حبي لديرتي فاق كل المحبين وحبي لك فاق ديرتي واهلها ♥️!

البارت التاسع و الخمسون

< في الصباح عند الجد فهد >
الجد فهد : يا صقر العيال وينهم فيه ما أشوفهم
أبو خالد : مدري بس بروح أشوفهم
أبو زياد : حتى عيالي مهم بالبيت الظاهر عندكم
أبو خالد مادري والله بس بشوفهم الحين وبلهطهم بالعصا لين يصحصحون
قام أبو خالد وهو ناوي عليهم نيه شقرا
كان معه العصا إللي يتكي عليها وفتح الباب بهدوء عشان مايصحون و شافهم كل واحد منبطح على الثاني وحالهم يرثى له
أبو خالد ضحك على شكلهم إللي كان رجل حمد على ظهر زياد و راس زياد على رجل فارس وكان شكلهم يضحك
أبو خالد بنفسه : طيب طيب أوريكم الحين كيف تتصلحون بالنوم وترتاحون
أبو خالد شال العصا وطق بها الباب بقوه والعيال قاموا منصدمين ومرتعبين
عمر : أبو سعود وش جانا
زياد وقف من الصدمة ويصارخ : يا عيال شكلها القيامة قامت ياعيال استشهدوا موتوا شهداء
حمد قام منخرع : أشهد أن لا إله إلا الله و أن محمد رسول الله
ذيب كان باقي في هول الصدمة بدأ يستوعب شوي شوي ولف راسه با اتجاه الباب وشاف أبوه واقف ومعصب لف عليهم ذيب
ذيب : يا عيال رحنااا فيهااا
أبو خالد : تعال أنت وياه أوريك كيف تتشهد تعال
خالد : أذكر الله يا يبه عندنا ضيوف
أبو خالد : مرح ابتدي إلا بك يا راعي الضيوف
عمر : سم ياعمي وش بغيت و أبشر
أبو خالد : يا قليلين الحياء جدكم وش قايل لكم هااا؟؟؟ وش قايل لكم تسون الصبح
عزيز : يا عمي وحنا ما نسينا وكنا بنصحى بس أنت جيت
فارس : إيه صح ياعمي يعني كنا بس دقيقة ونصحى بس أنت استعجلت
أبو خالد : أستعجلت أجل و أنتم كل واحد منبطح على الثاني وماتدرون عن إللي حولكم
ذيب : يا يبه أفا عليك أنا ما نمت أبد بس يعني قلت بسترخي شوي و أنت جيت
أبو خالد : الحين أوريك كيف تسترخي
شال العصا حقته و أي واحد قدامه يجلده و العيال يناقزون و اللي يطلع برا واللي يحصل له جلدد
أبو خالد : سرعهه قدامي أنت وياه صلوا فجر وبسرعه ترحوا المزرعة تفهمون ولا لا
حمد : أبشر أبشر يا يبه
راحوا العيال بعضهم لحمام مجلس الرجال ( يكرم القارئ)
و بعضهم حمام غرفة حمد وذيب ( يكرم القارئ)
وبعد ما خلصوا راحوا كلهم يصلون فجر
_________••__________
< عند البنات في غرفة ترف و تسنيم >
رولا : يا بنات قوموا عجزت وانا اصحي فيكم
ترف بنعاس : رولا بالله فكينا خلينا ننام
رولا : يا بنات حرام عليكم أمي وعماتي ينظفون وحنا نايمات قوموا خلاص
لينا فزت : يلا يلا صحيت أنا
تسنيم صحيت : و أنا بعد
وبدوا البنات يصحون وحدة ورا وحدة مابقى غير ترف و أسيل
بتول : هي أنتم بسرعة قوموا
أسيل : بتول أطلعي وطفي اللمبة بسرعة
العنود : أسيل عمة أسماء جاية لك قومي برضاك
فزت أسيل : أبك أنا صاحية قومي يا ترف أحسن لك
قامت ترف وهي فيها نوم الدنيا
ترف : ما تخلون الواحد ينام براحته أنتم
تسنيم : لو أنك تبين تنامين براحتك كان نمتي من بعد العشاء ما سهرتي
