#قصص_كهرمانه
#القاضي_والمطلقه
البارت ١٥
......................
اكثر بارت وقصه مؤلمه كتبتها😔
وحيدة انا ياقلبي لوحدي .. ومعي ألمي احتضن بيدي وحدتي والخوف يمزق اعماقي وهدوء الليل يزعجني وغياب الاحبة يتعبني والوقت بتمهله يخنقني والهم بناره يحرقني حزينة انا وحزني يعمق اهاتي ولا احد يشاركني وحدتي وقلبي موطن غربتي واصبحت لي فرحتي كسعادتي او كربتي ولا شيء يسعد مهجتي الا سرور احبتي ضائعة انا عن روحي وضياعي سببا لجروحي هل انا قتلت بيدي سعادة ايامي ام الظروف حطمت اجمل احلامي
اني ضاعه اين انا هل من موطن يرتويني
ام الموت ياخذني وينقذني من ضياعي
ام ابقى على هذا حالي وحيدة ضائعه انا وايامي .....
ضي
اتصل القاضي فرحني بمكالمته
بدون وعي طلبت منا اخابر عمو سامر
يمكن استغليت طيبته وياي
بس ماعندي غيره
الحمد لله من وافق
من اسمع صوته اسمع حنيه
وسداه من عندي وماتوقعت صدك يحقق طلبي
ربع ساعه دك رقم غريب عليه رديت بسرعه
ضي: الو
سامر: ضياوي حبيبتي
ضي: عمو سامر😭 مات بابا عمو
اني وياه ننحب اثنينه بلموبايل
ضي: عمو لازم تطلع
سامر: اششش لاتبجين ولاتحجين شي انتي قويه وتعيشين ديربالج على بيبي ماشي
ضي: بيبي بلمستشفى مااكدر اشوفها
سامر: وين انتي
ضي: بلحله يم امي
سامر: وشلونهم وياج
هوه سألني هذا سؤال وبعد ماتحملت اسكت
ابجي بصوت عالي واصرخ
اصرخ لدرجة بعد ماتنفس من البواجي وكلبي المورم
سامر: ضي كافي الله يخليج ولج عمي اني كلبي خلصان وخايف عليج
ضي: كله بسببي اني وجودي خطأ بهلدنيا
سامر: ضي كل تضحيتي لعيونج لاتخيبين املي بيج
ضي: ياريت مامضحي
سامر: امي شلونها روحيلها ابقي يمها
ضي: يومين واكلهم رجعوني لبغداد بس اريد اوكف على حيلي
سامر: متأذيه اهواي
ضي: مو بكد كلبي المتأذي عليك عمو مشتاقتلك ميته عليك وعلى كعدتنا ولمتنا ليش ليش طلكتني عوفني مثل الجلبه الدنيا تلطش بيه
سامر: كافي ضي راح اروح بعد مااكدر اتحمل احجي وياج
ضي: عمو اني راح اطلعك
سامر: ضي 😡
سكتني وسولف وياي ونهى المكالمه وياي
بقيت ابجي
واتصل القاضي بيه ... بلكوه رديت عليه
فهم جنت ابجي ويه عمو
بقى يسولف ويواسيني ويسألني على اهلي
حتى استحي شأكله كلهم اهلي مابيهم خير
هم مايصدك لو يكول العيب بيه مو بيهم
والقهرني عرفت ليلة رأس السنه واني ماادري
ضي: كل عام وانت بخير سنه سعيده
ضياء: انتي الاسعد يارب
ضي: يارب يخليك لاولادك وتشفى روز من كل مرض يوميه ادعيلها بصلاتي ابد ماانسى وكفاتك ويانه وروز انسانه محترمه تخبل الله يحفظها
ضياء: شلون عرفتي روز هي المريضه
ضي: عرفت
ضياء: فهمت قصدج .. روز تحبج واهواي تسولف بيج
ضي: عمو اسألك سؤال وماتزعل
ضياء: ههخ اسألي
ضي: انتوا بشر مثلنا لو ملائكه .... لو انتوا البشر واحنه الشياطين
ضياء: ههههههه احنه بشر مثلكم بس انتي ملاك شفافه وبعدج ماتعرفين الدنيا زين
