Unicode
အခန်း (၁၆၃) - တူညီသော တွေးခေါ်မှုမျိုး မရှိခြင်း
တတိယမောင်လေးလင်းက ပြုံးပြီး ခေါင်းညိတ်သည်။ လင်းချင်းဟယ်သည် သူ့အား မကြာခဏ ကလေးမမွေးရန်အတွက် ဖျောင်းဖျရန် စိတ်ထဲ တွေးမိလိုက်သော်လည်း ထိုအတွေးကို မေ့ပစ်ရန် ဆုံးဖြတ်လိုက်သည်။
သူမက အစ်မကြီးဖြစ်ရင်တောင်မှ တစ်ချို့အရာများကိုမူ ပြောရန် မသင့်တော်ပေ။
ထို့အပြင် သူမသည် သမီးသုံးယောက်အား အစဉ်လိုက်မွေးဖွားထားသည့် တတိယယောက်မလင်း၏ အတွေ့အကြုံကို သူမကိုယ်တိုင် အမှန်တကယ် မခံစားဖူးပေ။ ထို့ကြောင့် စကားနည်းနည်းသာ ပြောပြီး လင်မယားနှစ်ယောက်ကို သူတို့ဘာသာ ဆုံးဖြတ်ခွင့်ပေးလိုက်တာက ပိုကောင်းသည်။
မျှော်လင့်ထားသည့်အတိုင်း လင်းချင်းဟယ်သည် သူမ၏မောင်လေးနှင့် တူမနှစ်ယောက်ကို ဧည့်ခံကျွေးမွေးခဲ့သည်။ သူမသည် သူတို့အားလုံးကို အပြုံးပန်းများစွာဖြင့် အိမ်ပြန်စေခဲ့သည်။
နှစ်သစ်၏ ဒုတိယမြောက်နေ့တွင် လင်းချင်းဟယ်နှင့် ကျိုးချင်းပိုင်တို့သည် ကောင်လေးများကို မြို့ပေါ်သို့ ခေါ်ဆောင်သွားခဲ့သည်။
ယခင်နှစ်များကဲ့သို့ပင် ကောင်လေးများကို စားကြသောက်ကြရန်နှင့် ဆော့ကစားပျော်ပါးရန် အပြင်သို့ ခေါ်သွားကြသည်။
သူတို့သည် ကျိုးရှောင်မိန်ထံသို့ သွားရောက်လည်ပတ်ကြမည်မှာလည်း အသေအချာပင် ဖြစ်သည်။
ကျိုးရှောင်မိန်သည် ကိုယ်ဝန်ရှိနေပြီး သူမ၏အသားအရည်က သိသာထင်ရှားစွာ ကြည့်ကောင်းနေသည်။ သူမသည် ကောက်ညှင်းထုပ်ကဲ့သို့ ပြည့်ဖောင်းဖောင်းလေး ဖြစ်နေသည်။
သူမကို မြင်သောအခါ လင်းချင်းဟယ်သည် အလွန် စိတ်လှုပ်ရှား ထိခိုက်ခံစားလိုက်ရသည်။ ကံကောင်းထောက်မစွာဖြင့် သူမ(လင်းချင်းဟယ်)သည် သူမကဲ့သို့ ကလေးမမွေးရတော့ပေ။ သူမ သိရသမျှတော့ ကိုယ်ဝန်ဆောင်ပြီး ကလေးမွေးသည့် အမျိုးသမီးတိုင်းသည် ရုပ်ပျက်ဆင်းပျက် ဖြစ်သွားတတ်ကြသည်။
