بعد مرور بعض الوقت كانت جوري قاعدة قدام جارتهم نوال وهي بتعيط:
نوال: خلاص بقى يا بنتي متعمليش في نفسك كدة.
جوري: تعبت يا طنط ومش قادرة، مش عارفة أعمل إيه معاها، حتى الناس في الشارع بقيت اتكسف من نظراتهم لية.
نوال: طب وأنتي ذنبك إيه، انا عارفة انك متربية ومش بتعملي اي حاجة.
جوري: بس الناس ميعرفوش ده، شايفنها كل كام يوم راكبة مع واحد شكل ده غير اللي بتطلعهم شقتنا.
نوال: بقولك إيه يا بنتي، انا عندي حل وهيريحك ويخلي أختك دي تلم نفسها شوية.
جوري: بجد يا طنط، حل إيه ده.
نوال: انا هتكلم مع ابراهيم ونروح نجمع شوية من الجيران ونيجي لحد عندكم في البيت ونتكلم معاها.
جوري: دي فكرة كويسة بس أنتي عارفة لسانها يا طنط، ممكن تقل ادبها عليهم.
نوال: متقدرش يا بنتي، أختك جبانة لما هتلاقي الناس ملمومة حواليها هتخاف وتتلم.
جوري(بأمل): يارب يا طنط تخاف وتبطل اللي بتعمله ده.
نوال: ان شاء الله.
في شقة جميلة كان كريم قاعد بيبص للعقد اللي في ايديه ومش مصدق الكلام اللي سمعه منه، حطه على الترابيزة ومضي عليه:
كريم: امضتي اهيه، اتفضلي يا ستي.
جميلة: انت عبيط يا بني انت، أتفضل اعمل بيه ايه، ده بتاعك أنت.
كريم: اعمل به إيه.
جميلة: شكلك غبي ومش فاهم حاجة، انا مش قولتلك تاخد محامي و تروح توثقه في الشهر العقاري.
كريم: يا سلام وهما هيوثقوه كدة من غير ما يسألوا عليها.
جميلة: بطاقتها ومعاك، ابقى خد اي واحدة وخليها تقول انها هي، وأبقى ادي الموظف قرشين وهو مش هيدقق معاك ولا هيحقق في الصورة
كريم: انا خايف اتقفش وأروح في داهية.
جميلة وهي تخطف منه العقد: خلاص بلاش، بس ما تجيش بقى وتفضل تقولي انا بحب أختك بس مش هقدر اتجوزها وكدة
كريم: طب ما هو ده جواز برده.
جميلة: لا يا عبيط، ده عقد عرفي وانت مفيش عليك أي مسئولية، في اي وقت ارمي اليمين وسيبها، وخلصنا.
كريم: طب واوثقه ليه، ما تخليه كدة وخلاص.
جميلة: براحتك، خد صورة البطاقة ودبسه في العقد.
كريم: طب هاتي بقى.
جميلة: هات انت الأول مفتاح العربية.
كريم: طب مش لما اطولها الأول.
جميلة: وانا اعمل إيه تاني، سرقتلك بطاقتها وضربتلك عقد عرفي، والشهود اللي ماضية عليه سايبة البلد، يعني مفيش أي حاجة تاني، ناقص ادخلكم الأوضة وأقفل عليكم الباب
