Abstarct Of Love (Z&U)

Ep.17 (U)

ဦးမြင့်ကိုဦးတစ်ယောက် ရေချိုးခန်းကထွက်လာကာ ရေစိုနေသောခန္ဓာကိုယ်ကို တဘတ်နဲ့ခြောက်အောင်သုတ်နေမိသည်။ ခေါင်းလျော်ထားတာမို့ ဆံပင်စတို့မှာလဲ ရေသီးရေပေါက်တို့ကခိုတွဲလျှက်ရှိသည်။

ရေသုတ်နေရာမှ စာကြည့်စားပွဲပေါ်သို့ အကြည့်ရောက်သွားချိန်တွင် ဒေါသစိတ်တို့နဲ့အတူ လူပါစာကြည့်ခုံအနားသို့ရောက်သွားသည်။ ရေမချိုးခင်ကတင်ထားတဲ့ စာအိတ်ကအခုသူရေချိုးပြီးပြန်ထွက်လာချိန်တွင် ခုံပေါ်တွင်ထိုစာအိတ်ကရှိမနေတော့။ ကုတင်ရဲ့ခြေရင်းနားမှာ သူ့အတွက်အဝတ်အစားများကလဲအရန်သင့်ရှိနေတာမို့ ဇနီးဖြစ်သူအခန်းထဲဝင်လာတယ်လို့ထင်မိသည်။

" ခင်ရေ ခနလောက်လာပါအုံး။"

ဇနီးဖြစ်သူက ဘုရားခန်းမှထွက်လာတာကို မြင့်ကိုဦးတစ်ယောက် မြင်တွေ့လိုက်ရသည်။
ကိုယ်အပေါ်ပိုင်းကို တဘတ်တင်ကာ အခန်းထဲကထွက်လာပြီး အခန်းရှေ့မှာတွေ့တာကြောင့် ဇနီးသည်ကိုခေါ်လိုက်ခြင်းဖြစ်သည်။

" ဘာများလဲ။ အလန့်တကြားရှိလိုက်တာ။"

သူ၏အနည်းငယ်လောဆော်စွာ ခေါ်လိုက်သံကြောင့် ဇနီးသည်ထိတ်လန့်သွားဟန်တူသည်။ မျက်လုံးကလေးပြူးကျယ်ကာ သူ့အနားသို့ချက်ချင်းရောက်လာသည်။

" ကိုယ့်စာကြည့်ခုံပေါ်က စာအိတ်ခင်သိမ်းမိထားသေးလားလို့။ အဲ့ဒီစာအိတ်ကအရေးကြီးတယ်ခင်။"

" ကိုယ်ဖတ်နေကျစာအုပ်ကြားထဲ ခင်ညှပ်ခဲ့လိုက်တယ်။ အစကတော့အံဆွဲထဲထည့်မလို့ပဲ။ ခင်လဲစာအုပ်တွေရှင်းပြီး ဘုရားပန်းလဲချင်တာနဲ့ စာအုပ်ကြားထဲပဲ ညှပ်ခဲ့လိုက်တာ။"

ဇနီးဖြစ်သူစကားဆုံးတာနဲ့ မြင့်ကိုဦးအခန်းထဲလှည့်ဝင်လာခဲ့တော့သည်။
ဇနီးဖြစ်သူစကားကြောင့် စာအုပ်ကြားထဲညှပ်ထားတဲ့ စာအိတ်ကိုထုတ်ကြည့်လိုက်သည်။

ဟူး...တော်ပါသေးရဲ့။

စာအိတ်ကိုကြည့်လိုက်တော့ ဖွင့်ဖောက်ထားတဲ့အရာမတွေ့တော့မှ သက်ပြင်းချနိုင်သည်။ ခင်ကဒီလိုမျိုးအမူအကျင့်မရှိပေမယ့် သူကစိုးရိမ်နေတာမျိုးဖြစ်သည်။ စာအိတ်ဖွင့်ဖောက်လိုက်လျှင် ခင်တစ်ခုခုကိုတွေ့သွားနိုင်တာကြောင့်ဖြစ်သည်။ ခင်မသိတဲ့အရာတွေရှိနေသည်။ ခင်သိလျှင် စိုးရိမ်စိတ်တွေနဲ့အတူ သူ့ရဲ့အလုပ်တွေကိုသိသွားနိုင်သည်။ ခင်သိသွားလျှင် သားပါအလိုလိုသိသွားနိုင်သည်။