​ကောက်ညှင်းထုပ်​​လေးရဲ့ နှလုံးသားသံစဉ် | ေကာက္ညွင္းထုပ္​​ေလးရဲ႕ ႏွလုံးသားသံစဥ္

Part-4

Unicode...

​​ထွန်းသစ်စ လေ့ကျင့်တဲ့ထဲ စိတ်​ရောက်​နေသဖြင့် ကျောင်းက​နေ ​ကျောင်းဆင်းချိန်ထက် နာရီဝက်​​ကျော်နောက်ကျပြီးမှထွက်လာခဲ့ရသည်။ ဆိုင်ကယ်ကိုအရှိန်မြှင့်​မောင်း​နေရခြင်းက ၅နာရီထိုး​တော့မည်​ကြောင့်။

၅နာရီဆိုလျှင် ညီမဖြစ်သူ​ဟေမာန်နွယ် ကျူရှင်ဆင်းချိန်ဖြစ်သည်။ အမှီသွားမကြိုနိုင်ပါက တစ်​ယောက်တည်းမျက်နှာငယ်စွာ ထိုင်​စောင့်​နေရ​ပေလိမ့်မည်။ အတတ်နိုင်ဆုံး​မောင်းနှင်လာခဲ့​သော်လည်း ၅နာရီထိုးပြီး ၁၀မိနစ်​ကျော်မှ ကျူရှင်​ရှေ့​ရောက်သွား​တော့သည်။

"​စောင့်​နေတာကြာပြီလား"

သူ့ဆီသို့ ပြုံး၍​ပြေးလာသူ က​လေးမက​တော့ လွယ်အိတ်ကိုသူ့အစ်ကိုဆီ​ပေးရင်း ​ခေါင်းရမ်းပြသည်။ ထွန်းသစ်စ သူ့ညီမလွယ်အိတ်ကို ပုခုံးတစ်ဖက်တွင်လွယ်လိုက်ပြီး အ​နောက်က​နေသူ့ခါးကိုသိုင်းဖက်လာမည့် လက်နှစ်ဖက်ကို​စောင့်​​​နေလေသည်။ အဆင်သင့်ဖြစ်ပြီဆိုမှ ဆိုင်ကယ်ကို ဖြည်းဖြည်းချင်း​မောင်းထွက်လိုက်ပြီး အိမ်ကိုပြန်ခဲ့​တော့သည်။

"ပြန်လာပြီလား သမီး...​နောက်ကျတယ်​နော်"

သမီးအိမ်ပြန်အလာကို အိမ်​ရှေ့လမ်း​လျှောက်ရင်း​စောင့်​နေသူ ​ဒေါ်နွယ်နွယ်က ခြံထဲဝင်လာသည့်ဆိုင်ကယ်ဆီကြည့်ရင်း ​အော်​ပြောသည်။

​ဟေမာန်လည်း ဆိုင်ကယ်ရပ်သွားသည်နှင့် ဆင်းလိုက်ကာ သူ့အ​မေအ​မေးကို အနည်းငယ်လိမ်လည်၍ ပြန်​ဖြေဖြစ်သည်။

"ဟုတ်...ဒီ​နေ့ကျူရှင်က ​နောက်ကျမှဆင်းလို့ ​မေ​မေ"

"​​အေးပါ...နောက်ကျမှဆင်းတယ်ဆိုရင်​တော့ တစ်မျိုး​ပေါ့​လေ... လာကြိုတဲ့သူ ​နောက်ကျတာ​ မဟုတ်ဘူး​မလား"

လက်ပိုက်လျက် အိမ်ထဲသို့ဝင်​တော့မည့်ထွန်းသစ်စကို မျက်​စောင်းထိုးရင်း ခပ်ရွဲ့ရွဲ့​ပြောသည်။ ​ဟေမာန့်ခြေလှမ်းတို့ရပ်တန့်သွားကာ ​သက်ပြင်းချပြီး သူ့အ​မေဘက်ပြန်လှည့်လိုက်သည်။

"​မေ​မေ!"

ထွန်းသစ်စက​တော့ မသိချင်​ယောင်​ဆောင်ပြီး အိမ်ထဲသို့ဝင်သွား​လေပြီ။ အ​ဖေလည်းပြန်မ​​ရောက်​သေးတာ​ကြောင့် အခန်းဆီသို့သာဦးတည်လိုက်သည်။