Unicode🦊
ကုမ္ပဏီညစာစားပွဲပြီးသွားတဲ့ နောက်နေ့က တိုက်တိုက်ဆိုင်ဆိုင်ပဲ ပိတ်ရက်နှင့်သွားကြုံနေလေတော့ ညီညီ့အတွက်စိတ်လက်ပေါ့ပါးပြီး ကုတင်ပေါ်မှာပိုက်ဆံထိုင်ရေနေရုံသာရှိတယ်။သေချာတာပေါ့။ အဲ့ဒါမြေခွေးပေးလိုက်တဲ့ သူ့အတွက်bonusတွေလေ။မြေခွေးရဲ့စကားမတည်သမျှထဲမှာ ဒီလိုလစာဖြတ်တယ်ပြောပြီး လကုန်အပြည့်ရနေတာတို့၊bonusမရတော့ဘူးပြောပြီး ပေးလာတာမျိုးတို့ကိုတော့ သူနည်းနည်းသဘောကျမိပါတယ်။
မနေ့ညက ညီညီအိမ်ကိုပြန်ရောက်တော့ ညဆယ်နာရီနားကပ်နေပြီး သူ့အဖေနှင့်အမေတောင်အိပ်ယာထဲဝင်သွားနှင့်ကြပြီ။သူအိမ်နားရောက်ခါနီးမှာတော့ မေမေကဘယ်အချိန်ပြန်ရောက်မလဲဆိုတဲ့အကြောင်း ဖုန်းဆက်မေးခဲ့သေးတယ်။အဲ့ဒီအချိန်တုန်းက သူကမြေခွေးကားပေါ်မှာပဲ ရှိနေသေးတာ။ပြီးတော့ မေမေကလည်းသူ့ရဲ့ဂျစ်တူးဆိုတဲ့အိမ်ခေါ်နာမည်ကို အဆက်မပြတ်ထည့်ခေါ်လာတော့ တိတ်ဆိတ်နေတဲ့ကားအတွင်းမှာ ဖုန်းရဲ့စပီကာအားကောင်းမှုနှင့်မြေခွေးကသူ့ရဲ့ဒီရှက်ဖွယ်ကောင်းတဲ့ နာမည်ကိုသိသွားခဲ့ပါတယ်။အရမ်းမျက်နှာကိုဖွက်ထားချင်စရာ ကောင်းတယ်။
ဒါပေမယ့် မြေခွေးက အဲဒီနာမည်နှင့်ပတ်သက်ပြီး တကူးတက အတိုက်အခံလုပ်စနောက်မလာတာကြောင့် သူနည်းနည်းအသက်ရှူချောင်သွားပေမယ့် သိပ်မကြာပါဘူး။စိတ်တိုစရာတစ်ခုက စလာပါတယ်။အဲဒါက အိမ်ရှေ့နားရောက်တော့ သူဆင်းမယ်ပြင်ခါနီးမှ မြေခွေးကခဏစောင့်ဖို့ပြောပြီး ငွေမှင်ရောင်စာအိတ်ဖောင်းဖောင်းလေး ထုတ်လာခဲ့တယ်။တစ်ဆက်တည်းကားဒက်ရှ်ဘုတ်ထဲက အနက်ရောင်မှင်စိုဘောပင်ကိုလည်း ထုတ်လိုက်သေးတယ်။အဲ့ဒီနောက် ကားစတီယာရင်ပေါ် စာအိတ်ကိုတင်လိုက်ပြီး အနက်ရောင်ဘောပင်နှင့်တစ်စုံတစ်ခုကို ရေးခြစ်လိုက်တယ်။ညီညီကတော့ စိတ်ရှုပ်ထွေးရင်း တစ်ဖက်လူကိုအမေးသက်သက် မျက်လုံးတွေနှင့်သာကြည့်နေလိုက်ပါတယ်။
"ရော့"
မြေခွေးကမချိုမချဉ်ပြုံးရင်း ရေးခြစ်ပြီးသွားတဲ့ စာအိတ်ကိုသူ့ဆီလှမ်းပေးလာချိန်မှာ စိတ်မရှည်မှုနှင့်အတူ သူခပ်မြန်မြန်ပဲဆွဲယူကြည့်လိုက်တယ်။လက်ရေးတွေက ခပ်သော့သော့နှင့်လေးထောင့်ဆန်ပေမယ့် အသတ်နေရာလေးများမှာတော့ ဝိုင်းသွားပြန်တယ်။
YOU ARE READING
Kōhī {Complete }
RomanceKōhī = coffee in japanese☕☕ This story will make you feel warm and cozy, like having coffee on a rainy day.
