يوم جديد و شمس مُشرقه جديده على ابطالنا..
العصر تحديداً في بيت عبدالإله...
علي الي دخل مع الباب و في حظنه تاليا و ببتسامه: شوفو مين جانا
وقفت جيلان بصرخه و راحت له: اعطني ياها اشتقت لها والله
نجلاء ببتسامه: مو بس انتِ الكل اشتاق لها
جيلان وهي تبوسها وتشم ريحتها: آه ياحلوك وانا عمتك حلواه
نجوى: ريحت تولين؟
علي بهدوء: ايه خالتي تقول أن لانا حطت لها من عطر تولين
نجلاء: الله يرحمها ويغفر لها يارب ، خلاص عطيني حفيدتي يلا
جيلان: مقدر يمه مقدر تهبل
علي: بشويش على بنتِ
عساف هو متكي و ببتسامه: الله متى تجي بنتِ بس و تقول جيلان اعطني ياها اقول طسي وراك بس وهي تصرخ و تحاول و اوديها لحظن امها لا ليه لحظن امها لحظن جدتها
ضحك الكل من كلامه
عبدالإله: وجدها؟
عساف: ايه ماعليك جدتها بعدين جدها
نجلاء ببتسامه: الله يوفقكم وانا أمك و يتمم لكم على خير يارب
عساف هو يتخيل نجد و بنته الى ما انخلقت حتى: أمين أمين
علي: حددت زواجك؟
عساف: ايه كنت ابيه بعد شهر بس ابوي عصب علي و قلي اركد ياولدي
علي ضحك بخفه: هو صادق لا تستعجل ولا شي
نجلاء: حتى البنت ما يمديها تجهز
جيلان الي في حظنها تاليا و تلعب بيدينها: والله متحمسه لنجد متى تجي لبيتنا بس
عساف: مو كثري
عبدالإله رفع حاجبه: ماعاد تستحي انت
عساف: ليه وش قلت؟
عبدالإله: سلامتك
نجلاء ناظرت في جيلان: بنت جيبيها ، هاه صاحت ماتبيك
قامت جيلان واعطتها والدتها
نجلاء: ياقلبي يابنتِ ياروحي انا اكلك انا اكلك من حلاوتك
جيلان: يمه مافيها من الحلا شعره
علي ضحك: وين الاول الى بتموت من حلاوتها
جيلان: وجدان الي قالت مو انا
وجدان الي ماسكه بطنها بألم ياكذبك ياغيوره
نجلاء: فيك شي؟
وجدان بألم: آه يايمه بطني ، بطني يوجعني
عساف وقف: ولدت ولدت
نجلاء اعطت تاليا نجوى و وقفت: جيلان روحي جيبي عباية اختك و انت ياعساف شغل السياره بسرعة
عساف: طيب ، طيب الحين البيت بيصير حضانه
علي دفه بخفه: عجل يارجال مو وقتك رح
لبستها نجلاء العبايه و اخذوها للمستشفى تحت صراخها من الوجع
-
في بيت بطلتنا...
فيء: خالتي وينها؟
نجد ببتسامه: ايه صارت خالتك الحين
فيء: من قبل لا يخطبني سيف اقلها خاله
ضي شهقت: ياكذبك
نوف الي في يدها فنجال القهوة: خليها على قد عقلها ناظرت في فيء ، مصدقينك ماعليك
فيء: ياشينكم ، اخلصو علي بس وينها؟
نجد: راحت عند بيت خالي خالد ناظرت في نوف بستغراب ، غريبه صدق مارحتي معها؟
نوف الي شربت رشفه من القهوة: طردتني
ضحكت نجد بخفه
ضي: لو رحتي بتطفشين لا عندهم بنات ولا شي بس عيال و جالسه ببرقعك معهم ماتقدرين تاخذين راحتك
نوف: عادي
فيء رفعت حواجبها: شكل فيه حبيب هناك؟
كحت نوف من شرقت بالقهوة ضربتها نجد على ظهرها: صحه صحه
فيء ابتسمت: هيا هو فيه حبيب ، اخس يانوف بس تبين الصدق مو لايق عليك والله
رفعت نوف نظرها لها: ايه خليته لايق عليك انتِ و سيف بس
نجد: خلاص ادري الحين بيصير هواش
ضي: خليك منهم دريتي عن عمتي رهف؟
نجد: لا وش فيها؟
ضي: بتخطب ذيك أم الشيفه الي واقفه مع سارة لـ عمي احمد
نجد اتسعت عيونها: ضي امانه تقولينها صادقه؟
فيء: حتى أنا والله عجزت اصدقها
ضي: والله اني صادقه ماكذبت بحرف ، من أول ماجات و عمتي عيونها بس عليها استغربت قلت ذي وش فيها عليها يوم سألتها قالت افكر اخطبها لـ عمك أحمد
نوف: يعععع الله يعينكم
نجد: أستغفر الله ياربي شينه مي حلوه وشايفه نفسها بقوة أنا مدري عمتي وش شايفه فيها
ضي: صدق من قال الناس أذواق
نوف: لو تاخذ ذيك الي سمها جيلان اهون
فيء: ذيك أمي تبيها لصقر بس معيي
نجد أبتسمت: والله من اول ماشفتها قلت ذي لصقر
ضي: بس هو رافض يقهر
فيء: لو تحاولين معه يانجد يمكن يسمع منك
نجد: كذا مره اكلمه بموضوع الزواج و يتهرب ، بس محاول معه
ضي: ماتقصرين
نوف: اليحن وش تسوون بالجنيه ذيك بتصير زوجت عمكم؟
نجد: تبون الصدق؟ احس تصلح لعمي خليها توريه الشغل
فيء: حرام عليك عمي أحمد حليل
ضي بسخريه: ايه ، ايه مره حليل
نجد: حبيبتي عمي أحمد من تحت لتحت نفس عمي صالح
نوف: عائلتكم غريبه
فيء: خليك في عائلتك الكيوت الي ما نسمع خبر عنهم
نوف رفعت حواجبها: وش دخلك فيهم
فيء: هيا لا تدخلين في عائلتنا
نوف: أنتم جاين بذا البيت و تتكلمون قدامي يعني كيفي بتدخل
فيء: بس البيت ذا ياحبيبتي بيت عمي و احنا نتكلم عن عمانا يعني مالك دخل
نوف بعصبيه: فيوووه
نجد صرخت: خلاص وجع أنتِ وياها أني قايله بيصير هواش
فيء: نوف هي الي تعشق شي اسمه هواش
نوف: سلامتك أنتِ
ضي: يرحملي امكم خلاص
أبتسمت نجد على الأتصال الي جاها و وقفت راحت بعيد عنهم
نوف وهي تراقب تحركاتها: أتصل حبيب القلب
فيء قريت من نوف: صدق يحبون بعظ؟
نوف ناظرتها: ايه ماعرفنا الا البارح
فيء: كيف عرفتو؟
نوف: مو أم ذا شسمه خطيبها؟
فيء بسرعة: عساف
نوف: ايه أم عساف مو قالت لـ بنتها ليه ماقلتي لي أنّ اخوك يحبها
فيء: أني كنت حاسه والله بس كيف قالتلكم نجد؟
نوف: أمي سألتها وقالت لنا
فيء: حركات طلعنا كلنا نحب ناظرت في اختها و بدت تمسح على ظرها و تمثل الحزينه ، ماعليك وأنا أختك بيجيك الي يحبك و تحبينه
ضي بعدت يدها عنها: يعع الله يقرف بليس العدو تعرفيني ما أحب الحب و سواليفه
نوف: وكيف تبين تتزوجين؟
ضي: يجون ناس يخطبوني كذا احسن من اني احب واحد و انتظره متى يجي
نوف: ماش ماتعرفين شي أنتِ
~
عند نجد...
