ورود سامة

Part 35

ورود سامة
بقلم يحيى ادريس
‏35 part

يوم الخميس ..

خش محمد شاف امنه وغفران يلعبن مدلهن شوكولاطات امنه ابتسمت وقالت شكرا ..
غفران : شافتله وقالت مش ماما قالت متعطيش حد الا اختك
محمد : اسكتي عيب
غفران : عقدت حواجبها نمشي لماما تفتحها لي
امنه : جت بتمشي
محمد : هاتي نفتحها لك
شافتله بعدين مدتها له وجت غفران تقول هي نلعبو
امنه هي وهو ابتسم ومشا ركب لشقتهم هذ كله على عيون ياسمين تشوفلهم من روشن ب ابتسامه
نسرين : حكتلي امي ع الغداء ..
ياسمين : وووه اسكتي را تبي تجي بعدين تسلس هي
نسرين : وعليش
ياسمين : تقصقص في ع البنات شكلها تبي تعرف
نسرين : مش طايقه نشوف زومتها
ياسمين : تحمليها ه الكم ساعه
نسرين : مفروض لما نحنا نجو تلزم شقتها
ياسمين : الله غالب
زهراء : خيررر
ياسمين : خير ومرحبا امتى جيتي
زهراء : توا توا امي وين
ياسمين : مقيله ف دار مقعد
زهراء : شنجوكن
نسرين : تمام شخبارك انتي
زهراء : تمام
نسرين : شنو جو غداك امس
زهراء : جوني هاربين وضحكت
نسرين : فاشلين ما يجوني بكل
ياسمين : تضحك مايبوش يتعبوك عارفين زهراء عندها خدم ..
نسرين : هابا عليهم
ياسمين : مررت نظرها كان محمد واقف ع امنه ويلعب فيها ف بشكليطه ضحكت ي والله عليك احميدا
نسرين : شافت كنه ..
ياسمين : شكلها امونه هتبقى عميمتها سحر
ضحكت زهراء بصدمه ونسرين قالت بعيد سووو ووه
ياسمين : كنه حرام عليك احميدا يجنن هو في كيفه
نسرين : امه سحر
خشت سحر عليهم وكنها سحر قالتها بصاره ..
نسرين : قلت محمد يشبه ل امه ..
سحر : بالعكس يجيب من هارون اكثر
ياسمين : لا اسمحيلي هارون ما جاباته جيابه
سحر : حتى حمادي ما جاباته جيابه
زهراء : تضحك حتى ايوني
نسرين : حتى عويلتي
سحر ضحكت وسلمت عليهن طقان باليد شخباركن
..
بلال : صدق الله العظيم ..
الشيخ احسنت ي ابني رعاك الله ..
بلال ابتسم : شنو ي شيخي
الشيخ والله انت الشيخ ماشاء الله عليك
بلال : بارك الله فيك
الشيخ :سنتين وهتاخذ مكاني
بلال : مزال ياما تبيلي
الشيخ : شاف لباقي شباب نبيكم تكونو كيف بلال
بلال فرحان بالكلام اللي يسمع فيه وعكسه تماما خوه اللي فرح انه هله طلعو ومولع سبسي وافلام غير اخلاقيه وعايش حياته ع الاخير وين الاب الاب
الصبح بين جامعة والمستشفيات ومن العشية لليل
يشيل ف اثاث واصل ف وحده من عمارات يشيل ف صالون لشقة ف دور سابع وبالطرف يشيل ومرات يشيل ف طاولات ولو كمل يخدم تاكسي ع سيارة
وهكذا الحياة عشان يجيب طلبات نسرين اللي
مايكملنش ..
..
آيآن : وين مهاب وبلال ..
نسرين : بلال ف قرآنية ومهاب ف حوش خلاص شبوب توا ..
ياسمين : ابتسمت ربي يحفظهم ويبارك فيهم
سحر : كبرو وحتى اشرف كبر يومتا شفناه نا واختي معرفناش ..
نسرين : ليش وين شفتوه
سحر : مش هو سواق تاكسي
نسرين : انحرجت بذات قدام زهراء امم
سحر : شالنا وقال انه كان يشيل ف اثاث خذينا رقمه عشان اختي تبي حد يشيل اثاث رجاله يدلعو معش يبو يشيلو شي لكن هو ماشاء الله عليه هو عرفنا قال انا نسيب هارون ..
رضيه : وهي دير ف شاهي ع الكانون وانتن تركبن ف تكاسي مع رجاجيل ..
سحر : شن فيها عادي ب احترامنا وهارون يعرف ..
غفران : حي ي امنه باتك سواق عندنا ..