ضي: يمكن
ضياء: روحج الملائكه ابد لاتغيريها اكثر شي حبيته بيج روحج وشفافيتج
يا صخام هذا شيحجي
ضي؛ ان شاء الله واسفه عمو على طلبي واشكرك على مساعدتك ومخابرت عمو سامر
ضياء: تدللين واي شي تحتاجين اني حاظر واذا انتي بخير حاولي تزورين بيبيتج
ضي: امي مشغوله وبلكه يومين وياخذوني واتمنى هسه يمها لبيبي قبل باجر
ضياء: باجر الصبح ادزلج حامد وياخذج لبيبيتج ماشي
ضي: لا العفو عمو مااريد اكلفك
ضياء: ماتكلفيني وادزلج السايق ياخذج لبيبيتج
ضي: ماتعرف شكد ترحمني وترأف بحالي من تاخذني الها
ضياء: ضي اني احس بيج مامرتاحه يمهم
ضي: لا الحمد لله زينين
ضياء: ان شاء الله وباجر من تكعدين خابريني حتى ادزه الج ومو تستحين مني
ضي: ان شاء الله
ضياء: يله تصبحين على خير
ضي: اجمعين
سديته ونمت مرتاحه فرحانه راح اعوفهم وارجع لبيبي
بليل واسمع صوتهم رجعوا
بقيت نايمه وبلا عشا
دخلت ماما وحسن شافوني نايمه وطلعوا
الصبح ب٧ كعدت
لميت فراشي بلكوه وعزلته على صفحه
ومنتظره يكعدون حتى ادخل للغرفه الم غراضي
كعدت بيداء قبلهم راحت للحمام
بيداء: ضي ليش كاعده
ضي: منتظرتكم تكعدون اريد ابدل والم غراضي ومااريد ازعجكم وخاف تكعدون
بيداء: وين ترحين
ضي: ارجع لبيبي
بيداء: يا ليش ترجعين لبغداد
ضي: بيبي محتاجتني وعفيه اريد ادخل الم غراضي واخاف هناء تكعد
بيداء: تعاي ادخلي زين ماما تدري
ضي: هسه من تكعد ابلغها
خابرت مارد عليه القاضي
دزيتله رساله
(اني كعدت ابدل )
دزلي رساله
( اي ساعه ونص يمج السايق)
بعدها بيداء دخلتني للغرفه
واخذت غراضي قليله وعلاجاتي ولبست عباتي
وطلعت بيداء صاحت ماما
دخلت ماما للغرفه
امي: وين رايحه ضي مو اليوم ناخذج مو كلتلج يومين واخذج صيري زينه ولاتعاندين
اجه عمو حسن هستوه كاعد
اني ساكته زعلانه عليها ماارد عليها
حسن: ها عمو وين رايحه
ضي: ارجع لبغداد لبيبيتي
حسن: ليش
ضي: محتاجتني وتعبانه مااكدر اعوفها
دموعي نزلت مخنوكه من هلبيت
هناء: اريد انام طفو الضوه واطلعوا بره سولفوا
امي: انجبي ماعندج كل احترام لابوج وامج
هناء: ماما شوفي بيش الساعه ب٩ واحنه ب٤نايمين
حسن: كافي هناء 😡
حسن: ضي خليها باجر اخذج عمو هسه اني تعبان مااكدر اسوق
هناء: والله عمي مدلليها
امي: اكيد ماتروح ماتكدر هسه تسوق ويله ضي ارجعي نامي
ضي: عمو مااكدر هسه اروح لبيبي افهمني مريضه وماتكدر بدوني محتاجتني
حسن: ماشي خلي ابدل ونروح بس بشرط تشوفيها وترجعين وياي بليل
ضي: لا عمو تسلم ارجع نام السايق راح يجي لبيتكم ياخذني
حسن: منو السايق
ضي: صديق عمو ذاك اليوم شفتوا بلمستشفى
حسن: لاعمو شنو تروحين ويه السايق اني اوصلج
امي: شلون تصرفين وحدج
ماارد عليها
حسن: غير تبلغينا ضي لاتزعليني عليج
ضي: عمو سامر بلغني اروح لبيبي والسايق يدزوا الي
حسن: سامر شلون خابرج
