ورود سامة

Part 33

ورود سامة
يحيى ادريس
‏33 part

يناير  2014 ..

زهراء : بنعزم هلي الجمعة ..
عبد الله : مافيش مشكلة في اي وقت ..
زهراء : نفكر ف المزرعة خير شن رايك ..
عبدالله : ع راحتك ..
زهراء : خلاص نكلم ماما ونتفق معاها ..
عبدالله : رشف من قهوته
وزهراء تتصفح ع ايبادها جا آيآن ..
آيآن : ماما جيعان ..
زهراء : فخرية فخرية ..
جت فخرية تجري نعم ي خانو ..
زهراء : ديري حاجه ل آيآن مايحبش الكسكسو..
فخرية : بعرفك مابتحبها عملتلك كباب ..
آيآن صفق بحماس ولحقها ..
زهراء : عبد الله بنسجل آيآن ف مدرسة اجنبية ..
عبد الله : مش ف بابه حاليا ..
زهراء  : بس شوف بروحك العيل مايعرفش يتكلم انجليزي ..
عبد الله : ساهل ساهل ..
زهراء  : انا من الاسبوع جاي بنمشي جامعة ..
عبد الله : ان شاء الله خير ..
زهراء : شربت من فنجالها وحطت فنجال ف تبسي خلاص نا سمستر جاي ونتخرج شنو ناوي تجيبلي
عبد الله : تخرجي وتلقيها عندك ..
زهراء : مش اقل من 100 الف ..
عبد الله : ونا نبيكي تجيبي مش اقل من ممتاز ..
زهراء : ضحكت حي عليا وناضت تجري لشيتاتها
ضحك عبد الله
...
رضيه : محصلتوش بنزينه ..
اياد : تس خلاص مزال قدامي واحد بس كملن ..
ياسمين : حتى قاز نولعو دفايه القاز مش ضروري الماتوري ..
اياد : لا والله ..
رضيه : يامينتي وليدي من صبح مطوبر ف سميطري وماحصلتش ..
اياد : الله غالب يمي ..
ياسمين : خش غير دبشك را تمرض ..
مشا اياد لداره وقعدت ياسمين ان شاء الله غير ضي مايطفاش بس ..
رضيه : ان شاء الله يارب ..
ومن فوق كانت توليب راقده ومعاها بنتها ..
بس وردة دير فلاتر سناب شات واطلع ف لسانها ..
ضحكت بعد دزت ستريك لصحبتها وصحبتها ضحكت
...
يوم الجمعة ..
سيارات ورا بعضهن اياد شايل امه وخواته ..
وراه طول اشرف ب نسرين وبعدهم ايمن ونرجس ..
واخر سيارة كانو هارون وسحر ..
وقف اياد ع احدى محلات وبعدها اشرف وايمن
سحر : مسكت يد هارون ماتبعزقش فلوسك ..
هارون : كلهم يجيبو ونا نمد وجهي ..
غفران : بابا نبي شوكولاطة وزبادي ..
محمد : ونا برنقلز ..
سحر : لو جابلكم يضطر يجيب لباقي لصغار بابًا ماتجيب
هارون : ماعدلش ونزل ..
ايمن خذا معاه دجاج ومشروب واشرف خذا اجبان وفواكه وهك واياد عصاير وشوكولاطات ومعاه فجر يحط شيبسات خش هارون خذا بشاكيط ومفروم
وطلعو نفخت سحر عليش بس صرف فلوس حوشنا اولى ع اساس عبد الله مستحق ..
هارون : تحشمي ع وجهك راجل عازمنا نخشو نمدو ف وجوهنا سحر قلبت وجهها وتحركو ب سيارات
لمزرعة عبد الله ..
...
زهراء تلبس ف آيآن قلة ادب مانبيش طول لسان مانبيش كنك ساكت انطق ..
باهي باهي تمام ..
وصلن سيارات انفتحت البوابه توماتيكيا
عبدالله رحب بضيوفه رجاله خشو ف مربوعة
وصبايا جوا استلمت رضيه عداله شاهي ..
سفنز وفطاير دايرتهن ياسمين وخبزة تنور رضيه ..
سحر : تشرب ف شاهي سبحان الله ي نرجس من كان يقول نرجس المليانه سمحه اترق هك شكلك مش متريحه تخممي واجد حتى شعرك ضعيف ..
