الحليب المُر

بارت ال34

السلام عليكم

الي يحجون بأحترام ليش خذو على نفسهم 😂

البارت ال34

نرجس...

طلعت من المطبخ اودي الكهوة لعزام وشهم بالديوان جاي يتناقشون..اسمع شهم يحاجي علمود فضة...يريد يروح يرجعها...

والظاهر جاي يعيدون هذاك النقاش نفسه...

شهم:ماكدر اخلي نص جهالي هنا ونص هناك..ماكدر بناتي يبعدون عني..ومن حجيت هيج لأخوانها جنت معصب طلعت من دون علمي وهمين اخوانها اجو يهددون..خل يحاجون اختهم اول

عزام:مالومهم ازوجت على المرة وماتدري حتى لو مو خوش انسانة..يعني حتى هذيج الثانية ظالمها انته لا عقد لا شي وطفل عدها شهم..وشلون ترضاها على بناتك لو خواتك

شهم:لا مارضاها ولا تكوم كل شوي تلومني عزام انته هم ازوجت..وهي خدعتني ماردت اجيب جهال وماردت استغلها جنت راح اكولكم واعقد عليها

عزام عصب:جانت ظروفي تختلف..وازوجت كدام نرجس والكل وهي قابلة..بس انته شهم شسويت بالثنين كلي هسة لو رفضت ترجع فضة وجهالك بناتك الزغار يرحون بين ايدين خوالهم وتعرفهم ظلام ميرحمون لا جاهل ولا جبير

شهم:استغفر الله...اعرف غلطان والله بس وروح ابوي جان زواجي منها عمل انساني..وانخرطت بمشاعري وياها..واكثر واحد تعرف صار جم سنة متحمل فضة علمود الجهال..وانته الي تصبر بيه عليها

عزام عصب اكثر:يا عمل انساني وانته خالها بلا عقد محكمة..الطفل هذا عليمن ينحسب صار شي يحتاجله جنسية فجأة شتسوي بالله..واذا ماتريد مرتك الاولى ليش جبت منها بعد جهال

شهم بعصبية:عزام رحمة لأبوي لا تعاتبني كافي من غير شي ما متحمل روحي..تدري بيها تشك بيه ويه اختها ترضاها انته تعرفني كلش زين عمري ماباوعت بالحرام حتى من ابتعدت عني اكثر من سنة..وشيماء مثل اختي وتكعد تسولف وياي وتضحك..تكلي انته حاط عينك على اختي..وين صايرة هيج..متحملها لخاطر الجهال..ومن خلفت منها ظنيت تنعدل تتغير بس لا جديد..وحتى اتهمتني ويه......استغفر الله...

(هنا ☝️الأحتمال الأكثر راد يكول ليال🙂 بسبب شكها من قبل بليال ويه شهم ونرجس اكدت هالشي انو مرة تهمت ليال حاطه عينها على شهم وحتى من شهرت ليال وعزام)

عزام:والله اعرفك شهم..بس خيبت ظني بسوايتك ببت الناس استغليت ابوها مريض وتوفه وفوكها ماعدها سند..لو اخوانها بيهم خير جان كسرو ظهرك على سوايتك..وماراح انساها الك صدكني اعاقبك..لو جاي كايلي من الأول ماخليك تسوي هيج

شهم:استاهل عاقبني مقبولة..بس جهالي ماريدهم يصيرون بينه مشتتين..وهسة فضة هم اريد ارجعها لخاطر جهالي بناتي ماكدر بدونهم..حاكم الله يرحمه كال لا تاخذون منهم مره بس اخخخ لو سامع حجايته بس....