ورود سامة

Part29

ورود سامة
يحيى ادريس
‏29 part

مقعمزات ف صاله ..
ع صالون عالي
امي ماتنلام را اللي مات راجلها وانسرقو فلوس من حقنا انتي ليش خذيتيهم ي خالتي ماتوقعتها منك
انا ساعدتك تهربي عشان الحب ديري فيا هك ..
قمر : شافتلها بحزن فرج راقد ريح وماتوقعتش
ان هذ حد ثروتكم وان  خليفه يموت نا سرقت
وقلت هنردوهن لكم وقت ما فرج يفتح مشروع مانحساب الامور توصل لهنا ..
نسرين :امي بطلتني من قرايتي بعد عرفت اني ساعدتك قعدت ف الحوش اشرف يسكن ف حوش لللي لاصق فينا بدا كل يوم ينابش من سور وتزوجته
قمر : تحبيه ..
نسرين : كنت بس توا منعرفش ..
قمر : عليش ..
نسرين : مش العيشه اللي نتمناها ف بداية صبرت وقلت الوضع يتحسن بس خلاص لي 11 سنة متزوجة ومافيش حاجه شقة ايجار من دون صبايا لا لبس كويس ولا ذهب لي ولا عويلتي حتى الوكال مرات نقعدو ف خاطرنا هذك الحاجه هو يشتغل مانكذب عليك بس يالله المصاريف الاساسيه وزادها قرايته ف طب ومصاريف قرايته
قمر : ربي يكون ف العون ..
منار : ماما صح ..
قمر : شافت لرسمه بنتها وقالت سمحه شاطره بنيتي فنانه شفتي ي نسرين ..
نسرين : بعد شربت من العصير ماشاء الله..
قمر : قوليلي شخبار كنتكم ..
نسرين : خليني ساكته احسن ..
قمر هزت راسها وقالت ماعد مزال على رمضان شي
مهاب : خش وقعمز جنبهم ..
نسرين : انت بنعرف شن جابك معاي ..
مهاب : كساد وشاف لمنار بنتك
قمر : انعم
مهاب : شفتها ف عزاء بنلعب معاها لكن جالطه
نسرين : تحشم ع وجهك
قمر : ما محبه الا بعد عداوة بعد تكبر تزوجو
مهاب : نا ناخذ هذ لا لا
قمر : غير اسمع
ونسرين تضحك رن تليفونها هذ اشرف ايوا..
اشرف : هي قدام باب ..
نسرين : باهي صكرت خالتي مع سلامه ..
قمر : ارجي شوي وناضت ..
مهاب خبط كراعه ع الارض شافتله منار بحده وهي ترسم ..
نسرين : امشي اطلع لبوك امشي ..
مهاب : مانيش طلع حط يده ع صدغ راسه قاعد هن
نسرين : قتلك فز تحرك
جت قمر مدت ظرف لنسرين ..
نسرين : وهي تلبس ف شنطتها شنو هذ
قمر : حاجه بسيطه
نسرين : لا واللهي نا نحكيلك بس مانبيش
قمر:فنصت فيها نا خالتك بعدين هذ جزء من حقك
نسرين : حضنت خالتها وعيونها مليانات دموع ربي مايحرمني منك
قمر : مسكت يدها ماتقطعينيش
نسرين : ان شاء الله شكرا بعدين جت بتمشي وقفت وقالت خالتي
قمر : نعم
نسرين : ياريت امي ماتعلمش بجيتي
قمر : سرك ف بير
ومنار : شافت لامها كيف عطت فلوس لنسرين
طلعو مهاب ونسرين ف الحاجر وهو يقول كم عطاتك
نسرين : شنو هذ ما عطتني شي هذين تحاليل تبيني نعطيهم لبوك
مهاب : اها وبعد ركبو سيارة هي عطيهن لبوي
نسرين : فنصت فيه شن نعطي
مهاب : تحاليل اللي عطتهم خالتي قمر
نسرين : مادخلكش بخبر صبايا
اشرف : كان يسوق ومش مهتم لحديثهم تعبان من المحاضرات وشغل ..