أم نايف دخلت : يا بنات قوموا بسرعة صلوا فجر و تعالوا بننظف البيت يلا
أسيل : يمه بيت خالي صقر بس ولا كلنا؟
أم نايف : لا يا حبايبي رح تنظفون كل البيوت
أسيل : يا يمههه والله تعبانة ماقدرت
أم نايف : أقول بسرعة أبوك اليوم جاي عجلي
أسيل ما كان ودها تقول كذا قدام بنات خالها سعود
لينا : أبد ياعمة رح نبدا بييت عمي صقر وبعدها بيتكم لا تشيلين هم
أم نايف : الله يبارك فيك يا لينا يا حبيبتي
طلعت أم نايف و راحوا البنات يتوضون و بدوا يصلون فجر وبعد ما خلصوا راحوا ينظفون بيت عمهم صقر
ترف : يا يمه وش ها النظافة اليوم
أم خالد : يا بنت زواج أخوك بكره وتقولي وش ها النظافة اليوم
ترف : يويلي مسرع الأيام ذيب ورولا بيتزوجون اخييرااا
العنود لفت على رولا وشافتها بتموت من التوتر و الحياء
العنود : و عروستنا متوترة
أم خالد حضنتها : أفا عليكم بنتي ما عليها خوف
رولا حبت راسها : الله يخليك يا أمي
أم زياد : يا هُدى ما ودك يبدون تنظيف؟
لينا : لا ياعمة رح نبدأ الحين
بتول : يا بنات خلونا نتوزع كل ثنتين لهم شغلة
ترف : أنا ورولا علينا غرفتنا
بتول : و أنا و العنود علينا المجالس
تسنيم : و أنا و لينا علينا المطبخ
غدير : و أنا و أسيل علينا الصالة
أم خالد : لا يا حبيبتي أنتي ماعليك شي
غدير : لا وال
قاطعتها أم نايف : خلاص يا غدير مارح تسوين شي لا تحلفين
تنهدت غدير بقلة حيله
وراحوا البنات كل ثنيتن للمكان إللي أتفقوا عليه
وبدوا ينظفون
_________••__________
< عند العيال في المزرعة >
عمر : يا عيال اثنين يجوا معي ننظف بيت الشعر
ذيب : أنا
عزيز : أنا
خالد : و أنا و زياد وحمد نروح للحمامات ( يكرم القارئ )
زياد : لا تكفى إلا أنت أجي مع كل الناس إلا أنت وبعد فين في الحمامات ( يكرم القارئ )  ياربي أرحمني
حمد : ماعليه الحمامات ( يكرم القارئ ) ولاشي ثاني
فراس : و أنا وفارس ونايف بننظف المجالس و الصالة والمطبخ إللي داخل
فارس : طيب و المسبح والحوش مين بينظفه
خالد : إذا خلصنا كلنا نتساعد فيها ونخلص وبعدها نروح للعزبة نشوف وش ناقص ووش زايد
,,,,,,,,,____,,,,,,,,,,
~ في بيت الشعر ~
ذيب : يا عمر بس رتب الجلسة و أنا بجيب المكنّسة ونكنّسة ماهو وصخ مره
عزيز : و أنا بجهز البخور وبساعد عمر في ترتيب الجلسة ونطلع منها التراب 
بدأ عمر يرتب و يطلع من الجلسات التراب و معه عزيز و ذيب راح يجيب المكنّسة
ذيب جاب المكنّسة : خلصتم يا عيال؟
عزيز : قريب نخلص
عمر : خلاص خلصنا
بدأ ذيب يكنّس التراب لبرا
عزيز : طلع عجاج السنين
عمر : من زمان ماقد نظفناه كذا
ذيب : هذا زواجي كل شيي يصييرر
عزيز : أقول أخلص بس
عمر : هات تبينا نساعدك
ذيب : إي والله ذبحني التراب
شال عمر المكنّسة عن ذيب وبدا يكنّس
,,,,,,_____,,,,,,,
~في الحمامات ( يكرم القارئ) ~
خالد : أعجل يا ولد وش ها التناحة فيك
زياد : طيب أصبر وش فيك أكلتني
حمد : أنا خلصت المغاسل
خالد : يا حمد تعال فكني من ها الزياد بيجلطني بفهاوته