توليب:اصلا كل عارضات الازياء وجميلات ضعيفات
سحر : الوليه المتهنيه ومدلعه تبقى مربربه ..
نرجس : ايمن هكي يحب ..
سحر : مش خايل عليك نصيحتي ردي كولي فكك من رجيم وجهك صايف تقول جايك بعيد عنا الخبيث
رضيه : فال الله ولا فالك كنك قولتك سوده انتي ..
سحر : مش قصدي خايفه عليها بس ي عمتي ..
نسرين: ما تخافي على غالي ..
سحر : مفروض تقسميلها شوي ي نسرين انتي دبه بكل ونرجس ارقيقه بكل ..
وردة : وانتي ماعندكش ذوق بكل ..
سحر : انحرجت وقالت نبصر معاكن ..
في الكوجينه ..
زهراء :حلال فيها طريحه بنعرف شن جابها دراه كبد
نرجس : فوتي ما دوريش كله عشان هارون ..
ياسمين : باهي غريبه ما قلتيش هل راجلك جايين
زهراء : شنو ..
ياسمين : اهم تو وصلو ..
زهراء : كيف هك وطلعت تتأكد ..
نوارة : شن ماتبيش تقوليلنا تفضلو
زهراء : اهلا وسلمت عليها بالخد وهي مصدومه
..
تكلم ب تليفون وهي تبرم ف المزرعة وتضحك
وردة : صفيتت وووه مش مصدقه ..
رنيم : مش قتلك توا تصفيهن عرفتك ..
وردة : صقع عليك ريتيني ونا شاطره ونصفي ..
رنيم : مبروك تخرج عقبال الماستر ..
وردة : الله يبارك فيك قولي عقبال فرحك هرمنا ..
هو واقف يشوفلها وعقلها طاير ع الاخر بيها ..
وردة : تمام تمام صكرت دارت قبضة بيدها يس وتنطرت وتمشي بحركه سريعه جمود هو وخر
عشان ماتشوفش ضحك وقال الله يبارك ..
سمع صوت خوه يصفر مشا ناحيته واقف يتفرج ع ولده حط يده ع كتفه ..
عبد الله : او عبيد شفت الفارس آيآن ..
كان آيآن ماسك زمام وضرب ب كرعيه الاثنين ضرب خفيف الحصان يسرع ف خطواته وشوي شوي يجري
عبد الرحمن : ابنخيي البطل ويصور فيه ..
والبنات من ورا روشن يتفرجن ..
نرجس : ماشاء الله..
ياسمين : الله يبارك ع وليدي
زهراء : تشوفله بفخر
نسرين : تشوف بعيون حاسده ف كل شي ف المزرعة ف لبس ف الاثاث حتى مهارات ولد زهراء
احسن من مهارات عيالها كلهم ..
لكن وردة : عيونها كانو على عم آيآن عليك طرف ..
ملاك ورهف وامنه بنطلعو ..
ياسمين : صقع ي بنات ..
بنطلعو كساد كساد ..
ياسمين : البسن جبوتايتكن
آيآن : يمشي ف يده ع الحصان ..
رهف : كذا خليني نلمسه
غفران : حتى نا
امنه : ونا ونا
بدن يلمسن وهن مبتسمات
ملاك : يععع جسمي شوك ..
بلال : دلوعه انتي ..
ملاك : شقلبت عيونها
بلال : ضحك
ومهاب ركز على خوه وابتسم
والغداء كان شوايات كباب وكبده ولحم وكلاوي
وياسمين دارت رز وردة سلاطات ..
وف العشيه جت صباح معاها كيكه برتقال عيالها لصغار ..
يحيى : شاف لسميه ابتسم وكان متحشم بعض شي
سميه : ما كانت مركزه معاه تلعب مع البنات
وكانت الاجواء عادية وآيآن مزال مش ناسي عركته هو ويحيى ف قعد يفشك ويرفع خشمه كانت مزرعة فيها غابه اشجار وفراولة وورود وحوض سباحه ..
يحيى : الله كان صيف را عمت فيه ..
آيآن : ضحك بسخريه على اساس تعرف انت هذ ماتشوف فيه الا ف تلفزيون ..
البنات ضحكن مع آيآن ..
يحيى : صقع عليك نعرف بعدين شفته ف فندث الؤلؤة ف درنة ..
