حبي لديرتي فاق كل المحبين وحبي لك فاق ديرتي واهلها ♥️!

البارت التاسع و الثلاثون

< في بيت أبو عمر >
دخل فراس عليها فراس و شافها تبكي بس وقت شافته رولا مسحت دموعها بسرعه
فراس نزلت دموعه غصب عنه و حضن رولا
فراس : رولا تكفين أسف تكفين
رولا : على أيش يا فراس تتأسف
فراس : يا رولا مالي قوه على جدي الود ودي ما تروحين لا أحد ما تبينه
رولا ما تبي أخوها يحس با الضعف
رولا : لا يا فراس أنا أبي ناصر
فراس : لا تكذبين علي يا رولا أنتي رفضتيه و جدي جبرك عليه
رولا : و الحين وافقت عليه خلاص لا تضعف أنت سندي و عزوتي لا تخليني أضعف
فراس : بس أنا ماني سندك أنا ما قدرت أوقف با وجههم وقت جبروك
رولا : يا فراس خلاص قلت لك أبيه
فراس : دامك تبيه أنا براحه لاكن إذا انتي مجبوره با اخذك و نرجع الرياض
رولا : لا يا فراس ابيه روح
راح فراس ياخذ قيلوله و أما رولا وينها و وين النوم كانت عند الشباك تناظر من الشباك و عيونها كلها دموع
________••________
< في بيت أبو زياد >
العنود : الحين ليش جدي يجبر رولا على شي ما تبيه
عزيز : و الله ما ندري أول مره جدي يسويها
زياد : حرام و الله هيه ما ما تبيه واضح عليها
أم زياد : عاد تبيه و لا ما تبيه تحمد ربها حد جا و خطبها
العنود أنفجرت على أمها : يا يمه أنتي وش مسلطك علها وش سوت بك عشان تكرهينها كذا يعني لو هم مثلك كان الحين كرهونا من سبب أفعالك لاكنهم يعرفون إننا مالنا ذنب فيك
أم زياد : عشنا وش شفنا يا العنود تصارخين على أمك عشان ناس ما تسوى
عزيز : يا يمه قولي لي وش سو بك عشان تكرهينهم كذا و الله هم يحبونك
أم زياد : كيفي أنا ما أبي أحبهم
زياد : الله يهديك يا يمه أبوي لا يسمعك ما حنا ناقصين مشاكل
أم زياد : و وش با يسوي أبوك يعني أقول أنت وياه سرعه غرفتكم أرقدوا قبل يصير شي ما يرضيكم
دخلوا العيال غرفتهم و دخلت العنود غرفتها
________••________
< في بيت أبو خالد >
أبو خالد : يا ولد قم أرقد و أنت بس ساكت وش فيك
حمد : يا يبه لا تشيل همه هو شوي مضغوط يومين و يرتاح
أبو خالد و هو عارف إن ذيب يحب رولا بس ساكت كأنه ما يعرف
أبو خالد : تبي عرس بنت عمك يجي و هو كذا ما با يستقبل الرجال
خالد لف على طول على ذيب إلي تغيرت ملامح وجهه
ذيب : يا يبه عرس مين با الضبط من بنات عمي
أبو خالد : و مين غيرها خطبوها أكيد رولا
ذيب هنا وقفت كل شعره في جسمه قلبه يحترق و يتكسررر حبه حبه
حمد : يا يبه بس ما حددوا الملكة
ذيب حس لو سمع أكثر با يموت غبنه و قهر راح و هو وده يروح عند رولا و يشيلها و تروح معه وين ما يبون
طلع برا و حصل دريشتها مفتوحة و شافها جالسه و نزلت دموعه بقهر عليها فز قلبه بس تذكر ماهي له وده لو ما يدري با الخبر
________••__________
< عند رولا >
كانت عند دريشتها و دموعها تنزل با شكل مرعب لا درجه من كثر البكي و التعب بدت تنزل د*م
و هي ما تحس بس تبي ذيب بس تبي تحضنه تبي تقول له أنا أبيك ما أبي ناصر بس وين ذيب وين
شافت دموعه تنزل و وجهه مسود عرفت إنه عرفت ودها تروح عنده تقول له و الله يا ذيب مو أنا و افقت و الله بس ذيب الحين با يحط اللوم فيها لأن ذيب يعرف جده ما يجبر أحد ما يدري إن جده تغيرر خلاص
رولا: ياربي أبي طريقه أبي ذيب يقنعني ما بقى غير كم ساعة و يجون
كانت با تروح له بس تذكرت بس كيف ذيب با يصد عنها مارح يكلمها
رولا : يا ذيب تكفى خلاص لعد تصد تراني مجبورهه ماني بكيفي خلاص خلاص