عساف: الوو
نجد ببتسامه: ياهلا
عساف: كيفك ياروحي؟
نجد عل و ضعها: بفضل حال من سمعت ذا الصوت
عساف: اهخ ياليتك جنبي ، وش تسوين؟
نجد: ابد جالسه مع بنات عمي و بنت خالتي
عساف: ياحظهم بحسدهم
نجد: لا تكفى ، قلي أنت وينك و وش تسوي؟
عساف: في المستشفى أنا
نجد بخوف: يمه عساف فيك شي؟
عساف بفرحه وضحت من صوته: لا ياروحي وجدان أختِ ولدت
نجد أبتسمت: ماشاءالله مبروك
عساف: الله يبارك فيك و عقبالنا
نجد الي تذكرت طفلها و بحزن: يارب
لاحظ عساف تغير صوتها: وش فيك ياروح عساف؟
نجد: مافيه شي بس قلي وش جابت أختك؟
عساف: بنت كنت أبيه يكون ولد بس الحمدلله
نجد: عندكم ولد خلاص
عساف: ايه بس صار الحين عندنا بنتين
نجد: يخليهم لكم يارب
عساف: أمين
نجد: بسكر طولت على البنات
عساف: تمام و أنتبهي لنفسك ياروحي
نجد: و أنت بعد
سكرت الخط و رجعت للبنات: ا.فيء صح كم باقي على زواجك؟
فيء: ليه الي متصل سيف اجل؟
نجد: لا ، لا بس تذكرت و أنا اكلم
فيء: باقي له اسبوع تقريباً
نجد: يوه ماخلصت
ضي: وبعد أنا والله تعبت و أنا ادور ولا لقيت
نوف: كيف أنا الي أخت العريس ولازم اكون كاشخه
نجد ابتسمت: وش رايكم نروح لسوق مع بعض
ضي ابتسمت على ابتسامتها: فكره حلوه
فيء: تسوين خير فيه والله باقي لي كم غرض ماخلصته
نجد: اجل تم
لفو على الباب الي دق
فيء: أكيد خالتي ولا سيف
نجد: لا تطمني ذا دق واحد صغير
فتحت الباب و دخل أنس شالته و بدت تسلم عليه: ياهلا ، ياهلا الي له الخافق يهلي ياهلا بضي البيت
فيء: الله الله
نوف: الي يشوفك يقول غايب عنك سنه
نجد: من الصباح مانه فيه ناظرت في اخوها ، وين كنت؟
أنس: رحت مع صقر للغنم و سلطان بعد معنا
و كأنها توها تشم ريحته: اففف ياريحتك كلها غنم و شموس ليه رحت؟
أنس: كنت ما أبي اروح بس جاء صقر ودق الباب وقال تروح معي شفتك نايمه أستأذت من خالتي وقالت روح
ضي: وانا مستغربه من الصباح صقر مو فيه طلع عند الغنم
أنس: إذا صرت كبير بسوي لي غنم و خيل زي صقر
نجد بضحكه خفيفه: بتسوي؟
أنس ببرائه: ايه
نوف ضحكت: اسمها بحط ياغبي مو بسوي
نجد ناظرت فيها: لا تقوليله غبي رجعت نظرها لـ أخوها و ابتسمت ، ماعليك منها بس فيه فرق ياروحي بين انك اتسوي و تحط ، اتسوي معناته تسوي شي زي مثلًا الطبخ و أنك بتحط للغنم اكلها زي كذا ، اما بحط هي أنك تجيب لك غنم و تحطها عندك و تعتني فيها فهمت ياروحي؟
أنس: ايه فهمت
مسكت بيده: شطور أخوي ، هيا يلا احممك
فيء: نجدد
لفت عليها: هاه؟
فيء: متى بنروح؟ دامك بتحممينه مافي وقت
نجد: لا ماعليك فيه وقت
أنس رفع راسه لها: وين بتروحون؟
نجد الي تمشي ومعها اخوها: لسوق
أنس بفرحه: هيهه بروح معك
نجد: لا تعب عليك
أنس: لا مو تعب
نجد: أنوس والله تعب احنا بنجلس نمشي و بتتعب وش اسوي لك وقتها روح عند عمي مصلح عند صقر و سلطان أبتسمت و و ناظرت فيه ، ويمكن العنود تجي بعد
أنس: ايه صح تذكرت صقر قلي بيودينا للبقاله
نجد الي بدت تطلع ملابسه: أنت ومين؟
أنس: سلطان و العنود ، اء اذني
نجد: اسفه شكلك كبرت البلوزه بصعوبه طلعت
أنس الي بداء يحط يده على جسمه و يعد: شفتي طولي كذا 6
نجد: ايه شفت ماشاءالله ، تعال يلا ادخل تحت المويه
أنس: مو بارده صح؟
نجد: لا تعال يلا
-
في بيت خالد...
