مسكتها فرح مع شعرها: لا ما سمعت وش بتسوين مثلًا؟ ، بتخربين بينهم؟ لا ما تقدرين ، بتسوين شي لنجد؟ والله لتشوفين نجوم الظهر
سارة بوجع: افتحي شعري يا مريضه
فرح: ما المريضه الا أنتِ ، و احذرك لو ما بعدتي عند نجد و عساف والله لقول لسعد أنك تحبين واحد مخطوب و أنك حاولتي تخربين خطبته ذاك اليوم ، عاد تعرفين غلات عساف عند سعد ما يحاتج أقول
دخل سعد: ايش فيه؟
نزلت فرح يدها بسرعة و بدت ترتب شعر سارة بتوتر: ولا شي بس أرتب شعر سارة قالتلي أن شعرها خربان فـ رتبته لها ناظرت في سارة و ابتسمت، صح؟
هزت سارة راسها بالإيجاب و في داخلها غضب
سعد: فيه فطور؟
فرح راحت عنده وحاوطت يدينها على رقبته و ببتسامه: سويت لك احلى بيض يحبه قلبك
سعد ابتسم: والله؟
فرح على وضعها: ايه باسته على خده و لفته لجهت باب المطبخ ، روح أنت اجلس و الفطور بيجي الحين
سعد: لا تطولون
فرح: لا ماعليك ماننا مطولين لفت على سارة و رفعت صوتها ، يلا سارونه ودي السفره
سارة وهي تناظرها بِكُره: والله انك خبيثه
قربت من اذنها فرح و ببتسامه: طالعه على أخت زوجي
أخذت صحن البيض و سارة أخذت طوفريت الشاهي و طلعو لصاله و حطو الفطور على السفره و بدو في الفطور
أم سعد: تسلم يدينك البيض حلو
فرح ببتسامه: بالعافيه
سعد هو مو متطمن: سارة فيك شي؟
سارة أبتسمت بتسليك: لا مافيه شي
سعد: متأكده؟ أحسك ماش اليوم
فرح: وش بيكون فيها الله يهديك ياسعد ، أكيد فرحانه بخطبت عساف ولد خالتها بس ماقدرت تعبر أو خانها التعبير
سارة وهي تناظر فرح ببتسامه مُتصنعه: ايه خاني التعبير و بقوة
أم سعد: على طاري عساف ، وجدان بتطلع اليوم من المستشفى بتروحين معي يافرح؟
فرح: مدري والله ياخالتي
سارة بسرعة: أنا بروح يايمه
أم سعد: باخذك بالغصب حتى لو مانك رايحه
فرح الي خافت سارة تقابل عساف و تشوش راسه على نجد ، أو أنّ يمكن يطلع كلامها صح و بينتقم من نجد و حبت تروح و تشوف سبب روحت سارة و حماسها ذا: خلاص يا خالتي بروح معك
أم سعد أبتسمت: إن شاءالله العصر و احنا ماشين
هزت راسها فرح و كملت فطورها
-
في بيت نجد...
طلع من المطبخ وهو يبكي وقفت وراحت له بسرعة بدت تمسح دموعه: وش فيك؟
أنس هو يبكي: وين راحت؟
مازالت على وضعها: مين؟
أنس: مين أخذه، أنا حطيته في الثلاجه
نجد: أنوس ، وش تقول أنت؟
أنس: الغوار مالقيته ، أنتِ اخذتيه؟
نجد: لا ، و دورته زين؟ ، يمكن انه داخل بين الاغراض الي في الثلاجه
أنس: لا دورته و طلعت كل الي في الثلاجه و ما لقيت شي
نوف الي نازله من الدرج و تضبط برقعها: وش الي مالقيته في الثلاجه؟
أنس: العصير الي جبته لـ نجدي
نوف: اهااا
نجد أعتدلت بوقفتها و بشك: نوف
نوف: هاه
نجد زفرت: لا تقولين أنك اخذيته؟
نوف: أخذت غوار أنا مو عصير
نجد صرخت: كلها واحد غوار عصير كلها واحد خير تاخذينه؟
نوف: بسم الله الرحمن الرحيم
ليلى طلعت من غرفتها بخوف و سيف نزل من الدرج على حال والدته
ليلى: وش الصراخ ذا وش صاير بعد؟
أنس أخذ العصاء و ظربها على راس نوف ، صرخت نوف من الوجع
أنس: تستاهلين جايبه لـ نجدي أنا
سيف: ممكن تفهمونا وش صاير؟
نوف: ياقليل الادب تضرب الي اكبر منك؟
أنس بعصبيه: ايه احسن على شان تتأدبين
كانت بتضربه بس حطته نجد وراها و دقت نوف عنها: قلت لك أخوي لا تلمسينه
نوف الي محطيه يدها مكان الظربه: ماعلمتي أخوك الأدب يوم أنه يضربني
نجد: و أنتِ ماتعلمتي الأدب يوم انك تاخذين الي في الثلاجه و مانه لك
ليلى بعصبيه و صراخ: خلااااااص ، خلاص أنتِ وياها و قلولي وش صاير؟
نجد: خالتي أنوس جاب لي عصير غوار وحطه في الثلاجه قامت نوف و أخذته
نوف: شدراني على بالي سيف جايبه
سيف: لا بالله ، ومن متى اجيب شي وما اقلكم عنه؟
ليلى: طيب خلاص الحين اجيب معي
أنس: لا أبي نفس الي جبته لـ نجدي
ليلى: طيب يا ياقلبي وش لون الي جبته لـ نجدك؟
أنس: أنتِ راح تجيبيلي اللون ، بس ماراح تجيبيلي نفسه
ليلى بستغراب: كلها واحد ترا بس الألوان الي تختلف
أنس: لا يختلف ، الي جابه صقر غير
نوف: من زينه عاد ، وبعدين مسمي ذاك صقر و شنبه ياكثره كأنه عش عصفور
نجد بحده: نوووف ، عن الغلط
نوف: ياويلي ليكون تحبينه؟ ، تراك مخطوبه
نجد: مالك دخل ناظرت في سيف ، لقيت بيت؟
سيف بستغراب: لا باقي
نجد: أستعجل طيب
نوف رفعت حواجبها: شايفه؟ ، شايفه يايمه كيف ملت منا ماعاد تبينا الحين
نجد: لا ، لا ياخالتي لا تفهميني غلط والله مو قصدي شي ، الي اقصده نوف طفشتني و بهذلت عيشتي
نوف: الله يا الكذبه
ليلى رفعت عبايتها على راسها: أمشو
نجد مسكت بعبايتها: خالتي
ليلى لفت عليها بهدوء: إذا ماخلصتي من مقاضي الزواج أمش معنا ، خلصتي أجلسي بالبيت
نجد: بهدوء: لا خلصت
ليلى مشت لجهت الباب: هيا اجلسي
طلعو و سكرو الباب وراهم طلعت نجد برقعها و رمتها بغضب: الله ياخذك يانوف ، اهخخخخخ كريه و بقوه
أنس: افف وش اسوي؟
نجد لفت عليه: وش؟
أنس بملل: أخذت الغوار ، و صقر ماجاء قال بيجي و ياخذني بس كذب عليّ
نجد: ماعليك الغوار بداله غوار ، و خلك اليوم في البيت مو لازم تطلع
أنس أبتسم: طيب ، بس وش نسوي؟
نجد أبتسمت على أبتسامته: وش تبي أنت؟ ، أمر بس و أنا تحت أمرك
أنس بتفكير: امممم ، كيكه بـ الفراولة
نجد: بس ماعندنا فراولة أبتسمت من لاحظت عبوس وجهه ، ماعليك نروح نجيبها و نسوي احلى كيكه في العالم
أنس نط بفرحه: هيه هيه
نجد: يلا ألبس جزمتك و أنا بروح اجيب عبايتي
أنس: طيب
-
في بيت أبو جزاع...