..
طلعت سحر متمكيجه ولابسه ضيق ..
فجر طبس عيونه ياريت تحترمي نفسك والبسي كويس
سحر : وجعاتك ان خذيت خوك حرقت فيك صح
فجر : وحده رخيصه كيفك ماتحرقش في
سحر : ابتسمت بتهكم رخيصه قالها
فجر : شن قصدك
سحر : شوف خواتك قبل لمع قرونك خواتك يجاران ورا رجاله وحده ورا الغرباوي وثانية تضربلكم مواعيد مع اولياء الامور ..
فجر : شن قصدك هاه شن تقولي انتي
سحر : ركبت وسيباته نار شايطه فيه
كانو مقعمزين يتفرجو ع مسرحية كوشي ي كوشه
ورضيه تصب ف شاهي وياسمين دير سندوتشات
جبنه للي يبي والوحيده اللي مش معاهم نرجس ..
طلعت قعمزت وقالت صبولي شاهي وف يدها تليفون اسمه الدمعه ..
فجر : مقعمز ركبه ونص وف يده طاسه شاهي شافلها بطرف عينه مركز عليها كيف تبتسم ..
فجر : كذا ي نرجس تليفونك ..
نرجس : ماردتش عليه
فجر : اووووي
كلهم ركزو معاه ..
فجر : نبي تليفونك ..
نرجس : شن تبي فيه ..
فجر : بندير مكالمه ..
نرجس : ماعنديش رصيد
فجر : وشن ديري تسهوكي توا
نرجس : نتفرج ع صور
فجر : كذا نتفرج حتى نا
نرجس : لالا
فجر : قتلك جيبي جاي
نرجس : امي قوليله
رضيه : كنك ي ولد
فجر : عارفهن هذين تلقيهن يكلمن ف رجاله
ياسمين : تحشم على وجهك بلا قلة ادب
فجر : انتي صكري فمك مدخلكش
ياسمين : شافتله بحده
فجر : جيبي تليفون
نرجس : مانيش جايبته لك وقدم فيها ضرب
وماقبل انتهيت عركتهم خذا تليفون وكسره بين اثنين
نرجس : حسبي الله ونعم الوكيل فيك ي متخلف
فجر : نا نربيكن كان امكن معرفتش تربيكن
صبت رضيه ادف فيه اطلع برا ي مسخ نا معرفتش نربي نا ياقليل الادب وصوت عياطهم واصل لحد وين
سحر : تاكل ف بريوش ب شوكولاطة ومبتسمه وتقول الله تكت عركه بين اثنين واحد دب واحد شين في مربوعة عيت حسين ها ها ها وناضت رفعت يدها وترقص ...
..
نسرين : تعد ف لفلوس ع سرير وتلحس ف صبعها
انفتح الباب نطت من مكانها وهي منصدمه فجعتني يخربيتك انت كيف تخش هك ي قليل الادب ..
مهاب ابتسم وهو مضيق عيونه لكن تحاليل سمحه
نسرين فنصت فيه : هي اطلع امشي اقرا خيرلك
مهاب : مش قاري النص بالنص ولا نقول لباتي
نسرين : امشي قول زعمتني نحس فيه بوك
مهاب : نقول لحني ان نحنا مشينا لقمر
نسرين : نهارك اسود تفتن علي امي
مهاب : النص ب نص
نسرين : صبتله وكرتله وذنه تقول حرف بس نقطعلك شواربك
مهاب : خلاص حولي حولي
نسرين : سيباته
وهو طلع شاف اخته امنه تفرج ع طيور جنه مشا فك تلفزيون البنت قعدت تعيط معش سكتت ومهاب ابتسم وقعد يرقص ف حواجبه طلعتله
نسرين انت يافرخ الحرام مهاب تجري وراه وهو
يجري من صالون للاخر لين دهشت وراسها صدع
ومهاب يصرخ ويضحك ويضرب ف اخته ويجري
نسرين : معش تحملت وخشت عطاته 40 جنيه
طلع فرحان بيهن وهي خشت طمرت باقي لفلوس
ومهاب يقول وهو فرحان ف شارع كل يوم 40 ندير
بيهن ثروة يربح ومشا لمحل غذائية وبعدين شاف محل دخان وقال خليني نجرب خذا قرطاس ودخن
ف بداية كح وتعب بعدين انسجم ..