امنه : منعرفش
سحر : لكن حرام من كثرة شغل لين كابر بكل هو مواليد كم
نسرين : تسحن ومضايقه اكبر مني ب 8 سنين
سحر : اممم
ياسمين : صحه له مكافح يقرا ويخدم
سحر : اي والله حتى اختي قالت دومينه يخدم بالحلال نعطيه حقه ب زياده حرام ضغط شغل عليه
نسرين : ع اعصابها وعضت شاربها تحتاني وحركت لسانها تهدئة لاعصابها 
سحر : شخبارك زهيرة
زهراء ابتسمت الحمدلله ..
سحر:شنو مافيش حاجه ع طريق بعد آيآن معش في
زهراء : مش وقته توا ..
سحر : شن اللي مش وقته عايني على روحك بالك عندك مشكلة ولا حاجه
زهراء : لا ماعندي شي بس مانبيش توا مزلت نقرا
سحر : شهادة ف ليبيا تاخذها وتعلقها ف ساس
زهراء : امم
سحر : مش عارفه مفروض اللي تزوج تشقى ب حوشها سوا وليه ولا راجل بس يخطر عليهم لقرايه
سحر : شافت لرهف وووه باهي اللي ماني حامل بنتك كنها ي نسرين قاعده تشبه حنها وضحكت
رضيه : كان ربي ما عطاها كان جت لحنها
سحر : مش قصدي عليك عمتي قصدي على ام اشرف حرام نسرين واشرف ولعيال وامنه اسماح
مسكينه رهف الوحيده طالعه هك ..
زهراء : كنها رهف تجنن ودمها خفيف
رهف شافت لخالتها ب ابتسامه وحتى ياسمين ابتسمت سحر مش قصدي حاجه بس حرام هك
والقعده كلها ع اعصابهم لعند روحت سحر ..
ف الكوجينه ..
خير ي خالتي
ياسمين : بلال بيك نورتنا
بلال : كيف حالك
ياسمين : تمام وين الغيبه
بلال : قاعدين شنو العشاء
ياسمين : رز ومحشي تبي حاجه اخرى
بلال : سلم يديك كل حاجه منك جميل ي جميل
ياسمين بضحكه : هابا عليك
بلال : شخبار خالتي توليب
ياسمين بحزن : علمي علمك
بلال : متعرفيش وين مكانها
ياسمين : لا والله
طلع بلال وتنهدت ياسمين بحزن
وكان آيآن ومحمد وغفران وامنه ورهف دايرين حوش ف المربوعه يعني طراريح زي الحوش وينتطرو جاي وغادي ليش خش فجر هزبهم
لمو مربوعه وقال رقدو كل حد برم وجهه ع اساس راقد وهو ولع بيلين سبورت يتفرج ..
ف الليل ف دار البنات ..
نسرين : تبحت لوجهها عفريتة العدو جمل مايبحت ف عوج رقبته
ياسمين : استغفر الله العظيم خلقة ربي
نسرين : تبكي مافي وحده فيكن سكتتها حتى رهف خلقة ربي ..
ياسمين : عشان هارون مانبوش مشاكل ..
زهراء : تبي مساعده ي نسرين انتي ليش ماقلتيلنا عن ظروفك ..
نسرين : ظروفي ماحد غابي فيهن كان تفهمو راكم بايعين الحوش وقسمتو وكل حد خذا حقه ..
ياسمين : نهارك اسود امي مزالت عايشه ..
نسرين : عايشين حوش سياح نياح ونا ف متبهدله ف الايجارات وتوليب الله اعلم كيف عيشها وحدها لا شغل لا شي ..
ياسمين : متعلقنش اخطاءكن ع شماعه غيركم تنهدت زعما شن صاير فيها ..
زهراء : ماقلتلكنش
ياسمين : شنو
زهراء : يومتا حلمت بيها ..
ياسمين : شنو الحلم
كانت توليب واقفه ف مكان وتمشي شوي شوي تلقى صونيه مليانه رز بالخلطة ولحم وتاكل وتاكل وف الاخير صونيه مافضيتش ونعيطلها نا بعدين هي مشت من باب اخر باب فيه عرم اوكال وهي تمشي
نقولها حتى نا نبي ناكل بناخذ من صونيه وناكل بس ماقدرتش
نسرين : ان شاء الله خير
ياسمين : يارب تكون بخير
..
كان ضي طافي وبنتها راقده وملامح لبكاء على وجهها
وتليفون طافي حذاها مسحت ع شعر بنتها سامحيني ي ماما وباستها بدت تبكي ورقدت حذاها
ملاك : دوب ما فتحت عيونها مصقعه وامها زادت حضنتها واصوات محركات ف شارع برا قالب دنيا
..