رهف: يعني مانكم حاظرين؟
أم جزاع: أنا بحظر عاد مدري عن البنات
رهف ناظرتهم: بتحظرون؟
فجر: لا
رهف: ليه؟ ، بنت عمكم بتتزوج ولانكم حاظرين عيب
ليان: والله أنا ودي ياعمه ، بس شايفه حالتي صعبه و فجر مانها حاظره من بيساعدني و يدف العربيه
رهف: فجور و أنا عمتك وش بلاك؟ ، مو أنك تعزين فيء و تحبينها؟
فجر: ماقلت شي ياعمتي بس ما ابي احظر
أم جزاع: خليها ، و قوليلي وين بيسوي الزواج؟
رهف: هينا في الحاره
أم جزاع: غريبه
رهف: ليلى الي قالت له ، ما تبي قاعه و صجه و رجعه
أم جزاع: ايه والله احسن لهم هينا مختصر و بسيط
فجر بهدوء: كم باقي على الزواج ؟
رهف: سبوع يمكن ، سبوع تقريباً ، أو يمكن أقل
أم جزاع: الله يتمم لهم على خير
ليان: الا يا عمه شفتي سلطان وينه؟ ، من اليوم طلع ولا جاء
رهف: أول كان عندي يلعب مع العنود ، بعدين قال أنه بيروح لـ أبوة
ليان براحه: اشوا خفت عليه
أم جزاع: الله يهديه ذا الولد كانه شاقي نفسه
رهف: والله أنه اشوا من أنوس ، أنوس مايخلي مكان الا و راح له
فجر: يوه تغيره شفته أمس مع الشباك ماهو أنوس الي أعرفه من قبل
رهف: ايه كبر و تغير ، و الشموس ماقصرت غيرت لون بشرته
أم جزاع: الله يهديه بس ، و يخليه لـ و خيته و يخليه لها
رهف: أمين
-
نرجع لبيت بطلتنا...
الساعة 2:00 تقريبًا..
رجعت للبيت هي و أخوها بعد ما شرت الفراولة ، دخلت المطبخ و بدت بتجهيز المكونات ، راحت للباب الي دق كذا مره: جايه جايه
قربت من الباب و حطت يدها عليه: مين؟
صقر: أبو شنب
ضحكت بخفه: ثواني بس
راحت للبيت لبست طرحتها و برقعها رجعت للباب و فتحته: تفضل ادخل
صقر: ا
نجد: لابسه أنا وش فيك؟
دخل و هو منزل راسه سكرت الباب و ناظرته بستغراب: وش فيك؟ ، مستحي مني يعني؟
صقر: لا وش الي مستحي منك ، بس خالتك و بنتها موجودين ، شيقولون عني الحين؟
نجد: لا مانهم فيه ، طلعو يخلصون اغراض الزواج
صقر: اهاا ، جيت طيب أخذ أنوس لأني وعدته أمس
نجد الي اشرت بيدها على الفرشه المفروشه في وسط الحوش: استريح بكلمك بموضوع
صقر بستغرام: وش هو؟
نجد: استريح و بقلك
رفع ثوبه لـ ركبه بعدين جلس: إن شاءالله أنه خيرر
نجد جلست و بهدوء: الله يا الدنيا كلًا بيتزوج و يصر عنده بيت
صقر: طيب!