آيآن : هذ حد عزاك شفته ففندق باهي كذا ورينا كان تعرف تعوم ودفه طاح يحيى ف المسبح وقعد
آيآن واللي معاه كلهم يضحكو وسميه تضحك بدموعها كيف قاعد يغرق ..
ياسمين : نهار اسود ..
وردة : حي ي زهراء ولدك طيح يحيى ف المسبح
زهراء : ناضت وجهها احمرر وهي عزمت خالتها تراضيها ع مواقفها سخيفه يصير هكي ..
وناض عبد الرحمن يجري طلع يحيى من مسبح
وردة : عليك شخصية ..
ياسمين : الحمدلله ياربي
ناض يحيى تعبان ومجمد حطو منشف ع كتوفه
عبد الله : من دار فيك هك
يحيى ساكت
عبد الله : تكلم
طلعت زهراء آيآن ..
آيآن انصدم ف امه وعبد الله يقدم يضربه كف قدامهم كلهم ياسمين حطت يدها ع قلبها
امشي اركب دارك معش توريني وجهك
الموقف وقتها برد على قلبي وزهراء غيرت دبشي
وكملت لعب عادي ماعدا ملاك خذت موقف عشان آيآن وكرهتني من وقتها ..
.. طلعن وردة وزهراء يتمشن ..
زهراء ؛ الف مبروك عقبالي يارب ..
وردة : خلاص سمستر وتكملي انتي ..
زهراء : يارب نجيب معدل كويس ..
وردة : تس
زهراء:كنك زعلانه كان نزغرت اللي افتكيت من قراية 
وردة : كساد نفكر هاه تخرجت بعدها مافيش شغل ولا تعيين ..
زهراء : مررت نظرها شافت عبد الرحمن يدخن ابتسمت عبيده ..
وردة : اس انتي عليش تعيطي لراجل ..
عبد الرحمن : مرت خوي شن الوضع ..
زهراء : هذي وردة اختي لصغيرة بينا سنة بس را ..
ضحك عبد الرحمن : ربي يحفظكن ..
زهراء : تخرجت من كلية لغات تخصص انجلش
عبد الرحمن : مبروك مبروك ..
زهراء : لو مافيهاش احراج تحصلللها خدمة تناسب شهادة ..
حك لحيته وقال تكرمي مرت خوي ..
زهراء : راك تنسى ..
عبد الرحمن : مستحيل ومشا ..
وردة ضربتها : نقنك سامطه عليك احراج ..
زهراء ضحكت : شن فيها ..
..
ملاك : اصلا هو بارد شن جابه ..
آيآن قارن حواجبه رد بالك تحكي معاه ولا تقوليله خير
ملاك : مستحيل
آيآن : نفكر نطفشه بكللل
ملاك : ونا معاك
آيآن : هز راسه ب وعيد
..
نسرين : فجر احن واحد ف خوتي وين يخش علي مايخلي مايجيب ..
رضيه : فعلا فجر اللي ف جيبه مش له نجيه ياربي
سحر : ماسكه تليفونها وتقلب فيه وهي تسمع فيهن
ياسمين : خوتي كلهم خير وبركه ربي يحفظهم
وردة : بس اللي يجوز خلاص يبقى خو مرته
شافتلها سحر بحده وردت نوارة صدقتي حسبي الله ونعم الوكيل في الثعالب اللي يفرقن بين اوليد وامه
والاخ واخته ..
كلهم شافو لزهراء وجهها قعد احمر وسحر ابتسمت بتشفي فيهن ..
وروح كل حد لحوشه ..
سحر : وهي خاشه لسريرها سمعت شن قالن امك وخواتك ..
هارون : وانتي عليش تسجليلهن ..
سحر : عشان تصدق محد يحبك زيي كلهن فجر حنون فجر كريم محد ذكرك بكلمة ..
هارون : خش لسرير وقلبه امتلى على هله بس مبينش اخر مره تسجلي فكيني منهن حركات هذين
سحر : اسفه حبيبي بس نا عشان مصلحتك نوريك صاحبك من عدوك ..
..
نرجس : تلاجه فاضيه ..
ايمن : شهر اللي فات عبيناها ..
نرجس : كيف شهر اللي فات قلتها بروحك ..
ايمن : نرجس ماتنفخيهنش ..
نرجس : شن اللي ماننفخش هذي مش عيشه را ..