وردة : شن جابله عقله المتخلف ..
ياسمين : مريض نفسي ..
نرجس : كسره البارد عوزني فيه ..
وردة : صدقو فيه اللي ضربوه كسروه تكسير
نرجس : ياريت يردو يكسروه
ياسمين : بعيد سو كنكن انتن خوكن
نرجس : انتي معانا ولا معاه
ياسمين : انا مع النوم هي نرقدو احسن حاجه
..
وف اليوم اللي بعده سحر مشت لهلها وتحكيلهم
عبله تفصفص ف زريعه ي نهار ابيض قصدك البنات
بيكلمو ولاد ..
سحر : هوه يمي هوه هذك شرينها مدرسة وتشلط ع كمبيوتر كل مره راجل وتضرب ف مواعيد خلاص
قريب تخش ع ثلاثين ..
عبله : دي الارمله ..
سحر : ايوا
عبله : كانت عجباني لحماده اخوكي
سحر : عليش يمي من جدك حماده ياخذ هذي
سمر : را حماتك سمحه الحق وحماده شين وكبير اخرى
سحر : لا حماده كان تبو تاخذو خوذو وردة سمحه وصغيره ..
عبله : بس بينهم كتير ازا الكبيرة اكبر منها ب 6 سنين
سحر : عادي راجل مايعيبه شي ..
عبله : تمام تمام ..
شن رايك ..
هارون : وردة مزال صغيرة ..
سحر : شن اللي صغيرة اهي زهراء ولدها يجري ..
هارون : زهراء راجلها من عمرها وهي اختارته ..
سحر : وكنه حماده مش عاجبك ولا شنو ..
هارون : خلاص توا نشوف امي والبنت ..
سحر : الخبر هذ شوري نا ماعليك ..
هارون : على كيفك بينك بينهن ..
..
كانت ياسمين طالعه ترجى ف هارون يوصلها للمدرسة ..
سحر وهي تمضغ ف المستكه ونازله من دروج
شافت ياسمين لابسه سروال وبلوزه ضحكت بتهكم وقالت شنجو ..
ياسمين : تمام نرجى ف هارون يشيلني لمدرسة ..
سحر : شوي وينزل ..
ياسمين : تمام
سحر : خشت وقالت عمتي عمتي ..
رضيه : وطت صوت الراديو هنا هنا
سحر : جيت نشرب معاك قهيوة صبح ..
سحر : نديرها ونجيك وخشت كوجينه دارت صفرة قهوة ومشت بيها لرضيه حطتها تفضلي عمتي ..
رضيه : سلم يديك ..
سحر : سلمك ..
رضيه : خذت فنجال وشافت لسحر بنظرة قولي ..
سحر : تنهدت عمتي ..
رضيه : قولي اللي ففمك
سحر : خوي الكبير ندوروله على عروسه ..
رضيه : ماشاء الله ربي يرزقه ببنت الحلال
سحر : ابتسمت هو مواليد ال 75
رضيه : مزال صغير مناسب يعني
سحر : ونا لاني نودلكم الخير دليتهم عليكم
رضيه تلاشت ابتسامتها وبلعت ريقها ..
سحر : ها ..
رضيه : خلي لين صاحبة الشان تروح ..
سحر : شن تبي نديرو الغداء ..
رضيه : لا توا ندير انا
سحر : والله مانك قاربه حاجه وناضت لكوجينه
وف العشيه ..
كانو ملتمات كلهن روحن من جامعة وياسمين من مدرسة ..
رضيه : ياسمين سحر جايبتلك عريس ..
سحر : وجهها انحمر ..