نجد: ما تبي يصير عندك بيت؟
وقف صقر بسرعة و نزل ثوبه وهو يقول: السالفه كذا أجل رفع صوته و بدا ينادي ، أنووس ، أنوس يلا مشينا
نجد: صقر تكفى
صقر ما زال على وضعه: ياولد وينك؟
نجد: صقر لا تطنشني ، ما هقيتها منك؟
صقر ناظرها: نجد ارتحت من أمي و خواتي تجين أنتِ ، تكفون ارحموني
نجد: أنت الي ارحمنا؟ ، نبي نفرح فيك و نشوفك عريس ، ترا على فكره ماشفتك عريس أنا ولا شفتك يوم لبست البشت
صقر: مو ذنبي
نجد: الا ذنبك ، قلت لك صقر أجل الزواج لين مانرجع من سفرتنا رفضت
صقر: أبوي منعني ، قال مدام أمجد فيه ذا اهم شي أنتم الي ليه سافرتم؟
نجد: وش أسوي أمي و خواتي و خاله ليلى و بناتها كلهم مسافرين تبيني اجلس لحالي؟
صقر: خلاص مو ذنبي ، أنوووس وينك؟
نجد: والله البنت حلوه ملح و قبله على قولتهم
صقر لف عليها: ليكون نفسها الي يمدحونها أمي و خواتي؟
نجد: ايه هي ، و مدام كلنا نبيها لك أعرف صدق انها تستحقك ، البنت ماشاءالله عليها متربيه و محترمه ، غيررر بكثير عن ليان ، و مايحتاج امدحها دام أخوها عساف و تعرفه أنت
صقر: بس معرف البنت؟
نجد: كفايه اننا نعرفها احنا ، تكلمت معها مرتين مدري ثلاث تهبل
صقر بعد ثواني معدوده: بتعوضني عن ليان وعن الشعور الي عشته؟
نجد بفرحه: ايه ، والله ايه
صقر بهدوء و يحك راسه بأحراج و يتلفت على أنحاء الحوش: خلاص
نجد الي محطيه يدها على بعضها على شان تصفق: خلاص ايش؟ يعني موافق؟
صقر على وضعه: موافق
نجد صرخت بفرحه و بدت تصفق: هيه يعيش صقر ، اووووه و اخيراً صقر بيتزوج
صقر بتوتر: بنت اصه
جاء أنس بستغراب: وش فيك؟
نجد مسكت يد أخوها و بدت تنط: أنوس صقر خلاص بيتزوج
أنس بدهشه: والله؟
نجد: والله
بدو ينطون و يرددون: يعيش صقر يعيش ، هيه يعيش صقر
صقر الي كان يتكلم و يحاول يسكتهم بس ماسمعوه أبداً سكتو على الباب الي دق
صقر بتوتر: شكل خالتك؟
نجد: لا مستحيل توهم راحو ما يمديهم يجون
صقر: لو هي وش بتقول عني؟ ، قليل أدب داخل في بيت البنت
نجد: البنت ذي بنت عمك ، بس صبر خلني أشوف مين
قربت من الباب: مين؟
لفت عليه ببتسامه وضحت من عيونها: شفت مو خالتي
فتحت الباب و دخل و بيده باقه ورد كبيره
نجد بدهشه: اوب وش ذا؟
عساف: وش شايفه أنتِ؟ لف وشاف صقر عقد حواجبه ، صقر!
صقر بأحراج و يحسب تفكير عساف راح بعيد: ا.السلام عليكم
عساف: وعليكم السلام
نجد أخذت الورده منه: اوه مشكور والله يا عساف ، تفضل حياك
عساف: صوتك طالع براء ايش فيه؟
نجد ببتسامه: صقر اخيراً بيتزوج
عساف: والله ، مين سعيدت الحظ
نجد بسرعة: مفاجئة ، راح تكون مفاجئة
صقر: بروح تبين شي؟
نجد: سلامتك ، و بقول لـ اهلك عن الخبريه الحلوه ذي
صقر: لا أنا بقلهم
نجد: تمام الي تبيه
صقر: يلا أنوس مشينا؟
أنس ناظر في نجد و رجع نظره لـ صقر: وعدت نجدي اجلس في البيت اليوم
صقر أبتسم: شف ، شف من يوعد و يـ لتزم بـ الوعد
عساف: صار رجال
نجد الي محطيه يدها على شعر أخوها و تبعثره و ببتسامه: أكيد بيصير رجال دامه ماشي مع ولد عمه
صقر: من أنا؟
نجد: لا جزاع
عساف و صقر نفس الحظه اتسعت عيونهم بصدمه: ايشش؟
نجد ضحكت: ماتوقعتكم تصدقون ، و أنت الي أنوس معك أربعه و عشرين ساعة كيف كذا
صقر: شدراني ، من بعد أمس خفت
نجد بسرعة و ربكه: أبو شنب طولت على عمي تراك
صقر و توه يستوعب على نفسه: ا.يلا مع السلامه
نجد ببتسامه: الله معك ، يا أبو شنب
عساف: فمان الله
أبتسم صقر و طلع ، بعد طلوعه لف عساف على نجد: وش يعنيلك صقر؟ ، علاقتكم قويه
نزلت لمستوا أخوها و أبتسمت: قلبي روح العب في العابك طيب؟
أنس: طيب ، بس متى تسوين الكيكه؟
نجد: الحين ، الحين أسويها ، أنت روح العب و إذا خلصت قلت لك
أنس: طيب
بعد ما دخل أنس اعتدلت بطولها و رفعت برقعها: أخوي
عساف: أخوك! ، و مدخلته البيت و لحالكم بعد
نجد: ايش قصدك؟
عساف مسح على وجهه: نجد ، قصدي واضح صقر ليه في البيت؟
نجد ضحكت بسخريه: ليكون شوشت عقلك و صرت تصدقها؟
عساف: محـ...
قاطعته نجد بصراخ: لا تتكلم ، لا تتكلم إذا أنت كذا و تصدق اي احد تفضل ذا الباب
عساف: نجد
نجد على وضعها: وش الي نجد؟ ، عساف ديني ودين الي يفكر تفكير وصخ
عساف: اهدي يابنت الناس ، و أنا استغربت وجوده هينا و وش يسوي
نجد الي انهات بكي و ملامحها وردت: تعبت ترا ، تعبت منكم تعبت من كل شي ، تعبت من الي بينتقم ، و تعبت من الي بيتخذ حق اهلي مني ، و تعبت من التفكير الوصخ الي زيهم
بدت تضرب يدها على قلبها و بقمت الانهيار: أكتم كل مشاعري في قلبي ، أكتم مشاعري ، أشعر بالحزن عشرات المرات يومياً ، لكني أكتم حزني و وجعي كل يوم نزت لـ الأرض من كثر البكي ، أخفي حزني كل يوم أنا ، اخفيه
ماتحمل أنهيارها و شكلها كذا نزل لها و دفنها في صدره و هو يبوس راسها: خلاص ، أسفه ، أسفه والله بس مو قصدي شي بس استغربت صقر ليه هينا ، و ماصدقت كلام أحد و لا فكرت ، يمكن اني غرت من صقر و كبرت الموضوع ، أو خفت
نجد الي في حظنه و بهدؤ: خفت من ايش؟
عساف سكر عيونه بعدين فتحها: أنك تحبيه أو يحبك
بعدة عنه بهدؤ: لو أحبه ما وافقت عليك ، وصقر يشوفني مثل أخته و جاء هينا لياخذ أنوس بس قلت له أنا يدخل
عساف بستغراب: ليه؟
نجد: لـ اقنعه في الزواج قلت يمكن يسمع مني ، و الحمدلله سمع و وافق
عساف مسكها مع يدها و وقفها و حظنها بقوه: للمره المليون أسفه ، لا تشيلين عليّ بخاطرك طيب؟
نجد شدت جسمها في حظنه و أبتسمت: طيب
جلسو دقائق معدوده على ذا الوضع
عساف الي تذكر و نطق بهدؤ: كيكه أنوس
نجد بعده عنه بسرعة: صح نسيتها
سرعت خطواتها للبيت و دخل وراها و اتجهت للمطبخ لصنع الكيك
-
العصر بضبط في بيت عبدالإله...