ضي: صديقه ساعده وخلاه يخابرني
حسن: هذا شنو يشتغل الرجال
ضي: قاضي
امي:😲
حسن: عرفته شخصيه مهمه
امي: والله مطورين من شوكت سامر وصلاح يعرفون قضاة
باوعتلها بطرف عيني
لميت غراضي وطلعت
بيداء : اني اشيلهن
ضي: علاكه خفيفه
بيداء: اي بس ماتكدرين ايدج محتركه
طلعت من الغرفه
ضي: مع السلامه هناء
هناء: الله وياج
جنت اتمنى عندي اخوات ومااحس بيهن اخواتي
هنيالهن على علاقتهن
كعدت بلصاله
اني: روحي بيداء نامي ماما
بيداء: تروح ضي وارجع انام
ضي: يتأخر ارجعي نامي
حسن: ارجعي نامي بيداء لان بليل ارجع ضي
ضي: لاعمو ابقى يم بيبي
امي: ليش
سكتت مارديت عليها
امي: احجي وياج ماتردين عليه شبيج
حسن: هاي شبيج يمكن مامنتبه عليج
امي: لا منتبه وتغلس😠
ضي: ليش اغلس يعني شفتيني مثلج اغلس ومااعيد بنتي حالها حال بناتي البقيه لو شفتيني اغلس اسمع بنتي تتألم وتبجي واروح انام لو شفتيني اطلع واعوف بنتي المريضه والي تاركتها عمر مااسأل عنها ومن اجتني اعوفها واطلع احتفل برأس السنه ويه عائلتي حتى مااحترمتي مرضي وحزني
امي: ماتوقعت كل هذا بكلبج وحاقده عليه مثل ابوج
ضي: انت وابوي نفس الحقد واخذته منكم
امي: شكد صلفه شلون تجاوزين عليه
حسن: ضي ليش هيج تحجين انتي ماتقبلين تجين تعيشين ويانه امج سوت المستحيل
ضي: يامستحيل امي حتى من اخابرها ماترد عليه اله اتصل على رقم غريب😢 وكل هذا والله مسامحتها واحبها ومازعلانه عليها لان امي😢
حسن: علياء صدك تحجي ضي😡
امي معقوله مجذبه على حسن
بقيت ساكته ورحت للاستقبال كعدت
عفتهم وحدهم
انتظر واسمع حسن يتعارك بلغرفه
كعدوا الكل بلبيت
وشوي واتصل رقم رديت عليه
ضي: الو
حامد: سلام عليكم اني حامد
ضي: اي اهلا
حامد: اني دخلت الحله بس وين بلضبط
ضي: فد لحظه
طلعت لعمو حسن
ضي: عمو هذا السايق بلخط مايندل
اخذ الموبايل ويدلي الرجال يم جامع كله اوكفلي
امي: ليش بلجامع يوكف
حسن: مايندل يدخل بلفروع تعاي ضي اوصلج اله
بدل واخذ مفاتيحه
حسن: يله عمو ضي
سلمت على اكرم بوسته وبيداء
وصلت لماما
حضنتني وكامت تبجي خطيه
شكد حقيره اني فشلتها وعاتبتها يمكن ماتكدر
الظروف منعتها تبتعد عني
حسن: بليل ارجعها لاتبجون وتودعون
ضي: لا عمو ابقى يم بيبي بس ان شاء الله أجي ازوركم بلايام الجايه
بيداء: رقمي عندج ونتخابر ونتراسل وارمشلج كل ساعه
ضي: ان شاء الله
امي: اي شي تحتاجين خابريني يمه وتلكيني يمج
ضي: ان شاء الله
طلعت وصعدت السياره
حسن: عمو خابريني رغم اني مااعوفج واني بمثابة ابوج تخابريني ماشي
ضي: اي
طلع فلوس من جيبه وانطانياهن
كلهن ٢٥ بس ماحسبت شكد
خلاهن بجنطتي بيداء خطيه انطتني جنطتها الي
ولكينا حامد واكف
صعدت وياه وودعني عمو حسن وباسني براسي
لو هوه ابوي اكيد مااتبهذل
صعدت ويه حامد وساكته وهوه هم ساكت
جوعانه ومامتعشيه ولا متريكه
طلعت الفلوس وحسبتهن شفتهن ١٥٠الف
