت الي كال عليه وهو جان شكله معصب هواي وكلمة وحدة وينفجر فسكتت محجيت شي
بقيت بغرفتي واني اسمع صوت الهوسة جوا
يارب العالمين افرجها من وين تطلع هالمشاكل !! والقلق ماكلني شراح يطلعني منها عاد ! بس لحد الان مفهمت هو شنو علاقته حتى يمد ايده عليها !!!
مسمعت الا صوت باب يندك قوي حييل ما انكر خفت،تقربت بتردد يم الباب فتحته محسيت الا ميساء هاجمة عليّة ومدت إيدها لشعري وهي اطول منها بس دفعتها مخليتها واجوي تلاحكولنا ابوها وخالي ظلت تحجي وتشمر حجي علية واني ساكتة وابوها يسكتها ومتسكت
ميساء:انت شعبالج؟ حنسالجياها؟من البداية جانت هاي حيلتج اساساً وليش لا ؟ على واحد كامل شنو الي يمنعج متسوين اكبر خطة بس حتى توكعيه
قبس: بس ميساء شبيج ؟ كافي خربتي علينا الجمعة بسبب الغيرة والحقد كاافي !!
ميساء: انتوا ابقوا مخدوعين بيها ولكم وحدة مخادعة تخدعكم بوجه البراءة الي تظهره بس وحياتج نور حشوفج شلون انضرب أني
جنت ساكتة محجيت حرف بس اباوع الها وهي تغلي كدامي وابوها ميكدرلها وهي تحجي بكيفها واني ليش هيج ؟ دائما اما اعرف شلون أااذي واجرح نثل ما ميساء تسوي،دائمًا اسكت واسكت وتمنيت بس هالموقف يخلص تمنيت شخص ينقذني ويطلعني من هالغرفة الي ضاك نفسي بيها،تمنيت بس !
سمعت الهوسة تجدد عدا صوت ميساء فتحت عيوني شفته !شفت سيف دا يحجي ويه خوالي ومبين اعصابه كلش متوترة وكاز على اسنانه
سيف: عمي يا اني يا ميساء اليوم !
محمد: سيف شنو هالحجي ؟ شجاكم البيت انكلب كَلاب استروا علينا واكعدوا وكافي عاد معارك انتوا مو جهال ولا احنا
سيف: هذا الي عندي ! يا اني يا ميساء اليوم !
ميساء: راح ترجع ندمان !
سيف: على شنو ندمان ؟على اخلاقج علمج تربيتج !
عطالله: الى هنا احنا هواي تحملنا اهاين بهذا البيت
الى هنا وانكطعت اي علاقة تجمعنا
غيث: يابة !!!ميصير هيج قرار تاخذه ميساء غلطت ليش نبقى نتستر على الخطأ
عطالله: الي عندي كلته..يلا امشوا
غيث: هيج الوضعية لعد اسمعوا قراري !اني راح ابقى ويه سيف وبيت عمي وميهمني بشر ! علاقتي بيهم متقطع ولا تتأثر
محمد: ابو غيث ااستهدي بالرحمن وابعد الشيطان تعال اكعد نتناقش
عطالله:ماكو نقاش الي كلته راح يتطبق
كال هيج وطلع خالي من البيت هو وزوجته وبناته سيف فات وركع باب غرفته بقوته بقوا بيت خالي مقداد وبناته وخالي محمد نزل جوا هو وبيبي
ضعفت اقدامي نهديت بالأرض ودموعي بلشت تنزل بِبُطء يا الله شنو هالامتحان الصعب ! ليش دائما اكون بين خيارين صعبين ! النفس ضاق والدنيا ضاقت كل الي ردته اكمل حياتي ببساطة ! محبيت اشوف احد حبيت بس اختلي بنفسي ..بنفسي فقط
حسيت على صوت اقدام بداخل الغُرفة اجتي قبس حظنتني وبصوت اقرب للهمس
انتِ قوية نور لا تيأسين تنحل ان شاء الله
قوية ! واني منو يصير قوي علمودي ؟
منو يتحملني مثل ما اني متحملة اي شخص ؟
منو يسمح الدموع عني مثل ما أمحي الدموع عن اي شخص !
منو الي يكونلي نورّ ولو لِمرة !!
قبس:مديت ايدي عليها جانت ايديها واطرافها باردين هواي لحيت عليها مفاد بيها ادري بيها من شي يغثها تتمرض حاولت اكومها مقبلت
قبس:الله يوفقج كومي نور لخاطري الحرارة بالجو مرتفعة وانت جسدج بارد عبالك قُطعة من الثلج كومي !
نور:قبس مبيا شي..
قبس:شنو ما بيج باعي على نفسج،ميستحق الموقف كومي على السرير حجيبلج أكل،دا اقنعها وهي مغمضة عيوزها ومتكورة على نفسها وراسها منزلته هزيتها مفاد بيها ناديتها مجاوبتني رفعت ايدها غصبا عليها شفتها فاقدة الوعي..يا ربي شلون !! صيحت باعلى صوتي
خااالي تعال بسرعة نور فقدت
خلال ثوان سمعت صوت بيبي وخالي والكل اجوي شالها خالي وخلاها على السرير رشينا مي شوية رجعت لوعيها بس مغمضة عيونها متقبل
بيبي:اتركوها
قبس:بيبي شلون !!