نجلاء: ياهلا بـ فرح نورتينا
فرح: بنورك
نجلاء: كيفك أخبارك؟
فرح: بخير الحمدلله
أم سعد: غريبه يوم أنك عمليه طلعوك اليوم الثاني؟
نجلاء: مريضه بنتِ هي الي طلعت على مسؤوليتها
أم سعد شهقت: خطأ و أنا خالتك ليه؟
وجدان: والله يا خالتي ما أحب جلست المستشفيات
أم سعد: عادي تحملي مايصير كذا
نجلاء: على الاقل لو جلست لين بكره أهون
سارة: ليه كم يوم قالو لها تجلس؟
نجلاء الي شايله عليها هي و بناتها الثنيتن تكلمت بدون نفس: مدري أسئليها
وجدان على وضع والدتها بس ماتبي تبين قدام خالتها: أربع أيام
سارة بهدؤ: اها
فرح الي بتلطف الجو ببتسامه: وش بتسمينها؟ ، أنتبهي تغلطين مثل أمك خلت أساميكم شبه بعظ و ألخبط بينكم
ضحكت وجدان: لا ، أبو حمودي مسميها على أمة هيا
فرح: ماشاءالله حلو اسمها
جيلان الي بتقهر سارة: قبال ما أشوف عيال أخوي وعضيدي عساف و نجده
فرح أبتسمت: أمين أمين
سارة بقهر: خبري عساف يكره الاطفال كيف بيجيبون عيال؟
نجلاء: بيجيبون إن شاءالله بيجيبون
جيلان: ما يكرهم بس ما يحب يمسكهم أول ما يولدون
أم سعد: ماعليكم أنّ جاه أطفال من لحمه و دمه بيحبهم و يمسكهم
وجدان: إن شاءالله
نجلاء ناظرت في فرح و ببتسامه: مافيه شي على الطريق يافرح؟
فرح بربكه: هاه ، لاوين بدري عليّ
وجدان: وين بدري عادي ، أنا حملت في حمود من ثالث سبوع من زواجي
فرح بصدمه: يووه
أم سعد: وش الي يووه؟ ، عادي
نجلاء: احنا كنا نحمل بعد مانطلع الاربعين بسرعة
جيلان: شايفه وش كثرنا مستعجلين أمي و أبوي الله يخليهم بس
نجلاء ضربته بخفه و تمتمت: قليلت الادب
جيلان وهي تفرك مكان الضربه: احح
ضحكت فرح و تذكرت والدتها نفس معاملت نجلاء: ايه بعد احنا أبوي مستعجل مره
وجدان: نفسنا أنتم ، بس احنا زايدين عليكم بـ أثنين
فرح بهدؤ: لو أبوي حي الحين كان تلقينا درزل
جيلان: صدق والله؟
ضحكت فرح على ردت فعلها: ايه
نجلاء: الله يرحمه
بعد ثواني جلسو ساكتين تكلمت أم سعد: ا.الا علي و عساف وينهم؟
اعتدلت بجلستها سارة و ابتسمت من ذكر اسمه
نجلاء: علي عنده شغل ، اما عساف والله مدري عنه من خطبت له ماعاد يجلس في البيت
أختفت ابتسامتها و شوي و تنفجر من الغيره و القهر
جيلان: شكله متكي مع نجده
فرح: ما اتوقع ، مستحيل أمي تخلي نجد تطلع معه
وجدان: ليه؟
فرح: أمي كذا عادات عندها
جيلان ضحكت: تذكرت موقف أمك مع عساف
فرح عقدت حواجبها بستغراب: ايت موقف؟
جيلان: عساف يوم كتب كتابه أخذ نجد للسطبل ويوم رجعو ما مع نجد مفتاح ونط عساف الحوش و لقا أمك قدامه
ضحكت فرح: ليكون سوته له شي؟
سارة: رايحين للسطبل لحالهم؟
جيلان: ايه خطيبها عادي رجعت نظرها لفرح ، لا بس كان في يدها عصاء يوم قلها عساف أنه خطيب نجد نزلتها
ضحكت فرح بقوه: من حظه ، والله لو ماقال لها كان كسرت العصاء على ظهره
نجلاء بخوف: تسويها؟
فرح: والله لتسويها
نجلاء: زين أنّ ولدي تكلم الحمدلله
أم سعد: الله يهديه
نجلاء: مجنون ولدي ذا مجنون
فرح: و أخذ الي اجن منه
نجلاء لفت بسرعة على فرح: تكفين؟ ، توقعت نجد هاديه و بتهدي ولدي
جيلان ضحكت بفرحه: و ناسه اجتمعو المجانين
وجدان: و أنتِ الثالثه
فرح: واضح الي فضحتها قبل تتزوج ، مع الاسف ياخاله نجد كذا
جيلان ببتسامه: لا ماعليك مافضحتيها
نجلاء زفرت: مابيدي شي والله غير أقول الله يهديهم بس
-
في بيت نجد...