اول مره هلكثر بأيدي فلوس
كعدت افكر شسوي بيهن
ساعه اكول اضمهن للجامعه السنه الجايه
ساعه اكول لا اشتري سرير الي و لبيبي بيهن
ساعه اكول اخلي محامي ثاني غير عمو باسل لعمو سامر
بعدين كلت خلي اصرف بس الفين اشتري غده
بس لازم الي وللسايق يعني ب٥الف
اخسر ٥ تبقى ١٤٥ هم ميخالف
ضي: عمو شوفلنا مطعم بسيط نشتري لفات الي والك نتغده
حامد: ماشي عمي
نزل حامد يشتري غده النا
ويخابر بلموبايل
تأخر عليه واجه بايده علاليك
اكل وعصاير وحلويات
ضي: هاي شنو
حامد: غداج
ضي: عمو شكد سعرهن وشدعوه
حامد: واصل حسابهن
ضي: لا مااقبل تدفعلي فلوس الغده اني ادفعلك
حامد: من عمي ابو ريسان مو مني
خجلت وسكتت وفتحت الاكل واكلت وانطيت لفه لحامد وعصير
لفات ماماكله مثلهن بحياتي
مره نوح اشترالي لفة كص يومين مااكل حتى طعن الكص يبقى بحلكي
مو هذه الفات اكل ومااعرف شنو
وصلنا للمستشفى ونزلني
والعلاليك وياي ووصلني لبيبي
شفت عمتي الجبيره وعمو باسل
طفرت بوجهي
عمتي: شجابج النا مو وليتي يم امج لو ماتحملتج
عمو باسل صيح عليها وسكتها
يخاف من القاضي لان حامد وياي
ضي: بيبي شلونها بعدها بغيبوبه
باسل: لا اليوم كعدت بس ماتكدر تتحرك ولسانها ثكيل تسأل عليج
ضي: بعد روحي يابيبي
دخلت للغرفه وشفت بيبي
بوستها بأيدها ورجلها وبخدودها
خدودها باردات وطريات
ضي: بيبي اكعدي اني ضي اروحلج فدوه
واحضنها وهي نايمه
ضي: افيييييش انتي امي وابوي وكل دنيتي اروح فدوه لعطرج وانفاسج انتي شمعتي ضايعه بدونج يابيبي
كعدت وحلكها اعوج بلكوه تحجي ماتحملت موقفعا
بيبي: ضويتي
ضي: اي ضويتج وعشيرتج وحفيدج
دمعت عينها ومسحت دموعها وابوسها بعيونها
ضي: فدوه لهلدموع
دخل ريسان للغرفه
ريسان: سلام عليكم
باسل: اهلا ريسان
ريسان: هلاو ضي شلونج شهلمفاجئه الحلوه نورتي بغداد
ضي: اشكرك
ريسان: اليوم الحجيه يكولون كعدت فرحت بأخبارها ..
التفت على حامد
ريسان: شعجب هنا حامد
حامد: جبت ضي من الحله
ريسان: ها
عرفت ريسان يوميه يجي للمستشفى وماعايف بيبي
هذوله شنو من بشر شكد طيبين
طلعوا بره الزلم وبقيت اني وعمتي
كاعده يم بيبي وسألتني
بيبي: وين صلاح وسامر
بلكوه تنطق اسمهم
ضي: عمو سامر بلشغل وبابا هم بليل يجون
عمتي: اليوم تطلع امي ودكتور يكول بلغوها وهيه بلمستشفى لاتبلغوها بلبيت وتنصدم
ضي:😡😡😡 هوه شكو حتى نبلغها
بيبي تأشر بلسانها شكو
عمتي تقربت من بيبي وكامت تبجي وحضنتها
بيبي: شكو يمه
عمتي: يمه صلاح مات اخوي راح مات دفناه يايمه فقدنه اخونا
وكامت تبجي وتنعي عمتي ويه بيبي
بيبي دموعها تنزل وتباوعلي
اني واكفه يمهن ووياهن ابجي
وشالي شايلته امسح دموعي
بيبي فجأه كامت تغرغر وتشخر
ضي: بيبي يمه بيبي شبيها
ركضت عليها واصيح بعلو صوتي
ركض دخلوا علينا وصاحوا الدكاتره دخلوا
طلعونا واني ابجي مااقبل اطلع