أم حاتم: وليد والله لو ماتروح عن وجهي لـ ... ، مدري وش اسويلك بس روح
وليد: يمه تكفين دام عمتي بتجي جات الفرصه لعندنا
أم حاتم: وليد قلت لا يعني لا
وليد: طيب أنا احبها يايمه
أم حاتم: حبك برص ياشيخ ، أنت شايف اسلوبها و تعاملها كيف؟
وليد: كانت معصبه
أم حاتم: ماشاء الله معصبه وتحط حرتها في نجد و أمها و خواتها و اخوها ها كيف لو زوجتك ياها كل ما عصمت حطت حرتها فيه
وليد: لا والله لا مستحيل تسويها واصلًا ماراح اخليها تسويها
أم حاتم: قم أفتح الباب اكيد عمتك جات
وليد الي وقف: تكفين اخطبيها لي
أم حاتم بعصبيه: الظاهر بتجنني أنت ، افتح الباب
وليد: طيب
راح وفتح الباب: هلا بعمتي نور بيتنا
ليلى: السلام عليكم ، بنورك ياولد اخوي
وليد سلم على راسها: وعليكم السلام
ليلى: وين أمك؟
وليد: داخل جالسه في الصاله حياك تفضلي
دخلت ليلى ورفعت صوتها: السلام عليكم
وقفت أم حاتم: وعليكم السلام يامرحبا حي الله من جانا
ليلى: الله يبقيك
أم حاتم: هاه شرايك في بيتنا؟
ليلى الي نظرها يتوزع على البيت: حلو ماشاءالله ناظرت في أم حاتم ، حوشكم عجبني كبير و وسيع مو مثل حوش نجد صغير
أم حاتم: ايه أنا قلت لخالد اهم شي عندي الحوش و الحمدلله توفقت فيه
خالد الي دخل مع باب الصاله: يامرحبا بوخيتي زارتنا البركه
ليلى: الله يسعدك يا أخوي أنت البركه كلها
خالد جلس و تكى: صبيلي قهوة يا أم حاتم
أم حاتم: ابشر
خالد: وينهم البنات ليه ماجو؟
ليلى حطت فنجالها على الأرض: مها و فرح كل وحده راحت لبيتها اما نجد و نوف بيجونهم بنات مصلح
خالد أخذ الفنجال من يد أم حاتم: ايه الله يحلي جلستهم
وليد هو يضرب اصبعه السبابه على ركبته والدته بعدت يده أم حاتم و هي تناظر في ليلى ببتسامه قرب من اذنها و بترجي: يمه يلا تكفين
أم حاتم تمتمت: طس عن وجهي
وليد على وضعه: ماني طاس لين تخطبين لي نوف
أم حاتم أبتسمت لـ ليلى الي تناظرهم وتمتمت: والله ياوليد لو مارحت عني لفضحك قدامهم
خالد: فيكم شي؟
أم حاتم: لا سلامتك بس وليد طفشان وده يشتغل إذا حاتم شغله كثير خله يساعده
خالد: ايه والله تعب المسكين قلي روح يايبه ولا تتعب نفسك جيت و الحمدلله لقيت وليد يبي شغل هيا قم و أنا أبوك قم روح لـ أخوك و عاونه
وليد ناظر في أمه الي تصب القهوة
أم حاتم: وراك تناظرني كذا سويت الي علي
وقف وليد و نزل ثوبه: ايه ماقصرتي يايمه
ليلى: عسى شغل حاتم مو كثير عليه؟
خالد: والله كثير وشوي مُتعب
أم حاتم: قايله له يصبر لين يلاقي له شغل زين بس مايفهم ذا الولد
ليلى: حاتم ماشاءالله عليه حركي ويحب يشتغل
خالد: ايه
-
عند شغل حاتم...
دخل و هو معصب و جلس على الكرسي
حاتم وهو يصفط الملابس: وش فيك؟
وليد: امك
ضحك حاتم بخفه: وش مسوي لها بعد؟
وليد: ليه ماتكون هي مسويه لي شي؟
حاتم: أمي و اعرفها ماتسوي شي الا إذا احد غلطان ، قلي وش مسوي؟
وليد زفر: عمتي ليلى جات لنا
حاتم بسرعه: والله! متى؟
وليد: أنت تبيني اقلك ولا اسكت؟
حاتم: لا قلي ياطويل العمر
وليد: قلت لها دام عمتي جات اخطبي لي نوف
حاتم: والله مانك بصاحي
وليد: ليه؟
حاتم: أنت شفت البنت وش سوت في اهلها ، ولا اعمى؟
وليد: شفت
حاتم: اجل كيف تبي أمي تخطبها لك تبيها تعصب على أمي؟ ، ولا فوق ذا مو عاجبها بيت نجد تبي لها بيت يعني حسبالك بتجلس عندنا لا ياحبيبي تبي لها بيت و أنّ ماشريت بتعصب على الكل وعلى أمي
وليد: تخسي والله ماترفع صوتها عليها ، و أنا بشتغل معك وجمع فلوس
حاتم ضحك بخفه: بتجمع فلوس المهر ولا الشقه و المصروف عليكم؟
وليد: كلها
حاتم: ياحليلك تحسب أنت أنّ السالفه كلام بس ، عزيزي وليد ركز هاه ركز
وليد: ياخي شسوي والله احبها
حاتم هو يتذكر نجد و خطبتها من الغريب ذا الي مايعرفه: مو كل مُحب ياخذ محبوبته الدنيا قسمه و نصيب
وليد: أنت سالفتك غير و أنا غير
حاتم: لا تجي و تصدع راسي بكلامك تبي تشتغل تعال ذي الملابس صفط كل لون مع أخوه
وليد: ايه ببدا من اليوم و أقول أبوي يساعدني
حاتم: اشتغل وأنت ساكت بس
-
في المستشفى عند غرفه وجدان...
