Unicode
အခန်း(၂၀) - ကန်စွန်းဥပန်ကိတ်
စာရေးသူ - NanFangLiZhi Southern Lychee 南方荔枝
ဘာသာပြန်ဆိုသူ - Snowtowel
ရွာသူ/သားတွေ ဘယ်တွေပဲပြောပြော လင်းချင်းဟယ်နှင့် သူမသား သုံးယောက်ကတော့ အိပ်မက်လှလှတွေ မက်နေကြပြီ။
နောက်တစ်နေ့ မနက်စောစောတွင် လင်းချင်းဟယ်သည် အဝတ်အစားများ လျှော်ဖွတ်ပြီးနောက် ပြန်လာကာ ဂျုံယာဂုကို ချက်ပြုတ်လိုက်သည်။
အခု သူမ သူတို့ကို သုံးရက်ကြာတိုင်း ရေချိုးပေးပေမယ့် ခြေထောက်တွေကိုတော့ နေ့တိုင်း ဆေးကြောစေသည်။
သူမသည် ညီအစ်ကို သုံးယောက်အတွက် ဆားနယ်ထားသော ဝက်ဝမ်းဗိုက်သားကို ကြော်လိုက်သည်။ ဆားနယ်ထားသော ဝက်ဝမ်းဗိုက်သားကို နောက်ထပ် ဟင်းခတ်အမွှေးအကြိုင် ထပ်ထည့်စရာမလိုတော့ဘူး။ ဆီထဲ ဒီတိုင်းကြော်လိုက်ရုံနဲ့ အနံ့က အရမ်းမွှေးကြိုင်လာသည်။
အိုးထဲကျန်သည့်ဆီဖြင့် ညီအစ်ကို တစ်ယောက်စီအတွက် ကြက်ဥ တစ်လုံးစီ အနှစ်မကွဲ မကျက်တကျက် ကြော်လိုက်သည်။
မနက်စာက ရိုးရှင်းပေမယ့် ညီအစ်ကို သုံးယောက်လုံး စိတ်ကျေနပ် အားရကြသည်။
“ အမေ….. အမေက ဘယ်လို နေထိုင်ရမယ်ဆိုတာ မသိဘူးလို့ အပြင်လူတွေက ပြောနေကြတယ် “ ကျိုးလောင်တက မကျက်တကျက် ကြက်ဥကြော်ကို ဝါးရင်း မစဉ်းစားဘဲ ပြောလိုက်သည်။
အပြင်မှာ ဆော့ကစားနေစဉ် ထိုအကြောင်းကို သူ ကြားခဲ့သည်။
သူလည်း ကြားကြောင်း ဖော်ပြသည့်အနေဖြင့် လောင်အာ့လည်း ခေါင်းညိမ့်ပြသည်ကို လင်းချင်းဟယ် မြင်လိုက်သည်။ သူမက မျက်ခုံးပင့်လိုက်ပြီး “ အမေက ဘယ်လို နေထိုင်ရမလဲ မသိဘူးလို့ မင်းတို့ကော ထင်နေတာလား “
“ မထင်ပါဘူး “ ကျိုးလောင်တက ပြန်ဖြေသည်။
“ အမေ…. ဒါက ဘဝကို ဘယ်လိုနေထိုင်ရမယ် ဆိုတာပဲ “ ကျိုးလောင်အာ့ကလည်း ပြန်ဖြေသည်။
“ အရသာရှိတယ် “ အငမ်းမရစားနေသော လောင်စန်းက ဆက်ပြောသည်။
“ သူတို့ပြောချင်တာကို ပြောပါစေ။ မင်းတို့အမေ… ငါက သူတို့ပိုက်ဆံကို သုံးနေတာ မဟုတ်ဘူး။ ငါ့ယောကျာ်းက ငါ့အတွက် ပိုက်ဆံရှာနေတာ ငါက ဘာလို့ မသုံးရမှာလဲ။ ပြီးတော့ ငါ့မှာ ပြုစုပျိုးထောင်ရမယ့် သား သုံးယောက် ရှိသေးတယ်။ ငါ မင်းတို့ကို ဖြူဖွေးပြီး ထွားကြိုင်းအောင် ပြုစုပျိုးထောင်ဖို့ မလိုဘူးလား။ ငါ ပိုက်ဆံမသုံးရင် မင်းတို့လို အစားကြီးတဲ့ ကလေးတွေကို ပြုစုစောင့်ရှောက်ဖို့ ငါ ဘယ်လိုလုပ်ရမှာလဲ “ လင်းချင်းဟယ်က ပြောသည်။