ايمن : شافلها
نرجس : ولدك دون عن العيال كلهم لبسه عادي حوشنا انت شفت استراحه اختي كيف نحنا حوشنا
شوف خادمه صيانه عطيبه من ثاني سنة ركباته رطوبه وحالته حاله تقول بناء من ثمانينات را زامطه وساكته ..
ايمن : اففف منكده را ..
نرجس : انا نحكي ف واقع عندك فلوس ورث طلعن كنك هكي تعبت من ه العيشة
ايمن : وانتي ي دكتورة خيرك م طلعي معاشك
نرجس : معاشي قلت ماشي بين تحضير وبين مسؤوليات حوش والاثاث ي استاذ ع اساس خذيتكم ناس فلوس وعز طلعتو وهم ..
ايمن : ضمي فمك ..
سمعت عياط ولدها سيباته وخشت لولدها ..
ايمن طلع وسيب الحوش نكد نكد ..
...
ياسمين : كسد الحوش بعد مشت نرجس ..
توليب : نحنا مش عاجبينك ..
ياسمين : مش هك بس لما نبقو ملتمين كلنا وهي بذات تجي بعد وين وين ..
توليب : تعرفن لما نفكر ف كلام سحر يطلع منطقي
وردة : كلام شنو ه المعفنه ماتعرف تقول كلمة صح
توليب : على نرجس وضعها مش عاجبني حتى نا
ياسمين : ماحسيتش شكلها متريحه
وردة : اكيد متريحه من يصحلها تعيش ف طرابلس وحوش بروحها وزيطه ..
توليب : ربي يسعدها
ياسمين : امين يارب
وردة : كساد بكلل وضي طافي باهي ي فجر شيلنا لزهراء ..
فجر : مش براده يومك وثانيك ماشين لها ..
وردة : شن فيها كساد بكلل ..
رضيه : ريحي عظامك ..
وردة : كلي نا بنمشي بنحضر مسلسلات
فجر : مرات تبقى مش قاعده
وردة ؛ لا حكيت معاها ع الفايبر قالت قاعده
توليب : صار مخططه
وردة : رفعت حواجبها ومشت تجري تلبس ..
زهراء : حطت مق نسكافي وين امي والبنات ..
وردة : متحشمين مابوش
زهراء : عليك طروح ..
وردة : وين ولدك ..
زهراء : يعلق ف خشمه من يوم مزرعة ..
وردة : شكله قلبه اسود
زهراء : مطت شواربها للاسفل
وردة : اسمعي اعلقيلنا تلفزيون ع نت را ضاربني كساد حطي افلام جدد مسلسلات جديده ع شن تفرجي انتي
زهراء : مانبحت ف تلفزيون بكلل ..
وردة : مالا شن ديري ..
زهراء : نروح من جامعة تعبانه نرقد ولو وعيت نشوف آيآن بيش يقرا متعب الخدم واي مربية
تجي يطفشها قليل ادب وكان عبد الله حن علينا ياخذنا كافيهات مطاعم وهك ..
وردة : ماشاء الله..
زهراء : ان شاء الله تحصلي كيفه ..
وردة : ان شاء الله خطرها معش حكيتي مع خوه شن صار ف شغلي ..
زهراء : نسيت عمتي عندها فرح اليوم هي والبنات نكلمه يجي يتعشى وبالمره نذكره بيكي ..
وردة : تمام
زهراء ابتسمت كنك فرحانه هك ..
وردة:عليش لا قصدي طبيعي بنفرح ما نحصل شغل
زهراء : اممم
وردة وجهها انحمر وزهراء ضحكت وردة خلاص ..
..
توليب : شنو العشاء ..
ياسمين : رز جاري ..
توليب : كان جا ضي بيش تقري ملاك عندها امتحان
فجر : وكنك ماتقريها انتي ..
توليب ماردتش عليه ..
فجر : نحكي معاك بنتك لازم تحس ان عندها ام ساد فقدها لبوها ..
ياسمين : تشوفلهم وهي ساكته
توليب : ومن اللي قتل بوها ..
