جيت إلك ولهان وعيونك دروب

البارت الثاني

جيت إلك ولهان وعيونك دروب

الكاتبة : عليا الناصر

البارت ال : 2

ريم : ماما حبيبتي شبيچ تعالي إگعدي إرتاحي وراحت
جابت جهاز الضغط وقاستلها ضغطها

سارة : خالتو جوري شبيچ يا معودة لا تخرعينا عليچ
هيچي رايحة أصيحة لطلال خلي يجي يوديچ للمستشفى
لأن أكيد ضغطچ صعد هسة وناظرت بريم مستفهمة

ريم : إي والله أكيد صعد ماما عيوني إنتِ خلي نوديچ للمستشفى هسة

جوري : لا ماما ما بية شي لا تخافين عليه هسة أروح أتمدد شوية وأرتاح ينزل هاي لأن وگفت عالتنور خبزت لصگبان من الفجر فدخت

ريم : ياكل سم وزقنبوت إن شاء الله وقزالقرط همين أبو فليس يروح يشتري من الفرن شكو يخليچ تخبزين وإنتِ مو زين عليچ تخبزين وتوگفين عالتنور ونور وينة عنچ شلون خلاچ توگفين عالتنور وتخبزين وما منعچ لو جاي ومگعدني والله فلا أخليچ تخبزين لو يجي مو هذا الأجرب صگبان

جوري : نهرتها بحده ولچ ماما لا هيچي تحچين عليه وتالي وياچ وويا لسانچ الطويل  هذا تراني گلبي خلصان مو حمل مشاكل وأذية إستري علينه ونور ما يدري خبزت ورى ما راح للدرس مالت الخصوصي ورى آذان الفجر خالة سارة إنتِ متأكدة طلع تعيينچن بهالناحية الگشرة هذي

سارة : إي خالة ليش شبيها لأن ناحية ومو مركز وبعيدة منا

جوري : زين أبوچ ما يگدر يسويلچن واسطة وينقلچن ويسحبچن لهنا قبل ما تروحن وتداومن بيها هناك

سارة : لا ما يصير لازم على الأقل نداوم سنة بيها أو أكثر يله هذاك الوكت يجوز يصير نقل لو تنسيب عود

جوري : بضوجة لا حولة ولا قوة الا بالله يعني ما راح أخلص ويظلون ورايا .. ورايا بيت المعروف أستغفر الله واللهم لا إعتراض على شغلك وحكمتك يا رب وراحت لغرفتها

سارة : ولچ ريم شبيها خالة ليش ضاجت من سمعت بإسم الناحية معقولة لأن بعيدة هواية ومنو هذولا بيت المعروف اللي ما راح تخلص منهم

ريم : ما أعتقد لأن بعيدة بس الظاهر من ورى بيت جدو يجوز ساكنين هناك وما تريد ألتقي بيهم لأنها تخاف عليه منهم