End This War (Alegria Boys #3) (Published under MPress)

Kabanata 6

Kabanata 6

Kiliti

"Ang harsh mo namang magpasalamat." Tumawa siya at nagpatuloy sa paghuhugas ng kanyang sugat.

Matalim ko siyang tiningnan kahit hindi niya naman iyon nakikita.

Lumapit ako sa kanya at tumabi upang makita ng malapitan ang sugat. Napatingin siya sa akin. Ngumisi siya at mas lalo akong sumimangot.

"Akin na nga yan!" Galit kong utas at hinawakan ng marahas ang braso niyang nagdurugo parin.

"Ow!" Reklamo niya.

Pumikit siya sa sakit pero ngumisi din. Kainis, huh! Pasikat ang isang ito. Pacute pa.

"Sorry." Malamig kong sinabi at tiningnang mabuti ang kanyang sugat.

Alam kong nakatitig siya sa akin ngayon pero di ko magawang iangat ang paningin ko para makita siya. Nanatili akong nakatitig sa sugat niya. Mukha namang hindi gaanong malalim iyon pero di pa humuhupa ang pag dugo nito.

"Gagamutin ko na." Sabi ko at bumaling sa kanya.

Nakaangat ang kanyang labi at matama akong tinitingnan. Kung makatingin siya sa akin ay para bang may nakakatawa.

"Dahan-dahan, ah? Hindi naman kaya tuluyan mo ako?" Humalakhak siya.

Inirapan ko siya, "Anong akala mo sakin? Tsss."

Nilagyan ko ng alcohol ang panyo. Habang ginagawa ko iyon ay nakita kong naghubad siya ng t-shirt. Nag igting ang bagang ko at iniwasan ko ang pagtitig sa katawan niya. Pero kahit panay ang iwas ko, nakikita ko sa gilid ng mga mata ko ang nakabalandra niyang biceps. Mabuti na lang at nakatagilid siya kaya hindi ko makita nang lubusan ang buong katawan niya.

Hindi ko naiwasan ang pagtingin sa kanyang braso dahil iyon ang gagamutin ko.

"Ba't ka pa naghubad?" Sabay ismid ko nang nilalagyan ko na ng alcohol ang sugat niya.

"Para mas madaling magamot."

Hindi ako tumitingin sa mukha niya pero alam ko na namang nakangisi siya. Hindi ko alam kung may nakakatawa ba o ano. Habang tumatagal ay mas lalong tumitigas at na define ang muscles niya sa braso sa paningin ko. God, he is hot. Braso niya pa lang ang nakikita ko pero alam ko... Siguro ay hinubog itong katawan niya dito sa bukid. Masyado siyang na expose sa mga gawaing pambukid kaya ganito na lang ang katawan niya kahit kaedad pa lang kami.

Don't get me wrong. Maganda din naman ang katawan ni Clark. Medyo mas payat siya kay Hector ng kaonti. Kontin abs at muscles na nakuha niya sa pag g-gym. Nasa 5'6 ang height ko, kaya hula ko nasa 5'7 o 5'8 si Clark dahil hindi naman kalayuan yung tangkad naming dalawa. Pero itong si Hector, halatang 6 footer. Bakit ko nga ba kinukumpara? Pinilig ko ang ulo ko at nag concentrate sa pag lalagay ng alcohol sa kanyang sugat.

"Ba't ka galit?" Tanong niya.

"Hindi ako galit." Malamig kong sinabi.