زياد : ترا ما سويت شي بس جالس أكنّس وهو يقول غلط
حمد : يا زياد وش كنّست أنت الدنيا كلها تراب
خالد : علمه حلقي نشف و أنا أفهم فيه بس تقول له ثور يقول أحلبوه
ضحك حمد على زياد وكناسته
حمد : خلاص أنا وخالد بنكنّس وأنت تشطف
زياد  : لحالي أشطف ؟؟؟
حمد : لا لا بنساعدك أنت خلنا نخلص قبل العيال بعدين
خالد : يلا يا حمد أنت أثنين و أنا أثنين
معلومة { الحمامات عبارة عن أربع حمامات (يكرم القارئ) و أربع مغاسل }
خلص خالد و راح يشوف حمد
خالد : ها بشّر خلصت
حمد : إي خلصت
خالد بصوت عالي لازياد إللي كان برا : زياااددد تعالل ياولد خلصنااا
زياد : جاايي جايي
جاء زياد و بدا يوزع المويا بجميع اجزاء الحمام ( يكرم القارئ ) و حمد وراه يشطف
حمد : خلاص تعبت تعال أنت أشطف و أنا با أوزع لك
وتبادلوا وبعد معاناة كبيرة مع زياد خلصوا وقفلوا الحمامات ( يكرم القارئ ) وطلعوا
,,,,,,,______,,,,,,,,,,
~ عند فراس و فارس ونايف ~
فراس راح عند فارس: أنا خلصت الصالة شطفت الأرضية ورتبت مفارش الكراسي
فارس : يلا بس باقي لي شطف الأرضية و أخلص
فراس : بروح عند نايف أساعده المجالس شوي كبار و أثنين
راح فراس عند نايف وشافه يشطف الأرضية
فراس : ما شاء الله عليك خلصت بسرعة
نايف : باقي المجلس الثاني وش إللي خلصت
فراس : يلا بساعدك بالمجلس الثاني
راح فراس وكان يحاول يزيل التراب من على كنب المجلس و بعد ماخلص نص الكنب جاء نايف و كمل النص الثاني وشطفوا الأرض مع بعض وطلعوا
فارس جاء عندهم : أنا خلصت
نايف وفراس مع بعض : و حنا خلصنا
فارس : أجل يلا نقفل ونطلع
قفلوا وطلعوا الحوش ولاقوا العيال كلهم بالحوش
نايف : الظاهر مابقى غيرنا ينظف
ذيب : إي طولتم بس ماعليه يلا نبدأ بالحوش
فراس : يلا
بدوا العيال ينظفون الحوش و يرتبوه
عزيز : يا عيال واحد يجي معي نروح نحط فحم على النار
عشان نبخر
حمد : أنا بجي معك
راح حمد مع عزيز وحطوا الفحم على النار وجلسوا عنده عشان مايشب فيهم
وبعد تقريبًا ٧ دقائق شالوا الفحم وحطوه بالمبخره و طفوا الغاز و حطوا عليه البخور وبخروا المجالس و الصالة وطلعوا بالبخور لبيت الشعر
و بعد وقت خلصوا العيال من الحوش بالكامل و ركبوا السيارة ورجعوا
______________••________________________________تسريع للأحداث,____________
,,بمَ إن اليلة بالكامل عبارة عن تنظيف حبيت أسرع الأحداث لليوم الثاني العصر،،،
________••__________
,, عصر ليلة تشهد لها نجد العذية ليلة من أبهى اليالي لينال الذيب رولاه بعد حُب عظيمم ومحاربة سنوات ،،
_______••________
< عند رولا >
كانت جالسة في بيتهم و خواتها يتجهزون و بنات عمها جاينها واللي تروح تساعد الحريم بالذبايح و إللي واللي
غدير : حياتي رولا شفك نحافنه زود
رولا بتوتر الدنيا كلّه : لا ماني نحفانه
ترف : رولا إللي يشوفك يقول بتتزوج مغصوبة وبتتزوج واحد غريب تراه حبيب القلب و بعد ذييييبببب أبتسمي يا بنت أبتسمي
