USRI YUSRA [ROMAN URDU VERSION]

•CHAPTER-61•

قِسط نمبر 13

Woh bed par uske paas hi baithi thi, uska haath apne haath mein liye, jhuk kar uske pur sukoon chehre ko dekhte hue saanson ko ginte hue. Kuch der pehle hi woh kapde badalne ke baad neend ki goli lekar so gaya tha aur woh tab se uske paas baithi hui thi. Ang ang mein fikar aur ek anjaana sa khauf samaaya hua tha. Neend udd chuki thi. Sukoon garat ho chuka tha. Usse is tarah achanak, is roop mein dekh kar uska dil bohot se andesho mein ghir gaya tha. Woh bay-had pareshan ho rahi thi.

Qehar barsaata lehja aur shola chalagati aankhein to jaise zehan mein sama gayi thi. Usse itni azeeyat mein dekhne ke baad apni ghalti ka shiddat se ehsaas hone laga. Mrs. Shirazi ne roka tha, to usse ruk jaana chahiye tha. Shayad usse kisi aur tareeke se baat karni chahiye thi. Ek yateem bache ke liye pathar hote dil ko kisi aur tareeke se mom karna chahiye tha. Usne socha.

Magar woh aisa kaise karti? Mrs. Shirazi usse kuch bhi batane ko tayyar nahi thi aur Faris usne to darwaza khulne se pehle hi band kar diya tha. Ek hi jumla, pathhar par lakeer jaisa Phir Rayyan ka zikar aur uski lahu rang aankhon se jhalakti waazeh tanbeeh,

"Agar tum chahti ho ke hamare darmiyan sab theek rahe, to aindha tum uska naam nahi logi mere saamne." Usse yaqeen nahi aa raha tha, yeh baat usse Faris Wajdan ne kahi thi. Woh jo uske liye kuch bhi karne ko tayyar tha, woh is tarah sakht alfazo mein ek hadd numaya karega ?

Usne gehri saans lekar aziyat se aankhein moond li. Mrs. Shirazi ka gham ek taraf, Rayyan ki fikr doosri taraf, aur Faris ka ishtiaal amaiz ravaiya teesri taraf tha. Ek zara si umeed thi ke baat karke masla hal kar legi, lekin yeh umeed bhi khaak ho gayi thi. Khushk labo ko tar karte hue usne zakhm saaf karke patti baandh di.

Faris ke liye kuch tasalli karke sone ki koshish ki to baar baar uska chehra aankho mein aane laga. Woh kitna ghusse mein lag raha tha aur kis qadar ajnabi sa ho gaya tha, jaise woh usse jaanta tak nahi tha. Usse bohot andar tak dukh hua.

Raat karwaate badalte, khud se ulajhte, aur situation ko sochte hue guzargayi. Baar baar uski aankh khulti rahi, uska khayal aata raha, uski fikr hoti rahi.

Namaz ki adaigi ke baad, woh uski talaash mein tez tez qadam uthati kamre se bahar aayi thi. Rahedaari mein neem tareeki thi. Deewaro par lagi khidkiyo se subah ke aasar numaya ho rahe the. Sooraj ki roshni abhi zameen par nahi utri thi, magar ujala har taraf phail chuka tha.

Usne Faris ko kitchen mein khada dekha. Fajr ki namaz ke baad woh yaqeenan apne liye qahwa bana raha tha. Aahat par zara sa rukh badal kar usse dekhne laga. Nazar bilkul khaali aur weeraan lag rahi thi. Jannat ka dil shiddat se dhadak utha. Cabinet band karte hue usne chaar rakha aur aanch dheemi kar di.

"Qahwa bana raha hoon, tum piyogi?" Uska lehja naram tha. Taa'suraat mein koi sakhti nahi thi, na hi andaz aur ravayye mein kisi talakhi ka shaaibah tha. Wo Faris wajdan ko dekhti reh gayi.

Usne fikar aur pareshani mein saari raat sote-jagte guzari thi, aur woh subah se aise mukhatib ho raha tha jaise guzashta shab unke darmiyan koi baat nahi hui thi. Jaise usne sakht tassurat nahi diya tha, na hi kisi baat par mushtail hua tha. Aankhon mein fikar aur dil mein izteraab liye usne sar hilate hue usay ijazat dedi.

Faris ki peeth ab uski taraf thi. Woh sar jhukaaye khamoshi se qahwa bana raha tha. Aag ke neelgo sholo par rakha ubalta paani apna rang badal chuka tha. Woh kursi par baith gayi, ungliyo mein ungliya phansaaye, andar ke izteraab ko chupane ki koshish karte hue.

Faris ne cup mein qahwa daal kar uske saamne rakha aur doosra cup haath mein liye kursi kheench kar uske paas baith gaya.

Kuch dair tak uski nigaahein bhaap uthaate cup par jami rahi. Phir usne sar utha kar Faris ko dekha. Yeh khayal tha ke shayad ab woh kuch kahega, koi wazaahat dega, ya koi baat karega. Shayad narmi se kuch samjha dega ya apne ravaiye ki wajah batadega. Magar doosri taraf gehri khamoshi ke siwa aur kuch nahi tha.