عساف: يوه ياصغرها يا وجدان نتفه
جيلان: ايه بنتك والله غريبه بنت علي تاليا جات و باقي على ولادتها تقريبن شهرين مو مثل حجم بنتك
وجدان بتعب: بنتي نادره
أبو محمد: خل بنتِ لو سمحت لا تتكلم عنها
عساف هو يـ أشر بيده: هل قد والله لو بشيلها بصبع شلتها
وجدان: عساف يارب يبلاك ربي في عيالك و اشيلهم بظفر مو بصبع بظفر
نجلاء: بنت استغفري ربك
وجدان: شايفه كيف يتكلم على بنتِ يايمه؟
عساف: الحين وش دخل عيالي المساكين؟ يوه عمتهم حسوده
وجدان: و يوه من خال بنتِ مُتنمر
عبدالإله: خلاص خلو الكلام ذا عنكم
أبو محمد: غريبه قلت لهم يجبونها ليه طولو
وجدان: هم كذا
نجلاء: صح تاليا مع مين؟
علي دخل: اخيراً لقيناكم
عساف: هاه على طاري بنته جو
نجلاء: تاليا وينها؟
نجوى: والي معي مين يايمه؟
نجلاء: والله من خوفي ماشفتها ، جيبيها جيبيها ، ليه جيتو وتعبتو المسكينه ذي
علي: شسوي خوفتونا ندق محد يرد ادق على عساف يطلع الخط مشغول و بعدين دق ولا رد علي
عساف: ماسمعته
علي: لا بالله تكلم من كنت؟
عساف ببتسامه: الحُب مالتي
عبدالإله: اثقل وأنا أبوك اثقل
عساف: وش فيها يايبه دقيت لبشرها
وجدان: ايه وش كانت ردت فعلها؟
عساف: فرحت والله
نجوى: بس حكمت من صوتها ، ماتدري لو أنها حسدتها
وجدان: نجوى خلي الخبث ذا الي فيك بعيد عنا
نجوى: أنا صادقه مو مات طفلها يمكن تحسدك الحين
نجلاء الي تفشلت من بنتها قدام زوج بنتها: ياليتك ماجبتها خليتها تجلس في البيت
نجوى: كلمت الحق صارت تزعل
جيلان: طيب خلاص معك حق بس اسكتي يرحم لي والدينك
دخلت الممرضه: هادا بيبي جاء
راح لها أبو محمد و شالها: ياماشاءالله ياحلو بنتِ أنا
عبدالإله: أذن في أذنها
أبو محمد أعطا بنته لـ جدها: أذن أنت ياعمي
جيلان صفقت بيدينها بفرحه: الله احب اللحظه ذي
بعد ما أذن عبدالإله في اذنها أخذها علي منه
محمد الي جالس جنب والدته: أنا سويتو لي زيها؟
وجدان سلمت على راسه: ايه
علي الي في حظنه بنت وجدان: حتى تاليا أذنا في اذنها ، ماشاءالله تشبهلك يا وجدان
نجلاء: تشبه لـ أبوها وين امها لا
عساف قرب منها: والله الخشم خشم وجدان و العيون عيون أبو محمد و الفم فم محمد ، وش رايكم فيه جبتها صح؟
جيلان: بعد ماعندك سالفه ، علي جيبها أشوف
علي: خذي
نجلاء: بشويش
عساف جلس جنب والده: تشبيهي صح يايبه ولا؟
عبدالإله: لا والله مو صح
عساف: شكراً لك يا الغالي
عبدالإله: العفو يا ولدي
جيلان جات عند عساف: خذها
عساف رفع يدينها: بعديها
جيلان حطتها على رجوله و بضحك : امسكها
عساف: جيلان لا تستعبطين علي خذيها
نجلاء ببتسامه: كيف بتمسك عيالك؟
عساف: مو لازم أمسكهم
وجدان: لازم يشعرون بشعور الأب
عساف: ما أحب امسك الاطفال وهم صغار كذا ، جيلان شيليها من رجولي
نجلاء: خلاص يابنت شيليها
جيلان: لا ، لا لين تمسكها شتقول عنا نجد لو عرفت انك ماتحب تمسك الاطفال
عساف: ماراح تقول شي بس شيليها
دخلت الممرضه: وين بيبي لازم يودي حضانه
عساف ناظرها: الله جابك هاذي هي خذيها
جات و أخذتها و طلعت
عساف وقف: يمه توتر
أبو محمد ضحك: وشبك عرقت؟
عساف: ذا توتر
نجلاء وقفت: يلا خلونا نطلع قبل لا يطردونا
جيلان: أنا بجلس مع وجدان
وجدان: ايه بالله خليها تجلس يايمه
نجلاء: طيب
محمد: و أنا بعد بجلس
وجدان: لا ياأمي أنا أنت روح للبيت مع جده وجدي
محمد بزعل: بجلس مع أختي
عساف: اخس ، أقول أمش لا يحطون فيك إبره
وقف محمد بخوف: لا خلاص بروح
ودعو وجدان و جيلان و طلعو
أنسدحت جيلان على الكنبه: واخيراً بنام بدون أزعاج أمي
وجدان: الظاهر تحسبين نفسك في فندق خمس نجوم ، حبيبتي أنتِ في مستشفى يعني كل شوي داخله عليك الي تنظف و الي تتطمن على المريض يعني فيه أزعاج
استغربت عدم ردها ناظرت فيها و لقتها في سابع نومه ضحكت بخفه و طفت اللمبه الي عندها و نامت هي بعد
-
في السوق عند البنات...