ياسمين : وهي تاكل ف رز عريس من ايش قصته
رضيه : خوها الكبير شن يخدم قلتي
ياسمين : ابتسمت وحست انها مزالت مرغوبه وقعدت تشوفلهم
سحر : عمتي فهمتيني غلط خوي يبي وردة
رضيه : انصدمت
وردة : رفعت حاجبها هذ ما ناقص ناخذ خوك
سحر : شافتلها بغل
وردة : معلش بس فوق ماهو كبير شيننن معقوله نهايتي هذ
ياسمين : قلبها وجعها اما عرفت موضوع لاختها
سحر  : انا نركب لشقتي ..
رضيه : خليك تعشي معانا ..
سحر : بارك الله فيك وركبت فوق تصنعت ملامح الحزن وخشت شقتها وهي تقول انا نوريكن ي ثعالب خشت شقتها خبطت الباب بقوة كان هارون مقعمز وحاط ع قناة جماهيرية يتفرج ع خطاب سيف الاسلام وعن ليبيا الغد ومن ه الكلام ..
هارون : نقص صوت وقال كنك ..
سحر : قعمزت ربعت يديها ماكني شي ..
هارون : حد زعلك ..
نزلت شواربها وبدت تبكي
هارون : تكلمي من جا شورك ..
سحر بنبره باكيه: محد
هارون : اقسم بالله ماتكلمي نشيلك لهلك
سحر : رفضو خوي بطريقه مهينه قالت وردة شين وهذ ما ناقص كانت تقدر ترفض بلطف بس وجعتني
هارون : نزل شافهن يطلعن ف الفرش يديرن ف حمله عشان خشة رمضان نزل وهو حامق ..
هارون : ماتبيش تقدري تقولي لا لكن تهيني مراتي اللي دايره فيك خير وتبي تمشي سوقكن ..
رضيه : سوق شنو بلا قطاف صبايا انت الاخر..
هارون : حوش عوانس وارامل شفقت عليهن
ياسمين : تصب ف تايد وكلمات ينزلو زي سم
نرجس : ماشاء الله فتناتك علينا
هارون : وحده توصل لمراتي ف كلمة تشوف شي مايعجبها ربي بناتك يمي حاطات راسهن ب راس
الوليه راك تخسريني حتى نا وركب لشقته يهزب
رضيه : اغسلن اغسلن ..
وردة : تحك بغل لدرجة كسرت مكنسه
...
توليب : مش من جدها هذ مش بالغصب
نسرين : حتى خوكن وذن ..
نرجس : اخرى قالت مش لياسمين لوردة الراجل كبير
وردة : وشين اخرى وسادك غير خوها شلتوت كيفها
توليب : تخيلتك معاه
وردة : عليك نهاية
زهراء : مش اي حد توافقن عليه حتى ياسمين انتي صبرتي خوذي حاجه كويسه او اقعدي هنا خير
ياسمين : من قاللكن ندور ف راجل ..
آيآن : جيعاان ..
زهراء : امشي مش فاضيه ..
ياسمين : ناضت تعال حبيبي شن تبي
آيآن : بتفكير بيتسا ..
ضحكت توليب نقنها بيتسا
زهراء : 24 ساعة نطلب فيها ..
مهاب : خالتي ياسمين نبي بكلاوة
ياسمين ضحكت حاضر ..
ملاك : ونا ونا نبي بتاتا اوسه مهروسه
ياسمين : نجك لي احلى بطاطا
آيآن  : البيستا اول
مهاب : كذا اس ي فرخ
ملاك : بتاتا
بلال : ضحك وهو يشوف لملاك
ياسمين : وانت
بلال : اي حاجه منك عادي خالتي
ياسمين : رهف تجيكم
مهاب : مستحيل حني تخليها تجينا مره روحت معانا جتنا حني من صبح خذتها..
بلال : من ساعة 7 تخبط ع باب
ضحكت ياسمين ..
..