جت في بالها تدق عليه بس ما عندهم إلا تلفون البيت
بس ما تعرف رقمه
رولا : يارب ساعدني يارب
راحت رولا با بهدوء غرفه أخوانها و فتحت جوال عمر بهدوء و بحثت عن رقم ذيب و كتبته في التلفون و رجعت الجوال و راحت
رولا : الحمدلله ما صحي ولا كان رحت فيها
اتصلت رولا على الرقم مره و مرتين و ثلاث بس ما فيه أي رد
رولا : يا ذيب ماهو وقتك رد عل جوالك ردد
ذيب كان جواله في الإسطبل ناسيه من كثر الضيق إلي هو فيه
رولا رجعت دقت بس نفس الشي مافيه أي رد من ذيب
عجزت كل الأبواب مقفله في وجهها
راحت و انسدحت لعل و عسى تنام
___________••____________
< بعد صلاة العصر >
الجد فهد : يا ولد الرجال في الطريق و أنت ما غير تتدلع
زياد : يا جدي مين قال تدلعت بس أعطيكم جو
الجد فهد : الحين هذاك السربوت ما غير يدور ما يعرف أهله
حمد كان وده يقول له أنت سبب تغير ذيب و مفارقة بسمته
الجد فهد : يا نايف رح شوف الحريم ناقصهم شي و لا لا
نايف : أبشر يا جدي
الجد فهد : تبشر با الجنة و أنا جدك
راح نايف عند الحريم عشان يشوف إذا ناقصهم شي
نايف من ورا الباب : يا ولد
البنات كلهم دخلوا عشان نايف يدخل
أم نايف : تعال يا وليدي مامن أحد
دخل نايف و سلم على حريم أخواله
نايف : يا يمه ناقصكم شي أجيبه لكم
أم نايف : لا يا حبيبي مو ناقصنا و لاشي رح مع الرجال
نايف : خلاص إذا احتجتم شي نادوني
أم نايف : تمام
راح نايف و جو البنات
ترف : يا عماتي إذا جو عيالكم أطلعوا لهم لأن ما عاد قدرنا ننحشر في الغرفه كتمه
أم زياد : لا يا حبيبتي دامه مو محرم عليك تدخلين لو في شبك غنم
ترف : نعم نعم و مين قال لك إنه محرم علي إذا تبين ولدك تراه في بيتك و بعد أنا ما قلت عيالك أنتي بس قلت عيالكم يعني حتى ولد عمتي أم نايف و حتى لينا
العنود :صبر صبر شدخل لينا الحين
ترف : لينا أخوانها و بتول و رولا يعني هم فهمتي ولا باقي
العنود : إيه فهمت عبالي عيالها
ترف : الحين يا أسيل أنتي ليش جايه معنا و هو أخوك
أسيل : و الله عاد شفتكم كلكم داخلين دخلت معكم أجلس لحالي
ضحكوا البنات عليها
تسنيم : يا بنات غدير ما قد رحنا لها
بتول: إيه و الله عاد هي تحب رولا و حظرتها منهم بس الله يعين و بس
ترف : ياربي حرام على جدي و الله حالة رولا تخليك تموتين من كثر ما أنك تبين تساعديها بس ما تدرين كيف
لينا : الله ييسرها
أسيل : بنات شيلوا اغراضكم و نروح نتجهز عندها
لينا : إيه و الله عيت تاكل لها يومين ما تأكل
أم خالد : وشوله ما تأكلوها البنت با تموت
بتول : و الله يا عمه عيت حاولنا فيها و هي رافضة ما ندري وش علتها لو تشوفيها الحين
أم نايف : هي نحيفه و الحين بس العظام تشوفين غيرها ما فيه
أم زياد : عزيز يقول الناس جو
أم خالد : يا ويلي و بنتي باقي ما جهزت
كلمه و بنتي لامست قلوب بتول و لينا ب حنيه يعني وش موقف أم رولا لو كانت موجودة
ترف : يلا يا بنات تجهزوا بسرعه و خلونا نروح عند رولا نجهزها
راحوا البنات يتجهزون و بعد ما خلصوا راحوا لا رولا يجهزوها
أسيل : رولا بسرعه قومي الرجال جو
رولا : طيب يجون وش أسوي لهم
ترف : رولا بلا دلاخه قومي تجهزي أحسن لك
رولا : لا ما أبي اتجهز مين قال لكم إني موافقه
لينا : يلا يا رولا قومي بسرعه
أبت رولا ما تقوم و خلوها البنات تلبس الفستان غصب و حاولوا يحطون لها مكياج و تنزل دموعها تخربه
بتول : يا رولا وش ها البكى الحين خلينا نسوي لك مثل الناس
رولا : لا تسون لي شي ما أبي و لا شي خلوني كذا