سحبني عمو باسل
ضي: بيبي لاتركيني بيبي
ونشوفهم يضربوها بصدرها صدمات كهربائيه
ماكو ماتكعد
ضي: شنو معناها ميته صح جابوني عمو معناها ماتت
ريسان وحامد ساكتين وعمتي تبجي
ضي: عمو الله يخليك جاوبني معناها ماتت لو عايشه
ريسان: ان شاء الله دكوم بسلامه ضي اهدئي
ابجي وارجف خايفه لامااريد اخسرها
ضي: اي هيه دكوم بسلامه اليوم نرجع لبيتنا اني وياها
بأيدهم يسوون وماكو فايده
تأخروا وماكو فايده
هدئوا ونسحبوا
ريسان يباوع وفهم السالفه التفت باوعلي
ضي: كملوا كعدت مو
اباوعلهم غطوها
يمه يمه اخذوا روحي من غطوا وجها يعني حياتي انتهت مو حياتها يعني بعد ماكو بيبي ام ضحكه الحلوه والمعدله المرتبه ام سوالف الحلوه
لا لاتموت الله يخليك لايعوفوها خلي يحاولون بعد
ابوس ايدك احجي وياهم
ولازمه ايده واتوسل بي وهوه يهدئني
ركضت عليها اني وعمتي ونبجي عليها
تلطم عمتي واني رفعت غطاها وبأيدي اسويلها اسعافات
ضي: هسه تكعد والله هسه تكعد اكعدي بيبي
وادفع بصدرها بكل قوتي واهز بيها واكعدها
كومتها رفعتها
ضي: بيبي لاتعوفين ضويتج ولج بيبيييييييييييي
يسحبوني ومااقبل اتركها
بلكوه طلعوني من الغرفه الطم وافرفح وابجي
ملخت نفسي فقدت عليها
ضي: بيبي اكعدي ولج بيبي شوفي حالي لاضحكين عليه ولج بيبي شكله لعمو سامر من يسألني عليج اكله ماتت امك شلون بيه بيبي
طلعت بلردهه وكلها تبجي وباسل يخابر وبدوا يجون ازواج عماتي وعماتي واقاربنا
اني بينهم غريبه ومايردوني
كاعده بلكاع ويم باب غرفة بيبي ابجي والطم
عندي امل تكعد ومامصدكه ميته
ريسان: ضي كومي حرام هذا الي اسوي
ضي: ومن عافتني مو حرام من الله اخذها مني مو حرام
ريسان: استغفر الله ضي كومي
وكلها تبجي وتلطم على بيبي
عماتي يغلطون عليه ويعدون ويصفون عليه واني مو بحالهن
رادوا نرجع وماقبلت اله ابقى يمها
خلوها بلتابوت شفتها
ضي: زلكم لاتخلوها طلعوها مابيها شي
ركضت اكعدها وماتكعد
ضي: بيبي بسرعه اكعدي راح يخلوج بلتابوت كومي حبابه الله عليج كومي
اخذوها مني صعدت بسيارتها مااقبل اله بلسياره الي هي بيها
وصلنا للبيت دخلت بي وشفت مكان الحرك
شفت من ضرب بيبي ودفعها وضربها ووكعت
شاورت بيبي
ضي: بيبي اخذيني وياج لاتتأخرين عليه الي راح يصبرني على فراكج تاخذيني وياج انتظرج لاتتاخرين عليه فدوه بيبي سمعتيني توعديني يله اوعديني تاخذيني
كمت واصيح
ضي: بيبي اوعديني مااعوفج اله توعديني اله دكليلي اخذج بيبي اكعدي اوعديني بس طمأنيني
دمعه نزلت من عينها
عمتي: شوف دموع امي هاي عايشه صح
من شفت دموعها كمت من يمها وخفت
ابجي عليها
عمتي الجبيره
عمتي: كله بسببج كتلتي امنا واخونا
وضربني وزلم يفكونهن
دخل ريسان شافني طلعوني بلكراج متملخه وايدي المحروكه حتى دم طلع منها ملتهبه وكلها جراحه
تخربطت بس مااغمى عليه
وابجي