نجد بملل: عساف بعد خلني اشتغل زين
عساف: اشتغلي منعتك؟
نجد: ايه مشغلني مقدر اتحرك
عساف: يدينك الي تشتغل ترا
نجد زفرت: في احد يحضن شخص في المطبخ؟ ، ولا ويطبخ بعد
عساف الي حاضنها من ورا و في نفس الوقت محطي دقنه على كتفها و يشوفها وهي تشتغل: عساف ما يمنعه شي
نجد سكتت و بدت بتقطيع الفراولة وهي متوتره و خايفه أنّ خالتها تطب عليهم وهم بذا المنظر فزت و صرخت من جرحت نفسها
بعد عنها عساف بسرعة ولفها لناحيته بخوف و مسك يدها وكشر: احح توجعك؟
نجد بألم: وش رايك أنت؟
عساف الي بدا يدور في المطبخ
نجد ناظرته بستغراب: وش فيك؟
عساف مازال يدور: لزقت الجروح وينها؟ ، وينها فيه؟
نجد ضحكت بخفه: ترا جرح بسيط
عساف وقف: وش الي بسيط دم ، دم ينزف من أصبعك ترا
نجد: شكلك تخاف من الدم؟
عساف: ما اخاف منه بس ما احب اشوف الشخص الي احبه و اعزه ينزف دم ، وينها اخلصي عليّ؟
نجد اشرت على الدولااب: هناك في الدولااب الي فوق الثلاجه
فتح الدولااب و أخذ اللزقه و لفها على اصبعها
عساف بحنيه: بالله ماتوجعك؟
أبتسمت له: احس بـ حرارة الجرح بس
عساف: والله أني حمار
نجد عبست: ترا ما ارضى تقول على نفسك كذا
عساف أبتسم: طيب ، خلصت تقدرين تكملين شغلك
ناظرت في اصبعها ب تفحص و ابتسمت: ماشاءالله عليك لو صرت ممرض احسن من المحامي
عساف بستغراب: وش دخل؟
نجد: ضبطت اللزقه زين
عساف ضحك: مايبيلها ترا
نجد بعد تفكير: طيب وش رايك شوي الليل ناخذ الكيكه ذي و نقول لـ سعد و فرح و صقر ونطلع للبر
عساف: بس الكيكه لـ أنس؟
نجد: ماعليك راح اقطع قطعه صغيره له ، هاه وش قلت؟
عساف ببتسامه: تم ماعندي مانع ، بس كيف بتطلعين من خالتك؟
نجد ببتسامه: ماعليك خلها عليّ
عساف على وضعه: اثق فيك
رجعت لشغلها ببتسامه ، فزت على الاصوات الي طلعت في الحوش لفت على عساف بسرعة وهو يقول: وين اروح؟ ، المره ذي والله لتكسر العصاء على ظهري
نجد بخوف: صبر صبر ، خلنا نفكر
عساف على حالها: وش الي تفكرين؟ ، دخلت هي و أنتِ بتفكرين
نجد رفعت الفرشه الي على الطاولة ، الفرشه الطويله المغطيه الطاولة بالكامل: ادخل ، ادخل بسرعة
عساف: نجد مو منجدك؟
نجد هي تناظر باب المطبخ: عساف ادخل مافي حل الا هو
كان بيدخل دفته بقوه من سمعت اصواتهم في الصاله
دخلت نوف و استغربت توترها و نزول الفرشه بسرعه: ايش فيك؟
نجد وهي ترتب الطاولة: ولا شي ، جالسه ارتب الطاولة
نوف جات عند الكيكه: الله ماقصرتي والله ، عاد جايه تعبانه و مشتهيه شي حالي و قهوة
نجد: ا.ذي لـ فيء ، ايه سويتها لـ فيء
نوف: لا والله ، اجل بروح معك
نجد بسرعة: لا ، يعني صقر اكيد بيجلس معنا
نوف الي بتسحب الكرسي و تجلس: مو...
صرخت نجد بسرعه: لا تجلسين
فزت نوف: بسم الله ، ليه؟
نجد بتوتر: ا.مكسور
نوف: كل الصراخ ذا على شانه مكسور
كانت بتسحب الثاني بس صرخت نجد
نوف بخوف: نجد والله أنّ فيك شي ، صاحيه أنتِ؟
نجد حطت يدينها على كتف نوف و هي تمشي: أنوس كب عليه الشاهي ، روحي ريحي اكيد أنك تعبانه
نوف: نجد شايله همي؟ مستحيل
نجد: اكيد بشيل همك ، روحي يلا
نوف: لا ما أبي بشوفك و أنتِ تطبخين
نجد: خلصت ، خلصت أنا
نوف بشك: ايه معليه بجلس هينا ، مشتاقه للمطبخ أنا
نجد دفتها بخفه برا المطبخ و ماسكه الباب بيدها: بجلس لحالي في المطبخ
سكرت الباب و قفلته وزفرت بتوتر و مشت لطاولة و رفعت الفرشة: اطلع
كان بيطلع بس دق الباب و دفته برجولها
عساف: اهخ
فتحت الباب: خالتي
ليلى دخلت المطبخ: من عندك؟
نجد: محد ، ليه؟
ليلى: محد؟
نجد هي تفرك يدها بتوتر: ا.يه
ليلى: من الي جاء اليوم؟
نجد: صقر
ليلى: غيره
نجد ضحكت بتوتر: من غيره؟ ، مافي احد
ليلى بعصبيه: نجد مين؟ ، أنوس يقول فيه أحد دخل البيت
نجد بربكه: اهاا ، قصده عساف ، ايه عساف جاء و جاب لي الورده ذي أخذت الورده الي كانت على الطاولة ، شوفيها يا خالتي وش رايك؟ ، حلوه صح؟
ليلى: وينه؟
نجد: راح
ليلى: مين الي معك في المطبخ؟ ، أنوس قال دخل و يساعدك في الكيكه
نجد تمتمت: ياربي يا أنوس كأني ما اعلمك لا تقول لـ اي شخص عنا
عساف الي تحت الطاولة: ماعينت خير دام أنس قالها كل شي يارب يسرها
ليلى: انطقي
نجد: خالتي الله يهديك تصدقين ولد صغير؟ ، محد معي
