جيت إلك ولهان وعيونك دروب

البارت المــائــة والأخير

الـكـاتـبـة : عـلـيـا الـنـاصـر

جـيـت إلـك ولـهـان وعـيـونـك دروب

الـبـارت : الــ 100 والأخير

وضاح : حس على نجلة اللي ظلت تتگلب وما نامت للصبح أخر شي من شافها تفتر بالغرفة وتريد تطلع ما تحمل زاح الغطى وگعد وصاح بيها يا مره ما تگليلي شبيچ گظيتيها الليل كله وإنتِ بس تتگلبين والنوب تفرفرين بالغرفة وهسة ما تگليلي على وين غابشة من الصبح

نجلة : إرجع نام وكمل نومتك مالك شغل بية أنة عيني ما تاخذ نوم وما نمت وهسة أريد أطلع برى أشم شويه هوى لني شوية أحس بروحي مخنوگة

وضاح : كل عقلچ يعني حضرتچ فوگ ما قلقتيني وشغلتي بالي عليچ وما خليتيني الليل كله أنام والنوب تريدين تطلعين برى وما تگليلي شبيچ بالله من شنهو مخنوگة

نجلة : مو گتلك روح بات يم لياليك ولا تجي تبات يمي ما رضيت وعندت إلا تجي هانه يمي لو رايح بايت يمها چان نمت مرتاح وما طارت نومة عينك

وضاح : وين أبات يمها وهناك بايتات يمها أم محمد وأم مصطفى وأم بلسم وبنتها يمكن مو عيب هو إحنة گلنالهن باتن هناك حتى ياخذن راحتهن لن بيتنه هوسة وگرابتتا البعيدين باتو بي وإنتِ لا تحججيين بيه وبنومتي وگولي ما ردتك تبات يمي لنك منعتني أرجع أروح لبغداد للفندق على دُرة ونور

نجلة : يبو على حظي دومك كاشفني إي على هاي وأنة مو ردت أحجز غرفة هناك وياهم أنة وبويسيل نبات بيها وهم ما رضيت إنتَ وعاندت ودگيت رجل إلا ترجعنه

وضاح : بربچ على شنهو حاجزة يمهم قابل شكو عليهم تراهم مو صغار ونور رجال والنعم منه وبعدين بويسل هو يجيله مجاز كل 15 يوم يله ينزل وهم يعتبر بعده عريس جديد شكو ماخذته مبيته وياچ وعايفها لمريته هم البنية مشتاگتله وتريد تشوفه تشبع منه تسولف وياه وإنتِ تريدين تبعدينه عنها وتاخذينه تبيتينه يمچ وبفندق چماله وبغداد والله يا إنتِ عليچ سوالف بطلي وإگعدي

نجلة : يبو عليك كليتني بگشوري ورميتني وهذا إنتَ دومك مچعمني وما تخليني لا أحيس ولا أفيص وبعدين بويسل شكو عليها مرتة لو فارگتة هاليوم هذا هو يبات بس سواد الليل وعود تعتبره بعده ما نازل مجاز وضاح أنة گلبي مثل النار على هاي الفاهية دُرة وأبد ما متطمنه لوضعها وكلش خايفة منها وعليها هاي ما تدبرها أدري بيها والله يعلم هسة شحاست وشلاصت وخزتنه وأنة على هاي ردت أحجز غرفة وياهم وأبات هناك يمهم حتى أكون قريبة عليهم بس إنتَ الله يسلمك منعتني وما قبلت