من نهل الانوار المحمديه(ج١)

للكاظم

كضمت الغيض حزنك فيض
بيك الشيعه مايدرون
بيك الشيعه مايدرون
..........
بطامورة سجن ضلمه
وقيودك تهد الحيل
گضيت سنين من عمرك
لاتعرف نهار وليل
بيك الشيعه ماتدري
عفاك تحملت هالويل
ضنهم ينطفي نورك
يل علمك بحر والسيل
ضلم سجنوك ...مارحموك
تالي بسمهم يغدرون
بيك الشيعه مايدرون
.....
عنه ماسمعنه اخبار
راهب هاشم يسجنوه
تمر اعوام والكاظم
عن العالم يعزلوه
مو موسى بسجن بغداد
چنهم للنبي يقيدوه
بتراب السجن ياناس
امام الرافضه يسجوه
تمر صعبه...بارض غربه
واهله عنه ينشدون
بيك الشيعه مايدرون
.....
يبن جعفر لفاك الموت
وانته مقيد ومسجون
لاواحد غمضلك عين
لابشفاهك يگطرون
املاك السمه نزلت
اجو لمصابك ينوحون
حيطان السجن مولاي
تنعاك بدمع العيون
عده يسموك..ضلم غدروك
حرمة طه مايرعون
بيك الشيعه مايدرون
.....
حسافه تنغدر مسموم
حسافه لو اجاك الموت
ياحاله الصرت بيه
من سمك تون بسكوت
تخافن لو يسمعوهه
وتسمع للشماته صوت
وحيد تغمض عيونك
بغربه من يفوت الفوت
يقيدونك ....يسمونك
بضلمك ياعذر ينطون
بيك الشيعه مايدرون
.......
يشيعه والاشد واصعب
حماميل اربعه يشيلوه
بسلاسل قيدو جثته
باطراف الجسر يرموه
غريب وما اله دفان
ماله اهل ويشيعوه
امام الرافضه صاحو
وليكم طايح تلكوه
اجو غسلو.. بدمع ينعوه
عزاء الاجله ينصبون
بيك الشيعه مايدرون
.....
للخادمه ام عباس الخفاجي