ليلى: نجد ، لا تستهبلين عليّ ، أنوس قال سمعت نجد تتكلم مع أحد في المطبخ
نجد زفرت براحه و ابتسمت: أكلم فروح ، جالسه أسوي كيكه على شان بروح لـ بيت عمي مصلح و اتصلت لتسلى معها شوي
ليلى بعدم راحه: وليه تروحين لبيت عمك؟
نجد: ا.بس كذا بغيير جو شوي ، و يمكن فيء تبي مساعده بساعدها
ليلى: اهاا ، طيب كيفها فروح اخبارها؟ ، و وينها فيه؟
نجد بتسامه: الحمدلله بخير ، و هي عند بيت عمتها مدري خالتها أم سعد
عساف ببتسامه: في ذبتي أنك كفووو
ليلى: ايه زين
كانت بتطلع ليلى بس استوقفتها نجد: خالتي
لفت عليها
نجد هي تفرك يدها: زعلانه مني؟ ، اسمعي والله ياخالتي مو قصدي بس أنتِ تعرفين نوف و اسلوبها ، و الصراحه أنا مليت منها و من هواشها
ليلى: حصل خير
نجد: يعني مانك زعلانه مني؟
ليلى أبتسمت: كيف ازعل منك ؟ ، و أنتِ دواء ينحط على الجرح
راحت نجد وحضنتها ببتسامه: ياااروحي يا خالتي ، تدرين أني أحبك؟
ليلى الي تمسح على ظهرها بيدينها: ادري
بعدت عنها نجد: اكيد انك تعبانه روحي ريحي
ليلى: ايه والله رجولي مانها شايلتني
نجد: ايه ، الله يعينك
بعد طلوع خالتها سكرت الباب وراها و راحت لـ عساف و رفعت الفرشه ، طلع من تحت الطاولة و هو يعرج
نجد بستغراب: وش فيك؟
عساف الي جلس على الكرسي: أول شي ماقصرتي رفستيني برجلك ، ثاني شي تصلبت رجولي و أنا جالس عليها
نجد ضحكت بخفه
عساف: ايه اضحكي
نجد على وضعها: أسفه معليش ، وليه ماجلست على الأرض؟
عساف: مدري ، من الخوف ماقدرت
نجد: طيب تقدر تمشي الحين؟ ، على شان تطلع
عساف وقف بصعوبه: ايه ماعليك ، بس كيف اطلع؟
نجد ناظرت الشباك: ذا الشباك اطلع معه وراح يطلعك على الحوش ، و أنا بوقف في الحوش و افتح الباب لك و على طول تطلع
عساف ناظر في الشباك و رجع نظره لنجد: مافي حل غيره؟ ، نطت الشباك صعبه
نجد: لا ، ونطيت الحوش انت ما تقدر تنط من الشباك؟
رفع ثوب و مسكه بـ اسنانه: يلا توكلنا على الله
طلعت نجد و فتح الشباك عساف وكان بيطلع بس رجع من شاف شخص طلع من الملحق
سيف: نجد ، وش عندك؟
نجد فزت: ماعندي شي
سيف ناظر في شباك المطبخ و رجع ناظر نجد: فيه أحد عند الشباك؟
نجد: لا ناظرت لشباك و شافت طرف ثوب عساف و تمتمت ، أنك حمار صدق يا عساف ناظرت في سيف ، إذا قصدك على الابيض ذاك ، ذي منشفه
سكرت عيونها من بعد عساف عن الشباك: ايه شكل نوف اخذتها
سيف: اها ، بروح اخذلي ماء اجل
نجد بسرعة: لا وش الي تروح ، أنا بجيبه لك
سيف: لا ما أبي اتعبك
دخل للبيت قبل لا تتكلم حطت نجد يدها على وجهها و بخوف: والله و رحتي فيها يا نجد
فزت على الشخص الي تكلم وراها: وش تنتظرين ليه مافتحتي الباب؟
نجد لفت عليه: يمه عساف!
عساف: لا خيالي ، يلا بروح تبين شي؟
نجد: سلامتك
عساف الي طلع و قبل لاتسكر الباب نجد دخل راسه: صح ، متى اجي و اخذك
نجد: بجي مع صقر لا تتعب نفسك بالمشوار
عساف بغيره: عادي لو اتعب نفسي ، متى؟ اخلصي
نجد زفرت: مدري بتصل عليك وقتها
عساف: طيب
جاها أنس جري بعد ماسكرت الباب ، نزلت لمستواه و مسكت بيدينه و ببتسامه: وش بغيت؟
أمس بحزن: صدق صقر بيتزوج خلاص؟
نجد بستغراب: ايه ، ليه؟
أنس على وضعه: إذا تزوج ماعاد يأخذني للغنم ولا البقاله ، ولا يلعب معنا
باسته على خده و أبتسمت: لا ، مراح يصير كل ذا ، و إذا تزوج عادي راح ياخذك و يلعب معكم ، وبعد راح يجون أخوان لـ سلطان و تلعبون سواء
أنس بفرحه: والله صدق؟
نجد: إن شاءالله
أنس ببتسامه: طيب الكيكه استوت؟
نجد على وضعه: ايه ، راح اقطع لك منها و الثانيه باخذها معي
أنس بستغراب: وين بتروحين؟
نجد: عندي شغل فـ لازم اخذها معي قربت من اذنه و بصوت خافت ، بس اسمع أنا قلت خالتي أني بروح لبيت عمي مصلح و صدقتني ، أنت لا تقول لها أنّ عندي شغل طيب؟
أنس: طيب ، بس عليه كذبتي عليها؟
نجد حطت يدها على فمه بسرعه: اشش ، اش لا تسمعك الحين ، لأني لو قلت لها ما راح تخليني اروح
أنس: طيب
نجد بتنبيه: لا تسوي أزعاج ولا تشاغب ، تلعب بالعابك بعدها تفرش أسنانك و تنام ، أتفقنا؟
أنس: أتفقنا
نجد ببتسامه: كفك أشوف
اعطاها كفه بكفها و دخلو للبيت
-
في بيت أبو صقر..
الساعة 10:00 تقريباً..