الساعة 9 صبح
دايرات فطور ومقعمزات وكل وحده حذاها ولدها وبناتها ماعدا مهاب وبلال فطرو مع اياد وفجر
جا محمد صباح الخير ..
كلهم قالو صباح الخير
رضيه : صباح الخير صباح النور صباح الخبزة ف تنور
زهراء : ابتسمت تعال افطر حمادي
محمد ابتسم : شكرا عمتي ياسمين قالتلك امي نبي سكر
ياسمين : حاضر ي سكر وناضت لكوجينه
نسرين : ماتمشي تاخذ من محل ه الجلده
زهراء : كنك انتي العيل قاعد هنا
ناضت امنه وعطاته كيكه من اللي عطتها لها زهراء
هو ابتسم وخذا منها ضحكت زهراء عليهم ..
نسرين تعالي هنا فرخه امنه ..
امنه مشت تجري ل امها ونسرين قارنه حواجبها
مش ميه مره نقولك حاجتك ماتعطيها بيش تفهمي
رهف شافت لامها بعدين شافت لمحمد كان يشوف لعمته بغضب ورهف قاعده تجمع من امس ..
رضيه  : كنك انتي شن دخل لصغار ..
نسرين : هي اللي بدت من امس
زهراء : بس حرام محمد طيب ومؤدب
ياسمين : دمنا ولحمنا مهما كان ي نسرين
نسرين : وووه شكلها دارتلكم سحر كلكم مش غير هارون
ياسمين : استغفري ربك فكينا من ه كلام
نسرين : لا هكي وهكي ي هبله ي نيه سبب طياح سعدك وتعنيستك ماهو من وراها ورا اختها ي نايضه وصبت وخذت زكريا وخلت امنه ورهف يشوفو لخالتهم 
ياسمين : تشوفلها بصدمه
زهراء : شافت لياسمين كانت قريب تبكي
آيآن : مكلوبه هذي فوتيها ي خالتي
رهف : انت المكلوب احترم نفسك
آيآن : صبا بيضربها
زهراء : آيآن وفنصت فيه مدخلكش
آيآن قرن حواجبه وطلع ..
رضيه : الحمدلله ومسكت سبحه تستغفر
..
غفران : تحط سكر ف شاهي وتغني سكر حلوه دنيا سكر ترا را را 💖 وتضحك وتحرك ف جسمها
...
ومشا الجو لعند الظهر ف هدوء تام وصمت
مليان ب سلبيه وتوتر
كانو الاطفال يلعبو ف الحاجر شافت سحر نازله
من فوق ومعاها بنتها ولدها
رهف : شاطت الكورة بقوة جت ف وجه غفران
بدت تبكي البنت
سحر : عطك ضربه وراس حربه
رهف : امشي ي سحاره ي مخمجه ي بنت المصريه ي **** كلمة مش تمام 
سحر : قارنه حواجبها وتبي ترد ع كلمة اكبر من هذك
بس حصلت كف طرشلها وذنها خشت رهف تجري تبكي وتعيط نسرين : كنك شن في ..
رهف : خالي هارون ضربني
كلهم انصدمو ..
هارون : بنتك مش متربية لو سمعتيها شن قالت كلمة نا راجل نتحشم نقولها مش فرخة تقولها لمرات خالها
سحر : وووك لين جسمي قشعر من الكلمة
وردة : شافتلها برفعة حاجب
سحر : كلمة قهرتني بصراحه
هارون : اسمحيلي يمي يوم جمعة دام لمة بناتك نا وعيلتي نقعدو ف شقتنا خير هي سحر ..
سحر تمسح ف دموع تماسيح مع سلامه عمتي
ومرت الايام بسرعة ..
تخرجت فيهم زهراء من كلية الهندسة ..
عبد الله : مبروك حبيبتي ..
زهراء : الله يبارك فيك ي عيوني  ..
ودار عزومة عشاء كبيرة ...
نسرين : كان جايه لفعه مرت خوك مانقدرش نجي
زهراء : مانيش مكلمتها غير تعالي ..
نسرين : تمام صكرت وطلعت كان راجلها مع بنته
اشرف : شطورة مني
نسرين : اختي زهراء تخرجت
اشرف : ماشاء الله الف مبروك
نسرين : دايرين عشاء ونبي نحضر
اشرف : باهي وتي روحك
نسرين : نبي هدية نشيلها لها
اشرف : انتي عارفه الوضع
نسرين : كنه الوضع تشتغل وعين الله عليك
اشرف : نشتغل عشان نوفر طلباتكم
نسرين : وهذين من ضمن طلبات
اشرف : لا حول ولا قوة الا بالله
نسرين : العلي العظيم
...