ضي: ها بيبي شفتي بس غمضت عينج محد يريدني مو كتلج لاتعوفيني دكليلي عمج سامر وياج عمي سامر بلسجن وهسه اني وين صفيت بلشارع بيبي شفتي
اخذني ريسان للمستشفى
مااقبل وبلكوه قنعني
ماقبلن عماتي اروح وياهم للنجف
وايدي مجروحه
يداووني وماتألم واكبر واحد مايتحمل ألم تنضيف الجرح والحروق
اجه ضياء للمستشفى وشافني ابجي على بيبيتي
ايدي ملتهبه
نظفوها الي وضربوني ابر
شكلولي كانونه وعلاجات
طلعوني من المستشفى
صعدت ويه ريسان وضياء
ضياء: ضي ترحين ويانه للبيت
ضي: لا اخذوني للنجف لبيبي اريد انام يمها ادفنوني وياها
ساكتين مقهورين عليه
ريسان: ضي ارتاحي بيتنا يم روز وهسه نخابر والدتج تجي تاخذج
ضي: الله يخليكم خلوني احظر فاتحة بيبي
ضياء: ضي ايدج ملتهبه ولازم عنايه وانتي مريضه ومو زين وضعج اذا ماتعتنين بيها تخيس ايدج
ضي: واذا يعني اموت صح لعد خليها
ضياء: لا ماتموتين يكطعوها الج وتبقين بلا ايد ضي كافي اصحي صيري قويه
ضي: عمو سامر بلغتوا
ضياء: بوقت مناسب نبلغه
ابجي على بيبي ووصلنا للبيت
قصر ضخم بيتهم عبالك بكد منطقتنا
نزل ريسان قبل ابوه دخل للبيت
والقاضي نزلني من سياره
طلعت روز وبنيه حلوه تخبل وياها
دخلوني للبيت
روز: تعاي بغرفتي
ضياء: لاتصعدوها ماتكدر
روز: لعد وين ترتاح خطيه
ضياء: دخلوها بغرفتي
رهف ، روز:😲
دخلوني للغرفه وابجي على بيبي روز تحضني وتسكتني
والبنيه الي وياها هم تهدئني
بس مااكدر اسكت ومستحيه منهم
ضي: شوكت تخابرون ماما تجي
روز: رهف شوفي بابا خابر امها
طلعت بره وبقت روز يمها
روز: اصبري وصيري قويه مااكلج اسكتي لا ابجي طلعي الي بداخلج فرغي همومج بس لازم تكونين قويه وضي انتي مريضه وايدج ملتهبه اعتني بنفسج
ضي: لخاطر منو اعتني بنفسي
روز: لخاطر نفسج امنا من فقدناها هم مثلج تعبنه ونبجي ونفرفح بلاخير احنه تعبنا ودموعنا مانشفت وامنا مارجعت ونأذيها بكبرها هسه انتي لازم تدعيلها تترحميله
دخلت رهف
رهف: خابرهم بابا وهم بلطريق
روز: الحمد لله والشكر امج عايشه وان شاء الله تعوضج عن فقدان بيبيتج
رهف: ياعمري انتي
ضربوني ابر بعد مااشوفهم نعست
شي غريب بعز مشاكلي وبلوتي نمت
غفيت بفراش القاضي
نص ساعه وفزيت مخترعه وابجي
وحدي بلغرفه دخلت رهف الي
ضي: الله يخليج خلي اشوف عمي سامر كولي لابوج اشوفه والله اموت اذا مااشوفه
دخل ضياء وريسان
ضياء: ضي مايصير
ضي: ماتحمل اريده هوه الوحيد بقالي بهلدنيا وهوه ماعنده غيري الله يخليك عمو
رهف: بابا حاول خطيه خلي تشوفه
ريسان: حاول هي تبلغه اهون مايسمع من الغريب ووحده المسكين
طلع بره ضياء
مااعرف شسوه وشوي واجه
ضياء: يله ضي تحظري اخذج
البنات انطني ملابس سود وغسللي وجهي ولبست حجابي وطلعت
اخذني ضياء وحامد
الطريق كله اباوع ع طريق وابجي
وصلنا للمركز ونزلت ودخلنا اني وضياء بلغرفه
اجه عمو سامر منتهي شكله بهلخمس ايام اسود شكله ورايح ضعيف ومن حال الى حال
