جيت إلك ولهان وعيونك دروب

البارت الثامن عشر

جيت إلـك ولـهـان وعـيـونـك دروب

الـكاتـبـة : عـلـيـا الـناصـر

الـبـارت : الـ 18

مياس : قاطعته لشهم وهي تصيح من راد يحچي  لا تعبها لنفسك لأن مثل ما سبق وگلتلك ما أصدگ بيك وأني رايحة منا ويا ويلك تلحگني وتحاول توگفني وطلعت تردح عليه لشهم گدام الناس اللي تجمعوا عالصياح والهوسة سواء مراجعين أو موظفين بالمستشفى عود إبن شيوخ ودكتور وبالك عنه وهو خايس ويدور گ .. لا وچمالة بالمستشفى بمكان شغله وكملت طريقها وهي ولا مهتمة ومن داخلها كانت كلش فرحانة لأن أذته لشهم وفضحته ونزلت من قيمته گدام الناس وأخذت تكسي من باب المستشفى لأن شاهين راح ورى ما وصلها وأصلاً هي ما تريده يرجعها

علي : ماما أليد بابا خلي يجي مااااااما وينه بابا

مياس : كفختة ووجع يوجعك ويوجع إبوك الحقير الخاين ماكو ولى الله ياخذه ويخلصني منه وصاحت بأبو التكسي وصلنا بسرعة لا تظل تتصفن ومن وصلها للبيت إنتظرني هنا لا تروح دقايق وراجعة أريدك توديني للمدينة وراح أنطيك كروتك ضعف وإلتفتت على علي ظل هنا هسة أجيب أخوك ونروح لبيت جدو فيصل ودير بالك تنزل ماشي وفاتت جوى لغرفتها طلعت جنطة هدومها اللي كانت أصلاً محضرتها سحبتها وطلعت سمعت صوت حسين إبنها بالمطبخ كان گاعد ياكل هو وبنات فهد راحت عليه وسحبته من إيده ووگفته گوم بسرعة فضني

رهف : على كيفچ شبيچ ويا خليه خطية ياكل جوعان وين تريدين بي

مياس : ياكل سم وصخونه أني بيا حال هسة وشغل وعمل ما عندي أنتظرة لما يخلص زقنبوته إمشي لك فضني يلة وسحبتة

رهف : من شافته برطم وعيونه دمعت هاي شبيچ تخبلتي وإسم الله عليه حبيبي من السم والزقنبوت وإن شاء الله بعدوينه وما تگوليلي وين تريدين تاخذينه وتهجين ورادت تسحبه من إيدها

مياس : أگول الفاهية الثولة إنتِ أخر وحدة تحچي ويايا وعود من يطلع براسچ خير وما تظلين مكفخة جوى إيدين سبع السبمبع فهد هذاك الوكت تعالي وحاچيني لأني مو مثلچ أسمحله يدوس عليه وأبقى بيتة حانيتله راسي وخاضعتله ومكفخة جوى إيده

رهف : إحترمي نفسچ ولا تظلين تخربطين بكيفچ واللي بيني وبين فهد ما يخصچ ولچ فهميني شصاير