Unicode🦊
ညီညီက ပိတ်ရက်နှစ်ရက်လုံး အိပ်ယာထဲမှာ ဟိုခွေဒီခွေနှင့်သာ နေနေတော့တယ်။ရေဆာရင်ရေထွက်သောက်၊ထမင်းဆာရင် ထမင်းထွက်စားရုံကလွဲလို့ တွင်းအောင်းသတ္တဝါလို သူ့အိပ်ခန်းထဲကနေကို ထွက်မလာခဲ့ဘူး။ပိတ်ရက်နှစ်ရက်လုံး အခန်းထဲကနေပဲ တနင်္လာနေ့အလုပ်တက်ရင် ကောင်းမလား၊မတက်တာ ပိုကောင်းမလားဆိုတာကို သူထိုင်စဉ်းစားနေခဲ့တာ။နောက်ဆုံးတော့ မသွားဖို့ကသာအနိုင်ရသွားတယ်။
တနင်္လာနေ့မနက်မှာတော့ သူ့အမေကအခန်းတံခါး လာခေါက်ပြီး အလုပ်မသွားဘူးလားဆိုတဲ့အကြောင်း မေးမြန်းလာပါတယ်။အိပ်ယာထဲကမထရသေးတဲ့ ညီညီ့ရဲ့အသံကွဲအက်အက်က သူ့ကိုတကယ်ဖျားနာနေတယ်လို့ အထင်ခံရစေတယ်။
မနက်စာအခန်းထဲလာပို့ပေးရမလားဆိုတဲ့ မေးခွန်းထပ်မေးပြီးတဲ့နောက် အမေကပြန်ထွက်သွားခဲ့လို့ ညီညီ့အခန်းလည်းပြန်တိတ်ဆိတ်သွားပါတယ်။သူ့အမေကသူ့အဖြေကိုတောင် မစောင့်ဘဲပြန်ထွက်သွားတာကြောင့် မနက်စာကိုအိပ်ခန်းထဲတကယ် ယူလာပေးလောက်တယ်လို့ ညီညီတွေးမိတော့ သူ့အမေအိပ်ခန်းထဲကို မနက်စာသယ်ပေးလာတဲ့အချိန်အထိ သူအိပ်ယာထဲခွေမနေချင်တော့ပါ။ မျက်နှာသစ်ကိုယ်လက်သန့်စင်ဖို့ ထလိုက်ပါတယ်။ကံကောင်းတာလား၊ဆိုးတာလားမသိပေမယ့် သူ့နဖူးကတကယ်ကိုနွေးနေပြီး သူ့မှာတကယ်အဖျားသွေးရှိနေတာပဲ။
နောက်ဆက်တွဲအနေနှင့် သူ့ရဲ့ခြေဆစ်လက်ဆစ်တွေပါ ကိုက်ခဲလာပြီးတော့ လက်ဖဝါး၊ခြေဖဝါးတွေက ပူလာခဲ့တယ်။မျက်စိတွေလည်း ပူပြီးစပ်ဖျဉ်းဖျဉ်းဖြစ်လာသလို ပါးနှင့်နှုတ်ခမ်းသားတွေကတော့ ခပ်ရဲရဲဖြစ်လာတယ်။
သူကိုယ်လက်သန့်စင်ပြီးကုတင်ပေါ် ပြန်ခွေတော့မယ့်ဆဲဆဲမှာပဲ နွားနို့တစ်ခွက်ရယ် ခရင်မ်မပါတဲ့ဘီစကစ်အလွတ်တွေရယ်ထည့်ထားတဲ့ မနက်စာဗန်းနှင့်အတူအမေက အခန်းထဲကိုပြန်ဝင်လာတယ်။
ညီညီ နွားနို့ထဲဘီစကစ်တွေသုံးလေးချပ်လောက်စိမ်ကာ စိတ်မပါလက်မပါစားပြီးတဲ့အချိန်မှာ အမေ့ဆီက စိုးရိမ်မကင်းအသံထွက်လာပါတယ်။
ESTÁS LEYENDO
Kōhī {Complete }
RomanceKōhī = coffee in japanese☕☕ This story will make you feel warm and cozy, like having coffee on a rainy day.