سامر: ضي
شافني عيوني منتهيه من دموع وايدي ملفوفه
ركضت عليه وابجي بواجي
حضنته
ضي: بيبي ماتت امنا راحت عمي مابقى الي احد غيرك
بقينا نبجي اني وياه تخبل خطيه
كام يلطم على راسه
سامر: شسويت ياصلاح بينا
ويدك براسه حيل
خجلانه منه كل الي صار بسببي نهجم البيت
بقى حاضني ونبجي
ماسكتنا اني وياه
سامر: يمه رحتي وماودعتج يمه الغربه يدفنوج مو ابنج تموتين وانتي غريبه يمه ح ادورين على ولدج وماكو احد يمج يايمه اعذريني
بقيت ساعه يمه
ضياء: ضي لازم نطلع مايصير نبقى اكثر
عقلنا وبالنا مو يمه وكومني ضياء
سامر: ضي تعاي
شاورني عمي سامر
ضي: بس عمو مايصير لازم
سامر:😡
حضنته حيل
سامر: اريدج رجال مهما يكون ماتخسرين الي وصيتج عليه لادكولين الوكت او الظروف وتبقين قويه ولاتعبين حاربي الدنيا محارب وعيشي حياتج
ضي: عمو انت ح تطلع صح
سامر: ضي تبقين محافظه على كل اسرارنا لاخر نفس الج اوعديني
ضي: عمو
سامر: اوعدي عمج
هزيت راسي اله
سامر: ضي عمو احبج
وكام يبجي وحضني بصدره خله راسي ويبوس براسي ويبجي
سامر: غصب عني اعوفج سامحيني
طلعنا وابجي على عمي وبيبي
ضياء: ربج يفرجها ضي
رجعوني للبيت واهلي ماكو تأخروا عليه
مستحيه منهم
كاعده بلصاله وانتظرهم
روز: تعاي نامي ارتاحي من يجون كومي
ضي: لا هسه يجون مايتأخرون
رهف: اي بس نامي تمددي كافي تعبتي اليوم وكافي تبجين موزين عليج
ريسان: ضي من صبح بلا اكل
رهف: صدك شلون هيج وانتي تاخذين علاج
كامت تسوي اكل واني كاعده
مااريد اكل واستحي منهم
روز: تعاي أكلي ويانه ونطرد ريسان
ريسان: ليش بله
روز: حتى تاكل براحتها البنيه
ريسان: واني شعليه رجال أملي بطني واكوم
روز: امليها بغرفتك بلمطبخ اله ويانه
ريسان: اني مااعرف اله بهذا الميز اكل
رهف: خليك هنا من عيوني واحنه بلمطبخ ناكل
ريسان: اني مااعوف رهوفه وحدها تاكل
رهف: اكلك لاتخلينا نصيح بابا😡
ريسان: هوه وينه اختفى فجأه
روز: مااعرف منو خابره وطلع بسرعه ودايخ
ريسان: من شوكت
روز: قبل ساعه
ريسان: ب٩ بليل وين راح منو يخابره بليل
اباوع ب٩ لعد وين امي شكد عيب
اخذ الموبايل ريسان وخابر ابوه
شوي وسكت ودخل جوه للغرفه
روز: يله ضي كومي
كمت وياهم ومستحيه بلكوه اكلت لكمه ومااكدر اكل
رهف: هاي شنو ضي تعبت وبلاخير تاكلين بس لكمه
روز: خليها براحتها المهم اكلت وتاخذ علاجها
ضي: موبايلي وين اريد اخابر ماما
رهف: هسه انزل حنطتج فوك غراضج
صعدت ونزلت بايدها الجنطه
دخل ريسان ضايج
اتصل على ماما مغلق جهازها
صارت ب١١ بليل اهلي ماكو ومستحيه
دخل القاضي ضايج مخنوك
روز: وين صرت بابا
ضياء: شلونج ضي
ضي: زينه بس أهلي تأخروا هسه يجون اسفه سلبت راحتكم
رهف: لاتحجين هيج ولاتقلقين الغايب عذره وياه
ضياء: اهلج باجر يجون اتصلوا عليه
ضي: ليش
ضياء: صار عدهم شغله مهمه والصبح يمج