في أحد المحلاات بعد دخولهم كذا محل ولا لقو لهم فستان
نجد بتعب: ذا اخر محل راح ندخله مالي دخل تعبت والله
ضي: حتى أنا لو مالقيت عادي اجلس في البيت مو لازم احظر
فيء: لا بالله أخت العروسه أنتِ
راحت في وطلعت فستان سماوي: شوفي وش رايك بذا؟
نجد: لا ماش صبر طلعت الفستان الاصفر ، ذا حلو خذيه
ضي: مدري صبر
نوف الي جايه و معها فستان موف: خليك من اختياراتهم الي تلوع الكبد ذا يجننن والله مناسب لك بما أنك أخت العروسه
ضي: شوشتو براسي بشويش خلوني اختار واحد منهم
الموظفه: تفضلو تحتاجون مساعدة؟
نجد ابتسمت: لا يعطيك العافيه
الموظفه: تمام إذا تحتاجون أنا هناك
نجد: تمام ناظرت في ضي بعد ماراحت الموظفه ، هاه عجلي؟
ضي: ذا الي مع فيء لونه حلوه وهادي
نجد ناظرت في الفستان الي في يدها: تمام أنا باخذ الي معي اجل
نوف: و أنا بعد باخذ ذا
ضحكت نجد بخفه
فيء: وش فيك؟
نجد: لا بس نضحك
فيء: هيا يلا بس روحو قيسوها خلونا نروح لهلنا تعبت خلاص
نجد: ايه يلا
أخذو مقساتهم و دخلو في غرفت القياس و بدو يقيسون و طلعت حلوه عليهم طلعو من المحل كانو البنات متجمعات و يسولفون انسحبت نجد منهم بهدو و وقفت عند احد البسطات و بدت تقلب في الاغراض و الملابس الي عندهم
نجد بهدؤ: اخيراً لقيتك
ناظرها و رجع ناظر في الاغراض: اشتقتيلي؟
نجد على وضعها: حيللل ، بموت من كثر الشوق
ضحك بخفه: وش تسوين هينا؟
نجد: ليكون بتحاسبني؟ ، اصحى هاه اصحى
جزاع: صاحي أنا بس استغربت وجودك هينا
نجد: من هم الي في سبب وفات اهلي؟
جزاع: قلت لك إذا تبيني مساعده
نجد: ما ابي مساعدتك أبي بس اعرف مين هم؟
جزاع: لا ماصير كذا
جو البنات عندها: نجد
لفت علهم بتوتر ناظرهم جزاع الي كان متلثم و رجع نظره للبسطه
فيء مسكت نجد مع يدها و اخذتها بعيد عن البسطه: من ذا؟
نجد: مدري
ضي: تسولفين معه ولا تدرين من هو؟
نجد: صاحيات أنتم وش الي اسولف معه واقفه عند البسطه بشتري شي لـ أنوس وهو جاء و وقف بيشرتي بعد
فيء الي ركزت في عيونه: مو غريب علي والله
نجد: كيف يعني تعرفينه؟
فيء: عيونه ، صبر صبر جزاع والله جزاع
نجد بتوتر: فيوه وش الي جزاع الولد مات و تحت التراب الحين
فيء: بس نفس عيونه بضبط
ضي: ماشاء الله على تركيزك
نجد: عادي الشبه أربعين و لاعاد اسمعك تقولين جزاع
فيء: ليه؟
نجد: لأنك راح تحمسين ناس مشتاقه له و تبيه وهو اصلًا ميت
ضي: صح يافيء نجد والله صادقه
فيء: طيب
نجد: مشينا يلا
فيء: صبر
نجد: وش؟
فيء: باقي لي أكسسوارات
نجد بدت تناظر المحلاات: ذا هو محل الاكسسوارات روحي له
فيء: يلا امشو
نجد: بجلس هينا أنا
جلست و هي تناظر في جزاع و دخلو البنات المحل وهم مستغربينها فزت على جوالها الي دق: هلا
فرح: وش الازعاج ذا وينكم؟
نجد: وعليكم السلام ، الناس تسلم
فرح: السلام عليكم ، وينكم؟
نجد: طلعنا لسوق أنا و نوف و بنات عمي مصلح
فرح بحزن: ياحظكم ، ليه ما مرتوني؟
نجد: احلفي ، يابعد بيتك
فرح: عادي
نجد: ايه مره عادي
فرح: وش فيك؟ شكلك رايحه مغصوبه
نجد: لا بس تعبت شوي
فرح: اها
نجد: وينك أنتِ و وش تسوين؟
فرح: ابد والله جالسه اجهز لنروح عند أم سعد
نجد: ذي الحزه؟ ، كئن الوقت متأخر
فرح: سعد كل ما اشتاق لـ أمه و أخته قال يلا مشينا لهم حتى لو في نص الليل
نجد: اهااا ، الله يعينك على الحيه اجل
فرح: ماراح تسوي شي و أنّ سوت بوريها الشغل
نجد أبتسمت: ايه كفوو يا.... سكتت من رمى الورقه في حظنها
فرح بستغراب: نجد ، الووو نجد
نجد: ايه هاه
فرح: شفيك؟
نجد الي تناظره وهو معطيها ظهره و تناظر الورقه: لا مافيه شي ، بسكر الحين تبين شي؟
فرح: لا سلامتك
نجد: يلا اجل مع السلامه
سكرت الخط و فتحت الورقه و عقدت حاجبها من المكتوب طلعو البنات من المحل و دخلت الورقه في الشنطه بسرعة و وقفت: خلصتي خلاص؟
فيء: ايه الحمدلله
نجد: ا.تروحون ، تاخذون تكسي عادي
ضي: ليه؟
نجد: ا.عندي شغل
نوف: نروح معك عادي
نجد: لا شغلي بيطول روحو انتم للبيت لا يقلقون علينا
ضي: نجد فيك شي؟
نجد: لا ، لا مافيه شي
نوف: مانك على وضعك والله
نجد أبتسمت و وضح من عيونها: والله مافيه شي بس من المشي و الفره من محل لـ محل تعبت ، روحو أنتم و أنّ وصلتو طمنوني طيب؟
ضي: طيب
ودعتهم و ركبت سيارتها ، أخذو البنات تكسي و رجعو البيت
-
عند بيت سعد و فرح...
سعد فتح باب الغرفه و وقفت على فتحت الباب
سعد: شهل الجمال؟
فرح الي دارت بفستانها: حلو
حط يده على خصرها و ناظر في عيونها بتمعَّن: مو بس حلو الي بعد الحلو
حطت يدينها على كتوفه: اكيد بعد الحلو دامني زوجت رفعت صوتها بقوه ، الرسام سعد
ضحك سعد بخفه: هيا اخلصي خلينا نطلع لأني ماني قادر امسك نفسي اكثر من كذا من الحلى الي شايفه قدامي
بعدت عنه بهدوء: خلصت ، بس بلبس عبايتي وطلع
سعد: تمام انتظرك
لبست و طلعت له و نزلو ركبو سيارتهم
فرح: سعد!
