جيت إلك ولهان وعيونك دروب

البارت السادس

جيت إلك ولهان وعيونك دروب

الكاتبة : عليا الناصر

البارت ال : 6

حميدة : يا ساتر يا ستار شصاير شنهو إنغارينا ولكم وطلعت من غرفتها يولي غيدة .. غيدة شكو من الصباحيات ومن غادة ما حچت بس أشرتلها على نجلة أم شاهين مرته لوضاح أخوها الكبير وبنت عمهم أستغفر الله العظيم يا گاعدين أكفيكم شر الجايين خيرچ يولي شكو وشعجب اليوم جايتنا من صباحيات الله خير بالعادة ما تجينا ولا تعبرينا

نجلة : بصياح إي أنه تگولون عليه شر وغيري لا وهاي صدگ بنتها لجويري راح تجي لهنا

حميدة : بلا مبالاة إي وتجي وإنتِ شكو بيها للبنية بعدين هاي بنته لفاروق الله يرحمه

نجلة : بحدة شوفي عمة والله العظيم إذا بنتها لجويري جتي لهنا ما راح يصيرلها خير ترى ووالله إلا أگطعها بسنوني هاي الدايحة بنت الدايحة أم الشوارع اللي بلا أصل شلون تقبلون تستقبلونها هنا إنتو شنهي شبسرعة نسيتوا اللي صار گبل وحلفة لعمي

حميدة : هوب .. هوب .. هوب يولي وإلزمي حدچ عاد لهنا وكافي تراها بنته لإبني وبنت أخوه لرجلچ وبنت عمهم لولدچ ومن أقرب الناس إلنه شلون بعد تعايرينها وتگولين عليها بلا أصل شو إنتِ ما تعرفين تسولفين وما تحشمين كل أحد واللي صار صار واللي مات مات بعد شنهي هاللغوة هاي مالتچ

نجلة : بصياح لا تگولين عنها قريبة إلنه وبالذات عليه وعلى ولدي هاي وحدة غريبة عنا وعمرها ما راح تكون من عدنا والمفروض قبل ما تفكر تجي لهنا تكسرونها لرجليها إلها هي هاي العايزة النوب بنت جويري تجي هنا وعادي ولا كأنه البزون ماكله شحمة عمة شنو شبساع نسيتوا شسوت إمها الساقطة اللي مو من وراها أختي تشوهت سمعتها وشنو ذنبها بيوم عرسها إبنچ يعوفها والعالم كلهم گاموا يشيلون ويحطون عليها وسيرتها صارت على لسان اللي يسوى واللي ما يسوى ومن يومها وهي مريضة وطريحة الفراش لو أبوية اللي إنجلط ومات كونة ما تحمل الفضيحة اللي صارت من وراه لإبنچ الله لا يرحمه وعساه بجهنم وبئس المصير بعد ما قشمرته هاي جويري الإدبسرزز الگ .. اللـ .. ولعبت بعقلة وخلته مثل الطرن يركض وراها ويبيع الكل على مودها