طـغيان إِحمِرار السآعد

بارت 41

    طِـــغيان إِحمـــرار ألســـآعد

~ عشتار ~
العنود _ هذا صوت الباب
طلعت اول وحدة والصدمة من شفت
محمد ، جواد ، الاكبر احس الدنيا وكفت عيوني ما رمشت حتى الأصوات اتلاشت ما أشوف غيرهم اسمع أصوات البنات واشوفهم راحوا يركضون باتجاههم لزمتني العنود من ايدي وهمست
العنود _ تعاي وياي تعالي
عشتار _ جؤ اصبري
بقيت اباوع على البنات شلون حاضنات الاكبر بكل قوتهم وعايفين محمد وجواد اللي جانوا يباوعون عليه منتظرين ردة فعلي او يمكن منتظريني اروح يمهم وكالعادة ابجي واشتاقيتلكم بس والله هيهات إذا ما عذبتكم مثل ما عذبتوني
رجعت نفسي للبرود نظراتي تحولت من الصدمة لعدم الاهتمام ابتسمت باستهزاء ولفيت دخلت للبيت والعنود وراي تمشي مصدومة صعدت الغرفتي وهي دخلت وياي كعدت على السرير ورجعت صدمتي قفلت الباب وكعدت بالارض كدامي وحجت بصدمة ما تقل عني ابد
العنود _ شرجعهم ؟ شديصير ؟ مو على اساس تنفذ بيهم امر المحكمة وانسجنوا شلون طلعوا
عشتار _ راسي راح ينفجر راح ينفجررر
بدأ الصراع براسي كمت افكر بافكار استغفر الله العظيم سيطرت على عقلي باوعتلي العنود بقلق
العنود _ شبيج عشتار
عشتار باعتراف _ بدأ الوسواس يأخذ مجراه
فزيت من مكاني بعد ما أتحمل أفكر اكثر من هيج فتحت الباب ونزلت اركض لكيتهم كاعدين بالصالة والبنات كاعدات يم الاكبر يسولفون ويسألون عليه حجيت بصوت عالي قلقانة
عشتار _ تعالوا
شمس _ تعاي سولفي ويانه
عشتار بعصبية _ دا احجي عربييي
فزوا من مكانهم واجوي بناحيتي اشرتلهم اصعدوا صعدوا واني وراهم حتى ما كلفت نفسي القي نظرة عليهم خليتهم يحسون نفسهم شفافين بالنسبة الي هواء اي شي إلا الانسان
صعدت للغرفة راسي يدكون بي طبل عبالك البنات كاعدات مستغربين ليش عصبت وليش حجيت هيج
رميم _ شبيج عشتانه ليش هيج سويتي اكيد هسه انقهر
عشتار _ اسفة عيطت عليكم
شمس _ نروح فدوة لتراب رجلج بس ليش هيج سويتي
عشتار _ لا رد
سكتت ماعرف شنو اجاوب شكول اكولهم كمت افكر رجعوا حتى يذبحوكم كدامي ويحركون كلبي بيكم مثل ما حركوا كلبي على امي وابوية لو اكول هسه يشبون نار بيكم شحجي
عشتار _ لا تكعدون وياهم إلا بوجودي او بوجود نينا او العنود غيرها ما اقبل
البنات _ حاظر بس لا تزعلين
ابتسمت بوستهم وحجيت بحنان
عشتار _ يا روحها العشتار بنيات كلبي انتوا حليتوا حياتي وازهرتوها ونورتوها خليتوني احن وأرق ام بالدنيا علمتوني وسهرتوني وضحكتوني هواي صنعتوا مني شخص مهتم ومسؤول عرفت الشوق الفطري منكم احبكم حب ما ينوصف اني اخاف عليكم من نفسكم حتى
عيونهم تلمع بكلامي وطول ما اني احجي يبوسون بيه وبأيدي ما احس غيرت بجت العنود طفرت عليها حاضنتها بقوة حضنتني وكالت بقهر
العنود _ اتمنيت عندي اخت نفسج
عشتار _ ليش ما معتبرتني اختج ؟
العنود _ واعز منها
طلعوا البنات حجيت واني امسح على ضهرها
عشتار _ العنود انت رابع خواتي واكثر وحدة بالدنيا تفهمني اني ما اعتبرج بس صديقة انتِ اختي وصديقتي ورفيقة عمري وبير أسراري والفاهمتني ما توقعتها منج
العنود بضحك وهي تمسح دموعها _ عذريني عشتورة بس ضربني حزن مشتاقه الأهلي
عشتار بزعل _ لا تكولين تردين تروحين البيتكم
العنود _ عشتار صارلي هواي هنا كلش هواي واخوية اتبهذل بدوني واهلي تعرفيهم ما يرجعون بس مرة بالسنة
سكتت اتعودت على وجودها يمي حضنتني بقوة وكالت
العنود _ الخاطرج باجر راح اروح وصدكيني بين يوم ويوم أجيج