توليب واقفه تنظف وتشوف لزبونه مش عاجبها
وصارت لخبطه ف المحل وقعدت توليب نقدر
نساعدكن قالن بهزوه انتي روحي شوفي شغلك ..
توليب : انا نعرف نديرلها زي ماهي تبي
الزبونه ف الاول خافت بس اصرار توليب واسلوبها ف الاقناع انها تقدر وافقت وطلقت توليب عصا المكنسة وبدت تتفنن ف الزبونه اللي كانت خايفه
لمعلمة : شو عم تعملو تاركين هي على زباين
الزبونه واو زي مانبي بزبط صح ..
توليب : شن رايك ..
الزبونه : ربي يحط يديك ف الجنة الله يبارك
توليب : ابتسمت سلمك
والكوافيرة غارت من توليب وتشوفلها بحقد
حتى لمعلمه ابتسمت ب حركة توليب ..
وتوليب فرحانه انها كانت قد الموضوع
..
ياسمين وردة يوتن ف روحهن ..
خشت سحر عليهم السلام عليكم ..
رضيه : وعليكم السلامم ..
طلعن ياسمين وردة شافنها انصدمن ..
سحر : شكلكن طالعات ..
وردة : امم مع الاسف طالعين ..
سحر : عليش مع الاسف حتى نا مكسده نمشي معاكن
ياسمين : زهراء دايرة عزومه للعيلة
سحر : اخس عليك ي سموني ونا برانيه ما نا من العيله
رضيه : هي معانا
سحر : نوتي لعيال ع سريع وركبت
وردة : هذ شن تبي تمشي معانا عليك براده
ياسمين : معلش الله غالب
...
انفتحت البوابه خشت سيارة اشرف درسها ونزلو هو وولاده شباب استقبلهم عبد الله ف المربوعه ونسرين وامنه وزكريا خشو لجهة استقبال فتحت
الخادمه الباب جت زهراء مبتسمه وهي تقول اهلا ..
نسرين : الف مبروك حبيبتي عقبال دكتوراة ..
زهراء : الله يبارك فيك خذت منها هدية ليش تعبتي روحك
نسرين : حاجه بسيطه
زهراء : شخباركم ي سمحين
امنه : تمام
نسرين : من جا
زهراء : مازال ما جا حد
وشووي وتجي سيارة اياد وبعدها هارون وينزلو نفس نظام وه المره اللي فتحت باب زهراء ابتسمت وين
شافت هلها بس انصدمت ف سحر زهراء تعابير وجهها جامده حتى حضنتها سحر تبارك وهي ساكته اكثر ماردت عليهم ب تفضلو وتبلع ف ريقها خشو
ونسرين انصدمت فيها بس متقدرش دير اي لقطة
وتسب ف زهراء لانه فهمتها هذ مش حتجي جت
سحر تسلم ونسرين مدت طروف صوابعها نفس لقطة دارتها مع محمد ومع غفران ب طروف صوابعها وما قالتش حرف قاعده ع اعصابها
وصاله بدت زحمه كل شوي يجي حد من الاقارب
والاحباب طلعت وردة وهي تستقبل ف قريبتهم
لان زهراء لاهيه وجت بتخش شافها عبد الرحمن
ابتسم ورفع يده اللي فيها تليفون تحشمت وخشت
والاجواء كلها تقديم في غاية الفخامه وعشاء فخم
بعد العشاء جا عبد الله نادلها من عند جرس طلعتله نعم
عبد الله : تعالي نبيك ف موضوع
زهراء : شنو
عبد الله خذاها من يدها وقال ل امه ورضيه تعالن لحقنهم والبنات يراقبن طلع بيها لكراج الخلفي
مفخرة 2014 انصدمت وقالت الله والبنات شهقن
وسحر تشوف بحقد وتقول  ريت حظوظ القبايح
زهراء من فرحتها حضنت عبد الله نوارة خزي لا حشم لا جعره اما رضيه مبتسمه عبد الله ف الاول تحشم بعدين ابتسم ..
والبنات يقولن الله ماعدا اثنين نسرين شعور الغيره بدا فيها وسحر اللي حقدها مخليها متمناش لخير لحد
...
نرجس : تخرجت من طب ع اساس بنبقى دكتورة
فوزية : المرا المقومه تبقى ف حويشها على راجلها وصغارها وبتاعينها ..
نرجس : حرام 7 سنين من عمري ع الفاضي ..
فوزية : اللي تبي تخدم ماتزوج ي بنتي ..
نرجس : شافتلها
فوزية : نوضي ديري العشا
نرجس : ناضت دير ف العشاء من فم ساكت
فوزية : تعلي ف الاخبار
ونرجس ف كوجينه حوش هل زوجها مش بس هو تعاني فيه حتى هله وكانت تضطر تساير وتمشي
...