رولا أبتسمت بتسليك عشان تسكت وهي حازه بخاطرها لعدم وجود أمها وأبوها في زواجها وفرحانة لا أنتصار حبهم هي وذيبها
بتول : رولا ياعيوني متى ودك تتمكيجين يعني مابقى شي على صلاة المغرب
رولا بهدوء : بصلي و أتجهز ، وين لينا؟
ترف : عند الحريم تطبخ معها
رولا : وأخواني ؟
ترف : بس فارس موجود الباقي بالمخيم يظبطون
رولا : ناديه لي أبيه
ترف : أبشري
راحت ترف تنادي فارس
ترف : فارس تعال كلّم رولا
فارس : وينها فيه
ترف : بغرفتهم تعال تبيك
فارس : يلا يلا شوفي لي طريق
راحت ترف و دخلوا هي و غدير المطبخ لين يدخل فارس
دخل فارس على رولا
فارس : الله الله أختي اليوم أجمل عروسة بالعالم
رولا : بتول عادي تطلعين شوي أبي فارس لحاله
بتول : تأمرين أمر
راحت بتول وبقى فارس عند أخته رولا
فارس : سمّي يا روح أخوك
رولا تجمعت بعيونها الدموع وفارس لاحض وهي وقفت وحضنته
فارس : أفا وليه حبيبت أخوها تبكي وشوله الدموع
رولا وهي تشاهق بحضن فارس : فارس أبي أمي و أبوي بزواجي أبي أشوف أمي تحصني و أبوي يزفني لاذيب
فارس شد عليها وجلسها : ولا تخافين ياروحي أنتي أنا عندك بزفك لين الفندق ولو تبين أنزل معك عادي كل شي ولا زعلك و لينا و عمتي هُدى مو تعتبريهم أمك خلاص لا تخافين مرح يخلوك
رولا : بس يوم زواج غدير أمها كانت تبكي فرح لها و أبوها بس أنا أبي أشوفهم و أشوف فرحتهم
فارس : خلاص يا حياتي هم فرحانين لك وهم بالجنة وعند ربي والحين يبشرون إللي عندهم إن بنتهم بتتزوج رولاهم بتتزوج وبعد بتاخذ ذيبها وش أحلى من كذا ، مو أنتي تبين ذيب وتحبينه ؟
رولا : إي
فارس : أجل اليوم ليلة من أبهى اليالي اليوم قلبي بيطير من الفرحة لابنتي وحياتي و أختي وروحي رولاي لا تخافين ياعيون أخوك و ذيب بيكون لك الأب و الأم و الأخ و الأخت والصديق و الصديقة و الحبيب والزوج وكل شي
رولا ضحكت : و أنت شعرفك أنه بيكون ذا كله
فارس : وهو فيها سؤال يعني واضح من عيونكم قد أيش الحب طاغي ، ويلا يا حبيبتي روحي أمسحي وجهك وأذن مغرب صلّي وتجهزي برجع مره ثانية و أنتي بالفستان الأبيض
رولا : أبشر
أبتسم لها وحب راسها وخدها وطلع
وبعده دخلوا البنات عندها
________••_________
< عند العيال بالمخيم >
فراس : يا خالد جب اللمبات إللي عندك
خالد : جبتها
ذيب : يا عيال خلصنا إللي داخل من ترتيب وتبخير
عمر : أنا خلصت الحبل الأول من اللمبات
حمد : و أنا خلصت الثاني
فراس : أصبروا باقي لي ثنتين و أخلص
ذيب : عجل عجل
عزيز : يلا يا ذيب على الحلاق
ذيب : اوهه شلون نسيتها
عمر : أصبروا العيال قريبين
ذيب : مين هم
عمر : فيصل ومشاري وياسر و راكان جاين
خالد : هذا هم جو
فيصل نزل من السيارة
فيصل : ما شاء الله ما انتظرتوا نجي نساعدكم
مشاري : ذيب رحت عند الحلاق
ذيب : ذلحين رايح
مشاري : يلا أنا بروح بك
عمر : أنا بروح البيت و فراس مع ذيب يروح يحلّق و برسل فارس إذا يبي
ذيب : و أنت؟
