قلبي لاهب دمعي ساجب
كل هلي صرعى اعله ارض الغاضريه
٠٠٠٠٠٠٠٠٠٠٠٠٠٠
السجاد واني ابجي بدمع
اعله حسين مكسور الضلع
والدي الما مثله ابو
شلون راسه ينكطع
واجب الابن ياشيعتي
يدفن ابوه بهالوضع
وانه اشوفنه اعلى الارض
قلبي ياشيعه ينفجع
جروني بحبال العده
عنه خذوني هالجمع
والدي يانعم الابو
بانوار قدسيه يشع
اعلى الحبايب قلبي لاهب
وانه اشوف حسين ابويه
اعلى الوطيه
٠٠٠٠٠٠٠٠٠٠
صديت عيني للنهر
اندب يبن راعي الفخر
عباس يابو المرجله
من شوفتك قلبي انفطر
ودعتك بالله ورحت
الرايتك صديت النضر
ناديتك بدمعة حزن
ياحيف هالجف انبتر
انعاك وابجي اعله العلم
وشلون ساريه انكسر
هذا عمي جفه مرمي
ياحسافه العايله بعده سبيه
٠٠٠٠٠٠٠٠٠٠٠
صديت يمنه ويسرتي
مكدرت احبس دمعيتي
ياخويه يالاكبر صحت
بلكن تهب الصيحتي
من شفتك مكطع وصل
للكاع نخت هامتي
يالاكبر لمصابك ذبت
واشهكت يا مر شهكتي
ياخويه اضل طول العمر
عليك اسجب دمعتي
ياكربلا شنهو السبب
مني خذيتي كل هلي
نار الاكبر بقلبي تسعر
يا شبيه الهادي ليك اصفك بديه
٠٠٠٠٠٠٠٠
ياشيعه من علتي نمت
بالطيف هالحاله شفت
كل بني هاشم غربو
وانه اصرخ وبيهم صحت
لاوين تردون المشي
ردت امشي لاجن مكدرت
من بعيد حديت النضر
حيدر علي وطه شفت
والزهره بيديه الطفل
ناديت مارد اسمعت
بالطيف بس انه وحرم
لخرايب الشام وصلت
ليهم اكصد محد يرد
لن اعاين مقيد بيد ال اميه
******
للخادمه ام عباس الخفاجي
أنت تقرأ
من نهل الانوار المحمديه(ج١)
Poesíaابيات في حق اهل البيت اقل ما يمكن ان نقدمه ابابيات من تاليفي عدا بارت كانت ابوذيات سمعتها وحفضتها منذ الطفوله لم اعرف مؤلفها وضعتها وثوابها له هن عباره عن اربع او خمس ابوذيات
