Unicode...
ကျောင်းပိတ်ပြီးကတည်းက အစ်ကိုနှင့်ပထမဆုံးတွေ့ဆုံမည့်နေ့ဖြစ်သည်။ နှစ်ယောက်တည်းတွေ့ဆုံခြင်းမျိုးမဟုတ်ဘဲ ကိုဉာဏ်ရောခန့်ပိုင်ပါလိုက်ကြမည်။ အစ်ကိုကလည်း သူ့ညီမလေးနှင့်မိတ်ဆက်ပေးချင်လို့ဟုဆိုသည်။
အစ်ကို့မိသားစုဝင်တစ်ဦးနှင့်တွေ့ရမည်ဆိုတော့ စိတ်လှုပ်ရှား၏။ အစ်ကိုကသူ့မိသားစုအကြောင်းသိပ်ပြောလေ့မရှိတဲ့သူ။ ပထမဆုံးအကြိမ် သူ့ညီမလေးအကြောင်းပြောပြတော့လည်း စိတ်ဝင်တစားနားထောင်မိသည်။ အစ်ကိုက သူ့ညီမကိုတော်တော်ချစ်ပုံပေါ်၏။
ခါတိုင်းဝတ်နေကျလို ပုဆိုးမဟုတ်တော့ဘဲ မေမေဝယ်ပေးထားသော အုတ်ကျိုးရောင်ဘောင်းဘီတိုကို ယုံကြည်ချက်ရှိရှိရွေးလိုက်သည်။ ဗိုက်ပူပူမပေါ်စေဖို့ အောက်ကအနက်ရောင်စွပ်ကျယ်သားကိုခံပြီး အပေါ်က အဖြူနှင့်ပန်းရောင်အဆင်းကြား ရှပ်အင်္ကျီကို ကြယ်သီးမတပ်ဘဲ ထပ်ဝတ်လိုက်၏။
ဆံပင်ကိုခါတိုင်းလို အုန်းဆီမလိမ်းဘဲ ကိုဉာဏ့်ဆီကဂျယ်အနည်းငယ်ယူပြီး သေသေသပ်သပ်ခွဲလိုက်သည်။ ဒီလိုကျတော့လည်း ပေါ်နေတဲ့လက်နဲ့ခြေသလုံးတွေက ထင်ထားတာထက်ဖွေးနေသလို။
ထက်ရန်သဘောကျစွာ ပြုံးလိုက်ပြီး မျက်မှန်ဝိုင်းကိုတပ်လိုက်သည်။ သူအသင့်ဖြစ်တော့မှ ကိုဉာဏ်ကရေချိုးခန်းထဲကနေထွက်လာပြီး ပြင်ဆင်သည်။ ရေသုတ်ရင်း ထက်ရန်ကို ခေါင်းစခြေဆုံးကြည့်ပြီး ချီးကျူးလိုက်သေး၏။
"အမယ်...ရန်ရန်က ဟုတ်လှပါလား...တစ်ခါမှဘောင်းဘီတိုမဝတ်ဖူးဘဲနဲ့"
"ဟဲဟဲ...ဒီနေ့ကစပြီး ကြိုးစားပြီ"
"ငါ့ဂျယ်တွေမလား"
သပ်ရပ်နေသောဆံပင်တွေကို လှမ်းကိုင်ဖို့ပြင်နေစဉ် ထက်ရန်က ခေါင်းကိုရှောင်လိုက်သည်။
"ကျွန်တော်ဒီနေ့ဝယ်မှာဗျ"
"ပြီးတာပဲ"
ခန့်ပိုင်လည်းအောက်ကိုရောက်နေပြီမို့ မြန်မြန်ပြင်ဆင်ပြီး ထွက်လာခဲ့တော့သည်။ အစ်ကိုက City Parkတွင်ချိန်းထားသည်။ ဘာလို့များကစားကွင်းထဲချိန်းတာလဲဆိုသည့်အဖြေကို ရေလွှာမိကျောင်းစီးပြီးခါစ ရေစိုနေသည့်ဆံပင်များကိုခါနေကြသော မောင်နှမနှစ်ယောက်ကိုမြင်ပြီး နားလည်သွားသည်။
YOU ARE READING
ကောက်ညှင်းထုပ်လေးရဲ့ နှလုံးသားသံစဉ် | ေကာက္ညွင္းထုပ္ေလးရဲ႕ ႏွလုံးသားသံစဥ္
General Fictionသီချင်းတစ်ပုဒ်အတွက် ဘယ်အရာတွေ ပေါင်းစပ်ကာမှ ပြည့်စုံသလဲ...။ ကျွန်တော့်အတွက် အစ်ကိုဟာ ပြည့်စုံခြင်းတစ်ခုပဲ...။ သီခ်င္းတစ္ပုဒ္အတြက္ ဘယ္အရာေတြ ေပါင္းစပ္ကာမွ ျပည့္စုံသလဲ...။ ကြၽန္ေတာ့္အတြက္ အစ္ကိုဟာ ျပည့္စုံျခင္းတစ္ခုပဲ...။ 📘 Cover art by Hawk F...
