AIRLEYA

XIV

MAKALIPAS ANG KALAHATING ORAS, narating ni Airleya ang mansyon ng pamilya Whitlock.

Mula pa lamang sa malayo ay kitang-kita na niya ang kaguluhan sa loob ng bakuran. Nagkalat ang mga armadong kabalyero na hindi niya kilala, habang walang awang winawasak ang katahimikan ng mansyon ng kaniyang mga lolo't lola.

Pagkababa pa lamang niya ng karwahe, mabilis niyang hinugot ang espada mula sa kaluban.

Swish!

Sa isang iglap, bumagsak ang unang kabalyerong sumugod sa kaniya.

Mahigpit niyang hinawakan ang kaluban gamit ang kaliwang kamay at ginamit iyon bilang pansalag sa mga kasunod na pag-atake.

"Sino ang nag-utos sa inyo na lusubin ang Whitlock?" malamig niyang tanong.

Kalmado ang kaniyang boses, ngunit sapat iyon upang maramdaman ng sinumang nakarinig ang nag-aalab niyang galit.

Nag-aalala siya para sa kaligtasan ng kaniyang lolo at lola.

Kung may nangyaring masama sa mga ito...

Hindi niya mapapatawad ang sinumang may kagagawan.

Maya-maya'y may naramdaman siyang presensiya sa kaniyang likuran.

Dahan-dahan siyang lumingon.

Isang binatang nasa dalawampung taong gulang ang nakatayo roon. Hawak nito ang isang mahabang espada. Nababalot ng dugo ang kasuotan nito, at may mga patak pa ng dugo sa kaniyang mukha.

Hindi man lamang ito kinakitaan ng takot.

Bumaling si Airleya kay Sir Exter.

"Sir Exter."

"Po, Lady Airleya."

"Puntahan mo sina Lolo at Lola. Siguraduhin mong ligtas sila."

Saglit siyang tumigil bago muling nagsalita.

"At kapag may nagtangkang saktan sila..."

Unti-unting lumamig ang kaniyang mga mata.

"...huwag kang mag-iiwan ng buhay."

"Masusunod."

Agad na umalis si Sir Exter papasok ng mansyon.

Si Sir Ceasar na lamang ang nanatili sa kaniyang tabi.

Muling ibinalik ni Airleya ang tingin sa lalaking nasa harapan niya.

"At sino ka naman?"

Tahimik lamang siyang pinagmasdan ng binata.

"Wala siya sa alaala ng tunay na Airleya..." bulong ng kaniyang isipan.

Ngumiti ang lalaki.

Umaabot hanggang balikat ang makintab nitong kayumangging buhok. Kitang-kita sa mamahaling kasuotan at tindig nito na nagmula ito sa isang marangal na pamilya.