Unicode☕️
"အဲ့ဒီလိုဆိုရင်တောင် ကိုယ်ကမပေးပါဘူး"
ကိုကိုးလက်ကောက်ဝတ်ကို ဆုပ်ကိုင်ထားခဲ့တဲ့ လင်းဟန်သာရဲ့လက်တွေကပြန်ပြေလျော့သွားတယ်။ကိုကိုးက ဆိုဖာပေါ်ကိုလက်နှစ်ဖက်လုံးထောက်ချလိုက်ပြီးတော့ လင်းဟန်သာကိုရွှန်းလဲ့ကြည်တောက်နေတဲ့ မျက်၀န်းနက်နက်တွေနဲ့ ခပ်မော့မော့လေး ကြည့်လိုက်ရင်းမျှော်လင့်ချက်လေးရေးရေးလောက်နှင့် စကားစတယ်။
"ဒေါက်တာ ကျွန်တော့်ကိုနည်းနည်းလေးတောင် မချစ်တာကသေချာရဲ့လား"
စကားဝိုင်းက ဦးတည်ချက်ပြောင်းသွားတော့ လင်းဟန်သာရဲ့မျက်နှာက ပုံမှန်ထက်ပိုတည်တံ့သွားတယ်။သူ့ရဲ့ဗာဒံစေ့သဏ္ဍာန် မျက်ဝန်းညိုညိုတွေက ကိုကိုးကို တိတိကျကျကြည့်မနေတော့ပါ။အဲ့ဒီအခိုက်အတန့်မှာ လင်းဟန်သာ ဘာတွေတွေးနေခဲ့မလဲ။ကိုကိုးဟာလည်း ဘယ်လိုအတွေးတွေကြောင့် ဒီလိုမေးခွန်းကိုဆွဲထုတ်လာရသလဲ ကာယကံရှင်တို့သာသိနိုင်လိမ့်မယ်။
"မင်းကရော.....ကိုယ့်ကိုချစ်တာ မင်းကိုယ်မင်းသေချာရဲ့လား"
တချို့တိတ်ဆိတ်တွေက အကျယ်လောင်ဆုံးပဲ။ဖွင့်ထားတဲ့ ပြတင်းပေါက်တွေဆီကဝင်လာတဲ့မိုးသက်လေကစကော့တလန်ဇာအုပ် ကတ္တီပါကန့်လန့်ကာတွေကိုတောင်လွင့်လွင့်လူးလူး ဖြစ်သွားစေတယ်။ကံကောင်းထောက်မစွာနှင့် သစ်ကြမ်းပိုးခေါက်ရနံ့ဖယောင်းတိုင်တွေကိုတော့ မငြိမ်းသက်သွားစေပါ။ လင်းဟန်သာကို ငေးခနဲဖြစ်စေလောက်တဲ့အထိသူ့ရဲ့သွားတန်းဖြူဖြူလေးတွေကိုလှစ်ပြရင်း ကိုကိုးကနှစ်နှစ်ခြိုက်ခြိုက်ရယ်လိုက်တယ်။
"အသက်သုံးဆယ်အရွယ်လူကြီးက ဆယ့်ရှစ်နှစ်ကောင်လေးသူ့အသည်းကိုကစားသွားမှာ ကြောက်နေတာလား"
ကိုကိုးဒီလိုပြောတော့ ဒေါက်တာကမျက်နှာကို ခပ်စောင်းစောင်းလွှဲသွားတယ်။ ဘုရားရေ....သူ့ဒေါက်တာက တကယ်ကို မယုံမရဲနှင့်ကိုကိုးကိုသံသယဝင်နေတာပါလား။ကိုကိုးမှာ ရယ်ရအခက်၊ငိုရအခက်ပါပဲ။
"အိုးမိုင်ဂေါ့...တကယ်ကြီး အဲ့ဒီလိုတွေးနေတာလား ဒေါက်တာ"
ကိုကိုးက ပြောရင်းဆိုရင်း သူ့မျက်နှာကိုမကြည့်ဘဲဘေးစောင်းလွှဲထားတဲ့ လင်းဟန်သာရဲ့ဘေးတိုက်မျက်နှာနားဆီ တိုးကပ်ပစ်လိုက်တော့ နှစ်ယောက်သားရဲ့အကွာအဝေးကနီးကပ်သွားတယ်။ နှစ်ယောက်ကြားမှာလက်သုံးလုံးစာ အကွာအဝေးသာရှိတော့တယ်။ဒီအကွာအဝေးကို မသိသေးတဲ့လင်းဟန်သာက ခေါင်းကိုဆတ်ခနဲပြန်လှည့်လာတော့ နှာခေါင်းထိပ်လေးနှစ်ခုက ထိကပ်သွားပြီး မျက်ဝန်းနှစ်စုံကြားမှာ လင်းဟန်သာရဲ့လေးထောင့်ဆတ်ဆတ် မျက်မှန်သာရှိတော့တယ်။ ဆုံစိုက်သွားတဲ့ အကြည့်နှစ်စုံဟာ ဗို့အားတစ်ခုကိုဖြစ်ပေါ်စေမယ့် လျှပ်စီးကြောင်းလေးလို နှစ်ဦးစလုံးရဲ့ရင်ကိုတလှပ်လှပ်ဖြစ်စေတယ်။
YOU ARE READING
Kōhī {Complete }
RomanceKōhī = coffee in japanese☕☕ This story will make you feel warm and cozy, like having coffee on a rainy day.