ترف : يا رولا وش بلاك من متى و أنتي عنيده كذا خلينا نخلصك بسرعه
رولا : قلت لكم بس أنتم ما تفهمون قلت لكم ما أبيهه
العنود : و الله نعرف يا رولا إنك ما تبنيه بس وش نسوي
رولا : خلاص حاولوا فيهم عجزت أفهم ماحد يسمعني
أسيل : ودنا بس ما نقدر يلا خلينا نخلصك يمكن هذا نصيبك
جلسوا البنات يحاولون و يقنعون في رولا عشان تتجهز بدون ما تخرب شي
_________••__________
< في بيت جدة غدير >
أم ناصر : ما توقعتها توافق عاد هي شكلها ما صدقت با أحد يخطبها على طول وافقت
أصايل : عادي يا حبيبتي أم ناصر نوريها نجوم اليل في عز الظهر
ريوف : إيه صح و الله لا أكرهها في عيشتها
غدير : الحين مين وافق عليكم أنتم
أصايل : صديقتك هاذي إلي أسمها رولا وافقت على ناصر
غدير انصدمت و تجمدت في مكانها من الصدمة كيف هي قايلة لهم لا يوافقون كيف وافقت كيفف
شالت نفسها غدير و هي تحب رولا ما تعرف كيف با تعيش معهم و تعرف رولا تكرههم كيف با توافق كيف ما حد كان يدري غير عائلة الجد فهد إن رولا مغصوبة على الزواج
غدير تبكي عند أمها
غدير : يمه و الله حرام حرام رولا تجي عندهم كيف كذا
أم غدير : عاد يا بنتي هذا نصيبها و النصيب يصيب ما تدرين
غدير : مسكينة يا رولا انظلمت معهم
أم غدير : الله يعين و بس
_________••_________
< عند ناصر و أمه و عمته و أخته >
ناصر : يلا يا يمه الناس مستنين وش ها التأخير
أم ناصر : و من زينهم ها الناس إلي طاير فيهم محد يحبهم
ناصر : يا يمه تكفين اعتقينا الشر ما حنا ناقصين
أصايل : يا ناصر أخذت اخيس و حدة فيهم
ناصر : عاد أنا عجباني أنتم وش عليكم
ريوف : بترجع يا ناصر و تشوف
ناصر : أقول أقعدوا هنا لعد تجون بروح اشيل و اعمامي و أنتم أقعدوا
راح ناصر عند أعمامه و شالهم و ركبوا السيارات و بعد ما وصلوا استقبلوهم عيال أبو عمر من عمر و فارس و فراس و معهم الجد فهد و معهم أبو خالد و أبو زياد و و سلموا عليهم و دخلوهم المجلس
__________••______________
< أما عند ذيب >
شافهم و هم جاين في السيارات و هو طالع من بيتهم و أبو و عمه و جده و عيال عمه يستقبلون و هو عيونه دموع و يموت با بطيء ما بيده حيله عليهم و هو يعرف رولا ما تحب غيره كيف و افقت وهو شاك إن رولا رفضت و ما وافقت تركهم و راح عنهم شوي بعيد و كان مخطط أول ما يخلص الإسطبل يتزوجها بس راحت راحت رولا و طلع الخواتم و هو قلبه يحترق يموتت و قال بيتين من قهره و حزنه :
قالوا خطبها واحدٍ من هل الدار
قد و قعوا عقد النكاح بثباتي
أدري ماهو با الكيف يا بنت الأحرار
ودك بنا لو كان سوقك عباتي
ودعتك ألي عالمٍ كل الأسرار
الواحد إلي عالم الخافياتي
قالها و هو وده يروح لا رولا وده يترجاها ما توقع على عقد النكاح
_________••_________
< في مجلس الرجال >
أبو ناصر : يا أبو صقر جينا لا خطبت حفيدتك
الجد فهد : هذي الساعة المباركة و حنا موافقين
أبو ناصر ناظر الشيخ
أبو ناصر : يلا يا شيخ با نكتب كتابنا
جلس الشيخ بين عمر و ناصر و أبتدأ يقول
يلا يا عمر ردد وراي
الشيخ : زوجتك أختي
عمر : زوجتك رولا أختي
الشيخ : على كتاب الله
عمر : على كتاب الله
الشيخ : و سنه نبيه
عمر : و سنه نبيه
لف الشيخ على ناصر
ناصر : و أنا قبلت هذا الزواج و رضيته
بعدها وقعوا الشاهدين إلي هم الجد فهد و أبو خالد
و قع ناصر و راحوا عند رولا توقع
و راحت رولا عند شخص ثاني شخص ما تمنته ولا تبيه

أنتهى البارت

طولت البارت لأني كنت مشغوله الأربعاء و الخميس ما أمداني أكتب لكم 🥺🫶🏻