جيت إلك ولهان وعيونك دروب

البارت الرابع والخمسون

الـكـاتـبـة : عـلـيـا الـنـاصـر

جـيـت إلـك ولـهـان وعـيـونـك دروب

الـبـارت : الـ 54

مرام : ظلت تدگ بالباب وتصيح على شهم لحتى يفتحلها الباب لحد ما إنبح صوتها ومن تعبت وأيست كعدت بالگاع دخيلك يا ربي ليش بيلتني بهذا المخبل هسة أني وين أروح ووين أنطي وجهي وعلى حظي هذولا إختفوا ومحد بين منهم وغمضت عيونها بحرگة وهي تتنهد وتستغفر ورى ساعة ونص تقريباً إنفتح الباب ورجعلها شهم ناظرته بغيض وحقد

شهم : يله گومي لو عاجبتچ الگعدة هنا ومن ما نطت أي ردة فعل وظلت على گعدتها ونفس نظرتها إنحنى عليها وسحبها من ذراعها وگومها وگفها وبحدة گتلچ گومي

مرام : شرايد مني عوفني بحالي تريد تفضحني گدام أهلي وأهلك لو شنو نيتك بالضبط لك إحچي ليش ساكت مو ورمتة لگلبي

شهم : ما رد عليها طلعها من بيت وضاح لبرى وهو يسحب بيها إلى أن وصلها لحد سيارتة فتح الباب إصعدي يله

مرام : عزى وصخام بعيني وين أصعد وين تريد بية

شهم : بلا مصاخة عاد وإصعدي فضيني

مرام : ما أصعد وإنتَ اللي بلا مصاختك وعوفني بحالي شتريد مني سألتك وين تريد بية

شهم : إنتِ مو مالت إحترام بس ما عليچ عتب أختچ منو ودفعها بالصدر صعدها وقفل الباب عليها ورجع صعد حرك السيارة بسرعة

مرام : نزلني ما أريد أروح وياك هي گوة خوما گوة زين عوفك مني وأهلي شراح تگوللهم بابا اللي عادك مثل إبنة شلون هيچي راح تنزل راسة شلون راح تواجهة وتحط عينك بعينة لو سألك ليش هيچي كسرته بنته ششههههههههههههههم

شهم : صاح بيها ووجع لا تصيحين

مرام : لعد جاوبني ورد علية لخاطر الله إحچي ومن ما سمعت رده فتحت الباب وردات تشمر روحها من عنده

شهم : ضرب بريك راساً ووگف السيارة ومسكها من إيدها بقوة ومنعها تچيت وصاح بيها ولچ خبلة إنتِ تريدين تموتين وقفل الباب

مرام : عوفني أموت طبني طب بعدين الموت أحسنلي ما أبقى وياك وتصخمة لوجهي لك خاف الله بية لا تكسرني وخليني أرجع ذاتاً إحنة راجعين لبغداد وما راح نبقى يمكم وراح تخلص مني وبعد ما تشوفني شهم أحلفك بكل عزيز على گلبك وأحلفك بالله لا تأذيني ورجعني وگامت تشهگ وتبچي لك أني بشنو أذيتك ليش هيچي حاقد عليه إنتَ لك إحچي عاد