سعد: قلبه
فرح: ا.سارة
سعد لف عليها: وش فيها؟
فرح بسرعة: كيف عرفت أنّ نجد كانت حامل و أنّ عساف يحبها؟
سعد: توك تذكرين تسألين ذا السؤال؟
فرح: كنت متردده ، واليوم شجعت نفسي
سعد زفر: مدري والله علمي علمك ، ليه؟
فرح بكذب و ما تبي تسبب مشكله بين الاخوان: ولاشي بس اسئل كذا
سعد: فرح ، سارة سوت شي؟
فرح بسرعة: لا ، لا وش بتسوي مثلًا؟
سعد: مدري سؤالك غريب
فرح مسكت يده وابتسمت: تطمن مافي شي ياقلبي
سعد باس كف يدها و ابتسم: تمام ، صح حسبتي حسابك اننا بنام عند أمي؟
فرح: ايه
سعد: كويس
-
وصلو للبيت و فتح الباب لهم من سمع صوت السياة عقد حواجبه: نجد وينها؟
ضي: تقول عندها شغل
صقر: وش الشغل ذا الي في نص الليل؟
ضي: مدري ، قالت خذو لكم تكسي أنا عندي شغل و بيطول شوي يمكن
جاء أنس جري يدور اخته من بينهم: نجدي وينها؟
نزلت لمستواه ضي و ابتسمت: عندها شغل خذ الحلاوه ذي جابتها لك
أنس أبتسم: ما تطول صح؟
ضي: صح
رجع للبيت و أعتدلت ضي بوقفتها: صقر نجد فيها شي
صقر بخوف: وش؟ ، ضي وش فيها؟
ضي: مدري بس نجد مانها على بعضها ، وقلبي ناغزني مو متطمن
فيء طلعت الورقه من شنطتها و مدتها لـ صقر: كانت بتحطها في شنطتها بس طاحت منها و اخذتها
أخذ صقر الورقه و قراء الي فيها
ضي: وش وش مكتوب؟
صقر: انتبهو لـ أنوس
ضي: طيب وش فيها الورقه؟ ، صقر لفت على فيء بعد طلوعه ، وش فيها الورقه؟
فيء: مدري مافتحتها ، بس شكلها مصيبه
ضي: فال الله ولا فالك ياشيخه
-
دخلت المكان الغريب بخوف ، المكان الذي عبارة عن بيت قديم و غبار و صوت الشبابيك و الباب من الهواء بدت تنادي بخوف: جزاع ، جزاع
هو من وراها: بوه
فزت بخوف و حطت يدها على قلبها: بسم الله ، من وين طلعت؟
شغل كشافه و حطه في مكان مرتفع لـ يضيء المكان و جلس على الكرسي و حط قارورتين مويه: اجلسي و اشربي مويه اكيد عطشتي من الخوف
نجد: شكراً ما أبي ، قلي وش تبي و وش المكان الغريب ذا؟
جزاع: مكان الحوار الي بيصير بيننا
نجد لمت شنطتها على حظنها من سمعت صوت كلاب برا: ما بيني و بينك حوار غير اعرف سبب وفات اهلي؟ ، و امشي
ضحك جزاع: حسبالك بسهوله ذي بتعرفين؟
نجد: وش تبي مني؟
جزاع: أنك تسامحين ، بس تسامحيني على الشي الي سويته لك
نجد ضحكت بسخريه: تخسي
جزاع: تأنيب الضمير جالس يوجعني يا نجد
نجد مسكت بكيتها: ما حسيته يوم قربت مني غصباً عني ، ما حسيته يوم نمت معي على نفس السرير ، ما حسيت يوم انك جالسه و مقابل وجه بنت مو محرم لك شهر كامل ، توك تحس ، توك تتوجع ، شتقول عني أنا ، أنا ياجزاع احترقت روحي احترقت تعبت وش ذنبي أنا هاه؟ ، لدرجت أني كنت بنتحر
جزاع بغصه: أسف يانجد
نجد مسحت دمعتها: مايفيد ، بعد ايش؟
جزاع: ادري ، والله ادري و على شان كذا ناديتك تجين هينا و اطلب منك المسامحه و اقلك عن سبب وفات اهلك
نجد: مستحيل أني اسامحك
جزاع مسح على وجهه: الحل طيب؟
نجد: تقلي من سبب و فات اهلي و كل واحد يروح بطريقه ، و ايه صح ارجع لـ اهلك الي مشتاقين لك
جزاع زفر: أنا كلمتي وحده تسامحيني اقلك ، و سالفت أني ارجع لـ اهلي ترا إذا رجعت ماراح اقلك و حتى إذا سامحتيني و ترجيتيني مافي لأن فات الاوان فـ احسن لك تفكيرن زين قبل لا ارجع و الكل يعرف أنّ جزاع حي
دخل صقر بسرعه: نج...