بيبي:من تتعب اتركوها لوحدها هي ترتاح اعرفها اكثر
عوفوها هسة ..بالفعل تركناها وطلعنا اني هم ضجت شدايصير بهذا البيت دا ينهجم يوم بعد يوم تهمتت رحت لسيف طبيت لغرفته شفته كاعد على الكرسي ومخلص نصف باكيت الجكاير والغرفة ريحتها عبارة عن دخان صايرة
قبس:سيف شسويت ؟؟جاوبني شسويت شلون تمد ايدك على ميساء هيج،صح بنت عمك بس مو من حقك تمد ايدك عليها
جاوبي بنترة قوية
سيف:لعد شتردين اسوي ؟؟ اسكت وهي تضغط على الناس بدون احساس !
قبس:هي حجت على نور ما حجت عليك شبيك انت عصبت وفرّت ؟
ذب باكيت الجكاير بالارض بعصبية وجاوبني
اي واسكتلها ؟؟ لج اني اعرف بالعذاب الي هي بيه شلون اقبل بعد يأذوها ؟
اني اعرف مرارة الشي الي هي دا تمر بيه
اعرف الوحدة الي هي بيها،اعرف شعور انج صرتي لوحدج ولازم تواجهين الدنيا
اعرف شعور تتمنين ولو حظن واحد دافي من امج،كلمة يستقبلج بيها الاب،اعرف شعور يرجع الشخص وهو جارر اذيال الوحدة،اعرف شعور فقدان السند..اعرف كل شي شون تطلبون مني اسكت ؟
الشي الي عانيته ما اسمح الها تعيشه طالما بعدني اتنفس الهوا !
قبس: جنت اباوعله والدمعة تجمعت بطرف عيوني ادري بيهم اثنينهم محتاجين شي واحد بس يجمعهم !
الي بينهم اكبر من مجرد مسرحية،الي بينهم شي قوي حيل بس مو وكته حتى يطلع
شلون اواسيه وهو جرحه جبير..صار اله 15 سنة يعاني؟ اختتمت كلامي وياه بجُملة
سيف انت الك مستقبل وقدر كلش جبير بس مو وكته هسة ..
تركته بحيرته وعسى الايام تشافيّ
وسام: قضية حسن دا تتعقد وما بقى شي للجلسة ما بقى كدامي الا اروح لزينب اخته لحسن بدون ما اكول لسيف،ادري ما راح يقبل،بس هذا انسب حل والا القضية راح نخسرها
زينب:اني مستعدة اشهد
وسام:شوفيني التسجيلات الي مسجلتهن
زينب:هذا دليل كلش كافي ويه شهادتي حتى يطلع اخوي
وسام:بعد يومين الجلسة هذا الموضوع يبقى سر وسيف ما يعرف بيه،الصبح يوم الجلسة الكاج يم المحكمة
زينب: اني ما اريد شي غير حسن ينفرج عنه،حتى لو بفلوس ندفع
وسام: بشهادتج راح يطلع بس مثل ما وصيتج سيف ما يعرف ابداً ..
صار موعد الجلسة وسيف ضايج هاليومين وماله خلك احد اي واحد يحجي وياه ينفجر بوجهه التقينا يم المحكمة دا نطب وهو انصدم بزينب ووياها ام زيد
سيف: زينب شتسوي هنا ؟؟
وسام: راح تشهدّ ..
سيف: لك انت كل عقلك تحجي ؟؟شنو هي هيته ؟ البنية كتلك لا تدخلها بالموضوع ليش مُصرّ تدخلها !!!!!
زينب:اني راح اشهد اليوم مهما كان الثمن ومحيوكفني شي
سيف:لج بابا سمعتج راح تصير على كل لسان اني بمجتمع ميرحم لا تشهدين وحافظي على نفسج حسن راح نطلعه واوعدج اني حتى لو ادفع ملايين
زينب:استاذ وسام الموعد بدأ اعتقد !
مشيت وعفته اليوم اخوي لازم يطلع كافي هواي طولت هالمهزلة
بدت المحكمة وقدم كل واحد دليله استمرت المحاكمة اكثر من ساعتين ونص اجا دور اسمي صاحوني اشهد سألني القاضي وجاوبته على حسب اسئلته
وسام:سيدي القاضي وايضاً التسجيلات توضح تعرض الانسة زينب لتهديدات من قبل المُدعى عامر وايضا تهديدات بالقتل والتصفية ونمتلك دليل يوضح النا المن تعود التهديدات ومن قِبل من ..
بعد مد وجزر قرب وقت المحاكمة ينتهي نطق القاضي كلمته،حكمت المحكمة بالبراءة للمُدعي عليه السيد حسن غسان فلاح وعليه تُلغى كافة الشكاوى المرفوعة ضده
واخيراً ..طلع حسن استقبلوه زوجته وووسام واني بقى يحضن بينا هواي مشتاقيله،وهو خطية ضعفان وهلكان وجهه تعبان هواي
اجا لسيف وتحاضن وياه بكل قوته
حسن: لو مهما اسوي ما اوفيلك
سيف: الحمدلله على سلامتك ابو زيد،اهم شي طلعت سالم
رجع حضنه مرة ثانية !
سيف: تعال لبيتك جهالك ينتظروك امسح عيونك