ما لم يكُن بالقلب عليم

البارت 38

البارت 38
استغربت،كمت على حيلي،بس هو مر من يمي
بدون ما يباوعلي ولا سلم حتى !!
تجاهلني حيييل وطب للحمام وطلع والغضب
بعيونه،صح ما حجى ولا حرف بس
قريت عيونه واعرف اكو شي
طلع يرتب شعره ومبدل،ردت احجي
يس كلت ليش اتدخل ؟
راساً فتت بالمُفيد وكتله
نور: ادري اجيت تعبان بس لازم احجي
وياك بموضوع ..
ردت اكمل بس شفته متجاهلني وحتى ما
باوعلي واني دا احجي وياه،تذكرت اهلي
كلت ادوس على نفسي ميخالف
اردفت وكتله ..اريد اروح لبيت خالو
صفن دقيقة ويه نفسه باوعلي
وفتح موبايله ورفعه كبالي
وانصدمت
باوعلي وكال ضريبة بيت اهلج هذا المقطع !
_مافهمت ؟
_ما حتطلعين خطوة خارج البيت على
بيت خالج الا اذا وديتج وكلتلهم برغبتج
صار الزواج
_كل عقلك تحجي انتت !!!
_احجي عدل !
_شنو الداعي، لا تخاف اطمئن ما راح
احجي شسويت انت
_ وشنو يضمنلي ؟ اني ما اثق بيج،احتمال تخونيني
وتخونين كلامج ..
تقربت منه وباوعت بعيونه وكتله
الخيانة مو الي ..الخيانة معهودة لاصحابها
تردته ومشيت وهو خاير بكلامي بس هو
ذكي اكيد فهم مغزى كلامي ..
صار العصر متحملت لبست هدومي وكملت
وشيصير خلي يصير،رحت للهول جان كاعد
ومبين عليه ينتظرني شافني جاية
وكف على حيله وبقى يباوعلي،اني هم تجاهلته
ولميت شكم قطعة ملابس،بلكت ابقى هناك
طلعنا من الدرايج الخارجية بس بالكوة امشي
رجلي بعدها متأذية شوية
ركبنا بالسيارة بس محد يحجي،بس احس عليه
بطرف عيوني اشوفه يسوق بتشديد واعصابه
مشدودة
وصلنا البيت لزمت كَلبي،خفت حييل
خفت من ردة فعلهم ويا ترى راح يتقبلوني
ويستقبلوني،لو يطردوني مثل ذيج المرّة
سبقني هو ودك الباب بعنجهية
(فوك شينه،كوات عينه)
حجيتها بكَلبي،شوية والباب انفتح صارت
عمة سلمى بوجهنا،بدون ما وعي مني
جطيت بحضُنها وهي هم حضنتني بحرارة
حيييل
تعالوا فوتوا..لا تبقون برا
وصلنا المطبخ سمعت صوت بيبي تكللها
منو اجا سلمى
بس طبيت اني شافتني،انتفضت من مكانها
وعيونها تجمعوا بيها الدموع
تقربت منها ارتمي بين احضانها بس
هي راساً انسحبت ورادت تروح
بس عمة صيحتها ووكفتها بمكانها
عمة:دقيقة حجية ..
هما غلطوا ولازم تسامحيهم،صدكيني هي
مشتاقتلج هوواي،واجتي تشوفج،لا تصديها !
بيبي: وكت الي تجرأت وطلعت ويا سيف
بدون ما تكول لأحد،ما تذكرت عندها اهل
نور: بيبي،الله يخليج باعيلي بس
اني اجيتج غلطانة،سامحيني،مشتاقة الج هووواي
بيبي: ابتعدي منا،ويُفضَل تطلعين من البيت كله
نور:باوعت لسيف بكره وحقد،جان واكف يمي
يمكن كل كره الدنيا بذيج اللحظة جمعته ضد
سيف،هو السبب بكل شييي صار ودايصير
وهو انسان اناني لدرجة حتى ما رف اله جفن
من شاف دموعي كبال بيبي !! بعده شامخ
بملامحه الباردة ..
اثناء تفكيري قاطعني بصوته ووجه كلامه لبيبي
تقدم الها وكعدها على الطخم ..
سيف: باعيلي بيبي،اني ابنج !!
مو جنتي تكوليلي انت ابني مو حفيدي ؟
مو جنتي تنيمني بحضنج وتدفيني مثل أي أُم؟
مو انتِ نفسها بيبي الي تتلكاني يم الباب ؟
بيبي: اني نفسها،بس انت مو سيف نفسه ..
انتَ الي خنت ثقتنا كلنا ومن ورا ظهرنا تروح تتزوج
وبمنو ؟ بنفسها نور الي جانت رافضها وايام واحنا
نقنع بيك وجان اساساً الزواج جذب،فجأة
وبدون سابق انذار،تروح تعقد محكمة
ووتريد نسامحك؟ وين عايشين احنا ؟؟
سيف:بيبي ادري بيج راح تتفهمين وضعنا
وتتفهمين شعوري اكثر من اي واحد
احياناً تنفرض علينا شغلات ونرفضها،ونبعدها عننا
بس بعدين نتقبلها ونصير نحبها ..
مجنت اعرف ردة فعلكم هيج قوية،ولا تنسين
هي ما طلعت ولا انهزمت ويه غريب
مو اني نفسي الي جنت عاقد عليها محكمة وزوجها
شرعياً؟؟ شنو الي تغير مجرد صارت بالهوية
فليش هالمشاكل كلها ؟؟
بيبي: اييي تغييير،تغيير هواي،صحيح جنت
زوجها شرعياً بس كلنا نعرف انتوا مثل الاخوان
واساساً بس خدعة جان لعمامها،بس انت
حولتها لزوجتك واقعياً !! الفرق جبير سيف
سيف: سكت لوهلة و تنفس بعمق وكال .
بيبي أحبها ..!