ငါကွာရှင်းချင်တယ် [ဘာသာပြန်]

[3]

{Unicode}

Wechat အပ်လို့ရမလား?

ချန်းမင်ဟောင်သည် ထိုအေးစက်စက် မျက်နှာပိုင်ရှင်၏ အတွေးများကို ခွဲခြမ်းစိတ်ဖြာရန် ကြိုးစားရင်း, မေးခွန်းများဖြင့် ပြည့်နှက်နေသော မျက်န‌ှာဖြင့် ကြည့်သည်။

ကြည့်ခံနေရတဲ့ ယန်ရှောင်းကတော့ သူ့ရဲ့ ရှုပ်ထွေးနေမှုကို ဖြေရှင်းချက်ပေးဖို့ အစီအစဉ်မရှိလေဘူး။ ယန်ရှောင်း တည်ငြိမ်စွာ သူ့ခြေထောက်တွေကို ပြန်ရုတ်ပြီး ကွန်ပြူတာအိတ်ကို စားပွဲပေါ်ချကာ တည့်တည့်မတ်မတ် ထိုင်သည်။

ယဲ့ဖေး မျက်ခုံးပင့်ပြီး အခုထိ အံ့ဩထိတ်လန့်နေတဲ့ စတိုင်လစ်ကို "မင်းအခုနက ပြောသလိုလည်း မဟုတ်ဘူး" ဆိုသော အကြည့်မျိုးပေး၏။

စတိုင်လစ်: "..."

မဟုတ်ဘူး, သူတကယ် မလိမ်ဘူး!

သူတို့အောက်ထပ်မှာတုန်းက သိသိသာသာကို ဒီလူက ပူးပေါင်းဆောင်ရွက်ဖို့ ငြင်းနေခဲ့တာ, အခုကျမှ ရုတ်တရက် ဘာလို့ ပါးစပ်ပြောင်း*[၁]လိုက်တာလဲ?

ယောက်ျားတစ်ယောက်ရဲ့ ပါးစပ်က ကလိမ်ကကျစ် တစ္ဆေတစ်ကောင်လိုပါလား!*[၂]

"ကောင်းတာပေါ့," ယဲ့ဖေးရယ်သွမ်းရင်း ပြောသည်။ "မင်းရဲ့ အမျိုးသမီးဖန်တွေ စိတ်လှုပ်ရှားနေတော့မှာပဲ"

ယန်ရှောင်းတွင် အလွန့်အလွန်ချောမောသော မျက်နှာနှင့် တင်းမာသော အသွင်အပြင်ရ‌ှိပြီး သူ့မျက်နှာ ကောက်ကြောင်းမှာ နက်ရှိုင်းလှ၏။ သူလုပ်ငန်းစစချင်း အစောပိုင်းကာလမှာတင် ၎င်းကို မီဒီယာများမှ မတော်တဆရိုက်ကူးခံလိုက်ရပြီး မရေမတွက်နိုင်အောင် ရှာဖွေခံရမှု, ချီးကျူးခံရမှုများနှင် အဆုံးသတ်ခဲ့သည်။ ခုနစ်နှစ်ကြာသွားသော်လည်း အချောမောဆုံး ဖြတ်သွားဖြတ်လာများအကြောင်း ဖိုရမ်များတွင် ဆွေးနွေးချိန် ခိုးကြောင်ခိုးဝှက်ရိုက်ကူးထားသော သူ့ပုံများလည်းပါဝင်တတ်သည်။ သူသည် ရံဖန်ရံခါသာ အင်တာဗျူးများကို လက်ခံလေ့ရှိပြီး ခပ်လျှိုလျှိုနေတတ်ကာ မလွှဲမရှောင်သာမှသာ ကင်မရာရှေ့ပေါ်လာတတ်သောကြောင့် ပရိတ်သတ်အများကြီးကို စိတ်သောကရောက်စေသည်။