أم صقر: قضيتي كذا خلاص؟
فيء براحه: ايه الحمدلله
أم صقر: الحمدلله
ضي: والله أني شايله هم الزواج هم
فيء: عاد كيف أنا العروسه
أم صقر: هونوها و بتهون بإذن الله
فيء: يارب
أبو صقر: الله يوفقك وأنا أبوك يسعدك من عالي سماه
فيء راحت وحضنته: أمين ، و اجمعين يارب
أبو صقر ناظر في صقر الي مسرح و بـ عالم ثاني: هش ، وين وصلت؟
صقر شتت ذهرنه: قريب
أم صقر: وش بلاك؟ من يوم جيت ماش
ضي: رعد صار له شي؟
صقر: لا ، لا مافيه شي
فيء: اجل؟
صقر زفر و بسرعة: أنا موافق
أبو صقر: على وش؟
أم صقر الي حطت يدينها على جبينه و بدت تتفحص حرارته: مريض ، فيك شي و أنا أمك؟
صقر نزل يدها من على جيينه و باسه: مافيه شي يا الغاليه ، بس من كم يوم كنتم تقنعوني بموضوع ، و أنا أقلكم موافق خلاص
أم صقر الي راح عن بالها الخطبه: وش موضوعة؟
فيء بفرحه: دقيقه ، دقيقه لا تقول انك تبي تتزوج؟
ضي ضحكت: صقر صدق؟ ، موافق خلاص ، خلاص يعني؟
صقر الي يحاول يخفي فرحت من شافهم فرحانين: ايه صدق
أم صقر بفرحه و بكت: الحمدلله ، الحمدلله طاح الحطب الي براسك و بشوفك عريس للمره الثانيه إن شاءالله
صقر بهدوء: إن شاءالله
أبو صقر بفرحه: الله يتمم لك على خير ، و اخترت القرار الصح و أنا أبوك ، و إن شاءالله أنها بتكون زوجة صالحه و تسعدك و تكون الأم الثانيه لولدك
أم صقر الي مسحت دمعتها بطرف طرحتها: إن شاء الله يارب
فيء: أمي لا تصيحين تكفين ، شوي و بصيح أنا والله
أم صقر: صيحي و أنا أمك ، ذا الخبر اسعدني والله
ضي الي شوي و تبكي: كلنا ، و الحمدلله بيصير عند سليطين أخوان
أبو صقر: الله من دلعكم يا الحريم ، تصيحون على اتفه الاسباب
أم صقر: ذا الخبر مو تافهه أبدًا
فيء: صح
ضي أخذت شهيق بعدين زفرت: نجد كلمتك بذا الموضوع؟
صقر: ايه ، أنا كنت افكر من أول فيه يوم كلمتني نجد عن الزواج مره ثانيه وافقت
أم صقر: ماقصرت الله يسعدها
أبو صقر: أمين
وقف صقر على دق الباب: بروح أشوف مين
أبو صقر ناظر في بناته: تنتظرون أحد؟
ضي: لا
أبو صقر: غريبه من داق ذا الوقت؟
أم صقر: يمكن سلطان ولا رهف طفشت و جات
وقفت فيء: بشوف مين
~
عند صقر فتح الباب و دخلت نجد بسرعة و بيدها صينية الكيكه و كيس القهوة
صقر بستغراب: وش فيك؟
نجد: كذبت على خالتي أني بجيكم ، احس انها ماصدقتني جالسه تراقبني مع الشباك
صقر: وين بتروحين اجل؟
نجد: بنروح للبر ، جيت اقلك تروح معنا
صقر: تروحون؟ ، قصدك بمن تروحون؟
نجد: أنا و عساف و سعد و فرح و أنت
صقر: اهاا ، لا والله ماني برايح
نجد: ليه؟ ، تكفى صقر تعال
صقر بتعب: والله يانجد أني تعبان ، من الصباح و أنا شغال ، تعرفين زواج فيء قرب و انتم يا البنات ما تخلص أغراضكم ، و لا بعد الاشغال الي عند الغنم
نجد: قهرر والله
فيء جات: نجد ياهلا
نجد أبتسمت: هلا فيك
فيء: تفضلي ، ليه واقفه عند الباب؟
نجد بأحراج: لا والله بروح لفروح ، جيت لـ أسئل صقر إذا قلكم عن موافقته لزواج ولا؟
فيء جات و حضنتها بفرحه: يختي ماقصرتي والله ، توه قلنا و صحنا من الفرحه
صقر الي متكتف و سانت ظهرة على الجدار: بالغو في الموضوع مره
فيء: لا ما بالغنا ، و أنت لو تدري قد ايش ننتظر الحظه ذي
نجد ببتسامه: يخي خلهم ، مالك دخل فيهم يصيحون ، يضحكون بكيفهم
صقر: أوامر ثاني طال عمرك
نجد: لا تسلم
فيء: أمي تناديني ، بروح لها
نجد: و أنا بروح خلاص
بعد مادخلت فيء تكلمت نجد: بالله شوف شباك بيتي مفتوح؟
صقر فتح الباب و طلع راسه: ايت واحد؟
نجد: الي على اليمين
صقر: لا ما أشوف شي شكله مسكر رجع راسه و ناظرها ببتسامه جانبيه و هو يأشر بيده لشارع ، معشوقك برا
نجد: اما؟ ، شكلي طولت عليه كانت بتطلع بس لفت عليه ، سلملي على اهلك ، مايمديني كان دخلت و سلمت
صقر ببتسامه: ايه ، ايه مايمديك
سكر الباب وراها و هو يضحك زفر بعدها براحه: ياحلو الوناسه و سعت الصدر
-
حطت الأغراض وراء و ركبت بتوتر و انفاسها تتسارع: طولت عليك؟
عساف الي عاقد حواجبه: لا ، وش فيك كذا؟ ، كأن لاحقك أحد
نجد الي تناظر شباك بيتها: أمش ، و بعدين اقلك
مشى بمسافه بعيده عن بيتها ، زفرت براحه: يارب ما شافتني
عساف الي يسوق: مين قصدك؟
نجد: خالتي ، والله أني حاسه ماصدقتني ، بس الحمدلله عدت على خير
عساف: الحمدلله ، صقر بيجي؟
نجد بحزن: لا قهر
عساف: ليه؟
نجد: ياعمري عليه من الصباح وهو يشتغل لين المغرب و تعبان
عساف: ايه ياعمرك عليه
نجد لفت عليه: عساف ، وشبك حاسه انك حاقد عليه؟
عساف: لا والله
نجد: اجل؟
عساف: نجد ، قلت لك اليوم السبب خايف ، خايف طيب