سكت من شاف جزاع بطوله و عرضه و اقف قدامه و مانه مصدق حلم ذا ولا علم بدا يمراً يدينه على يد نجد لين مسكها مع ذراعها و هو عيونه على جزاع: سوا لك شي؟
نجد حركت راسها بـ نفي
ضحك جزاع بقوه: دامك ماتستغنين عن صقر و تقوليله كل شي ليه ما تزوجتيه هو ليه رحتي مع واحد ثاني
نجد الي تحرك راسها: ماقلت له لفت على صقر ، وش عرفك أني هينا؟
صقر على وضعه: امشي خلينا نطلع
نجد: ماراح اطلع
لف عليها صقر بنفعال: ليه؟ ، تنتظرينه يسوي لك شي هاه؟
نجد: لا ماراح يسوي شي بس بعرف منه شي
جزاع: كلمتي وحده يانجد روحي و فكري بموضوعي زين ، زين
صقر: نجد أمشي ، أمشي
بدا يسحبها صقر مع يدها لين طلعها من البيت ذا و جزاع اختفى
نجد لفت على صقر: ليه سحبتني كان خليتني اعرف منه مين هم؟
صقر الي مانه فاهم شي: ماني فاهم شي ، ولا شي فاهمه وش قاعد يصير يانجد؟ ، و جزاع ذا من وين طلع كيف طلع؟ ، مين الي دفناه و صلينا عليه؟
نجد: مدري ماقلي شي ، صدمني بس يوم طلع قدامي
صقر الي سمع صوت الكلاب و خاف انها تهجم عليهم: أمشي أركبي السياره ، و فهميني كيف قابلك و وين؟
نجد: صقر ليه جيت؟
صقر: خفت عليك وجيت لـ تطمن عليك
لفت عليه: وش اعني أنا لك؟ ، لأن مو طبيعي خوفك علي و مساعدتك لي في كل مره
صقر: وش قصدك يعني؟
نجد: مدري الجواب عندك ، صقر أنت تحبني؟
ضحك صقر: اذنك جالسه تسمع الي تقولينه؟ ، اساعدك لأنك وحده من خواتي
نجد: متوقع ، الكل لاحظ ، الكل يقول صقر يحبك ، صقر مايساعدك ولا يوقف معك الا انه يحبك ، كنت أقول لا مستحيل ايش الكلام ذا؟ ، بس بعد اليوم صدقت كلامهم كلهم
صقر: لا ، لا ، لا يا نجد أنا واقف معك أنتِ و أنوس على شان ماعندكم أحد ، أنتِ شايفه جزاع نذل و حقير ، و سيف كان مشغول في دورته و دوامه الحين ، و خالك بعد كان مسافر و محد عندكم ، تكفين لا يروح تفكيرك بعيد أنتِ مثل ضي و فيء والله مثلهم
نجد: كيف عرفت أني هينا طيب؟
صقر زفر و مسح على وجهه: ضي تقول أنّ قلبها ناغزها أنّ فيك شي ، وفيء اعطتني الورقه الي كنتِ بتحطينها في شنطتك بس طاحت منك ، أخذتها منها و على طول جيت لك
بدت نجد تطلع كل الي في شنطتها تدور على الورقه بس مالقتها وفعلًا طاحت منها
صقر: دورك قوليلي وش سالفت جزاع بعد معك؟
نجد: قلي أنه يعرف مين الي في سبب وفات اهلي
اعتدل بجلسته ولف كل جسمه لناحيتها: ايه طيب مين هم؟
نجد ناظرته: مدري ماقال لي ، قال سامحيني عن كل الي سويته لك و اقول لك سبب وفاتهم
صقر: سامحتيه؟
نجد: لا ، ولا فكرت حتى
صقر: أنتِ تتوقعين مين؟
نجد: أحس ياعمي صالح او جزاع بس إذا هم كيف جزاع بيسجن أبوه أو يسجن نفسه أو حتى يمكن قصاص لهم
صقر بتفكير: لا مستحيل هم ، مستحيل يمكن يعرف ناس هم سبب وفاتهم
نجد: مدري راسي وجعني من التفكير
صقر: قلتي لـ عساف؟
نجد بسرعة: لا ، لا ماقلت له ، ولا تقله أنت
صقر بستغراب: ليه؟ ، هو محامي يمكن يقدر يساعدنا
نجد: عساف لو عرف بوجود جزاع ليسوي جريمه صدقني ، عساف يكرهه وكان وده يموته على يدينه ، فـ احسن لنا نسكت و مانقول له
صقر: طيب الي ودك ، وش بتسوين بجزاع طيب بتسامحينه؟
نجد: مدري والله ، بس يمكن اسامحه على شان اهلي
صقر: يمكن كذاب بس يبيك تسامحينه؟
نجد: المسامح كريم ، أنزل خلني ارجع للبيت أكيد أنوسي اشتاق لي
اعتدل صقر بجلسته: أنا معك
نجد بستغراب: و سيارتك؟
صقر: جيت مع التكسي الي جاب البنات
شغلت سيارتها نجد و مشت: الي صار خله بيننا ، و قول لـ ضي و فيء انك لقيتني عند شغلي ولا وحده من صحباتي
صقر: ليه؟
نجد: جزاع مايبي أحد يعرف انه حيي ، قال إذا احد عرف ولا اهلي بكون أنا الخسرانه ، فـ خلنا سكتم بكتم على قولتهم
صقر: أبشري
-
في بيت نجد...
الساعة 11 تقريباً..
دخلت بهدوء لكي لا احد يصحى من نومه و اتجهت لـ غرفتها ، فزت من صوته وراها لفت عليه بصوت خافت: أنوس! اش لا أحد يصحى
أنس الي متخصر: خير إن شاءالله ، ليه تأخرتي؟
رفعت عاجبها ببتسامه: اخس صرت كبير و تحاسبني بعد
أنس الي يمثل الغضب: ايه أنا رجال البيت
نجد: ماعرفتك والله
راحت له و بدت تدغدغه و تسلم عليه من كل مكان: اكلك يارجال البيت ، اكلك
أنس بضحك: خلاص
نجد على وضعها: مافي
أنس الي هداء و استغربت نجد هدوءه: أنوس وش فيك؟
أنس بخوف و صوت خافت: اشش فيه وحش
نجد عقدت حواجبها: وحش؟
أنس: ايه شوفيه وراك
لف و شافت الضل الي وراهم رجعت نظرها لـ أنس و رفعت نظرها با ألي واقفه عند باب غرفتها و كشتها طايره من الالتماس و تحك شعرها بنوم
( يارب فهمتو قصدي😭)
نجد: بسم الله الرحمن الرحيم ، نوف أنتِ صاحيه ولا مجنونه؟
أنس: اشش لا يسمع اصواتنا و يجينا
نجد مسكت أنس مع اكتافه ولفته لناحيت نوف: شوف ياحبيبي ذي الوحش