فجر : ايش قصدك
توليب : مش انت من ثوار مش انت من اللي فجرو رتل العز مش قلت الله واكبر لما طاح النظام هااه
فجر : انتي شن تقولي
توليب : اسكت ي جرذ انت مش بس يتمت ملاك انت يتمت شعب ليبي كله ف رقبتك نا عمري ف حياتي ما هنسامحك ولا نسامح اي حد وقف ضد نظام
رضيه : كنك تعيطي وطي حسك
ملاك : خالو قتل بابا
توليب : رد على بنت اختك رد وبدت تضرب فيه ع صدره وهم كلهم منصدمين ف ردة فعل توليب اللي طلعت بعد 3 سنين كانت تبكي بحرقه الله لا يسامحك الله لا يسامحكم بس رضيه ضربتها كف
توليب يدها ع خدها وتشوف ل امها بحده
رضيه : مانسمحش لحد يتهم عيالي راجلك هو اللي صبا مع الغلط ولدي ما قتلش ماتتهميش وخلاص يعني مقعدينك عندنا ومتحملينك عشان تعزقي بلاك علينا
ياسمين : امي
رضيه : اسكتي انتي
توليب : شافتلهم ببرود والله ما قعدتها هنا
رضيه : توليب
توليب : مشت خذت بنتها وركبت فوق
..
زهراء : كبه ورز بالخلطة ومحشي ..
فخرية : تمام
فتحية : اي طلبات اخرى
زهراء : شوفن شغلكن ومشت طلعت من كوجينه
وردة : ضحكت ي قوية انتي
زهراء : مايبنش حد ساكت ضروري من قنطة شوي
وردة : هذ صوت آيآن شكله يخبط ف حاجه
زهراء : نمشي نشوفه شن يدير ..
آيآن : مولع اغاني ع الاخير ويخبط ف البوكس
زهراء : شافتله طفت منظومة الاغاني
آيآن : شافلها
زهراء : انت امتى بتعقل فهمني بس امتى
آيآن : قارن حواجبه
زهراء : اقعد ع واجباتك مستواك زي زفت بادي
آيآن : انا نكرهك مانحبكش
زهراء : اخر همي وطلعت وسيباته
قعمز ع سرير وهو غاضب ..
..
خش يحيى لحوش كان ضي طافي وهي بس قاعده
ف صاله قعمز عند كرعيها وقال امي عليش اصحابي كلهم عندهم ابهات ونا بس ماعنديش نشوف اصحابي يطلعو من مدرسة يمشو مع باتهم
ونا ماعنديش ليش شوي شوي بدا يبكي وامي اطبطب عليه خلاص ي امي الله غالب هذ قدرك
وهي بروحها بكت معاه لعند رقد ..
سنة 2014 كان سنة كئيبه وتذكرك ب اي شي سيء ف الحياة توليب نازله بشنطتها ومعاها بنتها تبكي
رضيه : ردي لدارك ..
توليب : حوش مش لاقيه قدري فيه مانقعده دقيقه
رضيه : قدرك واضح قدرك عند هل دارك اللي ماعبروك ولا دوروك لا انتي لا بنتك نحنا عانينك
توليب : بارك الله فيكم كثر خيركم
رضيه : انتي عارفه غضبي ماتخليني نغضب عليك
توليب بحده : طزززززززز
ياسمين حطت يدها ع فمها ..
رضيه : عينها رجفت لي نا كلمة هذي
توليب مزالت تشوفلها بحده
رضيه : تربحي توكلي لكن بنتك اللي حذاك ترده لك
فجر : وين ماشيه هذ
توليب : خطاااني مدخلكش وطلعت صكرت باب وراها
رضيه : التفت لبنتها حطي عشاء لخوتك نا نبي نرقد
ياسمين : ام وتشوف ل امها تركب لدارها مشت لكوجينه حطت يدها ع جبهتها وبدت تبكي ..
..
حطو العشاء لعبد الله وعبد الرحمن ..
وزهراء وردة تعشن ف صالة وردة كملتها من مسلسل لمسلسل من فيلم لفيلم وطلعت زهراء
تحكي مع عبد الله وردة مزال ماشبعت مشت لكوجينه يعطيكم صحه هن ابتسمنلها وهي قالت
سلم يديكن بس مزلت جيعانه را ضحكن وعطنها
وهي تاكل ولأنهن محجبات كلهن في كانو اي راجل
من العيلة يخش لكوجينه عادي وردة تاكل ف سندوتش محشي هك الواحد يشبع انما جو كواشيك مايمشي معاي هي لبستها بسيطه رافعه
شعرها كعكه مبعثره ماليه صوف حمرا وسروال امريكي ازرق غامق فنصت وين شافت واحد يشوف
من برا عند باب قزاز اللي يطلع ع حاجر كوجينه
وهو مبتسم ويدخن ..