جيت إلك ولهان وعيونك دروب

البارت التاسع والأربعون

الـكـاتـبـة : عـلـيـا الـنـاصـر

جـيـت إلـك ولـهـان وعـيـونـك دروب

الـبـارت : الـ 49

شاهين : زفر بقوة وكان راح ينفجر بيها ويرزلها لأنه ضايج منها وما يريد يسمع صوتها بس تمالك نفسة بأخر لحظة وسد الخط بوجهة بس بعد ثواني رجع تعالى صوت الرنين فتح الخط وصاح بيها وتالي وياچ مو تشوفيني فصلته وصارلي يومين ما جاي أريد عليچ معناها شنو يعني ما أريد أسمعة لصوتچ وولا أريد أأ ..

سارة : قاطعتة بدون مقدمات وهي تصرخ عليه طلااااااال أخذوه للسجن البارحة وجوي جماعة مجهولين أخذوه لبابا من الصبح وماما تخربطت وضغطها صعد ويجوز تنجلط وتموت وإتصلت بيك لأن ما عندي أحد أتصل عليه بس الظاهر غلطت وسدت الخط

شاهين : ألوووو .. ألوو ساااااااارة ورجع إتصل عليها يطلعلة مغلق أستغفر الله العظيم وفرك وجهة بعصبية

نجلة : خيرك يمه شبيك عالبنية ما تگلي ليش هيچي صيحت عليها ونافرها وما تطيق تسمع بسيرتها لو تداني إسمها ولا عبالك من سافرت وشردت تضم السالفة عليه تراني حاسة بيك وشايفة كل شي جدامي وإذا تشوفني ساكتة فبس لني ما أريد أتصرف وأخربها شاهين يا عيون إمك شنهو سوتلك البنية لو بدر منها بحگك لنك إبني وأعرفك كلش زين ما تنفر من أحد وتتجاهله إلا لو چان دايس ببطنك وقاهرك گلي يمه وريحني

شاهين : صارت مشكلة بيني وبينها وإن شاء الله تنحل لنها ما تستاهل وأهم شي هسة خلينة نشوف حل لمشكلته لأخوها وأبوها قبل ما يرحون بشربة مي

نجلة : ليش شصاير وياهم إسم الله

شاهين : واگعين بمصيبة وبس الله يستر وإتصل على أحمد رن .. ورن .. ورن ومن إنفتح الخط يا معود وينك محتاجينك ضروري وإنتَ تتغلى وما ترد علينه

غادة : هلا يا گلبي هلا بالعريس وصلتنا أخبارك وهاي شلون سويتها هيچي مفاجئة للكل وبدون لا تخبر أحد وشلونك وشلون صحتك والحمدلله على سلامتكم كلكم وإعذروني ما گدرت أجي عليكم وأشوفكم بس إن شاء الله أعوضها بعرسك