Dear Doctor Handsome [ Unicode + ZawGyi ]

Chapter ( 27 ) အဆက် *30 အဆက်

“ ဆေးရုံအုပ်ကြီးကပြောတယ်။
မောင်ဟာ အတိတ်ကို ပြန်မှတ်မိရင်လဲ မှတ်မိမယ်။
မမှတ်မိရင်လဲနေမယ် ။ ဘယ်အခြေအနေမဆို
ဖြစ်နိုင်တယ် တဲ့ သက်ရယ် ”

ဒီတစ်ခေါက် သူမ မောင့်ဆီသို့ရောက်လာသောအခါ မောင်က စိတ်ညစ်ညူးစွာ ခပ်ဆွေးဆွေးကလေးပြောပြနေခဲ့သည်။ အဲသည်အတိတ်တွေကို တစ်သက်လုံးသာမေ့နေ
လိုက်တော့မောင်။ သူမသည် မောင့်ကို စိတ်လိုက်ရ ပြုံးပြလျက် မောင့်လက်ကိုဆုပ်ကိုင်ကာ အားပေးနှစ်သိမ့်လိုက်၏။

“ စိတ်မပူပါနဲ့ မောင်ရာ။ မောင် မမှတ်မိတော့ရော
ဘာဖြစ်သေးလဲ၊ သက်က အေးအေးဆေးဆေး
ပြောပြပေးပါ့မယ်နော် ”

“ အဖြစ်အပျက်တွေ၊ လူတွေကတော့ သိပ်အရေးမကြီးပါဘူး သက်ရယ်၊ နောက်တော့လည်း ပြန်လည်ခင်မင်ရင်းနှီးသွားကြမှာပဲ၊
အခု မောင် ယူကျုံးမရဖြစ်နေမိတာက
ဆေးပညာနဲ့ ပက်သက်ပြီးလည်း မောင် ဘာဆိုဘာမှကို မမှတ်မိတော့တာပဲ။
မောင် ကိုယ့်ကိုယ်ကိုယ် သိတယ်။
ဘွဲ့ရပြီးကတည်းက အခုအချိန်အထိဆိုရင် မောင် လေ့လာခဲ့ရတဲ့ ဆေးပညာရပ်တွေ နည်းမှာမဟုတ်ဘူး။ မောင် အားလုံးကို အစကနေပြန်စရမဲ့ ကျောင်းသားလေးတစ်ယောက်ဖြစ်သွားပြီ ”

သူမ စိတ်မကောင်းဖြစ်သွားကာ မောင့်ပခုံးကို အသာအယာ ဆုပ်ကိုင်ဖျစ်ညှစ်လိုက်၏။

“ ဆေးပညာနဲ့ ပက်သက်ရင် မောင်ပြန်သင်ပေါ့လေနော်။သက်လဲ ဘေးကနေအစွမ်းကုန်ကူညီပေးမယ် ”

မောင်က ခပ်ရိပ်ရိပ်ပြုံး၍ အသိအမှတ်ပြုစွာ ခေါင်းညိတ်ပြသည်။ ထို့နောက် အဆက်အစပ်မရှိ ရုတ်တရက် ထမေးလာသည်။

“ စိုင်းမင်းခန့် ဆိုတဲ့ ကောင်လေးနဲ့ပက်သက်ပြီး
သက် ဘယ်လောက်ထိ သိထားလဲ။
မောင်နဲ့ အဲကောင်လေးနဲ့က
အရမ်းရင်းနှီးကြလား ”

မောင့်အတွက် ပျားလိမ္မော်သီးအခွံခွာပေးလျက်ရှိသော သူမ လက်တွေ တုန့်ခနဲ ရပ်သွားသည်။ သူမ မောင့်ကို ဖျပ်ခနဲ မော့ကြည့်ကာ မောင့်မျက်နှာကို အကဲခတ်နေမိသည်။

“ သူက မောင့်ကို ဘာတွေ ပြောသွားတာလဲ ”

“ ဘာမှမပြောပါဘူး။ အဲကလေးက
မောင့်ဆီခဏ ခဏလာနေတော့ တော်တော်များ
ရင်းနှီးလားလို့ပါ ”