طوال الحفل والجميع في حالة صدمة، وصور الصحفيين والحضور الخبر، وانتشرت الصور على السوشيال ميديا، بدأ المعازيم ينصرفوا وكان أولهم صحاب نجمة، قرب زياد من نجمة:
زياد: مش هتروحي تباركي لستك بيري ولا إيه، كنتي فاكرة أن فارس هيحب واحدة زيك، انتي للتسلية وبس لكن يوم ما يفكر يتجوز، لازم يكون واحدة من مستواه، عموما انا معنديش مانع تيجي تسليني في الأوضة شوية، ما انا ياما شوفتك خارجة من اوضته.
نجمة: انت حقير وسافل و....
زياد: انتي هتنسي نفسك يا بت إنتي ولا ايه، اللى كان بيدافع عنك خلاص رماكي في الزبالة، واوعدد أن قريب أوي انتي هتترمي برا البيت، إلا لو سمعتي الكلام وعرفتي مصلحتك مع مين دلوقتي.
بصتله نجمة باحتقار وجريت على جوا، اتخبطت في طريقها بفارس:
فارس: مالك يا نجمة، اوعي تكوني صدقتي اللي قالته طنط سوزان، انا اصلا مش فاهم ايه اللي خلاها تقول كدة.
نجمة: مفيش داعي تفسر حاجة يا فارس بيه، انا عارفة مقامي كويس، عن إذنك.
فارس(وهو يمسكها من يدها): مقام ايه، وبيه ايه دي كمان، كل اللي حصل سوء تفاهم مش اكتر، بطلي جناتك ده.
نجمة: الجنان اني صدقتك، وان واحد من عيلة المنياوي هيتجوز خدامة عنده، بس من النهاردة مالناش مكان هنا.
جريت نجمة على جوا ودموعها مغرقة وشها، كان فارس هيجري وراها لكن وقفه راجي:
راجي: سيبها دلوقتي وتعالى نشوف المصيبة اللي عملتها الست هانم.
مشي باقي المعازيم كلهم، ووقف راجي يتخانق مع سوزان قدام الكل وهي بارد عليه بكل برود:
سوزان: انا معملتش حاجة غلط، من زمان واحنا بنقول أن فارس وبيري لبعض، وكل اللي عملته أني أخدت الخطوة الأولى.
فريدة: الكلام ده كان زمان، وكل الأهل بيعملوا كدة لما ولادهم بيكونوا صغيرين، لكنهم كبروا دلوقتي ومش احنا اللى نقرر عنهم.
راجي: كل اللى عملتيه يا هانم فضيحة لبنتك، قوليلي الناس هيقولوا ايه لما يعرفوا أن الخبر مش صحيح.
سوزان: وايه اللي هيخليه مش صحيح، هو فارس هيلاقي زي بيري فين، وبعدين انا متأكدة أن فارس مبسوط وبيري كمان، صح يا ولاد.
بيري: أوي أوي يا مامي.
فارس(بإحراج): يا طنط بيري زي أختي مش اكتر من كدة.
راجي: هااه ردك ايه يا مدام، فارس بيحب نجمة ومش هيجوز غيرها.
زاهر: الكلام ده صحيح يا فارس.
فريدة: أيوة يا زاهر، فارس قاللي وانا كنت هكلمك قريب في الموضوع ده.
سوزان: يعني إيه، هيتجوز حتة خدامة عنده، وهيفضلها علي بنت الأصول وبنت عمه.
