AIRLEYA

XVIII

Chapter XVIII

DALAWANG ARAW matapos ipagdiwang ni Airleya ang kanyang kaarawan, nagtungo siya sa teritoryo ng House Silverio. Isa iyon sa mga plano niyang matagal nang gustong gawin—ang makilala ang pamilyang Silverio.

Hindi sana iyon magiging posible kung hindi siya tinulungan ng kanyang ama, na ngayo'y buong pusong bumabawi sa mga taon na nawala sa kanilang mag-ama. Kahit pa may mga taong pilit na gustong sirain ang unti-unti nilang nabubuong samahan.

"Lady Airleya, narito na po tayo," magalang na sabi ni Sir Caesar, na nagsilbing kutsero niya sa araw na iyon.

Pagkababa ng karwahe, agad na napatingala si Airleya sa napakalaking gate ng Silverio Estate.

"Wow..." hindi niya napigilang sambitin.

"Mas malaki ba ang Silverio Mansion o ang Imperial Palace?" tanong niya kina Sir Caesar at Sir Exter habang titig na titig sa mansiyon.

Pakiramdam niya ay hindi na iyon simpleng mansion.

Isa na iyong palasyo.

Ilang sandali pa'y sinalubong siya ng Duke at Duchess Silverio kasama ang kanilang dalawang anak na lalaki—sina Gelal at Killian.

Maayos na yumuko si Airleya at isinagawa ang tamang noble courtesy.

Napapalakpak naman ang Duchess.

"Perfect courtesy! Marvelous!"

Napangiti si Airleya sa papuri.

"Ito ang panganay naming anak, si Gelal Vincent," pagpapakilala ng Duke.

"At ito naman ang bunso, si Killian Serio."

Magalang na yumuko ang magkapatid bilang pagbati.

Hindi mapigilang mapatitig ni Airleya sa dalawa.

Pareho silang may silver na buhok at sky-blue na mga mata na minana sa kanilang ama.

Napakaguwapo ng magkapatid.

"Kung hindi lang sinabi ni Papa na dalawa ang anak ninyong lalaki," seryoso niyang komento habang nakatingin kay Killian, "pagkakamalan ko talagang babae si Lord Killian."

Napabuntong-hininga si Killian.

Samantalang si Gelal ay napangiti at inakbayan ang nakababatang kapatid.

"Nasanay na kami," natatawang sabi ng Duchess.

"Marami na ring nagsabing mukha siyang babae dahil sa sobrang ganda niya."

Tumango si Airleya.

"Pero gwapo pa rin siya."

Nagpatuloy silang maglakad sa mahabang hallway habang nagkukuwentuhan.

Hindi nagtagal ay nakasalubong nila ang dalawang maid na agad na yumuko.

"Your Grace..."

Napakagat-labi ang isa sa mga ito.

"Hindi pa rin po namin siya mapalabas ng silid."