الحليب المُر

بارت جديد 2

السلام عليكم

اكو مثل يكول (اتقِ شر الحليم لو غضب)يعني احذر غضب شخص هادء وصبور🙂🔥

ليال....

الصبح فزيت على بجي ريحان..كمت بنعاس وثكل كعدت اخذتها لحظني بوستها بشمه..ماتنطي فرصة مو كافي الليل كله تبجي وماتريد اطفي الضوى...

اتدور مسامر بت الشيخ..سكتتها رضعتها..باوعت لمكانه فارغ..طالع قبل مافز حتى هو بعده مريض والليل كله لازمها ويفتر بيها...مانام حبيبي خطية...

حاظنها لصدره واكف بيها وهي تسكت على صدره من يوكف بيها..انه مرات اراقبهم بحب بس ساعات مادري بالدنيا اغمض واانه كاعدة...باوعت لمعتز نايم...

خذيت جهازي بنعسة اشوف رسايلي..فتحت رسالة دازها الي عزام...كاتبلي...الي يندل طريقهم كلبي بعد ياهو عن دربهم يوخره....

ابتسمت عالغزل المكتوب الي من الصبح..انه الصبح نفسي بخشمي بسبب بجي ريحان الليل كله..وهو سهران مثله مثلي وينبع منه كلام كله عشك...

كتبتله..وعلى طريقهم ماتلكه لافتة مكتوب عليها نعشقكم...

سديت التلفون مارديت على اي احد ثاني..جيهان مراسلتني وخالاتي...وبعد بعد..مارديت مابيه...

اجتني رسالة....فتحته...

عزام:ياهي لافتة لا وحدة ولا ثنين يابويه عالعشك مالهم..شما امشي بدرب ثاني جدمي يمشيني لدربهم

ليال:ابو معتز ادليك على الواتباد وتصير كاتب ههههه..يصير كتل على كتاباتك ياشيخ

عزام:هههه شنو هذا بعد..بس لا الي تقرين بي..احب احتفظ بكتاباتي بس لمعشوكي

ليال:اوويلي على هالكلمات ابو معتز من الصبح يريدني اكله تعال احبك واشمك واحظنك

عزام:هههههههههه لا يابه مشغول..شنو كعدتج ليلتي الزغيرة

ليال:اي والله كعدتني من نومة حلوة حلمانها بيها بحب عمري يغازلني بعشكه..فزيت لكيت احلى كلام

عزام:يفداج العدوان يابه

ليال:وين انته وتراسلني ههههه

عزام:بحظن مرتي الثانية

ليال:هههههههههههههه لا ماتسويها بيت شهم انته لو بيت مليكه

عزام:بيت شهم..كاعد بالديوان بحدي بس ولده..مادري وين طالع من الصبح

ليال:خير خوما صاير شي..خاف رايح يدور ابنه كالعادة خطية

عزام:لا ماعتقد وين يدور..الله المعين...بدليهم وحظري نفسج اجي اخذكم

ليال:وين عمري انه مانمت كلش..دزيتله ايموجيات يبجن...

عزام:بيت مليكه دكت عليه اتريدني اخذكم الها ماتكدر تجي هي تعبانة..ميخالف عمري من ترجعين نرجس تاخذ ريحان ونامي