လေတချက် ဝေ့တိုက်သွားခြင်းနဲ့အတူ
တဖြုတ်ဖြုတ်ကြွေကျလာသည့်သစ်ရွက်ကြွေတွေက
ပြောင်စင်အောင်လှဲထားသည့် ခြံဝန်းအတွင်းမှာ ပျံ့ကြဲသွားကြသည်။
မီးခိုးငွေ့တွေအူထွက်နေသည့်အမှိုက်ပုံပေါ်သို့
သစ်ရွက်ခြောက်တချို့ကို ဖြန့်ကျဲအုံလိုက်သည်နှင့်
မီးတောက်တခုက ဟုန်းခနဲထ,တောက်လေသည် ..။
အပူရှိန်ကြောင့် ဝါးပင်ဖျားတချို့မှာ ယိမ်းထိုးသွားကြပြီး
ဝါးရွက်နုလေးတွေသည် ညှိုးရော်နွမ်းခြောက်သွားကြသည် ။
" သားရေ ညှော်တယ်ကွယ် ဘာတွေရှို့နေတာလဲ "
" အမေ့ဆီ အညှော်လာလို့လားအမေ
ကျနော် ကြွပ်ကြွပ်အိတ်လေးနည်းနည်း မီးထဲထည့်လိုက်မိလို့ "
" အမေက ရတယ်
ခေါင်းရင်းက ဘကြီးဖိုးနီက နေသိပ်မကောင်းဘူးလေကွယ်
စောသေးတယ်ဆိုပေမယ့် လူကြီးတွေက နိုးနေကြပြီသားရဲ့ .. "
" အင်းပါအမေ အမြန်သတ်လိုက်မယ် "
ပုဆိုးကိုတိုတိုဝတ်ကာ
မီးပုံဘေးမှာဆောင့်ကြောင့်ထိုင်နေရာမှ
အနားမှာ အဆင်သင့်ချထားသည့်ရေပုံးကို ယူလိုက်ပြီး
မီးပုံကိုတုတ်နဲ့ထိုးဖြဲကာ ရေနဲ့လောင်းချလိုက်သည် ။
ရှဲခနဲမြည်ကာ မီးခိုးငွေ့တွေလုံးတက်သွားပြီး
ခဏအကြာမှာဘဲ မီးခိုးငွေ့သေးသေးလေးဘဲကျန်ကာ
မီးပုံကြီးက ချုပ်ငြိမ်းသွားလေသည် ။
မီးပုံအလင်းရောင်ပျောက်သွားသည်နှင့်
ပတ်ဝန်းကျင်သည် ရောင်နီထွက်စ,ပြုလာသည် ။
အိမ်ရဲ့နောက်ဖေးဘက် ခြံကွက်လပ်ထဲမှာ
အမှိုက်တွေပုံပြီး မီးရှို့နေသည်မို့ လူတွေအိပ်ရာမထခင်
မနက်စောစောမီးရှို့နေခြင်းဖြစ်ပေမယ့် အမေပြောသလို
ဘကြီးဖိုးနီရဲ့ကျန်းမာရေးက သိပ်ကောင်းတာတော့မဟုတ်ပေ ။
အသက်အရွယ်လည်း ကြီးပြီဖြစ်သလို
ဘဝရဲ့နောက်ဆုံးအချိန်ကိုရောက်နေပြီဖြစ်တာမို့
သွေးသားမတော်စပ်ပေမယ့် စိတ်မကောင်းဖြစ်ရပါသည် ။
ငယ်စဥ်ကတည်းက ခြံချင်းကပ်နေလာကြသူတွေဖြစ်ပြီး
ရပ်ဆွေရပ်မျိုးဖြစ်သည့်ဘကြီးဖိုးနီသည် သူတို့တွေအပေါ်မှာ
မြေးသားတွေလို ချစ်ခင်ရှာသူဖြစ်သည် ။
YOU ARE READING
🌙 လရိပ်ညို 🌙
Romanceအချစ်မှာ အပေးအယူဆိုတာ မရှိဘူးကမ္ဘာရဲ့ ငါ ဒါပေးလို့ ဒါပြန်ရ,ရမယ်လို့လည်း မမျှော်လင့်ရဘူး အချစ်ဆိုတာ ကိုယ်ချစ်တဲ့သူ အဆင်ပြေပျော်ရွှင်နေတာကို ဘေးနားက ကြည့်နေခွင့် ရတာနဲ့လည်း အချစ်ဖြစ်တာပဲ ။ ကျွန်တော်ကတော့ အမကြီးလို မတွေးဘူး ကိုယ်ချစ်တဲ့သူ ကိုယ့်ကို...