عشتار بزعل _ ليش ما تسكنون بهذا البيت اللي بصفنه
العنود _ يمعودة على بختج البيت بمنطقتكم سعره مليارات ميلي
عشتار _ استغفر الله نسيت مو بيت كامل شقة هي
العنود _ شكد سعرها
عشتار _ اتوقع ما يريدها بيع يريدها أجار
العنود _ شكد كم مليار
عشتار _ بلا اوكفي
فتحت تليفوني ودخلت على الصور طلعت السكرين وحجيت بابتسامة
عشتار _ تصدكين بالشهر يريد مليون بس
فتحت عيونها بصدمة وحطت ايدها على كلبها
العنود _ مليون ؟ ميلي عزززه لازم كل شهر ابيع عضو من اعضائي
عشتار _ ليش انتِ تشتغلين واخوج يشتغل
العنود _ اي بس رواتبنه ثنينه يلا اكدر ادفع الاجار
عشتار _ معليج اني أدبرها
العنود _ شلون
عشتار _ هسه شوفي الساعة كاعدين تتوقعين
العنود _ بعد وكت تره
عشتار _ تمام
كمت بسرعة حتى نسيت سالفة اخواني طلعت فستان بسيط لونه رمادي فاتح لبسته ولبست كعب بسيط حطيت عطر وشويه حمرة وهي كل هذا وصافنة عليه
العنود _ رايحه تخطبي ؟
عشتار بخزره _ انجبي
العنود _ يمه والعباس عيونج من تخزرين تخوف
ضحكت ولزمت ايدها كومتها ومشيت قبلها امشي بثكل اطك بكعبي كالعادة نزلت وبنص الدرج صحت بدلع
عشتار _ نينا
اجتي تركض باوعتلها وحجيت
عشتار _ روحي لهذا اللي بصفنه اللي يريد يبيع الشقة اللي كتلج صوريها وكوليله آنسة عشتار بنت عبدالله تريدك بشغلة
هزت راسها وطلعت تركض دغتني العنود وكالت
العنود _ ولج شدسوين يمكن اخوية ما يقبل
عشتار بغرور _ مو على اساس بكيفج او بكيف اخوج امشي واسكتي
رحت للصالة دخلت وهم كاعدين يحجون بس شافوني سكتوا ما باوعتلهم حتى كعدت على التخم حاطه رجل على رجل والعنود بصفي وجها احمر تريد تضحك وكاتمتها دقايق ودخل الرجال باوعلي وابتسم اشرتله على التخم المقابيلي مبتسمة كعد وكال
الرجال _ سلام عليكم
عشتار والعنود _ وعليكم السلام
عشتار _ شلونك ابو رسل
الرجال _ هلا بعشتار هلا ببنت عبدالله
عشتار بابتسامة _ الله يخليك
الرجال _ خير ان شاء الله عاملتكم كالت ترديني بشغلة ضرورية
عشتار _ اي نعم بس شنو تشرب
الرجال _ زاد خيرج ما اريد والله هسه شارب قوري جاي
عشتار _ بالعافية ابو رسل اني وصلني خبر انت تريد تأجر البيت مالتك شقق صح
الرجال _ اي نعم
عشتار _ البيت شكم شقة ؟
الرجال _ شقتين الطابق الاول والثاني
عشتار بغرور _ جيد الشقتين راح أجرهم منك بمليون
الرجال باستنكار _ مليون ؟ الشقتين مليون
ضحك واني ابتسمت
الرجال _ عفواً منج آنسة بس اني الشقة الوحدة عارضها بمليون شلون تردين شقتين بمليون يعني الاولى خمسمية والثانية خمسمية
عشتار بغرور _ بيتك كله مدخل بي حرام يعني اني هم راح اخسر
صفن بوجهي يبلعم ما متوقع جوابي ابد ألقيت نظرة على اخواني صافنين بالنقاش مصدومين مني من كلامي
عشتار بابتسامة خبيثة _ يعني مدخل بي نسوان وشرب حرام وأغاني واوراق ومناقصات حرام ونصب واحتيال
وسع عيونه مرتبك واني مبتسمة برود عيوني تحجي عن لساني وهو بقه صافن بوجهي يبلعم حجيت بهدووووء
عشتار _ ها شنو رأيك ؟
ابتسم وكال بارتباك واضح يحاول ينسيني الموضوع
الرجال _ يجرالج ثنينهم 750 بالشهر
عشتار _ بعد افضل
ارتبك بالزايد عباله ارفض بس والله عرض حلو كلش
الرجال _ حاظر باجر نسوي الإجراءات
عشتار _ مو باجر يومين وارجعلك خبر
الرجال _ تمام آنسة
ابتسمت وهو استأذن وطلع يركض على ايده ورجله حتى باوعت على العنود متجاهله كل نظراتهم ضحكت بوجها وكمت وهي انفجرت تضحك بعلو صوتها راحت تمشي سريع صعدت فوك قبلي تنهدت مبتسمة ومشيت اريد اطلع ودغدغ اذني صوته
