في قصر كبير مكتوب عليه عائلة المنياوي، دخل عرفة البواب ووراه شابة وماسكة في أيدها بنت صغيرة سحباها وراها:
عرفة: صباح الخير يا ست هانم، البنت اللي كنت قولت عليها لحضرتك إيه، قربي يا صباح كلمي الست هانم.
صباح (وهي بتبص في الأرض): تصبحي بالخير يا ست الناس.
فريدة: ما شاء الله، بس دي شكلها صغيرة يا عرفة ومالهاش في خدمة البيوت.
صباح: أنا أول مرة اشتغل، ولولا الحوجة والظروف مكنتش خرجت من بلدنا خالص.
فريدة(بعد ما شافت البنت اللي ماسكة في جلبية أمها ومستخبية وراها): دي بنتك.
عرفة: أيوة يا ست هانم، والله يا ست هانم صباح أصلها طيب وبنت ناس غلابة، أبوها الله يرحمه كان عشرة عمري.
فريدة: اومال فين جوزك، هو كمان شغال هنا.
صباح(بحزن): الله يرحمه، كان راجل طيب مات بعد ٥ سنين من جوازنا وسابني انا وبنته في الدنيا لوحدنا.
فريدة (وهي تشاور للصغيرة): تعالي يا حلوة، هي اسمها ايه.
صباح: نجمة.
فريدة: الله اسمك حلو اوي يا نجمة.
عرفة: تؤمري بخدمة تاني يا ست هانم.
فريدة: روح أنت يا عرفة.
عرفة: مش هوصيكي يا صباح يا بنتي، عايزك ترفعي راسي فوق وتسمعي كلام الست.
صباح: حاضر يابا الحج.
مشي عرفة وطلبت فريدة من صباح أنها تقعد عشان تفهمها الشغل وفضلت نجمة ماسكة في أمها وعيونها بتلف بتتفرج على المكان:
فريدة: بصي يا ستي، البيت هنا بيت عمي المنياوي الله يرحمه، وانا عايشة فيه مع جوزي زاهر وعندي ولد واحد اسمه فارس.
صباح: ربنا يخلي يا ست هانم.
فريدة: عايش معانا كمان راجي اخو زاهر ومراته سوزان وعندهم زياد و بيري، انتي هتساعدي دادة كاميليا وتسمعي كلامها.
صباح: حاضر يا ست هانم.
فريدة: أهم حاجة هنا الأمانة، واسرار البيت ده متخرجش براه، مفهوم يا صباح.
صباح: أبدا يا ست هانم، انا عمري ما اعمل كدة أبدا.
فريدة: تعالي ورايا، هوريكي البيت ومكان أوضتك كمان.
دخلت فريدة ووراها صباح وبنتها، وسمعت صوت عالي جي من جوا:
فريدة: في إيه بتتخانقوا ليه انت وهو.
فارس: يا مامي زياد هو السبب، دخل أوضتي واخد لعبي من غير ما يستأذن مني.
فريدة: مش عيب كدة يا زياد.
