《ပွင့်ဖူးသဇင် ပင်ထိပ်တင် ပန်းတော်ဝင်မို့ ထူးလှတယ် 》

အပိုင်း (၁)မင်း ငါ့အိမ်မှာ ပန်းလာမခူးတော့ဘူးလား?

Scroll down for Zawgyi font

{မင်း ငါ့အိမ်မှာ ပန်းလာမခူးတော့ဘူးလား?}

" ဩကာသ၊ ဩကာသ၊ ဩကာသ၊ကာယကံ၊ ဝစီကံ၊ မနောကံ သဗ္ဗဒေါသ ခပ်သိမ်းသော အပြစ်တို့ကို ပျောက်ပါစေခြင်း အကျိုးငှာ ပထမ၊ ဒုတိယ၊ တတိယ၊ တစ်ကြိမ်၊ နှစ်ကြိမ်၊ သုံးကြိမ်မြောက်အောင် ဘုရားရတနာ၊ တရားရတနာ၊ သံဃာရတနာ၊ ရတနာမြတ်သုံးပါးတို့ကို အရိုအသေ အလေးအမြတ် လက်အုပ်မိုး၍ ရှိခိုးပူဇော် ဖူးမြော်မာန်လျော့ ကန်တော့ပါ၏ အရှင်ဘုရား "

နံနက်ခင်းအာရုံတက်ချိန်တွင် ကြည်လင်ပြတ်သားသော ဘုရားရှိခိုးသံသည် အရပ်ရှစ်မျက်နှာတစ်ခွင်ကို ပျံ့နှံ့နေပါသည်။ လူလတ်တန်းစားမိသားစုအများအပြားနေထိုင်သော ရပ်ကွက်အတွင်း၌ လူအများစုသည် နေ့တစ်နေ့ကို စတင်ရန်အတွက် ပြင်ဆင်လှုပ်ရှားနေကြပြီဖြစ်သည်။ လူအများအပြားသည် တမင်တကာအော်ဆိုနေခြင်းလည်းမဟုတ် ၊ တိုးတိုးသာသာဆိုနေခြင်းလည်း မဟုတ်၊ မြန်လည်းမမြန် နှေးလည်းမ‌နှေးသော ဘုရားရှိခိုးပူဇော်နေသော လူငယ်လေး၏အသံကြောင့် နံနက်ခင်းကား ကျက်သရေအဖြာဖြာပြည့်စုံသွားစေသည်။

" မေကြီးရေ ကျွန်တော် ထမင်းအိုးချက်ထားပြီးပြီဗျ ၊ဒီနေ့လည်း ကျွန်တော်ပဲ ဆိုင်ခင်းလိုက်မယ်၊ ကျောင်းမသွားခင် ဘကြီးတင်တို့အိမ်က ဟင်းသီးဟင်းရွက်တွေယူခဲ့မယ်၊ မေကြီး အိပ်ရေးဝမှ ထခဲ့ပါဗျ "

ဘုရားရှိခိုးပြီးသွားသော ဥဒေါင်းညိုက အိမ်အပေါ်ထပ်တက်ကာ သူ့အမေကိုပြောလိုက်သည်။ အဖေက သာမန်အစိုးရဝန်ထမ်းဖြစ်ပြီး အမေက ရပ်ကွက်အတွင်း ကုန်စုံဆိုင်ကလေးဖွင့်ထားသော ရိုးရှင်းသော မိသားစုက သားဖြစ်သော ဥ‌ဒေါင်းညိုက ရပ်ကွက်၏ အချစ်ခံလေးဖြစ်သည်။ လိမ္မာရေးခြားရှိပြီး အများကို ကူညီတတ်သော ကျောင်းသားလေးက ယနေ့တွင် ဆယ်တန်းကို စတက်ရပြီဖြစ်သည်။ နောက်နှစ်သာဆိုရင် သူက အဆင့်မြင့်တက္ကသိုလ်ကို ဝင်ခွင့်ရရန် ဖြေဆိုရမည်ဖြစ်သည်။