ညို

အခန်း - ၂၃

"အတူကချင်လား"

ညို့မေးခွန်းမှာ အဏ္ဏဝါ အနည်းငယ် ထိတ်လန့်သွားရသည်။ သူမ သီချင်းတွေကို ညို့လိုမှ မချစ်နိုင်တာ။

"ကျွန်မ မကတတ်ဘူးလေညိုရဲ့"

"အို ညို့လက်ကိုသာ ထိထားစမ်းပါ။ အရာအားလုံး ဖြစ်သွားစေရမယ်"

ညိုက ပြောလည်းပြောရင်း ကက်ဆက်ကိုပိတ်လိုက်သည်။ ဒါဖြင့် သူ အင်္ဂလိပ်သီချင်းဖြင့် ကလိမ့်မည်။ ညို .. ညို ခက်ရချည်ရဲ့လို့။ ထင်သည့်အတိုင်းပင် သူ့ဖုန်းကိုဖွင့်ပြီး သီချင်းရွေးနေသည့်ညို။ ထို့နောက် သူ့ထဘီကို သေချာတင်းရင်းစွာ ပြန်ပြင်ဝတ်နေသေးသည်။ ခါးတိုအင်္ကျီ၏အောက်အစနား၌ အညိုရောင်အရေပြားများ ကမ္ဘာကိုကောင်းချီးပေးရန် မျက်နှာမူလာကြသည်။

"လာပါ။ ညို့ကို မင်းလက်ပေး"

မတ်တပ်ရပ်ရင်းကနေ အဏ္ဏဝါ့ကို လက်ကမ်းနေသည့် ညို။ အဏ္ဏဝါ့အသိစိတ်များထဲ ပို၍ရှင်းလင်းလာသည်။ တယောညိုက အပြိုင်စကြဝဠာတိုင်းမှာ ကိုးကွယ်ထားရမယ့် မိန်းမပဲ။

အသံလုံအခန်းထဲ ငြိမ့်ညောစွာ ထွက်လာသည့် တီးလုံးသံ။ ညိုဖွင့်သည့် ထိုသီချင်းကို သူမ မကြားဖူးပါ။ ညိုကတော့ သူမ၏ လက်တစ်ဖက်ကိုဆွဲယူမတ်တပ်ရပ်စေပြီးနောက် အနောက်သို့ ခြေတစ်လှမ်းမျှ ညင်သာစွာ ဆုတ်သည်။ ညို့အကြည့်များ တောက်ပလာသည်။

'The world was on fire and no one could save me but you
It's strange what desire will make foolish people do
I never dreamed that I'd meet somebody like you
And I never dreamed that I'd lose somebody like you'

ဆွဲဆွဲငင်ငင်ဆိုနေသည့် အမျိုးသားတစ်ဦး၏အသံဟုသာ သူမ သိသည်။ ညိုက အဏ္ဏဝါ့လက်တစ်ဖက်ကို သူ့ပုခုံးပေါ်တင်စေ၍၊ ကျန်တစ်ဖက်ကို သူ့ခါးသွယ်သွယ်၌ ဖက်စေသည်။ ဘုရားရေ .. ဒီလို ညိုနဲ့အတူတွဲကနေမယ့် ယောက်ျားတွေကို မြင်ယောင်ရင်း အဏ္ဏဝါ ပူလောင်ခဲ့ဖူးသည်မဟုတ်ပါလား။ ယခုတော့ဖြင့် ..

'No, I don't wanna fall in love (this world is only gonna break your heart) No, I don't wanna fall in love (this world is only gonna break your heart) With you With you (This world is only gonna break your heart)'

ညို့လက်များ အဏ္ဏဝါ့ကျောပြင်၌ မြဲမြံစွာ ကုပ်တွယ်ထားကြသည်။ သံစဉ်အလိုက် ညို့ခြေများ ဖြည်းညင်းစွာပင် လှုပ်ရှားနေသည်မို့ ညိုနဲ့ထပ်တူကျအောင် သူမ သိပ်ပြီးကြိုးစားမရာမလိုနေ။ ညိုက သူ့မေးဖျားကို အဏ္ဏဝါ့လည်တိုင်၌ အပ်ထားသည်။ ထိုအသက်ရှူနှုန်းက မှန်းဆရခက်သည်။ သီချင်းသံများက ပိုလို့ပင်ဆိုးပါသည်။