الحليب المُر

بارت ال35

السلام عليكم

بارت ال35

مشية الهيبة لااا فزع..جن عاصفة غبار ضيعت دربهم....

~~~~~~~~~~~~~~~~~

ليال...

لزم وجهي داره عليه وطبع بوسة بشفتي عميقة..وانه شلون ما امووع بحبه..كلت هاي هو ضيم الأشهر راح يولدني صدك مثل ماتكول عمه شمع...

هو ابداً مالمسني من طلعت حامل لحد هاي الساعة..جان يجي يمي بس يحظني ويشم بيه...

مابادلته البوسة وخر عني وكال شكلج مجبوره عليه..مو مشكلة يابه..اعرف زعلانة..اكتفه بحظني..وانقهرت عليه...

هو هم شكثر متحمل عصبيتي ويسامحني شكثر حركت الغرفة هوست عصبت..وشكثر اصيح بوجهه مرات يعديها...

ولا مرة مد ايده عليه بالرغم جم مرة اعلي صوتي واجه راضاني جم مرة ومارضيت..خلينه واقعين شنو يعني لازم يبوس رجلي ويتوسل...

اصلاً ماحترم الرجال الي يتوسل بمرته وينزل قدره..شنو فايدة الشوارب لو ظل يتوسل..ماحب اخلي عزام يتوسل...

واعرفه مراح يتوسل صبره قوي ويحبني بس مال يتوسل وهو راضاني جم مرة مستحيل..وعزام ابداً مو من النوع اليركض وره غرايزه وبس...

لو صح جان مجاني وراضاني جان دور عد مرته الثانية وسكت..بس هو ابد مو هيج..ولا يوم راح يجي رجال مثل عزام مستحيل...

بصبره وشخصيته وقوته وحبه وحنانه..لو هو رجال بس همه نفسه..جان مانتظر طول فترة حملي..وهي عادي كل النسوان كلشي يصير بينهم بالحمل وميصيرلهم شي...

والانسان الله خلقه مو كامل..شنو يعني قابل يصير من كل ناحية..وهو ماصدكني بسبب حلفانها...او يمكن مصدكني بس هو عصب عليه عالعصبية مالتي مو محروك كلبه على نور....

عزام:ليله اريدج تعرفين الي اريده منج تشدين حيلج وتكونين بخير..خليج قوية وان شاء الله سلامات الج ولأبننا

كتله بهدوء:عزام شكثر تحبني

عزام:تعرفين ليله ماحاجه اسمعين الجواب

حجيت بنفس الهدوء:كلي حجم حبك الي اريد اسمعه منك

عزام:تدرين شكد غالية عندي نرجس..ازوجتج رغم ماجنت بحياتي افكر اكسرها ابداً..وجان عندي الوفاء اهم من العشك..بس يمج كسرت هالقانون

كتله بقهر:مادامك تحبني ليش ماصدكتني من حجيت عن نور

عزام:رجعنه لسالفة نور..يالله..يابه ترا هي مو سالفة مصدكج مامصدكج..انه عصبت عليج وكتلج ممنوع اطلعين من غرفتج على عصبيتج حاسبتج ليال مو على ضربج لنور ودفاعج عن نفسج..انتي صح كلتي دفعتها بس هم اعرف ماتقصدين..الي اريدج تفهمينه..ماحاسبتج علمودها حاسبتج علمود عصبيتج الماتكدرين تلزميها