نجد: لاتخاف طيب لأن صقر بيتزوج خلاص و مابيننا شي ولا راح يكون
عساف أبتسم: طيب ، بس لا تعصبين
نجد: أنت تعصبني وش اسوي؟
عساف: ماتوقعت لهدجه غلاته عندك
نجد: لأن هو الي وقف معي من بعد وفات أهلي و ساعدني في اشياء كثيره ، لولا الله ثم صقر لاكان الحين ضايعه أنا
عساف مسك يدها: ماقصر والله ، و من أول ماشفته هو وشنباته عرفت أنه رجال و ينشد عليه الظهر ، ماني كارهه ولا شايل عليه بس غرت
نجد: ونعم فيه والله ، لا تغار من الحين اقلك طيب؟
باس يدها بحب و أبتسامه: طيب ياروح عساف
نجد بعد تفكير طويييل تنحنحت: عساف
عساف وعيونه على الطريق: لبيه
نجد هي تلعب بـ أصابعه الي ماسكه يدها: لو ، لو طيب ، صار لي شي و خبيته عنك لمصلحتي وش راح تكون ردت فعلك لو عرفت بعدين؟
عساف ناظرها بسرعة و رجع نظره لطريق: فيه شي صاير صح؟
نجد بكذب و بسرعة: لا ، لا قلت لك لو بس بعرف رده فعلك بس
عساف: على حسب الموضوع
نجد: كيف يعني على حسب الموضوع؟
عساف: إذا كان الموضوع كبير و يستحق أنك تخبينه عليّ ماراح أقول لك شي من حقك تخبينه عني ، اما إذا تافه و بسيط لا والله بزعل منك و اشيل عليك
نجد: لا... ، يعني لا إن شاءالله أنه مو تافهه ولا شي
عساف: والله احس فيك شي ، تكلمي وش صاير؟ ، يمكن اقدر اساعدك
نجد أبتسمت وشدت على يدينه: مافيني شي صدقني ، لو فيه أنت أول واحد بتعرف
عساف: حلو
نجد اختفت ابتسامتها و قالت بداخلها: أسفه بس وش اسوي مقدر ، خوفي اقلك و تسوي شي و تضر نفسك و توجع قلبي عليك
عساف: اشش هيه وين رحتي؟
نجد ابتسمت: معك تطمن
عساف: وين مكانك ذا الي تبينا نروح له
نجد: كمل امش ، سعد و فروح وينهم صح؟
عساف: أول دقيت عليه يقول توهم طلعو من البيت
نجد: زين
-
في بيت نجد نفس التوقيت...
دخلت عليه في الغرفة وهو يلعب العابه: أنوسي البطل وش يسوي؟
أنس ناظرها ورجع ناظر العابه بصمت
جات و جلست عنده: شدعوه زعلان مني ، على شان غوار؟
أنس: ايه ، و لو سمحتي اطلعي برا غرفتي
نوف: افا ، تطلعني؟
أنس: ايه ، لأنك قاسيه مع نجدي و معي
نوف شهقت: شدعوه ، ذا من حبي لكم
أنس: لا
نوف: أسف طيب
أنس راح لسريه و حط البطانيه عليه: اطلعي بنام ، نجدي تقول نام بدري
جات وجلست عنده: وين راحت نجدك؟
أنس الي تذكر كلام نجد له: عند عمي مصلح
نوف بشك: عند عمك مصلح ، ولا رحت معها؟
أنس تأفف: اففف نوف ، كيفي اليوم ما ابي اروح
نوف وهي متحمله أسلوبه: إذا قلت لي اعطيك حلاوه و لا اقلك أوديك للبقاله و تشتري الي تبيه ، هاه وش رايك؟
أنس اتسعت عيونه بفرحه بس صعبه عليه يقول أخته وين راحت وهي نبهته: شكراً ، بنام
نوف بعصبيه دفته بخفه و وقفت: أختك من؟ ، نجد طالع عليها ، تقهرون
طلعت و سكرت الباب بقوه
أنس شال البطانيه عنه و جلس: شيطانه
و رجع أنسدح ونام
~
جات عنده في الحوش و جلست قباله بملل
سيف الي قدامه أبريق الشاهي: وش فيك؟
نوف: يخي احس مقهوره ، ودي اعرف نجد وينها؟
سيف: عند عمها مصلح
نوف ضحكت بسخريه: ياحلوكم أنت و أمي صدقتوها بسرعة
سيف: أنتِ فيك شي والله ، وش حقدك ذا كأنك بعير
نوف: مو حقد فضول
وقفت و رتبت قميصها ببتسامه: ضروري اتأكد
سيف: كيف تتأكدين؟
نوف وهي ماشيه للبيت: بتعرف الحين
دخلت و رقت لغرفتها ولبست عبايتها و نزلت وطلعت من البيت: ايه نشوف وينك يابنت أمجد
وصلت للبيت و دقت الباب كذا مره و فتحت لها فيء: نوف ياهلا ، تفضلي؟
نوف ببتسامه: زاد فضلك ، بس بغيت نجد لأن أنوس يبكي مو راضي ينام
فيء بستغراب: نجد!
نوف: ايه ، نجد بنت عمك أمجد
فيء: قالت انها بتروح لـ فرح
نوف ببتسامه انتصار: ايييه فرح
فيء: غريبه ماقالت لكم؟
نوف: هاه ، لا ، لا قالت لنا صح بس نسيت ، أسفه إذا ازعجتكم بذا الوقت يلا عن أذنك
فيء: الله معك
سركت الباب فيء بستغراب: غريبه وين راحت ، الله يستر لاصاير لها شي
اما نوف سرعت خطواتها للبيت وهي حالفه تنكد على نجد
-
وصلو للمكان الي تبيه نجد و بدو ينزلون الأغراض و الفرشه فرشوها
فرح هي تناظر المكان: المكان مو غريب عليّ
نجد: ايه قد جينا هينا ، لأن غنم عمي مصلح قريبه منا بشوي
عساف: والله مكان زين
اللهم صل على محمد وال محمد
أنت تقرأ
ما خلف القضبان.
Science Fictionاهلاً بكم جميعاً ، بروايتي واعزوفتي الأولى... بدأت كتابتها بـ1/1/2023 وشاركتها أياكم بـ13/1/2023 - (ما خلف القضبان.) (الرواية باللهجة العامية.) نبذة الرواية: بطلتي هي البنت الكبيره بـ العائله هي واخوها الصغير فاقدين اهلهم ويحاربون آلم ووجع الحياه ب...