ضي: لعد ودوني لبيت جدو
ريسان: مستحيل
ضي: ماعندي احد غيرهم لعد ودوني لبيت رجاء
روز: منو رجاء
ضي: تحب عمو سامر
روز: ليش شفتينا طارديج
ضياء: ضي اليوم هنا تبقين
ضي: بس
ضياء: ماكو بس
ريسان: حجي
يباوعله وبينهم نظرات
شكل ضياء مخنوك ضايج
ضياء: مااعرف شحجي دايخ
ريسان: استغفر الله اني ماتحمل طالع
ضياء: لا
روز رهف: شكو
ضياء: روز خلي ضي وياج او ويه رهف تنام
رهف: اكيد مانعوفها اثنينا اليوم نام يمها
كعد يمي ضياء
ضياء: ضي اكو خبر يصدمج ومااعرف شلون ابلغج
ضي: اهلي مايردوني صح
ضياء: لا والله
ضي: شنو
ضياء: عمج سامر
ضي: شبي
ضياء: بعد ماطلعنا ماتحمل الصدمه وجلطه بلدماغ
ضي: وهسه وين بلمستشفى
ضياء: انطاج عمره
ضي: يعني شنو
اغمى عليه ماتحمل بعد هذه الصدمات
معقوله بسبب هذا الحادث كلها تموت
اغلى اثنين بحياتي يفارقون الحياة
مستحيل
كعدت لكيت نفسي بلمستشفى
هذه العائله تبهذلت بسببي
ضياء فوك راسي
ماصرخت ولا بجيت ولاسويت أي شي
بقيت ساكته وضياء شكله خايف عليه
ضياء: ضي
ضي: اخذوا لو بعده
ضياء: منو
ضي: راح للنجف دفنوه
شفايفي ترجف واني انطق كلامي
ضياء: مخلي بثلاجه
ضي: بهذه المستشفى
ضياء: اي
ضي: مستعده اخدمك العمر كله بس خليني اشوفه الله يخليك
ضياء: انتي تعبانه وضغطج هابط زين ماصار بيج شي هسه ارتاحي مايصير تشوفينه
كمت لزمت ايده اريد ابوسها
ضي: ابوس ايدك
ضياء: كومي ضي لاهيج تسوين كومي اخذج
اخذني اله
دخلوني للثلاجات ريحه مو طيبه
دخلت وحدي والي بلغرفه وياي
فتح الباب طلع عمو سامر
راسه أزرك ومن أذانه وخشمه طاك دم انفجار صاير براسه
ضي: عمو سامر عمو شوف اني هادئه وساكته مااحجي على كيفي يله كوم تره اليوم عذبتوني انت وبيبي معقوله اثنينكم بنفس اليوم تعوفوني عمو سامر يله كوم بارده كوم نروح ناخذ بيبي ونروح لبيتنا ونتغطه وتشاقه وياي وتبوسني واني استحي منك زين عمو سامر يعني شنو من انت متت حياتي انتهت وياكم
اتلمس بي واخاف اوخر ايدي
ضي: عمو سامر ماتكعد يعني انت وبيبي بنفس اليوم ترضوها ها جاوبني تقبلها 😢
عموووووووووو سامرررر
اغمى عليه بعد ماتحمل الصدمه
عليكم أن تخرجوا رؤوسهم من القبور لتروا ما فعلنا بعدكم ،
لم اتوقع الغياب والفراق معكم كنت اظن تكمل حياتي معكم وليس بدونكم
الموت خوف وغريزه ولكن الان اصبح الموت يخاف مني اوعدكم صأصارع الموت الى ان اخطفه
لا ادع نفسي بدونكم لااكمل مسيرتي
اوعدكم سأتي اليكم
لاتعتقدوا الموت هوه تلفظ انفاسك وتغمض عينيك ويتوقف قلبك عن النبض والروح تخرج من الجسد
انما الموت يتحركون ويتحدثون وياكلون ويضحكون ولكنهم موتى يمارسون الحياة بلا حياة
كيف امارس حياتي والغالي في التراب
فانا في غيابكم عني يسمى الموت بحد ذاته
وداعا يااعز الناس
وفي حفظ الله ورعايته استودعكم يااغلى من روحي
عمي وجدتي
وللحكايا بقايا