نوف على وضعها: وش وضعكم أنتم الناس نايمه و أنتم جالسين تلعبون هينا
نجد: شفتي شعرك في المرايه أنتِ ولا لا؟
نوف: فاضيه أشوف شعري أنا ، النوم ذابحني و قمت من اصواتكم ، ترا مانكم لحالكم في البيت
نجد بسخريه: ايه ، ايه بس روحي نامي ، و إذا صحيتي مره ثانيه رتبي شعرك
دخلت غرفتها وهي تتحلطم: يوه بس متى اطلع من البيت ذا
نجد: يع ما يعجبها العجب
أنس: يمه خوفتني بكشتها
نجد ضحكت: أنت بطل لا تخاف مره ثانيه طيب
أنس: أنا ما أخاف بس كشتها تخوف
نجد: خلاص اص لا تقوم علينا مره ثانيه و تفجعنا
أنس حط يده على فمه: طيب
نجد: يلا لـ غرفتك و نام
أنس: تعالي نامي معي تكفين
نجد: ابشر كم عندي أنوس أنا؟
هو ماسك بيدها و متجه لغرفته: واحد
دخلت الغرفه و طلعت عبايتها و حطتها على الكنبه و أنسدحت جنب أخوها: وش شريت من البقاله
أنس الي بدا يعد بيدينه: اممم حلاوه و حليب و بطاطس
نجد: ثلاث اشياء يعني؟
أنس: لا فيه واحد بعد بس نسيته
نجد: تذكر وش هو؟
أنس: مدري هو عصير بس صقر يقول اسمه غير معرفه صعب
نجد بتفكير: بيرة
أنس: لا
نجد: طيب ، كيف لونه هو؟
أنس: الوانه كثيره أنا شريت أزرق و سلطان أحمر و العنود وردي
نجد بسرعه: غوار ، عصير غوار صح؟
أنس وقف ونط في سريره: ايوه هو
نجد ضحكت: طيب تعال انسدح وش فيك نطيت؟
دخل معها في البطانيه: لأنك شاطره جبتيها ، طعمه كان حلو مره
نجد: بالعافيه ياروحي
أنس: إذا قمنا بعطيك حقك في الثلاجه جبت لك لون وردي زي العنود
نجد: ليه ما جبت لي لون غير حق العنود؟
أنس: لأن العنود أخذت وردي ولازم أخذ لك زيها
نجد: تقلدها يعني؟
أنس: لا ، بس الوردي حق البنات
باسته على خده بقوه: ياروحي أنا الله لا يخليني منك
-
الصباح في بيت أم سعد...
طلعت من غرفتها و مستغربه من التحرك الي يصير في مطبخها و هي تعرف بنتها ما تشتغل لين تقول لها هي ، دخلت المطبخ و لقتها تطبخ: فرح!
لفت عليها ببتسامه: سمي خالتي؟
أم سعد أبتسمت: ماشاء الله عليك وش مقومك مع صبح الله خير؟
فرح رجعت لشغلها: الله يهديك ياخالتي الساعة 11 و متعوده الوقت ذا اقوم فيه
أم سعد: اهاا ، زين وش تسوين وينها سارة ما تساعدك؟
فرح: أسوي بيض للفطور ، و سارة مدري عنها والله
جات سارة متخصره: وش فيها سارة؟
أم سعد لفت عليها: وراك ما ساعدتي مرة أخوك؟
سارة: والله محد قلها تدخل المطبخ
أم سعد بحده: سارة
أبتسمت فرح بتسليك ولا ودها تنتف شعر سارة: ماعليه ياخالتي ما ابي احد يساعدني و أحب اسوي شغل بنفسي
أم سعد: ماقصرتي و أنا خالتك
فرح: أنتِ روحي أستريحي شويات و الفطور بيجهز
أم سعد: طيب ، ا.سعد وينه؟
فرح: نايم
أم سعد: ايه زين
طلعت من المطبخ و بقت سارة و فرح رجعت فرح لشغلها
و جات لها سارة: ممكن افهم كذبتكم ذي؟
فرح الي عينها على البيض: أيت كذبه؟
ضحكت بسخريه: و مستمره ، حمل نجد ليه كذبتو فيه؟
سكرت على البيض و لفت عليها: أنتِ الحين ليه خاشه خشمك بينهم ممكن افهم؟
سارة بكذب: لأن عساف يحبني و أنا حاولت انقذها ذاك اليوم بس ما نجحت
فرح: أنتِ صاحيه!
سارة: صدقيني ماكذبت ، عساف بينتقم من نجد ، ما يحبها
فرح الي بان على وجهها الدهشه و كملت كلامها سارة من لاحظت تغيرر ملامحها: حاولي تساعدين بنت خالتك ، بس أنتبهي لا تقولين لا أحد لأن عساف لو عرف أنّ خطته انكشفت بيسوي شي ما يرضي الكل
فرح الي بدت تفكر في كل شي و كيف نجد خلت عساف و حاولت تبتعد عنه و أنه يمكن صدق جاي ينتقم لها
سارة أبتسمت بس اخفت أبتسامتها بسرعة: فروح حبيبتي أنتِ معي؟
فرح: هاه ، كذابه الي تقولينه كله كذب
سارة حطت يدينها على اكتاف فرح: أسمعيني اعرف أنك تحبين نجد و تعزينها و أنها مثل وحده من خواتك ويمكن اكثر ، فـ على شان كذا ساعديها عساف خطير
فرح ناظرت في يدين سارة و نزلتها عنها: أقول بعدي ، و خيالاتك كثيره ترا ، وش الي انتقام و مدري وش؟ ، سارة والله لو ماتبعدين عنهم ولا صار لنجد شي ، وقسم بالله لتكرهين اليوم الي جيتي فيه فاهمه؟
سارة: ذي جزاتي أني بساعدكم؟
فرح: لا تساعدينا شكراً ، خليك في نفسك طيب؟ ، وعساف ما يحبك أبدًا ، لو يحبك تزوجك ما اختار نجد الي تقولين عنها حامل
سارة بعصبيه: هيه ، تراك زوتيها و تعديتي حدودك
ضحكت فرح: ايه طلعي العفن الي جواتك مو لايق عليك أنك طيبه و مسكينه يا حيه
سارة بغضب: نجد تبعد عن عساف سامعه؟
اللهم صل على محمد وال محمد
أنت تقرأ
ما خلف القضبان.
Ciencia Ficciónاهلاً بكم جميعاً ، بروايتي واعزوفتي الأولى... بدأت كتابتها بـ1/1/2023 وشاركتها أياكم بـ13/1/2023 - (ما خلف القضبان.) (الرواية باللهجة العامية.) نبذة الرواية: بطلتي هي البنت الكبيره بـ العائله هي واخوها الصغير فاقدين اهلهم ويحاربون آلم ووجع الحياه ب...