عمر : أنا حلّقت أمس بعد ما روحنا من المزرعة ما يحتاج
خالد : أجل يلا خلونا نروح عشان مانطول بقى نص ساعة على المغرب
راح عمر لسيارته متوجه للبيت و العيال للحلاق
_________••__________
---ابتداء العرس رسمي ----
< عند الحريم في بيت الجد فهد >
أم زياد : يلا يا بنات روحوا تجهزوا خلاص خلصنا طبخ الذبايح
تسنيم : يلا يلا بنروح نتجّهز عند رولا
كل وحدة راحت بيتها تاخد أغراضها وراحوا بيت عمهم سعود عشان يتجهزون فيه
العنود : يلا يا بتول أبتدي با رولا
بتول : يلا يلا
بدت بتول في رولا إللي دموعها تنزل لا إراديًا
بتول : خلاص يا رولاي خلاص تعبت ترا و أنا أعيد
لينا : رولا يا حياتي ليه تبيكين الحين خلاص خلينا نخلص بدري
غدير خلصت تجهيز نفسها
غدير : كيف يا بنات؟
ترف : يالبييهه وش ها الزين كلّه ما شاء الله
العنود : مرهه حبيت الشكل مع النونو الزغنطون إللي طالع
غدير : شكله مخربني
أسيل لفت عليها : بسم الله عليك وش إللي مخربك يا حياتي تراه مرهه جملك
بتول خلصت من رولا بعد معاناة و خلتها تروح تلبس فستانها الأبيض
ترف : مرهه متحمسة أشوفها با الفتسان الأبيض
بتول : الحين بتدخل بس ثواني
لينا فتحت الباب : مستعدين تشوفون قمرنا؟
العنود : إييي
دخلت رولا و كانت قمة قمة قمة في الجمااااالللللللل
كان شعرها الطويل الأسود إللي لتحت رقبتها مزينّها و طرحتها البيضاء مخليتها أميرة
ترف حضنتها : بسم الله ماشاء الله وش ها الزين كلّه يا رولا صدقيني ذيب لو شافك كذا بيغمى عليه
لينا دمعت وهي تشوف أختها عروس وهي تعتبرها بنتها مب أختها
لينا قربت منها وهي تمتم بيدها ورفعت يدها وحطتها على راسها وبدت تمشيها لين وصلت رجولها وحضنتها
لينا وعيونها تدمع : تبارك الله ياحظ ذيب برولانا بسم الله عليك ياعيون أختك
رولا : حياتي يا لينا لا تبكين أساسًا مرح أطلع من عندكم حتى الرياض بجي معكم
غدير : والله يا رولا ماشاء الله عليك قمر قمر قمر
الكل كان منبهر بجمال رولا إللي صدق ذوبهم هم كيف ذيب
ترف : يا بنات أنا خلصت تجهيز
أسيل : و أنا بعد
العنود : صبر اللبس حلقي
لينا : أنا بعد خلصت
بتول : أنا باقي بس شعري بحاول أخلصه بسرعة
وبعد ربع ساعة الكل صار جاهز تمامًا وكانوا البنات يتنقلّون من بيت أبو عمر لا بيت الجد فهد عشان المعازيم
___________••___________
< عند الحريم >
أم خالد : يا أسماء تعالي معي نشوف رولا لأن مابقى شي على الزفة
أم نايف : يلا يلا
راحوا أم خالد و أم نايف عند رولا وهم فيهم كمية مشاعر لا رولا لأن يعتبرون بنات سعود بناتهم وبعد العيال عيالهم
دخلت أم خالد على رولا ودمعت عيونها بفرح لها
أم خالد : بسم الله عليك يا بنتي ماشاءالله ها الزين كلّه بيحظى به ولدي
أم نايف سلمت على رولا : الله يحفضك يابنتي ولا تخافين صوني بيت زوجك و احفظيه
أم خالد جت عندها تحصنها وحضنتها بقوة وهمست رولا في أذن أم خالد
رولا بهمس : يا أمي والله يا إن فيني ضيقة بعدم وجود أمي و الحين راحت شوي من شفتك