نفس موضوع يتكلمن فيه
نرجس : غريبه ماتعلقتش ب امنه مع ان ع اسمها
نسرين : مش بالاسم محبة بخوت
زهراء : فعلا توا آيآن محبوب عندهم كلهم رغم ولدهم الاخر مسمينه ع بوهم ناجي محد يعدل عليه
وردة : صح مش قبل بيسميه ناجي
زهراء : بعد اللي داراته امه غير الاسم وقال حرام نظلمه وبيني وبينك نا لعبت ف دماغه الاسم ماعجبنيش ضحكت توليب حقيرة ..
زهراء : قالتها ع اساس انتي سميتي على عمتك ..
توليب : تخيلي نا اسمي توليب وبنتي نعيمه ..
نسرين : جبرة خاطر بس
توليب : يجبرو بخواطرها باقي عويلها
...
سحر شافت الفحص ف يديها ابتسمت وطلعت
هارون هارون ..
هارون: ها
سحر : بنبقو ثلاثه ..
هارون : ابتسم هي ننزلو تبوسي ع راس امي عشان رمضان وعشان نبشروها هي ...
سحر : شقلبت عيونها ونفخت
هارون : سقدي روحك فطورنا عند هلي ف رمضان
سحر : باهي ونزلو باست ع راس رضيه وقالولها
رضيه : ابتسمت مجامله والبنات مش طايقات يشوفنها ولا وحده طلعت سلمت عليها قعدو ربع ساعة ومشو ..
...
رمضان 2008 ..
كانت رضيه دير خبزة تنور وشربه والبنات الموالح وردة نوع حلو ..
وردة : شفتن الحقيرة تقول ما حملت كان هي
ياسمين : فكينا من مشاكل نقدرو بروحنا
نرجس : كان ترتزع ف شقتها
وردة : نتعبو وهي تاكل ع جاهز
ياسمين : ف شن تعبتي وريده
نرجس : نسيتي دارت البسبوسه
وضحكن ياسمين ونرجس عليها وردة شقلبت عيونها وقبل اذان مغرب ب 10 دقايق خشت سحر نساعدكن ف حاجه ..
نرجس : اها الله يربحك معلش كان فيها تعب ديري جرجير ولا سلاطه كان ماتقدريش خوذي مفرش شيليه لصاله ..
سحر : لا مافيهاش تعب ياقليبي وخذت مفرش
وردة : جت بتهجم عليها مسكنها نرجس وياسمين
حطو الفطور
سحر : البطاطا كنها هك ..
نرجس : كنها
سحر : طيبو المفروم قبل بعدين احشو البطاطا
ياسمين : لا وهو ني ينقلى مع البطاطا احسن
سحر : ماعجبنيش بعدين خذت بوريك كله زيت
نرجس : ضيقت عيونها
رضيه : تاكل وساكته متبيش مشاكل مع ولدها
سحر : ماتزعليش نبيكن تعلمن ننقدكن نا خير ماتمشن العرب يهزو عليكن
ياسمين : ماسكه ضحكتها
وردة على اعصابها ..
سحر : البيتزا دبه مفروض تقرمش ..
وردة : تنهدت بصوت عالي
سحر : شربه  ..
رضيه : كنها شربه نا درتها ..
سحر : لا يا عمتي ماشاء الله تسهف بس حاطه فيها حاجه
رضيه : نعناع
سحر : خففي منه داير فيها مراره
رضيه : ابتسمت بكرة انزلي وذوقينا من فطورك ي ي منال العالم انتي ..
البنات ضحكن ..
سحر انحرجت وسكتت وتاكل بصمت ..
وردة انمسح ع كبدها ..
وبدا مسلسل بعد فطور رضيه دير ف عداله شاهي مسلسل اسمه بنت من الزمن ده ..
وردة:تشوف لتلفزيون وشافت لسحر هذ يشبه لخوك
سحر : وين من
وردة : اهو كوناه
سحر : شافتلها من فوق لتحت لا مايشبهله
وردة : والله يشبهله مش صح ي بنات
نرجس : صح يشبهله بكل
ياسمين : بتنفجر من ضحك وهي متحشمه