محمد _ عشتار اوكفي
مشيت كلبي يدك صوته حسيت بأشتياقي اله صوته ذكرني بكل شي جان بحياتي وياهم من لعب ، ضرب ، ضحك ، بجي ، لطم ، حماية ، حنان كل شي بالحياة اتذكرته اتمنيت لو جانت غير هالظروف جان التفتت وحضنته شميت ريحته اللي صارلي فترة طويلة مفارقتها بس للاسف بسببك يا محمد بسببك
شايله بكلبي عليهم بس احبهم أريدهم يتأذون بس احميهم اتمنى يعيشون اللي عشته واخاف عليهم من نسمة الهوى
تنهدت وصعدت الغرفتي العنود كاعدة تضحك بس باوعت بوجها فطست نسيت الدنيا نسيت الهموم نسيت نفسي اضحك وما الحك اريد اسكت ما اكدر بعد فترة من الضحك والكح رحت دخلت للحمام مسحت المكياج وغسلت وجهي زين ما ارتاحيت نفسياً إلا سبحت بنص اندماجي بالسباحة واندك الباب العنود ادردم
العنود _ صارررر ساعتين بالحمام دا احسبلج ساعتين شتسووووين
عشتار _ ولج صبرررريي شويه نص ساعة على الاقل
كمت استعجل وره نص ساعة ثلث ساعة طلعت من الحمام اغني باوعتلي تثاوب وادردم ليش اتاخرت ما جاوبتها مشطت شعري ضفرته ورحت هي نايمة تمددت بصفها وكلت بتنهيدة
عشتار _ والله وبالله إلا أحرمه مني
العنود _ ما يتحمل يتخبل عليج يموت بدونج ينشل ينجلط توقعي كل شي يمكن حتى يكتل نفسه
عشتار _ ما اريده بعد
العنود _ تكذبين على نفسج لو عليه ؟ الكل يعرف هو يعشق التراب اللي تمشين عليه وانتِ هم تموتين عليه تردين تقنعيني تكدرين تعوفي
عشتار _ اني عشتار إذا اكو اي شي اني اريده راح اسوي لو شنو ما كان
العنود _ لنفترض عفتي انتِ تتوقعين هو راح يعوفج ؟ اقسم بالله ما أبالغ ولا اريد اخوفك يذبحج ويذبح نفسه
عشتار _ ما صار يهمني اي شي غير خواتي
العنود _ فكري بيهم قبل كل شي عشتار
عشتار _ الله كريم
العنود _ صدك انتِ وياه عقدتوا محكمة لو بس شيخ ؟
عشتار _ اي عقدنه محكمة يعني هسه اني زوجته رسمياً بس عرس ما سويت
العنود _ ليش حرمتي نفسج من الفرحة هاي
عشتار بتنهيدة _ ماريد بعد عموماً باجر يجي مصطفى علمود أتفاهم وياه على هاي الشقق
العنود _ عشتار تهورتي احنه ماعدنه هالمبلغ
عشتار _ مو بكيفج حتى لو اني أساعدكم
العنود _ مصطفى ما يقبل والله
عشتار _ هسه اسُكتي شنو هالطاقة السلبية اللي تبثيها بدون توقف خلي انام احسلي
درت نفسي ونمت وأسمعها تحجي
العنود بصدمة _ اسوكتي؟ طاقة سلبية ؟ تبثيها؟ توقف ؟ يا علي دخت شنو هالثقافة يبووووي حقه الرجال يتزوهر عليج عمي حقه
اندارت ونامت وهي ادردم ابتسمت وغفيت بنص نومي وحسيت اكو احد كاعد يم راسي اتوقعتها وحدة من خواتي او العنود بس وقف تفكيري من حسيت ايد خشنة عصرت خصري بقوة فتحت عيوني على وسعها والصدمة من شفته ردت اعيط بس حط ايده على حلكي مانعني من اي كلمة مانعني من الحركة فاتحة عيوني على وسعها اباوعله وهو يباوعلي بتعطش ابتسم بس ابتسامته مو طبيعية بيها خبال عبالك ماعرف شنو شبي همس يم اذني
مشعل _ اسف على اللي راح اسوي بس مجبور يا بعد حيلي
طلع من جيبه لاصق يريد يسد فمي اتعصبت مو اني اللي هيج يسوي وياي مووو انيييي عضيت ايده بكل قوتي اهز براسي متخبلة من وجوده وشلون لامسني حسيت بنفور منه مو طبيعي
دفعته بصعوبة وكمت اريد اطلع بس لزمني من خصري حاضني من وره ساد فمي بيده شويه وطلع كلينكس من جيبه حطه على خشمي ما اتنفست بقيت قاطعه نفسي وهو يحجي متخبل من عنادي
مشعل _ اتنفسي عشتارتي ابوس ايدج لا تعذبيني هيج
عاندت اكثر ما احس غير كرصني بخصري شهكت وغصباً ما عليه تنفست شويه وجسمي خدر فقدت الحركة والإحساس