السلام عليكم
البارت ال32
انته القسمة والنصيب..انته الي مثلك محد تكدر تجيب..انته الروح والرية والحبيب...ارد اكلك محد كدر ياخذ هالكلب غير ابتسامتك واللؤلؤ اليبين بيها....
رسمة الكحل البعيونها دوختني وللكمر وصلتني...
منقشة بأحلى نجوم ويوكف النبض لو كلمتني...
عندي جنها هلال العيد الي الناس بي فرحانة....
~~~~~~~~~~~~~~~~~~~
مر اليوم عادي ماكو شي..بس مغص لزمني ولاحظو عليه جم مرة سالني عماتي شبيج كلت ماكو تقلصات....
العصر رحت للحمام بثكل اكثر من العادة عبالك عليه تاسع...حسيت بحرارة ورطوبة بملابسي..ومن شفت الدم..متت رعبة..واطرافي كامت ترجف...
طلعت من الحمام وخفت لا يصير شي يوجع كلبي مثل نرجس وعزام راح يلومني ماحافظت عليهم...
رحت لعمة شمعة كاعدة بالهول..ماعرف شكلها وخايفة واطرافي ترجف من الرهبة..كتلها عمه انه ماعرف شبيه بطني توجعني وانزف...
شهكت ولطمت صدرها خوفتني اكثر..وكالت روحي بدلي وصيحي لرجلج وينه...
كتلها بخوف:هو بالديوان يمكن..ماعرف ماشفته بعد الغدا
شمعة خاتون كامت على حيلها:روحي لبسي عبايتج هسة اشوفه..ياربي رحمتك بوليدي..لاتفجع كلبه اكثر
صعدت فوك بألم يمووت..رحت للغرفة ابدل..واحس بالدم ينزل..ارد اعرف ابدل من الألم ماكدر..يمكن الخوف اخذني اكثر من الألم..رجليه ترجف حيل...
خفت اخسرهم..وينفجع كلبي وكلب عزام..كل تفكيري عزام..حاولت اتماسك واتقوه..تصلبت بطني ولزمتها بألم يمووت...
الا شوي ابجي من الألم هذا..هسة ليش تصلبت..يمكن بعدهم عدلين اي فرحت نفسي بهالتوقع..بس هاي تقلصات قوية الي تسبب تصلب بطني...
بطني ماجانت كبيرة كلش وماعبالك تؤم ابطني لتكول طفل واحد وبالسادس...لزمت بطني بألم من الانقباضات..غمضت عيوني وصحت آه...
عزام اجه بخوف فتح الباب بأندفاع:ليله شصارلج
كتله بألم:ماراح يموتون مو هيج..وظليت ابجي من الألم...حظني حيل وكال اسم الله..ومشاني للسرير كعدني..وهو يكول اسم الله عليج ليلتي...
غطاني بالعباية..لزمني وطلعني..شاف مابيه امشي شالني من طولي على طوله..من جوى زنودي وظهري على بطنه..يخاف يعصر بطني..ونزلني الدرج..وكبل للسيارة...
ظليت ابجي من الألم..فضة طلعت لابسة عبايتها بسرعة واجت ويانه..عماتي مابيهن ونرجس بحدها مريضة...فضة تسكت بيه بس وين الألم يمووت...
وظلت تلطم وجهها وتكول عزززااا بعينج لورة..هاي بسببها مو..وعزام كلها شبيها لارا..كالتله طاحت على بطن ليال....
أنت تقرأ
الحليب المُر
Roman d'amourقصة حقيقية تبدأ قبل 25 سنة عن بنية تعيش بيت الشيخ وربت عدهم وهو سماها من ولدت تكبر وتعشكه...واخوه يحبها بنفس الوقت...شاءت الاقدار وتصير حليلة اخوه...وهنا تبدي رحلة عذابها ويه عشك الشيخ. يكلها ليله نجوم وجهج حيرني وخلني ليل ونهار صافن بوجهج احسبهن...
