ငါကွာရှင်းချင်တယ် [ဘာသာပြန်]

[24]

{Unicode}

ကိုယ်မင်းကိုသဘောကျတယ်
မင်းနဲ့အတူရှိချင်တယ်

တိုင်ဖွန်းမုန်တိုင်းပြီးဆုံးသွားသော်လည်း ၎င်း၏သက်ရောက်မှုမှာ ပျောက်ကွယ်သွားခြင်းမရှိသေးပေ။ မိုးဖွဲဖွဲလေးများ စတင်ရွာသွန်းခဲ့ရာမှ မကြာမီတွင် ပြင်းထန်သောမုန်တိုင်းတစ်ခုအဖြစ်သို့ ရောက်ရှိသွားတော့သည်။ လေပြင်းတိုက်ခတ်ခြင်းနှင့် မိုးကြိုးပစ်ခြင်းများကြောင့် မြင်ကွင်းတို့မှာ ကမ္ဘာပျက်နေသည့်ပမာ။ လမ်းသွားလမ်းလာများသည် မိုးခိုရန်နေရာများရှာဖွေနေကြကာ ခဏကြာသော် လမ်းပေါ်တွင် ခက်ခက်ခဲခဲ ရုန်းကန်လှုပ်ရှားနေကြသော ကားများသာရှိတော့သည်။

ယန်ရှောင်းသည် အချိုပွဲဆိုင်မှ ပဲနီလေးအရသာနို့နှစ်လွှာအချိုပွဲနှင့် လျှောက်ထွက်လာချိန် ဒရိုက်ဘာက ချက်ချင်း ထီးတစ်ချောင်းဖြင့် သူ့အားလာကြိုသည်။ ကားကို ဆိုင်ရှေ့နားလေးတင် ပါကင်ထိုးထားသော်လည်း ပြင်းပြင်းထန်ထန် ရွာသွန်းနေသောမိုးကြောင့် သူသည် အနည်းမျှစိုရွှဲနေတုန်းပင်။

"ဥက္ကဌယန်, ကိုယ့်ကိုယ်ကိုယ် ခြောက်အောင်လုပ်လိုက်ပါဦး" ယန်ရှောင်းက မသေမသပ်ဖြစ်ရသည်ကို မုန်းကြောင်းသိသဖြင့် သူကားထဲဝင်ထိုင်လိုက်ချိန် ဒရိုက်ဘာက တစ်ရှူးထုပ်ကို လှမ်းပေးသည်။

"မလိုဘူး" ယန်ရှောင်းပြန်ဖြေလိုက်ရင်း ဒရိုက်ဘာကို ဖြောင့်‌ဖြောင့်မောင်းရန်ညွှန်ကြားလိုက်သည်။

လမ်းကို ခွဲခွဲခြားခြားမြင်နိုင်ရန်ခက်ခဲလာသောကြောင့် ကားသွားနှုန်းမှာလည်း နှေးကွေးသွားသည်။ ယန်ရှောင်းသည် ဒရိုက်ဘာကို မြန်မြန်မောင်းရန်မလောပါ၊ နို့နှစ်လွှာအချိုပွဲယိုဖိတ်သွားမှာစိုး၍ သူသည် လက်တစ်ဖက်ဖြင့် အချိုပွဲဘူးကိုသေချာကိုင်ထား၏၊ သူ့မျက်လုံးများထဲတွင် မှိန်ပျပျအပြုံးတစ်ခုက ပြိုးပြိုးပျက်ပျက်ဝင်းလက်နေသည်။

သူ၏ပုံမှန်အစီအစဉ်အတိုင်းဆိုလျှင် အခုချိန်တွင် ယဲ့ဖေးအိမ်ပြန်ရောက်နေပြီဖြစ်သည်။ ယန်ရှောင်း ဝယ်လာသည်ကိုမြင်လျှင် သူပျော်သွားလိမ့်မည်။ သူစောစောပြန်လာမည့်သတင်းအား မပြောပြရန် ယန်ရှောင်းဆုံးဖြတ်လိုက်သည်။ ချန်းမင်ဟောင်နှင့် သူရှာတွေ့ခဲ့သော အွန်လိုင်းပေါ်ကအချစ်ရေးအကြံပေးချက်များအရ တစ်‌စုံတစ်ယောက်၏အချစ်ရေးဘဝတွင် သင့်လျော်သောစပရိုက်များ မလွဲမရှောင်သာလိုအပ်ပါသည်။