أم خالد مسحت على راسها بحنان
أم نايف : تجهزي يا حبيبتي الزفه قربت
رولا : تكفين يا عمة تكفين أبي أخواني
أم خالد : يا أمي  أخوانك برا بس دخلونا قبلهم وبيدخلون الحين لا تخافين
طلعوا أم خالد و أم نايف ودخلوا أخوان رولا
عمر وهو ماسك دموعه  : لا إله إلا الله الله يحمي ها الوجه من العين بسم الله عليك ياعيون أبوك و أخوك
فراس: وش ها الزين يا رولا قلنا جميلة بس هدي علينا شوي
أما فارس قرب منها وحضنها وعيونه ماوقفت
فارس : ما توقعت يجي اليوم إللي أزفك فيه عروسة يا رولاي
عمر : اوهوه تبيها تصيح علينا الحين
فارس : أصبروا بحصنها
حصنها فارس و حب راسها وبعد عمر وفارس حبو راسها
دخلت بتول على رولا وشافت أخوانها
بتول : اوهوه مجتمعين بدوني ها
عمر : الله يا بتول وش ها الجمال اليوم غطيتم على كل الحضور
بتول : طالعين على أخواننا
فراس : محد معبرني بالمدح غيرك
بتول : أقول يلا عند الرجال ،ويلا يا رولا الزفة جت وين الشريط إللي قلتي سوتيه؟
فارس : سويتي شريط مسجل بدون محد يدري؟؟
رولا : إيي سويته لزفتي
عمر زعل بس سكت عشان ماتزعل رولا
عمر : يلا يا فارس خلها على راحتها
طلعوا العيال وشالت بتول المسجل تعطي الدقاقة تشغلّه و رجعت هي ولينا و ترف عشان يزفون رولا وباقي البنات عند الحريم
طلعت رولا من بيتهم وكان الدقاقات والمعازيم بالحوش والكوشة بجانب بيت الجد فهد في الحوش وطلعت رولا بجمالها وطلّتها الباهية والكل يسمي ويذكر الله على جمالها وكانت تنزف على الكلمات إللي كانت :
- يمه هناي اليوم ليتك حضرتي
وتشوف عينك فرحتي في عيوني
يمه هقيت الفرح راح خذتي
واليوم كل الناس فيك ذكروني
يمه الفرح باهت وروحك بتحيي
أتخيلك جنبي وتزهر لحوني ،، -
وكانت تفصله موسيقى هادئه و ابتدت الكلامات مره ثانية بـ:
-يابوي سعود ليتك بقربي
وتشوف عينك فرحتي وسط عيني
ليتك حضرت فرحتي وكنت جنبي
وتزفني لـذيب عريـسي
ويابوي وتسلم يده ليديني
ياليت كل العمر ترجع أمانيه ..-
و أنتهت الزفة وجلست على الكرسي إللي على الكوشة وهي بكلمات زفتها أثرت على كل المعازيم ولكن الكل كان يخبي دمعته خوفًا من أن تنهار عليهم
أم نايف كانت تقوم المعازيم على العشاء
أم خالد : يا أسماء حمد جاء يقول عمي فهد يبي يزف ذيب ويجي يشيل رولا
أم نايف : خلي المعازيم يتعشون وبعدها نطلعها
أم خالد لفت وشافت البنات كلهم تاركين العشاء وراحت لهم معصبة
______••______
< عند الرجال >
بدوا المعازيم يجون وكانوا الجد فهد و عمر وفارس وفراس و ابو خالد و أبو زياد وذيب وخالد بجنب بعد وإللي  يجي يسلم عليهم
بعدها بربع ساعة جو الدقاقين وبدوا يدقون و عيال الديرة واحفاد الجد فهد يرقصون و جاء وقت السامري إللي يجيب  راس ذيب ونزل يلعب معهم بسيفه وهي :
لاعبيني ياهوى واليل سامر
لاعبيني باللحون السامرية
كيف حرفك لعثم الحناجر
من سنا الافكار حيّه
وبعد ما خلص ذيب عرضه جاه أبو خالد و....